1, 2. (a) Ngatta makala ittam tu sikan na nono ta ehemplo da Noe, Daniel, anni Job? (b) Anni i situasion turi ta nitura ni Ezekiel i uvovug ira ta Ezekiel 14:14?

PROBLEMADU ka kari megafu ta taki, finansial, onu kapeppersigi? Nu mittan, marigatakka kari nga mapattalupaddian i pagayayya mu ta passerbi kani Jehova? Nu kunnatun, makala tu sikan na nono ta ehemplo da Noe, Daniel, anni Job. Imperfekto ira, anna neparubang ira ta kapurueba ira nga meparubang nittam, nga nu mittan mamappeligro ta inango. Ngem, ariadda nibbattan i integridadda. Nabbalin ira tu modelo ta pangurug anna pattuppal ta arubang na Dios.​—Bibbigan i Ezekiel 14:12-14.

² Nitura ni Ezekiel ta Babilonia i uvovug ira ta tema nga teksto tam turi 612 B.C.E. * (Eze. 1:1; 8:1) Tatun nga tiempo, aranni ngana i neprofesiya nga kadaral na apostata nga Jerusalem, nga nesimmu turi ta 607 B.C.E. Pilippiga laman i nangipasingan tu kualidad ira  nga gitta da Noe, Daniel, anni Job yatutta namarkan ira ta kapaliag. (Eze. 9:1-5) Nelagum tatun da Jeremias, Baruc, Ebed-melec, anna i Rekabita ira.

3. Anni i ikonsidera tam taw nga artikulo?

³ Kunnaw gapa ta maddaggun, danuri ikonsidera laman ni Jehova nga awan tu kapaliwatadda​—gitta da Noe, Daniel, anni Job—​i mamarkan ta kapaliag sonu madaral i maddaggun nga sistema na ganna-gannug. (Nep. 7:9, 14) Ikonsidera tam gafu nu ngatta inusa ni Jehova danatun nga lallaki bilang ehemplo na kinatunung. Durante nga paguruvovugattam i kada tadday, maffokus ittam ta (1) kapurueba ira nga inarubadda anna (2) nu kunnasi tam maparigan i pangurug anna pattuppalda.

4, 5. Anni ira nga kapurueba i neparubang kani Noe, anna ngatta kappabbaw yaw nga pagattam?

⁴ Kapurueba ira nga inarubang ni Noe. Ta tiempo na ginafuan ni Noe nga si Enoc, talaga ari ngana nga makadios i totolay. Makkagi paga lagu ira tu “marakay” nga ganna-gannug kontra kani Jehova. (Jud. 14, 15) Naggrabe i kinavayolente. Kakuruganna, ta kaggawan ni Noe, “napannu i davvun tu kinavayolente.” Nabbaggi tu tolay i marake ira nga anghel, nanga tu attawada, tapus naggaka ira tu vayolente, anna mestisu nga ána. (Gen. 6:2-4, 11, 12) Ngem nerumu-ruma si Noe. “Nakaleg tu fabor si Noe ta paningan ni Jehova. . . . Napakurugna nga awan tu pakkuranganna ta nallatanan na kakontemporariona ira. Liminakag si Noe kavulu i kurug nga Dios.”​—Gen. 6:8, 9.

⁵ Ikonsidera i kebalinan natun ira nga uvovug meyannung tatun nga matunung nga tolay. Angngariganna, ari liminakag kavulu na Dios si Noe nige na Delubio ta 70 onu 80 nga dagun laman​—i kapaddu na inango na totolay ta maddaggun. Nattolay yayya tatun nga tiempo ta ma-600 dagun! (Gen. 7:11) Ari tu kagitta tam ta maddaggun, awan tu kakavvuluna nga kapangngurug​—manawag nga maski i wawwaragina—​nga massuporta sa ta espiritual. *

6. Kunnasi nipasingan ni Noe nga talaga masikan i nonona?

⁶ Ari kontentu si Noe nga basta mapeggan tu makasta nga pattolay. Magutu yayya nga “nangilayyagayya ta matunung nga attolay,” ta publiko nga pangilammuyag tu pangurugna kani Jehova. (2 Ped. 2:5) “Megafu ta angngurug na, sinentensian na i mundo,” kunni apostol Pablo. (Heb. 11:7) Megafu tatun, neparubang si Noe ta panguyu-uyaw anna pangokkontra, anna peligro na kinavayolente. Ngem ari yayya nga ‘namippig ta arubang na totolay.’ (Prov. 29:25) Napeggan lallagu yayya tu sikan na nono nga iyawa ni Jehova ta matalo ira nga aripanna.

7. Anni ira nga kapurueba i neparubang kani Noe ta pamaddena tu arka?

⁷ Kabalin liminakag ni Noe kavulu i Dios ta maturu nga lima nga siglo, nikiddaw ni Jehova nga mamadday yayya tu arka tapenu mapaliag i totolay anna aya-ayam. (Gen. 5:32; 6:14) Talaga mariga yatun nga proyekto nga pamadday tu daka-dakal nga arka. Siguradu nga ammu ni Noe nga mas paga nga ma-uyu-uyaw anna makokkontra yayya megafu tatun. Ngem, sinuppalna yatun megafu ta pangurugna. “Kunnatun mismu i kingnguana.”​—Gen. 6:22.

8. Kunnasi nipasingan ni Noe i pattalona nga si Jehova i mangiyawa ta material nga pakawaganna?

⁸ Tadday paga nga kapurueba kani Noe i pangiyawa ta material nga pakawagan na atawa anna ánana. Nige na Delubio, kawagan na totolay nga mappursigi tapenu makaleg tu makan, anna ari mefuera tatun si Noe. (Gen.  5:28, 29) Maski nu kunnatun, nisentrona i pattolena ari ta material nga gannug, nu ari, ta Dios. Maski paga durante nga mamadday yayya tu arka, nga awayyana tu mabbayag tu 40 onu 50 dagun, nakafokus lagapa yayya ta espiritual. Nibala-balayunna nga kuan yatun ta tumunug nga 350 dagun kabalin na Delubio. (Gen. 9:28) Kakkasta nga ehemplo na pangurug anna pattuppal!

9, 10. (a) Kunnasi tam maparigan i pangurug anna pattuppal ni Noe? (b) Kunnasi imammatan na Dios danuri mangitaddag ta estandartena?

⁹ Nu kunnasi tam maparigan i pangurug anna pattuppal ni Noe. Makua tam yatun gukaban na pangitaddag ta kinatunung na Dios, ari pakiparte ta mundo ni Satanas, anna pamagollu ta interes na Pappatulan. (Mat. 6:33; Juan 15:19) Siguradu nga ari makapagayayya ta mundo i klase na pattoletam. Maski i taddag tam ta maddaggun ta dorob na Dios meyannung ta pagatawa anna moralidad, ay narresulta tu negatibo nga report ta karuan nga lugar. (Bibbigan i Malakias 3:17, 18.) Ngem kagitta ni Noe, maganassing ittam kani Jehova, ari tu ta totolay. Ammu tam nga yayya laman i makeyawa tu mannanayun nga inango.​—Luc. 12:4, 5.

¹⁰ Ngem kunnasi ka gapa? Kanayukka kari nga ‘lumakag kavulu i Dios,’ maski nu ma-uyaw onu makritika ka onu purueban na ziga i pangurug mu ta Dios bilang i Minangngiyawa? Nu parigammu i pangurug anna pattuppal ni Noe, makapakkomfiansa ka nga tangngallannaka ni Jehova.​—Fil. 4:6, 7.

11. Anni ira nga dakal nga kapurueba i neparubang kani Daniel anna ta tallu nga kakavvuluna ta Babilonia? (Innan i letratu ta gafu na artikulo.)

¹¹ Kapurueba ira nga inarubang ni Daniel. Nattolay si Daniel bilang aripan ta Babilonia, siudad nga napannu tu idolatria anna espiritismo. Alinno paga i paningan na Babilonio ta Judio ira, uyu-uyawadda ira anna i Diosda nga si Jehova. (Sal. 137:1, 3) Talaga mataki yatun ta Judio ira nga kagitta ni Daniel! Nesentro i atension sa anna ta tallu nga kakavvuluna​—da Hananias, Misael, anni Azarias—​megafu ta masanay ira nga masserbi ta patul. Metunnag nira maski i kanadda. Kakuruganna, nabbalin tu isyu i makan anna menum megafu ta manaki ni Daniel nga “parittan i baggina tu maka-makan na patul.”​—Dan. 1:5-8, 14-17.

12. (a) Anni i makasta ira nga kualidad i nipasingan ni Daniel? (b) Kunnasi minammatan ni Jehova si Daniel?

¹² Egga paga i tadday nga kapurueba ni Daniel, nga gittana ari tu mariga. Malalaki yayya, yatutta niddan yayya na patul tu espesial ira nga pribilehio. (Dan. 1:19, 20) Imbes nga mabbalin tu arogante anna aru ammuna, nattalupaddian nga minappakalinno anna ammuna i limitasionna, nga kanayunna nga iyawa i dayaw kani Jehova. (Dan. 2:30) Kakuruganna, abbing paga laman si Daniel turi ta nibilang yayya ni Jehova nga mepangngo nga ehemplo na kinatunung, kavulu da Noe anni Job. Egga kari i basehan na pakkomfiansa na Dios kani Daniel? Wan, egga! Nattalupaddian nga matalo anna minattuppal si Daniel adde ta ultimo na inangona. Kakuruganna, ma-100 ngana i dagunna turi ta meddu nga kinagi na anghel na Dios sa: “O Daniel, sikaw nga kuruga nabala-balor nga lalaki.”​—Dan. 10:11.

13. Kunnasi nga nabbalin tu bendision si Daniel ta kasi-Judiona?

¹³ Megafu ta fabor na Dios, nabbalin tu atannang nga ofisial si Daniel ta pammaguray na Babilonia anna Medo-Persia. (Dan. 1:21; 6:1, 2) Posible nga minaniobra ni Jehova i ganna-gannug tapenu mabbalin tu bendision si Daniel ta mismu nga totolena, kagitta da Jose ta Ehipto anna da Ester anni Mardokeo ta Persia. * (Dan. 2:48) Fugurammu nu  kunnasi nga makapabannay yatun ta Judio ira nga aripan, nelavu si Ezekiel, nga masingan i pakapangngua ni Jehova ta ganna-gannug!

14, 15. (a) Anni ira i negittan na situasiottam kani Daniel? (b) Anni i magigiammu na magana ira ta magana ni Daniel?

¹⁴ Nu kunnasi tam maparigan i pangurug anna pattuppal ni Daniel. Ta maddaggun, kagitta tam i dayu ta mundo nga i moralidad anna espiritualidadna ay zinaral na Babilonia nga Dakal, i imperio na falsu nga relihion, anna nabbalin tu “demonio ira i maddian ngana sa.” (Nep. 18:2) Yatutta, manawag nga nerumu-ruma ittam, anna puntiria ittam na panguyu-uyaw. (Mar. 13:13) Kagitta gafu ni Daniel, mawag nga mas umaranni ittam paga kani Jehova nga Dios tam. Nu sigga-pakalinno anna sigga-paran ittam nga mattalo sa, mabbalittam gapa nga mabalor ta paninganna.​—Hag. 2:7.

¹⁵ Egga i magigiammu na magana ira ta ehemplo na magana ni Daniel. Anni? Maski grabe i kinamarake ta Juda turi ta kabbing ni Daniel, ziminakal lagapa yayya nga egga i ayana ta Dios. Siempre, ari yaw nga nekanna laman. Ipasingan natun i makasta nga passanay na magana. (Prov. 22:6) Maski i ngagan ni Daniel, nga kayàna kagian “I Ukum Ku ay i Dios,” ay mangipasingan nga minagganassing ta Dios i maganana. (Dan. 1:6, ftn.) Yatutta, sikamu nga magana, ariannu molang ta ánanu, mapasensia lallagu nga tudduan ira. (Efe. 6:4) Makimallo kavulu ira anna ipakimallo ira. Nu mappursigi ka nga ipatalatto i kinakurug ta Biblia ta giffutuadda, malawa mu i ara-aru nga bendision ni Jehova.​—Sal. 37:5.

16, 17. Anni ira i dakal nga panguli nga naekspiriensa ni Job?

¹⁶ Kapurueba ira nga neparubang kani Job. Daka-dakal i nangulian na pattolay ni Job. Nige na kapuruebana, yayya “i kadakallan ta ngamin nga tolay na Zigattu.” (Job 1:3) Mariku, prominente, anna talaga respetadu yayya. (Job 29:7-16) Ngem, maski kunnatun, ari nappakatannang si Job onu nakatageno nga arianna mawag i Dios. Ta kakuruganna, tinukoy yayya ni Jehova nga “i aripakku,” anna kunna paga: “Matunung yayya nga tolay, maganassing ta Dios anna arayyuanna i marake.”​—Job 1:8.

¹⁷ Ta ababba laman nga tiempo, dakal i pinanguli na pattolay ni Job. Nelammag yayya ta grabe nga ziga anna paddaddam. Ammu tam nga i rason ay i minammara-parake nga si Satanas, nga laddug nga inakusanna si Job nga maddayaw ta Dios megafu ta egga i pammakapiananna. (Bibbigan i Job 1:9, 10.) Ari inalsa ni Jehova yatun nga marake nga akusasion. Niddanna lallagu si Job tu tiansa tapenu  mapakurug i integridadna, nga negamu i paddayona ta marenu anna ari makasarili nga futu.

18. (a) Anni i nagustuammu meyannung ta integridad ni Job? (b) Anni i ipasingan na pinakilallang ni Jehova kani Job meyannung Sa?

¹⁸ Namalattuag si Satanas tu natturunug nga nepallo nga pangatake kani Job, nga nappagabbo kani Job nga Dios i mapaliwa. (Job 1:13-21) Tapus zimittal i tallu nga appe nga mamanna-bannay anna mataki i kinakkagida kani Job, nga palawanadda nga iyawa laman na Dios nu anni i mepangngo sa! (Job 2:11; 22:1, 5-10) Ngem, pinattalupaddian lagapa ni Job i integridadna. Wan, egga ira i tiempo nga pinaliwana gapa i Dios, ngem nalippawa ni Jehova i taki nga mataga-tageno ni Job. (Job 6:1-3) Nasingan na Dios i talaga marraddam nga lalaki nga ari vuluvuga nallikug Sa, maski nu gittana sinomba ni Satanas si Job tapus verbal nga nikuttu-kuttagna gukaban na laddug ira nga insulto. Kabalin natun nga kapurueba, zinoble ni Jehova i dati nga pakkukua ni Job, anna nammungan paga tu 140 dagun i pattolena. (Sant. 5:11) Tatun nga tiempo, tulu-tuloy nga niyawana i eksklusibo nga debosionna kani Jehova. Kunnasi tam makasiguradu? Piga siglo ngana nga natay si Job turi ta nitura ni Ezekiel yaw nga tema nga teksto tam.

19, 20. (a) Kunnasi tam maparigan i pangurug anna pattuppal ni Job? (b) Ta pakilallattam ta tanakuan, kunnasi tam mepasingan i allo na Dios?

¹⁹ Nu kunnasi tam maparigan i pangurug anna pattuppal ni Job. Maski anni paga i situasiottam, kanayun nakuan nga nakasentro i pattoletam kani Jehova, nga napafutuan nga mattalo anna mattuppal gukaban na buu nga futu. Siguradu nga mas aru i rasottam nga kuan yatun anne kani Job! Daddamman: Aru ngana i ammu tam meyannung kani Satanas anna ta taktikana ira. (2 Cor. 2:11) Megafu ta libru nga Job, nammuattam nu ngatta ipamavulun na Dios i ziga-riga. Ta profesiya ni Daniel, nalippawa tam nga i Pappatulan na Dios ay interu-mundo nga gobiernu nga pammagurayan ni Cristo Jesus. (Dan. 7:13, 14) Ammu tam nga aranni ngana nga permanente nga pangultimuan na Pappatulan i ngamin nga ziga.

²⁰ Nituddu paga na ekspiriensa ni Job i pakawagan nga ipasingan i allo ta kasi-Cristiano tam nga magattattam tu ziga-riga. Kagitta ni Job, egga i tiempo nga mamaliwa gapa ira. (Ecl. 7:7) Ngem imbes nga ukuman ira, alippawatattam nakuan ira anna ikallo. Nu kunnatun, maparigattam i minaggiddu anna minangngikallo nga Yama tam, si Jehova.​—Sal. 103:8.

21. Kunnasi ipasingan na 1 Pedro 5:10 i nesimmu ta pattolay da Noe, Daniel, anni Job?

²¹ Maski nattolay ta nadduruma nga tiempo anna sirkumstansia da Noe, Daniel, anni Job, inattammadda i kapurueba nga neparubang nira. Iparaddam na istoria na pattoleda i kinagi ni apostol Pedro: “Kabalin na manganannuan nga pazziga-riga nu, i Dios nga paggafuan na ngamin nga allo . . . . Yaya mismu i mamasikan anna mamakaladda ta angngurug nu, ta yaya i nagagal nikamu tu mesipo ta mannanayun nga dayaw.”​—1 Ped. 5:10.

22. Anni i ikonsidera tam ta tumunug nga artikulo?

²² Gukaban na nainspiran nga uvovug ni Pedro, siniguradu ni Jehova nga patuyaggan anna pasikannanna i aripanna ira. Meyaplika gapa yaw nga uvovug ta totolay na Dios ta maddaggun. Karagatattam ngamin gafu nga mapasikan ni Jehova anna mattalupaddian nga matuyag ta paddayaw tam. Yatutta, kayà tam parigan i pangurug anna pattuppal da Noe, Daniel, anni Job! Kagitta na magigiammu tam ta tumunug nga artikulo, i rason ta integridadda ay talaga ammammuda si Jehova. Ta kakuruganna, ‘nalippawada i ngamin’ nga mekiddaw nira. (Prov. 28:5) Kunnatun gapa nittam.