‘Ako Yekova, mi ka kpara ni gbanga ha waĩ tipa undahe, ka mo agia nga ha ya? Watadu kpara foro mbiko pa zuu; ka mo abatasa nga re ya?’ (Abakuka 1:2, 3) Afugo Abakuka du du re, nangia wene kumba Mbori aima ida na ko. Ya mo gako kparakpee nayugo gupai nga ko aadunga na idapase te? Wa gu sa te! Mbori akido Abakuka nga regbo kinaho Ko naima siaha tipa ka digiso arungo.​—Abakuka 2:2, 3.

Ho mo watadu mbembedi gumero arungo ni, si taata tipa ka dakuti gupai nga Mbori namangapai dondoro, si naida ko mangipai ni ipo. Ono tie, Ziazia Kekeapai nakido rani nga: “Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.”​—2 Petero 3:9.

Barambeda! Yesu ayugu gupai nga kura papara riko aboro nika bi agu apai abi nikaa yugopa “digida rago.” (Matayo 24:3-42) Pa digiso ga Yesu sangbanebi ti gi gaani regbo re nayugo gupai nga Mbori nika digiso ga aboro arungo barambeda. *

Ono wai gu Mbori nika digiso arungo dunduko? Ho Yesu adu ni auru kpotosende, ko ayugu gu ome du Mbori na ni ka dia ga aboro arungo kusayo. Mo makianga bete akpiapai tipa gipai re.

Agberãngo: Ho Yesu na gako abawiriki adu ni bangiri Baime Gariraya, kere bavugumo aaida ka rindosi gayo kurungba. Ono Yesu ayugu gupai nga ko gbiati Bako na ome kurii agu agberãngo nga ga zegino. (AKorosaio 1:15, 16) Yesu apepai gbua taata nga: “Mo zéredi, ki ru zaa!” Sangbanaha angia gine? “Yuge ki kiti, rago ki zeredi azereda.”​—Marako 4:35-39.

Akaza: Aboro aima ino Yesu wenengai nga ko na ome beko ka husa airavurari na aboro ngbaramoni, gbiati agu aboro a naadu na ima-wiri-anya, ngbataka, watadu ai kura ngbatunga angbaramoni. ‘Ko ki husi agu yo dunduko naa kaza.’​—Matayo 4:23, 24; 8:16; 11:2-5.

Zingo Riahe: Yesu amangisunge na gu ome Bako afuhe fuko tipa ka kusa riahe ni bakerehe. Ziazia Kekeapai nayugoho nga ko arigi akutu aboro bara ue ti regbo gako sunge tungusapai auru kpotosende ane.​—Matayo 14:14-21; 15:32-38.

Kpio: Gu rengo nga Yekova na ome ka dia kpio kusayo ni yuguyuguhe rogo Ziazia Kekeapai yo tipa agu aboro biata Yesu azingisi yo be kpio. Boro sa bangbanda agu aboro ko azingisiyo aima dia arame biama ku rogo kpio yo.​—Marako 5:35-42; Ruka 7:11-16; Yoane 11:3-44.