«Yuumtsil, ¿baʼax kʼiin bíin a chʼenxikint in sen awat kʼáat óolalaʼ? ¿Baʼax kʼiin bíin jáawak in payalchiʼ tu yoʼolal le meyaj loob utiaʼal ka taalakech a wáantoʼon?» (Habacuc 1:2, 3). Le tʼaanoʼobaʼ aʼalaʼab tumen Habacuc, juntúul máax ku lúubul utsil tiʼ Dios. ¿Tu yaʼalaj wa tumen maʼatech u confiar tiʼ Dios? Maʼatech. Dioseʼ tu yaʼalajtiʼ maʼ kun xáantal kéen u xuʼuls le muʼyajiloʼ (Habacuc 2:2, 3).

Kéen muʼyajnak juntúul a láakʼtsil wa techeʼ maʼ xaaneʼ jeʼel a tuklik tsʼoʼok u xáantal maʼ u beet mix baʼal Diosiʼ. Baʼaleʼ le Bibliaoʼ ku yaʼalikeʼ «Jéeobaeʼ maʼ xaan utiaʼal u béeykuntik baʼax u yaʼalmiʼ, jeʼex u tuklaʼal tumen jujuntúul máakoʼobeʼ, baʼax ku yúuchleʼ chúukaʼan u yóol tiʼ teʼex tumen maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (2 Pedro 3:9).

¡Jach taʼaytak u xuʼulsaʼal! Jesuseʼ tu yaʼalaj jujunpʼéel baʼaxoʼob kun eʼesik «táan u taal u tsʼoʼokol tiʼ le yóokʼol kaabaʼ». Le baʼaloʼobaʼ yaan u yilaʼal tumen le máaxoʼob yanoʼob ichil «le generacionaʼ» (Mateo 24:3-42). Le baʼaxoʼob tu yaʼalaj Jesusoʼ táan u béeytal teʼ kʼiinoʼobaʼ, le oʼolal k-aʼalik maʼ kun xáantal kéen xuʼulsaʼak tiʼ le kʼasaʼan máakoʼob tumen Diosoʼ. *

Baʼaleʼ ¿jeʼel wa u xuʼulsik Dios le muʼyajiloʼ? Le ka taal Jesús way Luʼumeʼ tu yeʼesaj Dioseʼ jeʼel u béeytal u beetkeʼ. Koʼox ilik jujunpʼéeliʼ:

Kʼaʼamkach iikʼoʼob: Juntéenjeakeʼ Jesús yéetel u apostoloʼobeʼ tiaʼanoʼob tu kʼáaʼnáabil Galilea ka káaj junpʼéel kʼaʼamkach iikʼ yéetel máan u buuloʼob. Teʼ súutukoʼ Jesuseʼ tu yeʼesaj le páajtalil yaan tiʼ u Taata utiaʼal u controlartik le iikʼoʼ (Colosasiloʼob 1:15, 16). Letiʼeʼ chéen tu yaʼalaj: «¡Mak a chiʼ! ¡Jetsʼkúuntaba!». Le iikʼ túunoʼ chʼéeni yéetel jetsʼlaji (Marcos 4:35-39).

Kʼojaʼaniloʼob: Yaʼab máak il le páajtalil yaan tiʼ Jesús utiaʼal u tsʼakik chʼóopoʼob, móochoʼob, le ku tsʼáaik ataque tiʼoboʼ, le yaan lepra tiʼoboʼ bey xan uláakʼ kʼojaʼaniloʼob. Le Bibliaoʼ ku yaʼalikeʼ «tu tsʼakaj xan tuláakal le máaxoʼob kʼojaʼanoʼoboʼ» (Mateo 4:23, 24; 8:16; 11:2-5).

Tu tsʼáaj baʼal jaantbil: Jesús xaneʼ tu yeʼesaj le páajtalil yaan tiʼ u Taata utiaʼal u yaʼabkuntik le jaanloʼ. Le Bibliaoʼ ku yaʼalikeʼ kaʼatéen tu tséentaj u milesil máakoʼob beyaʼ (Mateo 14:14-21; 15:32-38).

Le kíimiloʼ: Jesuseʼ tu kaʼa kuxkíintaj xan le kimenoʼoboʼ. Juntúul tiʼ letiʼobeʼ tsʼoʼok kanpʼéel kʼiinoʼob kíimik kaʼachi, lelaʼ tu yeʼesaj le páajtalil yaan tiʼ Jéeoba utiaʼal u kaʼa kuxkíintik máakoʼ (Marcos 5:35-42; Lucas 7:11-16; Juan 11:3-44).