“HAR, woo lang saul ekj roopen no diene Help, un du horchst doa nich no? Woo lang saul ekj schrieen, ‘De Jewault haft de äwahaunt!’ un du kjemst nich halpen?” (Habakuk 1:2-3). Dit es, waut Habakuk säd, een gooda Maun, waut Gott sienen Jefaulen haud. Weesen dise Froagen, daut am daut aun Gloowen fäld? Oba nä! Gott vesechad Habakuk, daut hee wudd to siene Tiet met daut Lieden een Enj moaken (Habakuk 2:2-3).

Wan du lieden motst ooda wäa, dän du väl räakjenst, dan kaun sikj daut soo feelen, Gott wacht väl too lang un haud aul lang ea sult waut doonen. Oba de Bibel sajcht: “De Har vetrakjt sien Vespräakjen nich too lang, soo aus eenje meenen. Hee haft bloos Jedult met junt, wiels hee well, daut aulemaun sikj oppmoaken saul, un daut kjeena veloaren jeit” (2. Petrus 3:9).

Sea boolt! Jesus säd verut, daut Menschen von eene jewesse Jennerazion de latste Tiet beläwen wudden, un daut wie aun veschiedne Tieekjens seenen wudden, “daut dise Tiet aufschluten woat” (Matäus 24:3-42). Wie seenen nu, daut Jesus siene Profezeiunk sikj erfelt, un daut wiest ons, daut Gott boolt hia oppe Ieed met daut Lieden een Enj moaken woat. *

Oba woo woat Gott daut doonen? Aus Jesus oppe Ieed wia, wees hee, daut Gott de Macht haft, de Menschen äa Lieden leichta to moaken. See wie mol waut Biespels.

Owwadasch: Aus Jesus un siene Apostel met een Boot opp daut Galiläische Mäa fuaren, kjeem een stoakja Wintstorm opp, soo daut see Angst hauden, daut see wudden unjagonen. Oba Jesus wees, daut hee un sien Voda de Macht haben äwa de Natua (Kolossa 1:15-16). Jesus säd bloos: “Sie stell, beruij die!” Un waut deed daut? “De Wint läd sich, un daut wort sea stell” (Markus 4:35-39, JHF).

Krankheiten: Jesus wia doafäa bekaunt, daut hee emstaunt wia, Blinje un Lome to heelen un uk dee waut Aunstoot, Lepra ooda sestwaut hauden. Hee “muak aul äare kranke jesunt” (Matäus 4:23-24; 8:16; 11:2-5; von ons schroz jemoakt).

Hunga: Jesus kjrieech von sienen Voda de Macht, von een kjlienet bät Äten een deel to moaken. De Bibel rät twee Mol doavon, daut Jesus dusende Menschen Äten jeef, aus hee hia oppe Ieed wia (Matäus 14:14-21; 15:32-38).

Doot: Daut es gaunz kloa to seenen, daut Jehova de Macht haft dän Doot äwatsied to schaufen. En de Schreft rät daut von dree Mol, daut Jesus wäm vom Doot oppwuak. Eenen, waut hee trigj toom Läwen brocht, wia aul vea Doag doot (Markus 5:35-42; Lukas 7:11-16; Johanes 11:3-44).