Ekalen La na Dios so Amin ya Paniirap
“Anggad kapigan, O Jehova, so ikerew koy tulong, anta agmo ak met lanlamang dengelen? Anggad kapigan so ikerew koy tulong lapud inkaruksa, anta agka met lanlamang onsalet?” (Habacuc 1:2, 3) Say angibaga ed saya et si Habacuc, maong a too ya aabobonan na Dios. Kasin ipapanengneng na satan ya kulang so pananisia to? Andi! Impaseguro na Dios ed si Habacuc ya walay tinuro Ton panaon pian ekalen so paniirap.—Habacuc 2:2, 3.
No sikan mismo odino sakey ya maapit ed sika so maniirap, mainomay mon isipen ya matantan ya onkiwas so Dios, tan kinmiwas la komon. Balet oniay ipapaseguro na Biblia: “Si Jehova et aliwan matantan nipaakar ed sipan to, a singa iisipen na arum a totoo, noagta sikatoy maan-anos ed sikayo ta agto labay a walay siopaman a naderal noagta labay to ya amin et naikday pankanawnawan magbabawi.”—2 Pedro 3:9.
KAPIGAN ONKIWAS SO DIOS?
Magano la! Impaamta nen Jesus ya walay espisipikon henerasyon ya makaimaton ed nikadkaduma tan nanduruman nagawa ya tanda na kaunoran iran agew na “sistema na mundo.” (Mateo 24:3-42) Lapud nasusumpal la natan itan ya propesiya nen Jesus, mapatnag ya magano lan onkiwas so Dios. *
Pero panon ya ekalen na Dios so amin ya paniirap? Nen wadiad dalin si Jesus, impanengneng toy pakapanyari na Dios ya panampoten so amin ya paniirap na totoo. Imanoen so pigaran alimbawa.
Kalamidad: Nen manbiabiahe ed Dayat na Galilea si Jesus tan saray apostol to, walay maksil a bagyo tan ngalngali la onlereg so baloto da. Balet impanengneng nen Jesus ya sarag to tan na Ama to ya kontrolen so kalikasan. (Colosas 1:15, 16) Say imbaga labat nen Jesus: “Tunda ka! Deen ka!” Antoy agawa? “Kinmepa so dagem, tan nagmaliw a marendeen.”—Marcos 4:35-39.
Sakit: Kabkabat ya sarasarag nen Jesus ya paabigen iray bulag tan piley, pati saray dumurulot, akating, odino anggan anton sakit. “Pinaabig ton amin iray maniirap.”—Mateo 4:23, 24; 8:16; 11:2-5.
Eras: Inusar nen Jesus so pakapanyarin inter ed sikato nen Ama to pian parakelen so daiset a naakan. Legan na ministeryo to, amiduan amakan na nilibon totoo.—Mateo 14:14-21; 15:32-38.
Patey: Say pakapanyari nen Jehova ya bilayen iray inaatey et malinew ya apruebaan na taloran impamaoli ya ginawa nen Jesus. Say sakey ed saramay pinaoli to et apatiran agew lan inatey.—Marcos 5:35-42; Lucas 7:11-16; Juan 11:3-44.
^ par. 5 Parad kaaruman ya impormasyon nipaakar ed kaunoran iran agew, nengnengen so leksion 32 na libron Panliketan so Bilay ya Anggapoy Anggaan! ya im-publish na Saray Tasi nen Jehova tan nayarin i-download ya libre diad www.pr418.com/pag.
Ompan Nagustoan Mo Met
SAY PANAG-BANTAYAN
Nagunggonaan Kad Panangiyansakit na Dios
Say Kasulatan et ontulong pian ombiskeg so pananisia tayo ed saray impromisa nen Jehova ya nagawad arapen.
SAY PANAG-BANTAYAN—PANARALAN YA EDISYON
