“Ko e hā hono fuoloa, ʻe Sihova, kuo pau ke u tangi ai ki ha tokoni, kae ʻikai te ke ongoʻí? Ko e hā hono fuoloa kuo pau ke u kole ai ki ha tokoni koeʻuhi ko e fakamālohí, kae ʻikai te ke kau maí?” (Hapakuke 1:2, 3) Ko e lea eni ʻa Hapakuke, ko ha tangata lelei naʻá ne maʻu ʻa e hōifua ʻa e ʻOtuá. Naʻe fakahaaʻi ʻe heʻene kolé ha siʻi ʻo e tuí? ʻIkai ʻaupito! Naʻe fakapapauʻi ʻe he ʻOtuá kia Hapakuke ʻoku ʻi ai ʻEne taimi kuó ne kotofa ke fakangata ai ʻa e faingataʻaʻiá.​—Hapakuke 2:2, 3.

ʻI he taimi ʻokú ke faingataʻaʻia ai pe ko ha taha ʻoku ofi kiate koe, ʻoku faingofua ke fakaʻosiʻaki ʻoku fakatuotuai ʻa e ʻOtuá ke fai ha meʻa, ʻoku totonu ke ne kau mai he taimí ni. Ka, ʻoku fakapapauʻi mai ʻe he Tohi Tapú: “ʻOku ʻikai ke faituai ʻa Sihova ʻi he fekauʻaki mo ʻene talaʻofá, ʻo hangē ko ia ko e fakakaukau ʻa e kakai ʻe niʻihi, ka ʻokú ne anga-kātaki kiate kimoutolu koeʻuhí ʻoku ʻikai te ne finangalo ke fakaʻauha ha taha ka ʻokú ne finangalo ke aʻusia ʻe he tokotaha kotoa ʻa e fakatomalá.”​—2 Pita 3:9.

Vavé ni ʻaupito! Naʻe fakahaaʻi ʻe Sīsū ha toʻutangata pau te nau sio mata ki he ngaahi tuʻunga makehe te ne fakaʻilongaʻi ʻa e ngaahi ʻaho fakaʻosi ʻo e “fokotuʻutuʻu lolotongá.” (Mātiu 24:3-42) Ko hono fakahoko ʻo e kikite ʻa Sīsuú ʻi hotau taimí ʻoku fakahaaʻi ai ʻoku ofí ni ʻa e kau mai ʻa e ʻOtuá ki he ngaahi meʻa ʻa e faʻahinga ʻo e tangatá. *

Ka ʻe anga-fēfē hono fakangata ʻe he ʻOtuá ʻa e faingataʻaʻia kotoa pē? ʻI he ʻi māmani ʻa Sīsuú, naʻá ne fakahāhaaʻi ʻa e mālohi ʻo e ʻOtuá ke toʻo atu ʻa e faingataʻaʻia ʻa e faʻahinga ʻo e tangatá. Fakakaukau ange ki ha ngaahi fakatātā ʻe niʻihi.

Ngaahi Fakatamaki Fakanatula: Lolotonga ʻa e folau ʻa Sīsū mo ʻene kau ʻapositoló ʻi he Tahi Kālelí, ne mei ngoto honau vaká tupu mei ha fuʻu matangi mālohi. Ka naʻe fakahaaʻi ʻe Sīsū ʻokú ne lava mo ʻene Tamaí ke puleʻi ʻa e ngaahi ʻelemēniti ʻo natulá. (Kolose 1:15, 16) Naʻe pehē pē ʻe Sīsū: “ʻEi! Fakalongolongo!” Ko e hā ʻa e olá? “Naʻe tuʻu leva ʻa e matangí, pea naʻe hoko ha fuʻu tofukī.”​—Maʻake 4:35-39.

Mahakí: Naʻe ʻiloa ʻa Sīsū ʻi heʻene malava ke fakamoʻui ʻa e kuí mo e heké, pea pehē ki he faʻahinga naʻa nau puke ʻi he mahakimoá, kiliá, pe ko ha faʻahinga mahaki kehe. “Naʻá ne fakamoʻui ʻa e faʻahinga kotoa naʻe faingataʻaʻiá.”​—Mātiu 4:23, 24; 8:16; 11:2-5.

Nounou Fakameʻatokoni: Naʻe ngāueʻaki ʻe Sīsū ʻa e mālohi naʻe ʻoange kiate ia ʻe heʻene Tamaí ke ne ʻai ke lahi fau ha meʻakai siʻisiʻi. ʻOku lēkooti naʻe tuʻo ua he lolotonga ʻene ngāue fakafaifekaú ʻene fafanga ha toko laui afe.​—Mātiu 14:14-21; 15:32-38.

Mate: Ko e mafai ʻo Sihova ke ne toʻo atu ʻa e maté ʻoku hā mahino ia ʻi he toetuʻu ʻe tolu ʻoku lēkooti naʻe fakahoko ʻe Sīsū. Ko e taha ai ko ʻene fakafoki mai ke moʻui ha taha ne mate he ʻaho ʻe fā.​—Maʻake 5:35-42; Luke 7:11-16; Sione 11:3-44.