“O Jehova, njooleka lili kukukwiilila notamvwi? Ndakulilila nkaambo kakupyopyongana kwabantu, pele toswiilili.” (Habakuku 1:2, 3) Majwi aaya akaambwa aHabbakkukku, muntu wakali kusyomeka kuli Jehova. Kubuzya mubuzyo ooyu kwakali kutondeezya kuti takwe lusyomo na? Peepe. Leza wakasyomezya Habbakkukku kuti wakali kuyoomaninsya mapenzi aayo muchiindi cheelede.—Habakuku 2:2, 3.

Chiindi nituli mumapenzi naakuti zibbululu zyesu nizyaba mumapenzi, tulakonzya kuyeeya kuti Leza ulanonoka kunjilila. Pesi Bbayibbele lyaamba kuti: “Jehova taamusya ngaakasyomezya kale, mbobayeeya bamwi kuti wamuka, pe, pele ucimukazikila moyo, nkaambo tayandi kuti bantu bafwidilile, ulayanda kuti boonse bajane ciindi cakweempwa.”—2 Petro 3:9.

Lino-lino. Jesu wakatondeezya kuti kuli limwi zyalani lyabantu litazoobone zintu zisiyene-siyene zitondeezya kuti ‘mamanino aachiindi’ abaafwiifwi. (Matayo 24:3-42) Kuzuzikizigwa kwabusinsimi bwaJesu muchiindi chesu kutondeezya kuti chabaafwiifwi chiindi chakuti mapenzi azoomane. *

Leza uyoowamana biyeni mapenzi? Chiindi Jesu naakali aanyika, wakatondeezya kuti Leza ulaamanguzu aakugwisya mapenzi aali munyika. Atubone zimwi zikozyano.

Mapenzi Aalichitikila: Limwi zuba Jesu abasikwiiya bakwe nibakali muLwizi lwaGalilaya, kwakaba guwo pati lyakasibbizye bwaato. Jesu wakatondeezya kuti we aWisi balaamanguzu aakweendelezya bwiime bwakunze butali kabotu. (BaKolose 1:15, 16) Jesu wakati: “Tontola, uumune wi!” Mpawo niinzi chakachitika? “Muuwo wakaleka, kwakaba luumuno lupati.”—Marko 4:35-39.

Kuchiswa: Bantu bakalizi kuti Jesu wakali kuponia boofu, balema, balebukide mubili, basichinsenda nikuba malwazi woonse. Bbayibbele lyaamba kuti: “Balwazi boonse wakabaponya.”—Matayo 4:23, 24; 8:16; 11:2-5.

Nzala: Jesu wakabelesya manguzu ngaakapegwa aaWisi kuti avuzye chakulya chakali chiche. Magwalo atondeezya kuti kwaziindi zibili wakasanina zyuulu-zyuulu zyabantu.—Matayo 14:14-21; 15:32-38.

Lufu: Tulakonzya kubaachoonzyo chakuti Jehova ulaamanguzu aakubusya bafwide chiindi nitubala atala azikozyano zitatu aawo Jesu naakabusya bantu bakafwide. Umwi muntu ngwaakabusya wakali waba aamazuba aane kafwide.—Marko 5:35-42; Luka 7:11-16; Johane 11:3-44.