Dios inuu má maʼni gámbáa tsingíná
“Asndu nguánáa, oh Jeobá, gíʼmaa mandxa̱ʼwa̱ mu matambáyuʼ, rí asndu ikháánʼ xatadxun ráʼ. Asndu nguáthá nuthu gáthanʼ matambáyuʼ náa nuxmijná xa̱bu̱ rí asndu xátani kríñunʼ rá.” (Habacuc 1:2, 3.) Xúʼko̱ niʼthí Habacuc, mbáa xa̱bu̱ májáánʼ bi̱ Dios nindoo kaʼyoo. Lá niʼthí rígi̱ numuu rí táku̱mu̱u̱ kaʼyoo xáʼ. Na̱nguá. Dios niʼthúu̱n má rí nigíʼ mbá mbiʼi mu maʼni gámbáa tsingíná (Habacuc 2:2, 3).
Índo̱ ikháanʼ o mbáa bi̱ kuʼyáá namínuʼ, ramíʼskhoo makumulúʼ rí Dios ndajyúuʼ mu mambáyulúʼ. Mú náa Biblia naʼthúlúʼ rí “Jeobá na̱nguá ejyúuʼ ga̱jma̱a̱ numuu rí naʼthí maʼni, xóo eyáá tikhun xa̱bu̱, mú ikhaa naʼngo̱o̱ a̱jkiu̱u̱n numuu rí nimbáa tsíyoo mandáti̱ga̱a̱; ikhaa nandoo rí xúgínʼ maguanu mata̱nga̱a̱ a̱jkiu̱ún” (2 Pedro 3:9).
NGUÁNÁA GAMBÁYULÚ DIOS RÁ.
Dios inuu má maʼni rígi̱. Jesús niʼtáriyaʼ mbaʼa enii rí nasngájma rí inuu má mambáa “xúgíʼ dí xtáa rarígá náa numbaaʼ” ga̱jma̱a̱ rígi̱ mbuyáá xa̱bu̱ bi̱ mbóó má generación (o bi̱ nikuwa mbóó tsiguʼ) (Mateo 24:3-42). Rí mbiʼi xúgi̱ xtáa rambánuu kiʼtáriyaʼ rígi̱, rí nasngájma rí Dios inuu má maʼnimbánuu xkujndu ndrígu̱ún xa̱bu̱ numbaaʼ. *
Mú, lá maʼngo̱o̱ Dios maʼni gámbáa tsingíná ráʼ. Índo̱ Jesús nixtáa náa tsu̱du̱u̱ Ku̱ba̱ʼ, nisngájma rí Dios ma̱ndoo maʼni gámbáa tsingíná rí nuraʼníí xa̱bu̱ numbaaʼ. Guʼyáá tikhuu xkri̱da.
Gamiéjunʼ. Mbóo miʼtsú, índo̱ Jesús gajmíi̱n apóstoles ndrígio̱o̱ nagún náa inuu lamáa ndrígóo Galilea, niʼni giñánʼ mbiʼ rí asndu migamíi majngúun barco náa iyaʼ. Jesús nisngájma rí ikhaa ga̱jma̱a̱ Anu̱u̱ ma̱ndoo muni wíyúu tsiakii dí rígá náa numbaaʼ (Colosenses 1:15, 16). I̱ndó niʼthí: “¡Naskoʼ! ¡Wíí gáʼni! Ga̱jma̱a̱ niwi̱ji̱ giñánʼ, ikhú wíí kri̱ga̱” (Marcos 4:35-39).
Nandii. Mbaʼin xa̱bu̱ ndiyáá rí Jesús ma̱ndoo maʼni thanún bi̱ tsiyexi ga̱jma̱a̱ bi̱ gúʼxúʼ, xóo bi̱ naxnúu edxu̱ún, bi̱ guáʼdáá lepra, ga̱jma̱a̱ bi̱ guáʼdáá i̱ʼwáʼ nandii. Náa Biblia naʼthí rí Jesús “niʼni thanún xúgínʼ bi̱ kuwa rumíniʼ” (Mateo 4:23, 24; 8:16; 11:2-5).
Ewiʼ. Nákha Jesús xtáa raʼnimbánuu ñajunʼ ndrígóo, a̱jma̱ nuthu nijmuu tsiakii rí Anu̱u̱ nixnúu mu maʼni makuwi̱i̱n chíʼgíʼ ganitsu rí gíʼdoo ga̱jma̱a̱ maxnún mu̱phu̱ mbaʼin wéñuʼ xa̱bu̱ (Mateo 14:14-21; 15:32-38).
Rí nakháñulú. Índo̱ Jesús xtáa náa tsu̱du̱u̱ Ku̱ba̱ʼ, nikuxi̱i̱n ajtsíin xa̱bu̱, mbáa rí ikhaa niʼni má a̱jkhu̱ mbiʼi rí nikháñu. Rúʼko̱ nasngájma kaʼwu rí Jeobá ma̱ndoo makuxi̱ín bi̱ nikháñun (Marcos 5:35-42; Lucas 7:11-16; Juan 11:3-44).
^ Á mu nandaʼ ma̱ta̱ya̱a̱ itháan ga̱jma̱a̱ numuu iwáá mbiʼi, atayáá libro ¡Araxtaa gagi kámuu mbiʼi!, náa kíxnuu 32, dí nini bi̱ nutaraʼa numuu Jeobá. Ma̱ndoo matrigú xúʼkhiín náa jw.org.
Puede que también le interese
BI̱ NAYEJNGOO
Xú káʼnii gándoo gambayaaʼ ngajua ndrígóo Dios rá.
Biblia naʼni makumulúʼ kuʼyáá itháan Dios ga̱jma̱a̱ rí mitsaan rí naʼthí maʼni.
