“A Yehova, mpaka zuŵanji po ndiliyengi kuti mundiwovyi kweni kwambula yimwi kundivwa? Mpaka zuŵanji po ndipemphengi chovyu kuti munditaski ku nkhaza, kweni kwambula yimwi kuchitapu kanthu?” (Habakuku 1:2, 3) Yanga ndi mazu ngo Habakuku wangukamba. Iyu wenga munthu wamampha kweniso wayanjikanga ndi Chiuta. Kumbi vo Habakuku wangupempha vingulongo kuti wengavi chivwanu? Awa! Chiuta wangusimikizgiya Habakuku kuti wakusankha nyengu yo wamalisiyengi masuzgu ngosi.​—Habakuku 2:2, 3.

Asani yimwi pamwenga wachibali winu wasuzgika, kungaŵa kwambula kusuzga kuŵanaŵana kuti Chiuta waswera kuchitapu kanthu kuti wamalisi masuzgu ngo. Kweni Bayibolu lititisimikiziya kuti: “Yehova waswerengi cha kufiska layizgu laki nge mo ŵanthu anyaki aŵanaŵaniya kuti waswera. Iyu wazizipizga namwi chifukwa wakhumba cha kuti weyosi waku yimwi wanangiki, kweni wakhumba kuti weyosi walapi.”​—2 Peturo 3:9.

Wamalisengi pambula kuswera. Yesu wangukamba kuti mugonezi unyaki wa ŵanthu wazamuwona vinthu vakupambanapambana vo vazamulongo kuti te mu mazuŵa ngakumaliya nga “mugonezi.” (Mateyu 24:3-42) Chifukwa chakuti mazu ngo Yesu wangukamba ngafiskika mazuŵa nganu, vilongore limu kuti kwaja kanyengu kamanavi ukongwa kuti Chiuta wamalisi masuzgu ngosi nga ŵanthu. *

Kumbi Chiuta wazamuchita wuli kuti wamalisi masuzgu ngosi? Pa nyengu yo Yesu wenga pacharu chapasi, wangulongo kuti Chiuta we ndi nthazi zakumalisiya masuzgu. Tiyeni tikambiskani vakuwoniyapu pa nkhani yeniyi.

Masoka Ngachilengedu: Pa nyengu yo Yesu ndi akusambira ŵaki ŵenga pa Nyanja ya Galileya, chimphepu chikulu chakhumbanga kubizga boti lawu. Kweni Yesu wangulongo kuti iyu ndi Awisi ŵe ndi nthazi zakulamuliya vinthu va muchilengedu. (Akolose 1:15, 16) Yesu wangukamba ŵaka kuti: “Leka! Ja cheti!” Ntchinthu wuli chinguchitika Yesu wati wakamba mazu ngenanga? “Mphepu yinguleka ndipu nyanja yingugona.”​—Mariko 4:35-39.

Matenda: Yesu waziŵikanga ukongwa ndi ŵanthu chifukwa wachizganga matenda nga mtundu wewosi. Iyu wachizganga ŵanthu achibulumutiya, akupunduka, avizilirisi ndipuso amakhati. Bayibolu likamba kuti: “wanguchizga wosi wo atamanga.”​—Mateyu 4:23, 24; 8:16; 11:2-5.

Kusoŵa Chakurya: Yesu wangugwiriskiya ntchitu nthazi zo Awisi angumupaska kuti chakurya cho chenga chimana ukongwa chije chinandi. Bayibolu likamba kuti kaŵi kosi, Yesu wanguryisa ŵanthu masawuzandi nganandi pa nyengu yo wapharazganga.​—Mateyu 14:14-21; 15:32-38.

Nyifwa: Bayibolu likonkhoska za ŵanthu atatu wo Yesu wanguŵayuska pa nyengu yo wenga pacharu chapasi. Venivi vilongore limu kuti Yehova we ndi nthazi zakuyuskiya ŵanthu akufwa. Yumoza wa ŵanthu wo anguyuskika wanguja mumasanu mazuŵa nganayi.​—Mariko 5:35-42; Luka 7:11-16; Yohane 11:3-44.