“O Jehova, ino ndilalilila lugwasyo kwaciindi cilamfwu buti yebo kotandimvwi? Ino ndilalomba kwaciindi cilamfwu buti kuti undivwune kuzigwebenga pele yebo kotabwezi ntaamu?” (Habakuku 1:2, 3) Aaya majwi aa Habakuku, mwaalumi uuli kabotu iwakali kukkomaninwa aa Leza. Sena kulomba kwakwe kwakatondezya kuti unyina lusyomo? Peepe. Leza wakasyomezya Habakuku kuti wakalibikkide ciindi cakuyoomana kupenga koonse.—Habakuku 2:2, 3.

Ciindi nomuli mumapenzi naa mulongwe wanu, ncuuba-uba kwaamba kuti Leza wamuka kubweza ntaamu akuti weelede kuti kabwezyede kale ntaamu kusikila lino. Pele Bbaibbele lyaamba kuti: “Jehova tamukide pe kujatikizya cisyomezyo cakwe kweelana ambobayeeya bamwi kuti wamuka, pele umukkazikila moyo nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa.”—2 Petro 3:9.

lno-ino! Jesu wakaamba kuti zyalani limwi lyakali kuyoolibonena zintu izyakali kuyoocitika zyalo izyakali kuyootondezya mazuba aamamanino “aabweende bwazintu.” (Matayo 24:3-42) Kuzuzikizyigwa kwabusinsimi bwa Jesu mumazuba aano kutondezya kuti Leza ulaafwaafwi kubweza ntaamu yakumana mapenzi aabacitikila bantu. *

Pele ino Leza uyookumana buti kupenga koonse? Ciindi Jesu naakali anyika, wakatondezya nguzu nzyajisi Leza zyakumana kupenga kwabantu. Amulange-lange zikozyanyo zimwi.

Ntenda Zilicitikila: Ciindi Jesu alimwi abaapostolo bakwe nobakali mubwato mu Lwizi lwa Galilaya, kwakaba guwo pati ilyakapa kuti bwato buyande kubbila. Pele Jesu wakatondezya kuti walo alimwi abausyi balijisi nguzu zyakweendelezya zilengwaleza. (Bakolose 1:15, 16) Jesu wakaamba buyo kuti: “Umuna! Batama!” Ino ncinzi cakacitika? “Guwo lyakaleka, alimwi kwakaumuna wi.”—Marko 4:35-39.

Kuciswa: Jesu wakalizyibidwe kabotu akaambo kanguzu nzyaakajisi zyakuponya boofwu alimwi abalema kubikkilizya abaabo ibakali kusuntuka, kuciswa cinsenda naa malwazi aambi aaindene-indene. “Wakabaponya boonse aabo ibakali kuciswa.”—Matayo 4:23, 24; 8:16; 11:2-5.

Nzala: Jesu wakabelesya nguzu nzyaakapegwa a Bausyi kusanina bantu banji kuzwa kucakulya cisyoonto. Bbaibbele lyaamba kuti, naakali mumulimo wakwe, kwaziindi zyobilo wakasanina bantu banji.—Matayo 14:14-21; 15:32-38.

Lufwu: Cilitondezyedwe caantangalala kuti Jehova ulijisi nguzu zyakumana lufwu kweelana abantu botatwe mbaakabusya Jesu. Umwi wabaabo mbaakabusya kuzwa kubafwu wakalifwide kwamazuba one.—Marko 5:35-42; Luka 7:11-16; Johane 11:3-44.