1, 2. (a) Noa, Daniela, bona Iobu edia sivarai ese edena dala ai ita ia hagoadaia? (b) Edena nega ai Esekiela ese Esekiela 14:14 ia torea?

OI BE hekwakwanai haida hegeregere gorere, moni, o dagedage karadia oi haheaukalaia noho, a? Nega haida oi mamia Iehova ena hesiai gaukara oi moalelaia lasi, a? Bema oibe, Noa, Daniela, bona Iobu edia sivarai ese oi do ia hagoadaia. Idia be goevadae lasi, bona idia davaria hekwakwanai be hari ita davaria danu, bona idia be kahirakahira edia mauri idia haboioa. To Dirava idia badinaia noho, bona Dirava ena matanai abidadama bona kamonai karana dekenai idia be haheitalai namona.​—⁠Esekiela 14:12-14 duahia.

² Lagani 612 B.C.E. ai, Esekiela ese Babulonia dekenai atai ia noho sirina ia torea. * (Ese. 1:1; 8:1) Unai ia torea bena lagani 5 murinai, Ierusalema idia hadikaia​—⁠lagani 607 B.C.E. ai. Taunimanima  haida sibona be Noa, Daniela, bona Iobu edia kara idia tohotohoa dainai, idia mauri. (Ese. 9:1-5) Idia huanai be Ieremia, Baruku, Ebede Meleke, bona Rekaba taudia.

3. Inai stadi ai dahaka do ita herevalaia?

³ Hari danu, Iehova ese ia gwauraia maoromaoro taudia​—⁠Noa, Daniela, bona Iobu bamona​—⁠be inai tanobada dokona ai do idia roho mauri. (Apok. 7:9, 14) Dahaka dainai Iehova ese Noa, Daniela, bona Iobu ia gwauraia maoromaoro? Inai stadi ai ita ese (1) idia davaria hahetoho, bona (2) edia abidadama bona kamonai karana ita tohotohoa dalana do ita herevalaia.

4, 5. Noa be dahaka hekwakwanai ia davaria, bona iena sivarai amo dahaka ita dibaia?

⁴ Noa ia davaria hekwakwanai. Noa ena tubuna tau Enoka ena nega ai, taunimanima edia kara be dika. Bona Iehova dekenai “hereva dika rohorohodia” idia gwauraia. (Iuda 14, 15) Unai nega ai, kara dika be ia bada ia lao. Bona Noa ena nega ai, kara “dika be gabu ibounai dekenai.” Aneru dikadia be tanobada tauanina idia abia bona hahine idia adavadia. Bona idia havaraia natudia be idia dagedage bada. (Gen. 6:2-4, 11, 12) To Noa sibona be ia idau. “Noa be Iehova ese ia lalonamo henia. . . . Ia hahedinaraia ena nega ai idia noho taudia huanai ia be kerere lasi tauna. Noa be Dirava momokanina ida ia raka.”​—⁠Gen. 6:8, 9, NWT.

⁵ Unai siri amo Noa dekenai dahaka ita dibaia? Ita dibaia gauna be Abata ia do mai lasi neganai, Noa be lagani 70 o 80 sibona lalonai Dirava ida ia raka lasi, to kahirakahira lagani 600 mai kahana lalonai unai kara dika tanobadana dekenai ia noho! (Gen. 7:11) Noa ena nega ai, Dirava idia tomadiho henia taudia ma haida be lasi ia idia hagoadaia totona, toana be iena tadikaka taihu korikoridia danu be ia idia durua lasi. *

6. Edena dala ai Noa be boga-auka ia hahedinaraia?

⁶ Noa ia diba kara maoromaoro sibona ia karaia be hegeregere lasi. Unai dainai mai boga-auka ida “kara maoromaoro ia harorolaia” danu, unai amo taunimanima vairanai iena abidadama Iehova dekenai ia gwauraia hedinarai diba. (2 Pet. 2:5) Aposetolo Paulo ia gwau: “Iena abidadama amo ia ese tanobada ia hahemaoro henia.” (Heb. 11:7) Unai dainai taunimanima ese Noa idia kirikirilaia, idia dagedage henia, bona reana idia hagaria danu. To ia be taunimanima ia gari henia lasi. (Aon. 29:25) Oibe, iena abidadama dainai, Iehova ese ia dekenai boga-auka ia henia.

7. Noa be lagatoi ia karaia neganai, dahaka hekwakwanai ia davaria?

⁷ Noa be lagani 500 mai kahana lalonai Dirava ida ia raka murinai, Iehova ese ia hamaoroa lagatoi ta do ia karaia taunimanima bona animal ia hamauria totona. (Gen. 5:32; 6:14) Reana Noa ia laloa do ia auka unai bouti badana ia karaia totona! Danu, taunimanima ese ia do idia kirikirilaia bona dagedage henia. To, Noa be mai abidadama ida Dirava ena oda ibounai ia badinaia. Oibe, “unai hegeregerena ia karaia.”​—⁠Gen 6:22, NWT.

8. Edena dala ai Noa be Iehova dekenai ia tabekau?

⁸ Noa be tauanina dalanai iena adavana bona natudia do ia naria danu. Oibe, Abata ia do vara lasi neganai, taunimanima be idia hekwarahi bada aniani idia hadoa totona, bona Noa be unai ia karaia danu. (Gen. 5:28, 29) Herevana dahaka, ia be Dirava ia badinaia noho. Reana lagani 40 o 50 bamona lalonai Noa ese lagatoi ia haginia, unai nega ai danu  ia ese Dirava ia abidadama henia. Bona Abata murinai danu, lagani 350 lalonai unai ia karaia. (Gen. 9:28) Abidadama bona kamonai karana dekenai Noa be haheitalai namona!

9, 10. (a) Edena dala ai Noa ena abidadama bona kamonai karana ita tohotohoa diba? (b) Dirava ese iena taravatu idia badinaia taudia be edena bamona ia laloa?

⁹ Noa ena abidadama bona kamonai karana be edena bamona do ita tohotohoa? Bema Dirava ena kara maoromaoro taravatudia ita badinaia, Satani ena tanobada amo do ita gini siri, bona Basileia do ita atoa guna. (Mat. 6:33; Ioa. 15:19) Unai ita karaia dainai tanobada taudia be ita idia ura henia lasi. Hegeregere, headava bona mahuta hebou karana dekenai Dirava ena taravatu ita badinaia dainai, ita hadikaia herevadia idia halasia diba. (Malaki 3:17, 18 duahia.) Noa bamona, namona be Iehova ita gari henia, to taunimanima lasi. Badina ia sibona ese ita dekenai mauri hanaihanai do ia henia.​—⁠Luka 12:4, 5.

¹⁰ To oi be edena bamona? Haida ese oi idia kirikirilaia o emu ladana idia hadikaia, eiava moni ena hekwakwanai ese emu abidadama Iehova dekenai ia tohoa neganai, Dirava ida do oi raka noho, a? Bema Noa ena abidadama bona kamonai karana oi tohotohoa, do oi abia dae momokani Iehova be oi do ia durua.​—⁠Fili. 4:6, 7.

11. Babulonia ai, Daniela bona ena turadia toi be dahaka hekwakwanai idia davaria? (Laulau ginigunana herevalaia.)

¹¹ Daniela ese ia davaria hekwakwanai idauidau. Daniela be Babulonia dekenai idia guia, unai siti ai kaivakuku tomadiho henia bona meamea karana be bada. Danu, Babulonia taudia be Iuda taudia idia ura henia lasi, bona idia bona edia Dirava, Iehova, idia kirikirilaia. (Sal. 137:1, 3) Unai dainai abidadama Iuda taudia bona Daniela idia lalohisihisi bada! Ma danu, taunimanima ese ia bona ena turadia toi​—⁠Hananaia, Misaela, bona Asaraia​—⁠edia kara idia itaia namonamo, badina king ena ruma naria gaukarana totona treinini do idia abia. Bona King ena aniani do idia ania. To, do idia ania bona inua gaudia ese hekwakwanai ia havaraia, badina Daniela ia ura lasi “unai gaudia do ia abia . . . , unai amo ia goeva diba.”​—⁠Dan. 1:5-8, 14-17, NWT.

12. (a) Daniela be edena kara namodia ia hahedinaraia? (b) Dirava ese Daniela be edena bamona ia laloa?

¹² Daniela be hekwakwanai ma ta ia davaria, matamanai ia dekenai unai be hekwakwanai badana lasi. Oibe, reana iena aonega be bada dainai, king ese ia dekenai hahenamo momo ia henia. (Dan 1:19, 20) To ia be ia hekokoroku o sibona ena lalohadai ia badinaia lasi. Ia manau bona nega ibounai Iehova ia hanamoa. (Dan. 2:30) Momokani, Daniela be tau matamata neganai, Iehova ese ia be Noa bona Iobu ida ia gwauraia maoromaoro bona idia ita tohotohoa diba. Dirava ia diba Daniela be ia do ia badinaia. Oibe, Daniela be Dirava ia badinaia bona kamonai henia ela bona ia mase. Momokani, iena mauri lagani be reana 90 bamona neganai, Dirava ena aneru be ia dekenai ia gwau: “Daniela, Dirava ia lalokau henia bada oi.”​—⁠Dan. 10:11.

13. Edena dala ai Daniela ese Iuda taudia ia durua?

¹³ Dirava ese Daniela ia lalonamo henia dainai, Babulonia bona Mede-Parasa edia lohia henunai ia be ofesa tauna badana ai ia lao. (Dan. 1:21; 6:1, 2) Reana Iehova be unai ia karaia, unai amo Daniela ese iena bese taudia ia durua diba, Iosepa ese Aigupito ai bona Eseta bona Morodekai ese Parasa ai idia karaia bamona. * (Dan. 2:48) Unai nega ai idia guia Iuda taudia ese Iehova ena heduru idia itaia neganai, idia moale bada, Esekiela danu!

14, 15. (a) Edena dala ai iseda nega be Daniela ena nega hegeregerena? (b) Tama sina be Daniela ena tama sina amo dahaka idia dibaia?

 ¹⁴ Daniela ena abidadama bona kamonai karana be edena bamona do ita tohotohoa? Hari ita noho tanobadana ai matabodaga karana bona tomadiho koikoi be bada. Taunimanima momo be Babulonia Badana, tanobada ena tomadiho koikoi ibounai unai, ese ia hakaudia kerere. Baibel ese ia gwauraia, “demoni edia noho gabuna.” (Apok. 18:2) To, taunimanima idia itaia ita be idau dainai, ita idia kirikirilaia. (Mar. 13:13) Unai dainai Daniela bamona, namona be iseda Dirava, Iehova, kahirakahira ita lao. Bema mai manau ida Ia dekenai ita tabekau, iena matanai ita be do “kohu namodia” bamona.​—⁠Hag. 2:7, NWT.

¹⁵ Tama sina be Daniela ena tama sina edia haheitalai idia tohotohoa diba. Edena dala ai? Daniela ia maragi neganai, Iuda ai kara dika be bada, to ia ese Dirava ia lalokau henia. Unai be ia vara kava lasi. To ia hahedinaraia iena tama sina be ia idia hadibaia namonamo. (Aon. 22:6) Danu, Daniela ena ladana ena anina be “Lauegu Hahemaoro Tauna be Dirava,” unai ese ia hahedinaraia iena tama sina be Dirava idia lalokau henia. Unai dainai tama sina e, emui natudia dekenai umui hesiku haraga lasi, to mai haheauka ida umui hadibadia noho. (Efe. 6:4) Danu, idia ida bona idia totona umui guriguri. Edia kudouna ai Baibel ena hereva momokani oi atoa neganai, Iehova ese emui hekwarahi do ia hanamoa.​—⁠Sal. 37:5.

16, 17. Iobu ena mauri lalonai dahaka ia vara?

¹⁶ Iobu ese ia davaria hekwakwanai idauidau.  Iobu ena mauri lalonai gau momo idia idau. Hahetoho ia do davaria lasi neganai, “dina daekau kahana taudia ibounai edia huanai, Iobu sibona be tau bada herea.” (Iobu 1:3) Ia be taga tauna, momo be ia idia diba bona idia matauraia bada. (Iobu 29:7-16) To, Iobu ia hekokoroku lasi o ia laloa lasi Dirava ena heduru be anina lasi. Unai ita diba badina Iehova ese ia gwauraia “lauegu hesiai tauna,” ma ia gwau: “Ia be kerere ta lasi, bona kara maoromaoro tauna. Ia ese lau Dirava dekenai ia gari, bona kara dika dekena amo ia siri momokani.”​—⁠Iobu 1:8.

¹⁷ Daudau lasi, Iobu ena mauri ia idau haraga. Ia be ia ogogami momokani bona ia lalometau bada danu. Iobu dekenai unai ia vara badina Satani, ladana hadikaia tauna unai, be Iobu ia samania koikoi ia gwau ia be sibona ena ura gaudia abia totona Dirava ia tomadiho henia. (Iobu 1:9, 10 duahia.) Iehova be unai samania hereva koikoina ia laloa maragi lasi. To, Iobu dekenai maoro ia henia iena  Dirava badinaia karana ia hamomokania totona, unai amo do ia hahedinaraia ia be lalokau dainai Dirava ia tomadiho henia.

18. (a) Iobu ena sivarai ese edena bamona oi ia hagoadaia? (b) Iehova ese Iobu ia kara henia dalana amo dahaka ita dibaia?

¹⁸ Iobu hahisia totona, Satani ese hahetoho momo ia havaraia, bona ia ura Iobu ia abia dae ia dekenai ia vara gaudia ibounai be Dirava ese ia havaraia. (Iobu 1:13-21) Bena Iobu ena turana toi idia mai bona Iobu hadikaia herevadia idia gwauraia, idia gwau ia be kara dika ia karaia dainai Dirava ese ia panisia! (Iobu 2:11; 22:1, 5-10) To, Iobu be Dirava ia badinaia noho. Oibe, nega haida Iobu ia laloa namonamo lasi bona ia hereva, to Iehova ese ia mamia hisihisina ia lalopararalaia. (Iobu 6:1-3) Dirava ia itaia Iobu be ia lalohisihisi bada, to ia Ia rakatania lasi, herevana Satani ese Iobu dekenai hahetoho idauidau ia havaraia bona ia samania koikoi. Unai hahetoho ibounai idia ore neganai, Iehova ese guna Iobu dekenai idia noho gaudia be nega rua amo ia habadaia, bona lagani 140 ma ia mauri. (Iam. 5:11) Unai nega ai, Iobu be Iehova ia do badinaia noho. Edena bamona unai ita diba? Iobu ia mase bena lagani 100 momo idia hanaia murinai, Esekiela ese inai stadi ena siri badana ia torea.

19, 20. (a) Edena dala ai Iobu ena abidadama bona kamonai karana ita tohotohoa diba? (b) Ma haida ita kara henia neganai, edena dala ai Dirava ena hebogahisi karana ita tohotohoa diba?

¹⁹ Iobu ena abidadama bona kamonai karana be edena bamona do ita tohotohoa? Herevana iseda noho dalana be edena bamona, to gau badana be iseda mauri lalonai Iehova ita atoa guna, ia ita abidadama henia, bona mai kudouna ibounai ida ia ita kamonai henia. Oibe, badina momo dainai unai ita karaia diba, Iobu bamona lasi! Mani oi laloa: Hari, ita be Satani bona ena koikoi karadia ita diba. (2 Kor. 2:11) Iobu bukana ia noho dainai, Dirava ese hisihisi ia koua lasi ena badina ita diba. Daniela ena peroveta herevana amo, ita diba Dirava ena Basileia be gavamani korikorina bona Keriso Iesu ese ia lohiaia. (Dan. 7:13, 14) Bona ita diba unai Basileia ese kahirakahira hisihisi ibounai do ia haorea momokani.

²⁰ Iobu ena sivarai ese ita ia hagoadaia danu hisihisi idia davaria noho tadikaka taihu ita hebogahisi henidia totona. Iobu hegeregerena, reana haida be do idia laloa namonamo lasi bona hereva. (Had. 7:7) Namo lasi idia ita hahemaoro henia haraga, to edia kara ita lalopararalaia bona ita hebogahisi henia. Unai dala amo iseda lalokau bona hebogahisi Tamana, Iehova, ita tohotohoa.​—⁠Sal. 103:8.

21. Petero Ginigunana 5:10 ese edena bamona ita ia durua Noa, Daniela, bona Iobu edia sivarai ita laloatao totona?

²¹ Ena be Noa, Daniela, bona Iobu be nega idauidau ai idia noho bona edia mauri dala be idauidau, to idia davaria hahetoho idia haheaukalaidia. Edia mauri sivaraidia amo ita ese aposetolo Petero ena hereva ita laloatao, ia gwau: “Nega sisina lalonai hisihisi umui abia murinai, Dirava ese emui treinini do ia hagugurua, ia ese umui do ia hagoadaia bona umui do ia haginia goada.”​—⁠1 Pet. 5:10.

22. Stadi gabena ai dahaka do ita herevalaia?

²² Petero ese ia torea herevana amo Iehova be ita ia hadibaia, ia ese ena hesiai taudia do ia durua bona hagoadaia. Unai hereva ese hari Dirava ena taunimanima ia hagoadaia danu. Ita ibounai ita ura Iehova ese ita do ia hagoadaia bona iseda tomadiho karadia ita goadalaia. Unai dainai ita ura Noa, Daniela, bona Iobu edia abidadama bona kamonai karana ita tohotohoa! Stadi gabena ese do ia hahedinaraia, unai tatau be Iehova idia badinaia, badina ia idia diba namonamo. Oibe, Dirava ia ura do idia karaia gaudia ibounai “idia lalopararalaia.” (Aon. 28:5, NWT) Bona unai ita karaia diba danu.