“Nililirenge wovwiri m’paka pawuli, kwambura imwe kupulika? Kasi nipemphenge wovwiri kuti nithaskike ku nkhaza m’paka pawuli, kwambura imwe kuchitapo kanthu?” (Habakuku 1:2, 3) Habakuku uyo wakaŵa paubwezi na Chiuta ndiyo wakayowoya mazgu agha. Kasi pakuyowoya mazgu agha vikulongora kuti wakaŵavya chipulikano? Yayi. Chiuta wakamusimikizgira Habakuku kuti wamazgenge masuzgo agha pa nyengo yakuŵikika.—Habakuku 2:2, 3.

Para imwe panji mubali winu wakusuzgika, ntchipusu kuyowoya kuti Chiuta wakuchedwa kuchitapo kanthu. Panji mungayowoya kuti, ka mphanyi pasono wali kuwuskapo masuzgo. Kweni Baibolo likutisimikizgira kuti: “Yehova wakuchedwa yayi na layizgo lake, nga umo ŵanthu ŵanyake ŵakuwonera kuti wakuchedwa. Kweni wakuzikira chifukwa cha imwe pakuti wakukhumba yayi kuti munyake waparanyike, kweni wakukhumba kuti wose ŵang’anamuke mtima.”—2 Petrosi 3:9.

Sonosono apa! Yesu wakayowoya kuti muwiro unyake uzamuwona vimanyikwiro kulongora kuti tili ku “umaliro wa charu” chiheni ichi. (Mateyu 24:3-42) Pakuti ivyo Yesu wakayowoya vikufiskika, vikulongora kuti Chiuta wali pafupi kunjilirapo kumazga masuzgo gha ŵanthu. *

Kweni kasi Chiuta wazamumazga wuli masuzgo? Apo Yesu wakaŵa pa charu chapasi wakalongora nkhongono za Chiuta pakumazga masuzgo gha ŵanthu. Wonani viyelezgero ivi.

Masoka Ghachilengiwa: Apo Yesu na ŵasambiri ŵake ŵakaŵa pa Nyanja ya Galileya, pakawuka chimphepo chikuru icho chikate chibizgenge boti. Ndipouli Yesu wakalongora kuti iyo na Ŵadada ŵake ŵali na mazaza pa chilengiwa. (Ŵakolose 1:15, 16) Yesu wakayowoya waka kuti: “Chetama! Khala chete!” Kasi ntchivichi chikachitika? “Mphepo yikaleka, ntheura kukaŵa bata likuru.”—Mariko 4:35-39.

Ulwari: Yesu wakamanyikwanga chomene chifukwa wakaŵa na nkhongono kuchizga ŵachibulumutira, ŵakupendera, ŵavizilisi, ŵavyoni, kweniso matenda ghanyake. “Wakachizga wose awo ŵakaŵa ŵalwari.”—Mateyu 4:23, 24; 8:16; 11:2-5.

Kuchepa kwa Vyakurya: Yesu wakaŵa na nkhongono zakufuma kwa Chiuta kupangiska chakurya mwamunthondwe kuŵa chinandi. Baibolo likulongora kuti apo wakachitanga uteŵeti wake pa charu chapasi, Yesu wakalyeska ŵanthu masauzandi ghanandi maulendo ghaŵiri.—Mateyu 14:14-21; 15:32-38.

Nyifwa: Yesu wakawuska ŵanthu ŵatatu kulongora kuti Yehova wali na nkhongono zakumazgira nyifwa. Munthu munyake uyo Yesu wakamuwuska pakaŵa kuti pajumpha mazuŵa ghanayi kufuma apo wakafwira.—Mariko 5:35-42; Luka 7:11-16; Yohane 11:3-44.