Jutuk xa skʼan xakʼbe slajeb vokoliletik li Diose
«¿Baqʼuin to chavaʼibun jcʼop ti liʼ xiʼavet o ta atojol, ti yoquel mu xatacʼbun oe? ¿Baqʼuin to chacoltavan ti liʼ chicʼopoj ta scoj ti oy ep utsʼintaele?» (Habacuc 1:2, 3). Taje jaʼ jech laj yaʼi sba li Habacuc ti jaʼ jun lekil vinik ti lek ilbil yuʼun Diose. ¿Mi yuʼun van muʼyuk spatoj yoʼonton ta stojolal Dios ti jech laj yale? Moʼoj. Yuʼun li Diose yakʼojbe xa onoʼox skʼakʼalil ti bakʼin chakʼbe slajeb li vokoliletike (Habacuc 2:2, 3).
Kʼalal chkil jvokoltik o chil svokol li buchʼu lek xkojtikintike xuʼ van chanop ti kʼu yuʼun muʼyuk to kʼusi spasoj li Diose. Pe xi chalbutik ta jamal li Vivliae: «Li kʼusi yaloj Jeova chkʼot ta pasele mu yuʼunuk chjalij jech kʼuchaʼal tsnopik junantike, yuʼun stsʼikojboxuk to, mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti xasutes avoʼonton akotolike» (2 Pedro 3:9).
¿MI OY VAN KʼUSI TSPAS LI DIOSE?
Oy xa kʼusi jutuk skʼan spas li Diose. Li Jesuse laj xa onoʼox yal ti oy kʼusitik chkʼotanuk ta pasel ti chakʼ ta ilel ti poʼot xa skʼan xlaj «li kʼusitik oy ta balumile» xchiʼuk ti chil skotolik li jkʼol kuxlejale (Mateo 24:3-42). Yakal xa chkʼotanuk ta pasel avi li albil kʼopetike, taje jaʼ chakʼ ta ilel ti jutuk xa tajek skʼan xkʼot ta pasel yuʼun Dios li kʼusi snopoj ta stojolal li krixchanoetike. *
Pe ¿mi xuʼ yuʼun chakʼbe slajeb vokoliletik li Diose? Kʼalal ay ta balumil li Jesuse jaʼ te laj yakʼ ta ilel ti xuʼ xakʼbe slajeb svokol krixchanoetik li Diose. Jkʼeltik batel jun chibuk skʼelobil.
Li nikel, nojelal ta voʼ o yan kʼusitike. Jun velta kʼalal jaʼo te chanavik ta varko ta nab Galilea xchiʼuk yajtakboltak li Jesuse, tal tsatsal ikʼalvoʼ ti jutuk xa mu te mutʼij li svarkoike. Jaʼ te laj yakʼ ta ilel Jesus ti xuʼ yuʼun xchiʼuk Stot ti xuʼ spajesbeik yip ikʼ xchiʼuk li nabe (Kolosenses 1:15, 16). Yuʼun jaʼ noʼox xi laj yale: «¡Anchan! ¡Tsʼijlan!». ¿Kʼusi kʼot ta pasel un? «Chʼab li ikʼe xchiʼuk chʼan xi likel» (Markos 4:35-39).
Li chameletike. Epal krixchanoetike snaʼojik ti Jesuse xpoxtaj yuʼun li maʼsatetike, li koxoetike, jech kʼuchaʼal li buchʼutik ipik ta tupʼ-ikʼe, li buchʼutik ipik ta kʼaʼemal chamele xchiʼuk yan chameletik. Li Vivliae chal ti Jesuse «la xpoxta skotol li buchʼutik chil svokolike» (Mateo 4:23, 24; 8:16; 11:2-5).
Li viʼnale. Ti kʼu sjalil la xchol mantal li Jesuse, chib velta la stunes li sjuʼel akʼbil yuʼun Stot sventa chepajes li veʼlil yoʼ smakʼlin ta smiyonal noʼox krixchanoetike (Mateo 14:14-21; 15:32-38).
Li lajelale. Kʼalal ay ta balumil li Jesuse la xchaʼkuxes oxvoʼ krixchanoetik, li june oy xa ox ta xchanibal kʼakʼal xchamel. Taje jaʼ chakʼ ta ilel ti xuʼ xchaʼkuxes animaetik li Jeovae (Markos 5:35-42; Lukas 7:11-16; Juan 11:3-44).
^ par. 5 Mi chakʼan chanabe mas skʼoplal ta sventa li slajebal kʼakʼale, kʼelo li xchanobil 32 li ta livro ¡Kʼupino akuxlejal!, ti pasbil yuʼun stestigotak Jeovae. Xuʼ xayales ta moton li ta www.pr418.com/tzo.
Xuʼ van chakʼupin skʼelel xtok liʼe
LI JKʼEL˗OSIL TA TOYOLE
¿Kʼuxi xuʼ xatabe sbalil li kʼanelal yuʼun Diose?
Tstsatsubtas xchʼunel koʼontontik Vivlia ta sventa li kʼusi yaloj tspas Diose.
KʼUSITIK TSJAKʼIK TA SVENTA VIVLIA
¿Kʼusitik tspas li Ajvalilal yuʼun Diose?
Kʼelavil kʼusi tspas li Ajvalilal yuʼun Dios kʼalal mi lik spas mantal ta balumile.
LI JKʼEL˗OSIL TA TOYOLE (SVENTA CHICHʼ CHANEL)
