Profeta Habakuki yoowo aamurumeela Muluku moororomeleya aalavunle so: “Nyuwo Apwiya! Kinokhuwela mpakha lini, muhikìwaka? Hiyo ninnihaxiwa, ninnikhuwelela wa nyuwo. Muhinrwela-ni onàkiha?” (Habakuki 1:2, 3) Niireke eyo enooniherya wira khaarina-tho waamini? Nnaari. Muluku aahimulipiherya Habakuki wira waphiya okathi aya ammaliha ohaawa.​—Habakuki 2:2, 3.

Okathi munihaawa anyu wala muninweha anyu mutthu ohaawaka, ti vookhweya wuupuwela wira Muluku onnipisa ni wira ohaana opaka etthu okathi ene yoowo. Masi, Biibiliya onihimya so: “Apwiya khampisa omaliherya itthu sinihimyaya: ale anvanya etthu ila annivonya. Vano Muluku onnovilelani, mana khantthuna wira mutthu apweteye, nnákhala mmosá. Ontthunexawe wira atthu othene erukunuxe murima”.​—2 Pedru 3:9.

Moohipisa! Yesu aahihimya wira naamukhala nloko naarowa oweha ikanyeryo sa mahiku ookiserya a “olumwenku”. (Matheyo 24:3-42) Wiiraneya wa eprofesia ya Yesu mahiku ahu ala, onooniherya wira moohipisa Muluku onoopaka etthu wira aakhaliherya apinaatamu. *

Masi Muluku onrowa omaliha sai ohaawa? Okathi Yesu aari awe valaponi, aahooniherya owerya wa Muluku omalihaka ohaawa wa atthu. Nrowe nithokorerye matakiheryo ala.

Ihasara sa Ephattu: Nihiku nimosa, vaavo Yesu ni awiixutti awe yaalapuwa aya Ephareya ya oGalileya ni ekalawa, yaahikhumelela epheyo yoowali enaphavela osamiha ekalawa. Masi Yesu aahooniherya wira owo ni Tiithi awe anniwerya oruma ikuru sa ephattu. (aKolosi 1:15, 16) Yesu aahimmye so: “Mmàle! Mwikhalele!” Nto exeeni yaakhumelenle? “Nananoru epheyo yahìkhalela, khukhumelela omàleleya wulupale”.​—Marko 4:35-39.

Iretta: Yesu aanisuweliwa saana ntoko mutthu aarina owerya wa waapenuxa atthu yaahoona, oorakala, yaawereiwa ecilecile, makuttula, ni iretta sikina. Owo ‘ahavoniha aretta othene’.​—Matheyo 4:23, 24; 8:16; 11:2-5.

Othowa Eyoolya: Yesu aahirumeela owerya aavahiwe awe ni Tiithi awe wira okumiherye yoolya yowaatta. Biibiliya onihimya wira ikwaha sowiiraka piili okathi aalaleerya awe, aahaavaha eyoolya atthu anceene.​—Matheyo 14:14-21; 15:32-38.

Okhwa: Tthiri Yehova ookhalana owerya wa omaliha okhwa, eyo yaahooneya nuumala Yesu waahihimuxa atthu araru yaakhwiiye. Mmosa a atthu awo, yaahihimuxiwe, aahiviriha mahiku maxexe okhwiiye ene.​—Marko 5:35-42; Luka 7:11-16; Yohani 11:3-44.