«Jehová, ¿bin to ora te ma ba yac ajacʼbon caw, te ya xʼawonon ta atojol ta scaj utsʼinel, te mayuc coltayel awuʼune?» (Habacuc 1:2, 3). Jich la yal te Habacuc jtul winik te lek yoʼtan sok te lek ilbil yuʼun te Diose. ¿Yuʼunbal maʼyuk schʼuunel yoʼtan te jich la yale? Maʼuk. Jamal albot yuʼun Dios te stsaojix bin kʼajkʼal ya slajin te wokolile (Habacuc 2:2, 3).

Te kʼalal ayotik ta wokol o te machʼatik ay kuʼuntike, yaniwan jnoptik te maʼyuk bin yak ta spasel te Dios yuʼun ya skoltayotik. Pero te Biblia jich ya yal: «Ma ba hal ya xcʼoht ta pasel te bin yaloj te Cajwaltic [Jehová], hich te bin utʼil ay ya scuyic te ya xhalaje, pero yac smahliybelex, ma scʼan te ay machʼa chʼayel ya xbaht, ha ya scʼan te yacuc suhtes yoʼtanic spisilic» (2 Pedro 3:9).

Nopol ya slajin Dios te wokolile. Te Jesús la schol te bintik señail ya xkʼot ta pasel te kʼalal jaʼix-a te slajibal te bintik swenta balumilale sok te ay «jcaj tsʼumbalil» yuʼun ants winiketik ya yilik-abi (Mateo 24:3-42). Te albilkʼop-abi yak kʼoel ta pasel ta ora ini, jamal chikan ta ilel te nopol ya slajin Dios te swokol te ants winiketike. *

Pero, ¿yabal xjuʼ ya slajin Dios te wokolile? Te kʼalal tal ta Balumilal te Jesuse jamal la yakʼ ta ilel te ay yuʼel te Dios ta skoltayel te ants winiketik. Kiltik cheʼoxebuk ejemplo.

Te bintik ya xkʼax te bayal bintik ya sjin jilele. Ta jun buelta te Jesús ay ta barco sok-a te jpuk-kʼopetik ta mar yuʼun Galilea, tal tulan yikʼal jaʼal te kʼan muluk koel ta jaʼ te barcoe. Pero te Jesús sok te sTate la yakʼik ta ilel te ay yuʼelik yuʼun ya skombeyik yip te Balumilale (Colosenses 1:15, 16). Te Jesús jich la yal: «Chʼaban, lahmajan, la yut. Chʼab te iqʼue, buen lamal qʼuinal cʼoht» (Marcos 4:35-39).

Chamel. Te ants winiketik snaʼojik-a te ya xjuʼ yuʼun slekubtesel jchameletik te Jesuse. Jaʼ yuʼun la yikʼik tal te jtsʼoʼsitetik, koxoetik, jkʼaʼel chameletik, te machʼatik ya xtupʼ yikʼik sok spisil te machʼatik ayik ta chamele. Te Biblia ya yal te la «slecubteslan spisil te jchameletique» (Mateo 4:23, 24; 8:16; 11:2-5).

Wiʼnal. Te kʼalal ay ta Balumilal-a te Jesuse, cheb buelta la stuuntes te yuʼel akʼbil yuʼun te sTat yuʼun la yesmajtes te jtebnax weʼelil ay yuʼunik-a, jich la smakʼlin bayal ta mil ants winiketik (Mateo 14:14-21; 15:32-38).

Lajel. Te kʼalal ay ta Balumilal-a te Jesuse, la schaʼkuxajtes oxtul ants winiketik, te jtule ayix chaneb kʼajkʼal slajel-a. Jich la yakʼ ta ilel te ya xjuʼ yuʼun schaʼkuxajtesel te ants winiketik te Jehovae (Marcos 5:35-42; Lucas 7:11-16; Juan 11:3-44).