Taita Diosta ali sirvij Habacuc runaguca nircami: ‘Mandaj Dioslla ¿ima punllacamanda caparishpa mañajujpipash, na uyagrihuangui? Ninandapacha llaquichishcamanda caparishpa villajujpipash ¿ima punllacamanda na quishpichigrihuangui?’ nishpa (Habacuc 1:2, 3). ¿Taita Diospi na confiaimandachu shina nirca? Na. Habacucca Taita Diospi confiarcami. Chaimi Taita Diosca llaquicunata tucuchingapaj ña shuj punllata agllashcata intindichirca (Habacuc 2:2, 3).

Ñucanchi sufrinajushpa, o ñucanchi familia sufrinajujta ricushpami ñapash pensanchi, Taita Diosca na imatapash ruranllu nishpa. Shinapash Bibliapica ninmi: ‘Unayajunmi nishpa huaquin gentecuna rimanajujpipash, Jehová Diosca paipa nishcacunapica na unayanllu. Paica shujllapash tucuchi tucuchunga na munanllu, tucuicuna arripintirichunmi munan. Chaimandami pacienciahuan shuyajun’ nishpa (2 Pedro 3:9, NM).

Jesusca tucurimui punllacuna ñalla tucurinata yachachunmi, ima cosascunalla pasana cashcata villarca. Chai cosascunataca chai miraicunamandallata gentecuna ricunatami villarca (Mateo 24:3-42). Chai shimicunaca cunan punllacunapimi pactarinajun. Shinaca, ñallapachami Taita Diosca imatapash ruranga. *

Shinapash Taita Diosca ¿llaquicunata tucuchi ushanllu? Jesús cai Alpapi cashpaca, llaquicunata Taita Dios tucuchi ushashcatami ricuchirca. Shinaca, huaquin ejemplocunata ricupashun.

Acapanacuna, tamiacuna. Shuj punllaca, Jesuspash paipa apostolcunapash Galilea nishca yacuta canoapi rinajujpimi, ninanda huairashpa yacu jatarishpa canoataca casi tigrachirca. Chaimi Jesusca “‘upalla, casilla caichi’ nirca. Shina nijpimi huairapash chulunyashpa, cuchapash casilla tucurca” (Marcos 4:35-39). Shinami Jesusca, paipash paipa Taitapash yacuta, huairata controlai ushashcata ricuchirca (Colosenses 1:15, 16).

Ungüicuna. Ashtaca gentecunaca ñausacunata, jangacunata, lepra ungüita charijcunata, shuj shuj ungüita charijcunatapash Jesús jambijtami yacharca. Bibliapica ninmi, Jesusca “tucui ungushcacunatami [jambirca]” nishpa (Mateo 4:23, 24; 8:16; 11:2-5).

Micunacuna. Jesús cai Alpapi cashpaca, ishcai viajetami paipa Taita cushca poderhuanga, ashalla micunata ashtaca micunaman tigrachishpa tauca huaranga gentecunaman micuchirca (Mateo 14:14-21; 15:32-38).

Huañuicuna. Jesús cai Alpapi cashpaca quimsapuratami causachirca. Shujcarin ñami chuscu punllacunata huañushca carca. Shinami huañushcacunata Jehová Dios causachi ushashcata ricuchirca (Marcos 5:35-42; Lucas 7:11-16; Juan 11:3-44).