“Te ki tempu, o SEÑOR, lo mi sklama pa yudansa, i abo no ta tende? Mi ta sklama na bo: ‘Violensia!’ Tòg bo no ta salba.” (Habakuk 1:2, 3) Esaki ta palabranan di Habakuk. E tabata un bon hende ku tabatin Dios su aprobashon. Pero lokual ku el a pidi ta indiká ku e no tabata konfia den Dios? Klaru ku nò! En realidat, Dios a sigurá Habakuk ku el a pone un dia pa kaba ku sufrimentu.—Habakuk 2:2, 3.

Ora abo òf un hende ku bo ta stima ta sufriendo, ta fásil pa konkluí ku Dios a tarda i ku e mester a hasi algu kaba. Sinembargo, Beibel ta sigurá nos: “Yehova no ta tarda pa kumpli ku su promesa, manera algun hende ta kere; mas bien, e tin pasenshi ku boso pasobra e no ta deseá pa ningun hende ser destruí, ma e ta deseá pa tur haña chèns di arepentí.”—2 Pedro 3:9.

Dios lo tuma akshon pronto. Hesus a profetisá ku un generashon spesífiko lo mira un kombinashon di suseso ku ta karakterisá e último dianan di “e era akí.” (Mateo 24:3-42) E profesianan akí ta kumpliendo den nos tempu, lokual ta indiká ku pronto Dios lo intervení den asuntunan humano. *

Pero Dios por pone fin na tur sufrimentu? Ora Hesus tabata riba tera, el a demostrá ku Dios por kita sufrimentu di hende. Laga nos wak algun ehèmpel.

Desaster Natural: Un biaha ora Hesus i su disipelnan tabata nabegá den Laman di Galilea, un bientu fuerte a lanta i a hera di senk nan boto. Pero Hesus a mustra ku e ku su Tata por kontrolá forsa di naturalesa. (Kolosensenan 1:15, 16) Hesus a djis bisa: “Silensio! Keda ketu!” E resultado tabata inkreibel: “Bientu a baha i a kalma kompletamente.”—Marko 4:35-39.

Malesa: Hopi hende tabata sa ku Hesus por kura hende siegu, lam, esnan ku tin epilepsia, lepra i kualke otro enfermedat. El “a kura tur ku tabata malu.”—Mateo 4:23, 24; 8:16; 11:2-5.

Hamber: Durante su ministerio, dos biaha Hesus a usa e poder ku su Tata a dun’é pa multipliká un tiki kuminda pa míles di hende por a kome.—Mateo 14:14-21; 15:32-38.

Morto: Ora Hesus tabata riba tera, el a resusitá tres hende, un di nan tabatin kuater dia morto. Esei ta duna prueba ku Yehova por resusitá hende morto.—Marko 5:35-42; Lukas 7:11-16; Huan 11:3-44.