“Obe Yehowa, kasha nabanga kwidila bukwashi kodi, okampushîsha na pa kipindji kinyi? Nkwete’nka kwela musâse kodi mwanda wa buntomboshi, a oketupasha pa kipindji kinyi?” (Abakuke 1:2, 3, EEM) Ano nyi mayi a Abakuke, badi muntu e buwa mukuminyibwe n’Efile Mukulu. Kuno kwidila kwaye akulesha bu kukutwa kwa lukumino su? Nya, ta mbyabya! Efile Mukulu badi mushinkamiishe Abakuke’shi e na kipindji kya kafudisha makyenga ooso.—Abakuke 2:2, 3.

Su obe sunga ungi muntu oodi mufule kwete kukyenga, mbibofule bodya kumona’shi Efile Mukulu e na lulengu bu byashabandile kushintuula myanda na binobino. Bible etulungula’shi: “Yehowa taanyengakana bwa kukumbasha mulayilo waye; kutala bangi abanangusheena’shi ee na kanyengakanyi. Anka Aye eeleesha kwanudi na lwishinko, apele’shi bamo tabakashiminanga nya, anka booso bakafikiile mu kwilanga.”—2 Mpyeele 3:9.

Mu kapindji kapeela’mu! Yesu bapatulwile’shi kipungo kampanda akikamono myanda ibungi ayikalesha’shi twi mu mafuku a ku nfudiilo a “bya pano.” (Mateo 24:3-42) Kulombana kwa butemuki bwa Yesu mu ano mafuku eetu akulesha’shi, Efile Mukulu apudisha nkalakashi ikwate bantu binobino. *

Byabya Efile Mukulu akafudisha makyenga ooso mushindo kinyi? Yesu pabadi pano pa nsenga, badi muleshe bi bukome bw’Efile Mukulu bwa kufudisha makyenga. Banda kutala bino bileshesho.

Masaku aatuukila ku bintu bipangibwe: Yesu na bolondji baye pababadi abende mu Mbuu a Ngadileeya, kipapi ki bukopo kibadi kikyebe kuyina bwato bwabo. Anka, Yesu badi muleshe’shi aye na Nshaye be na bukome bwa kukunkusha bintu bipangibwe. (Beena-Kolose 1:15, 16) Yesu bambile nka penda’shi: “Umiina! Leka tuleo.” Nkinyi kibadi kikitshikye? “Lupunga lubalekyele, na kubekele kufukama kukata.”—Maako 4:35-39, Kilombeeno kipya 2014.

Mikumbo: Yesu badi muukibwe bwa ngobesha yaaye ya kupasha ba mpofu na basha bilema, mpa na boso babadi abakumbu kaulungu, basha nsudi, sunga ingi mikumbo ya ingi mishindo. “Booso babadi abakumbu... aye nkwibapasha.”—Mateo 4:23, 24; 8:16; 11:2-5.

Bipupa bya nsala: Yesu badi mufubishe bukome bubabadi bamupe kwi Nshaye bwa kufimisha bya kudya. Bible akula’shi baadi mudiishe bantu misusa ibidi mu mudimo waaye wa bulungudi, badishishe bantu binunu na binunu.—Mateo 14:14-21; 15:32-38.

Lufu: Bukome bwa Yehowa bwa kwimika lufu abumweneka kalolo ku misusa isatu ibabadi basangule bantu kwi Yesu yabadi baleshe mu Bible. Muntu umune a ku bantu ababadi basangule badi mufwe akita mafuku ananka.—Maako 5:35-42; Luka 7:11-16; Yowano 11:3-44.