Muli Yannara Maganu Qarra Baala Hunanno
“Ani qoonqoˈya naggi asse wiˈlanna macciishshattoekkihu mamooti geeshshaati? Assinanninke beebbanni gatisattonkekkihu mamooti geeshshaati?” (Imbaaqoomi 1:2, 3) Hatto yee coyiˈrinohu Maganunniho ammanamino soqqamaancho Imbaaqoomiiti. Isi hatto yiinohu ammana ajjinosi daafiraatini? Deeˈni. Maganu qarra baala murino yannara hunannota kule Imbaaqoomi sheshifachishinosi.—Imbaaqoomi 2:2, 3.
Atera woy baxatto manchira buutote qarri iillinoˈneha ikkiro, Maganu keeshshinoha lawaheranna rahe qarra huna hasiissannosi yite hedattoha ikkara dandaanno. Qullaawu Maxaafi togo yaanno: “Mitu manni heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino baˈˈara hasiˈrannokki daafira, kiˈnera yee cincino.”—2 Pheexiroosi 3:9.
MAGANU QARRA HUNANNOHU MAMAROOTI?
Maganu qarra hunanno yanna lowo geeshsha gambissino! Yesuusi ‘diru goofimarcho’ leellishshanno malaatta laˈanno gaamo heedhannota coyiˈrino. (Maatewoosi 24:3-42) Yesuusi coyiˈrino masaalo woˈmitanni noo gara hendiro, Maganu qarra baala hunano yanna rakkino. *
Maganu qarra baala hunannohu hiittoonniiti? Yesuusi uullate noo yannara, Maganu mannu oosora iillanno qarra baala hunate wolqa noosita leellishino. Hanni mito lawishsha laˈno.
Kalaqamu Dano: Yesuusi soqqamaasinesi ledo Galiilu Baari aana haˈranni heeˈreenna, wolqaataamu dambali kaino daafira, yowolo itantara kaˈino. Ikkollana Yesuusi kalaqamu wolqa isinna Annisi wolqara aleenni ikkitinokkita leellishino. (Qolasiyaasi Sokka 1:15, 16) Yesuusi dambala “Uurri! Gabbi yii!” yiino. Hakkiinni “Bubbe uurriteenna lowo geeshsha gaˈlabbi yii.”—Maarqoosi 4:35-39.
Dhibba: Yesuusi duucha hige illiwelootu ille fanino, kottoota hursino, hattono hawwunaatu, dhiigunna wolu ordu qarri noonsare hursino. Isi ‘addi addi dhibbinni qarrantinore baala hursino.’—Maatewoosi 4:23, 24; 8:16; 11:2-5.
Sagalete Anje: Yesuusi Annisi uyinosi wolqa horoonsiˈre shiima sagale atoottanno gede assino. Qullaawu Maxaafi, Yesuusi soqqanshosi yannara lame hige lowo kume ikkanno manna itisinota kulanno.—Maatewoosi 14:14-21; 15:32-38.
Reyo: Yesuusi Qullaawu Maxaafi giddo kulloonni garinni sase manna reyotenni kayisasi, Maganoho reyitinore kayisate wolqa noosita leellishshanno. Yesuusi kayisino manni giddo mittu reyinkunni shoole barra ikkinosiho.—Maarqoosi 5:35-42; Luqaasi 7:11-16; Yohaannisi 11:3-44.
^ Goofimarchu yanna daafira ledde afate, Yihowa Farciˈraasine qixxeessitinoha Hegerera Hagiidhitanni Heeˈra Dandaatto! yaanno maxaafa roso 32 lai; konne maxaafa www.pr418.com/sid aanano afiˈra dandaatto.