Tembwinineni Likulahelo na Kwononoka kwa Nowa na Ndanyele na Yombi
‘Ngwe Nowa na Ndanyele na Yombi, vakelemo, ngwe vamenene lika myonyo yavo.’—EZEKI. 14:14.
MYATHO: 89, 119
1, 2. (a) Mwafwa vika tunapande kutembwinina kuthimpa kwa Nowa na Ndanyele na Yombi? (b) Ezekiyele wakele kuli omwo wathonekele majwi ali ku Ezekiyele 14:14?
MULI mu vyetheko vya kufwa ngwe kuvinja na kujeneka vimbongo nambe kumipaketha ndi? Kukamikaluwila kupwa va kuvwahelela omwo muli na kupangela Yehova ndi? Nga mukemwo, cho tembwinineni kuthimpa kwa Nowa na Ndanyele na Yombi. Navo vapwile va kujeneka kulumbunuka, cho valiwanene na vukalu vuje vutukaliwana navwo. Thimbu imo, vashakele kuvathsiya. Nameme ngocho, vapwile va kulongwa, cho vanapu myanja yaivwa ya kukala na likulahelo na kwononoka ku mesho a Njambi.—Tandeni Ezekiyele 14:12-14.
2 Ezekiyele wathonekele echi chithoneka hanemana chilongetha chetu cha lelo mu 612 B.C.E te ali mu Mbambilone. * (Ezeki. 1:1; 8:1) Thimbu ivapolofwetele ya kunyongetha Yelusalema, muje mwashulile manene vaka-kutengulukila Njambi, yakele muyehi. Eyi nganda vainyongethele mu 607 B.C.E. Ha thimbu oyo, kwakele lika vanu vavandondo va kulongwa vaje vamwethele vifwa vyakele navyo Nowa na Ndanyele na Yombi, cho vovokele. (Ezeki. 9:1-5) Ava vanu vapwile Njelemiya na Mbaluke na Evendemeleke na Valekave.
3. Tuthimutwiya vika muno mu chilongetha?
3 Mu ngila imo lika, vanu vaje vali na kupangela Yehova mu kulongwa, ngechi mwa Nowa na Ndanyele na Yombi vakevo lika vakovoka omwo kano kaye kakavi kakanyonga. (Kujo. 7:9, 14) Tuchithimutwiyeni vyuma vyalingithile Yehova apangethe ava vanalume va kulongwa kupwa myanja yaivwa kuli yetu. Omwo tuthimutwiya hali umo na umo wavo, tushaka tumone (1) vukalu vwaliwanene navwo nomwo (2) mutwathela kutembwinina likulahelo na kwononoka kwendi.
NOWA WAPWILE WA KULONGWA NA KWONONOKA HA MYAKA YA KUTUVAKANA 900
4, 5. Vukalu muka vwaliwanene navwo Nowa, cho mwafwa vika kukoletha kwendi kunapu kwa kukomoketha?
4 Vukalu vwaliwanene navwo Nowa. Mu thimbu yayoyele kukulwila ya Nowa, Inoke, vanu vavangi vakele na vilinga vyavivi. Ava vanu vakele na ‘kushaula’ Yehova. (Yunda 14, 15) Vukenya vwatumine manene. Mu thimbu yayoyele Nowa, ‘vuvi vwashulile hano hathi hoshe.’ Tungelo vavavi valimukile vanu na kwambata vanakathzi, cho vakitile navo vana vavatumbwile ngwavo makithikithi. (Kusha. 6:2-4, 11, 12) Oloni Nowa wakele na futithi yaivwa. Cho “Shukulu Kalunga wavwahelele na Nowa. . . . Nowa wapwile munu wa vuthunga, kawanene ha kumuvayethela ha kati ka vanu vaje vayoyele navo ha thimbu ije, cho lalo mu kuyoya kwendi wendele na kulitombola na Njambi.”—Kusha. 6:8, 9.
5 Awa majwi atulongethako vyuma vimo hali Nowa, munalume wa kulongwa. Nowa kayoyele lika myaka 70 nambe 80, ije ivali na kuyoya vanu ano matangwa, oloni wayoyele na vanu vavavi ha myaka ya kweta ku 600. (Kusha. 7:11) Ha thimbu oyo, kukwakele chikungulukilo kuje wapandele kukalitakametha na vakwavo ku sipilitu nambe kukala na vayayendi nambe vishongo vendi va kulikwatathana navo ku sipilitu. *
6. Nowa wamwethele vati kuthimpa?
6 Nowa kakelele lika mbunge kukukala na futithi yaivwa. Oloni wathimpile ‘mu kwambulula vuthunga’ ku mbunga vya likulahelo lyendi kuli Yehova. (2 Petu. 2:5) Kapositolo Paulu wathonekele ngwendi: ‘Ha kukulahela, Nowa . . . wahithile kaye koshe.’ (Heve. 11:7) Mu kulinga ngocho, Nowa vakele na kumushaula na kumulwitha, vithimbu vimo vashakele kumuthsiya. Oloni ‘kathzivilile vanu lyova.’ (Vithi. 29:25) Yehova wamukwathele kupwa wa kuthimpa ngwe mwakakwathela vangamba vendi voshe va kulongwa.
7. Vukalu muka vwaliwanene navwo Nowa omwo wakele na kushonga vwato?
7 Hanima ya kwenda na Njambi ha myaka ya kutuvakana 500, Yehova walekele Nowa ngwendi ashonge vwato mangana ovole vanu na tuthitu. (Kusha. 5:32; 6:14) Chipangi cha kushonga vwato chapwile chachikalu, mwafwa waliwanene na vyetheko vyavingi. Nowa wathzivukile ngwendi omwo apanga chije chipangi vamushaula na kumulwitha. Oloni likulahelo lyendi lyamukwathele atwaleleleho kupanga chipangi chendi. “Walingile vyoshe vije vyamushikile Njambi.”—Kusha. 6:22.
8. Nowa wamwethele vati ngwendi wakulahelele manene Yehova uje wapwa Muka-kwana?
8 Vukalu vukwavo vwaliwanene navwo Nowa vwapwile vwa kuwanena nanga yendi vukwathi vwa ku muvila. Thimbu kanda livathzi lije, vanu vakele na kupanga na ndthzili athina vawane vyakulya, cho Nowa nendi wapangele na ndthzili. (Kusha. 5:28, 29) Nameme ngocho, kakele manene mbunge ku vyuma vya ku muvila, oloni wakele manene mbunge ku chipangi cha Njambi. Chipangi cha kushonga vwato hamo chambatele myaka 40 nambe 50, oloni Nowa watwaleleleho kukanyama ku sipilitu. Cho watwaleleleho lalo kupangela Njambi ha myaka 350 hanima ya Livathzi. (Kusha. 9:28) Tunapande kukavangeya mwanja wa Nowa wa kukala na likulahelo na kwononoka.
9, 10. (a) Twatha kutembwinina vati likulahelo na kwononoka kwa Nowa?(b) Njambi akamono vati vanu vaje vakavangeya mashiko endi?
9 Twatha kutembwinina vati likulahelo na kwononoka kwa Nowa? Twatha kulinga ngocho nga tupwa va kulongwa kuli Njambi na kujeneka kulikundika ku kaye ka Satana na kwaka vya Vumwene mu mutamba wa kulivanga. (Mateo 6:33; Yowa. 15:19) Kulinga ngocho kukalingitha vaka-kaye vatuthzinde. Vakaleho vavangi vanavathzindi mu mafuti amangi mwafwa ya kukavangeya mashiko a Njambi a kukundama ku malo na vupangala. (Tandeni Malakiya 3:17, 18.) Ngechi mwa Nowa, tunapande kuthzivila Yehova lyova, kethi vanu embwe. Tuthzivuka ngwetu ikeye lika muka-kwana kuyoya kwa myaka yoshe.—Luka 12:4, 5.
10 Yeni cho mwalyangwila kulinga vika? Mutwalelelaho ‘kwenda na Njambi’ nameme vakweni vamijola nambe kumilwitha nambe nga muliwana na chetheko cha kumithindiya kutonda manene vufuko kutuvakana kukulahela kuli Njambi ndi? Nga mutembwinina likulahelo na kwononoka kwa Nowa, cho mukulahela ngweni Yehova atha kumyana vyuma vyoshe vimutonda.—Fili. 4:6, 7.
NDANYELE WAPWILE WA KULONGWA NA KWONONOKA NAMEME WAKELE MU NGANDA MUJE MWALITHALELE VILINGA VYAVIVI
11. Ndanyele na vavuthamba vendi vatatu valiwanene na vukalu muka mu Mbambilone? (Kengeni chikupulo ha liputa 3.)
11 Vukalu vwaliwanene navwo Ndanyele. Ndanyele wakele mu vundthzinda ku Mbambilone, mu nganda muje mwalithalele vaka-kulemetha tumponya na vaka-kupanda. Vaka-Mbambilone vamwene Vayunda ngwavo kethi va theho, cho vakele na kuvajola hamo lika na Njambi yavo Yehova. (Myatho 137:1, 3) Oku kwathzivithile manene Ndanyele na Vayunda vakwavo va kulongwa kuvavala ku vimbunge. Vanu vavangi vamwene Ndanyele na vavuthamba vendi vatatu va Hananiya na Mishaele na Azaliya, muvavangwile ngwavo vavalongethe vipangi vya ku lipela lya mwene. Cho lalo, vavanene vyakulya vije vyakele na kulya mwene. Nameme ngocho, evi vyakulya na vinyu vyapwile chetheko, mwafwa Ndanyele kashakele “kulijwaletha ikeye vavenya ha kulya vyakulya na kunwa vinyu vya vumwene.”—Ndanye. 1:5-8, 14-17.
12. (a) Vifwa muka vyavivwa vyakele navyo Ndanyele? (b) Yehova wamwene vati Ndanyele?
12 Vukalu vukwavo lalo vwaliwanene navwo Ndanyele hamo vwapwile vwa kumwana vipangi vya kulitila mwafwa ya chashu chendi. (Ndanye. 1:19, 20) Nameme ngocho, Ndanyele kalyalethele nambe kukulahela mana endi vavenya, oloni wakulahelele Yehova. (Ndanye. 2:30) Nameme Ndanyele wapwile mwanike ha thimbu oyo, oloni Yehova wamumwene ngwendi wapwile wa kulongwa ngwe Nowa na Yombi. Kuma Yehova walimbenjele omwo wakulahelele Ndanyele ndi? Embwe. Mwafwa Ndanyele watwaleleleho kupwa wa kulongwa na kwononoka kweta kumamanethelelo a kuyoya kwendi. Ngechi Ndanyele mwakele na myaka 90, kangelo ka Njambi wethzile na kumukanyametha, cho wamulekele ngwendi: “Ndanyele, Njambi wakuthzema.”—Ndanye. 10:11.
13. Vayunda vavethzikile vati omwo ya Ndanyele?
13 Njambi wavethzikithile Ndanyele, cho vamwangwile kupwa mwata wakama mu vumwene vwa Vambambilone novu vwa Vamende na Vapelesha. (Ndanye. 1:21; 6:1, 2) Hamo Yehova wavethzikithile Ndanyele mu ngila eyi mangana akwathe vanu vendi, ngwe mukwapwile kuli Yosefa mu Ingito na Esita na Melendekai mu vumwene vwa Vapelesha. * (Ndanye. 2:48) Achithinganyekeni mwalithzivilililemo Ezekiyele na vakwavo Vayunda vaje vakele mu vundthzinda ha kumona Yehova ali na kuvakwatha.
Yehova akalithzivi mwamuvwa nga vangamba vendi vatwalelelaho kupwa va kulongwa (Kengeni palangilafu 14 na 15)
14, 15. (a) Ano matangwa analifu vati na matangwa ayoyele Ndanyele? (b) Vithemi vatha kulilongetha vika ku mwanja wa vithemi va Ndanyele?
14 Twatha kutembwinina vati likulahelo na kwononoka kwa Ndanyele. Ano matangwa, netu tunapu ngwe tuvangendthzi muno mu kaye munalithala manene futithi yaivi ije ivali na kukundwiya manene mu Mbambilone Wakama, nambe ngwetu vulombelo vwoshe vwa makuli vwa muno mu kaye, vuje vwapwa “nganda ya kukala mindthzindthzime ya kujwala.” (Kujo. 18:2) Mukemwo kulyangununa ku kaye kunalingitha vanu vatuthzinde. (Mako 13:13) Ngechi, tushwenyeni kuyehi na Yehova Njambi ngwe mwalingile Ndanyele. Nga tulikehetha na kwononoka kuli Njambi, cho netu atuthzema manene.—Hanga. 2:7.
15 Vithemi vatha kulilongetha vyavingi ku mwanja wa vithemi va Ndanyele. Vatha kulinga vati ngocho? Nameme Ndanyele wapwile mwanike ha thimbu yakele mu nganda ya Yunda muje mwakele manene vuvi, oloni watwaleleleho kuthzema Njambi. Kuli vamo vamukwathele kuthzema Njambi. Vithemi vendi vakevo vamulongethele mashiko a Njambi. (Vithi. 22:6) Lithzina lya Ndanyele lije lilumbununa ngwavo “Njambi Ikeye Lyako Lyange” limwetha ngwavo vithemi vendi vathingimikile Njambi. Ngechi, vithemi kethi mwechelele vana veni, oloni thimpeni omwo mulongetha vana veni. (Efeso 6:4) Waneni thimbu ya kulombela navo na kuvakundika mu malombelo eni. Yehova amivethzikitha nga mulifwita kulongetha vana veni Mbimbiliya.—Myatho 37:5.
VUFUKO NAMBE VUHUTU KUVWONOWETHELE YOMBI KUPWA WA KULONGWA NA KWONONOKA
16, 17. Yombi waliwanene na vukalu muka vwa kulithethzathethza?
16 Vukalu vwaliwanene navwo Yombi. Yombi waliwanene na vukalu vwa kulithethzathethza. Thimbu kanda aliwane na vyetheko, Yombi, “wapwile wa kufuka manene kutuvakana vanu voshe vakele mu Ngangela.” (Yombi 1:3) Wafukile manene na kuthsimana, cho vamuthingimikile manene. (Yombi 29:7-16) Nameme ngocho, Yombi kalijundwile na kwivala Njambi. Mukemwo Yehova wamutumbwile ngwendi “ngamba yange,” cho wendekele lalo ngwendi: ‘Wapwa muka-vuthunga na kulongwa, na kukomoka Njambi na kulihenga ku vuvi.’—Yombi 1:8.
17 Oloni mu thimbu yaindondo lika, vuyoye vwa Yombi vwatengulukile. Vufuko vwendi vwoshe vwahwile njwa, cho oku kwamuthzeyethele manene. Satana ikeye wanenethele ovu vukalu vwoshe mwafwa wavangeyeye Yombi ngwendi wakele na kupangela Njambi mwafwa ya vyuma vyakele navyo. (Tandeni Yombi 1:9, 10.) Yehova kechelelele ije ñanda ya makuli yakatwile Satana. Mukemwo wanene Yombi thimbu mangana amwethe ngwendi kulongwa kwendi kwatundililile kwithi ya mbunge yendi.
18. (a) Vika vitulilongetha ku kulongwa kwa Yombi? (b) Vyuma vyalingiwile kuli Yombi vitulongetha vika hali Yehova?
18 Satana wapangethele vingila vyavingi vya vukenya mu kwetheka Yombi, mangana athinganyeke ngwendi Njambi ikeye ali na kumuyandetha. (Yombi 1:13-21) Kutundoho, kwethzile vaka-kumuthzembeleka vatatu va makuli, cho vendekele ngwavo vyuma vyalingile vikevyo vyalingithile ngwavo Njambi amuhithe. (Yombi 2:11; 22:1, 5-10) Oloni Yombi watwaleleleho kupwa wa kulongwa. Eyo, ha vithimbu vimo, wakele na kuthevuka mu kwendeka, oloni Yehova wathzivithithile, mwafwa wamwene ngwendi Yombi wakele na kuthziva kuvavala. (Yombi 6:1-3) Njambi wamwene ngwendi Yombi watwaleleleho kwononoka na kupwa wa kulongwa, nameme Satana wamuyandethele na kumuvangeya vyuma vije kalingile. Muvyahwile vije vyetheko vyaliwanene navyo Yombi, Yehova wamuvwethzelelele luvali ku vyuma vije vyakele navyo ha kulivanga, cho wayoyele lalo myaka 140. (Yako. 5:11) Cho Yombi watwaleleleho kupangela Yehova na mbunge yendi yoshe. Tuthzivuka vati ngocho? Ezekiyele wathonekele echi chithoneka hanemana chilongetha chetu cha lelo, munima ya vita vya myaka, kutunda hathsililile Yombi.
19, 20. (a) Twatha kutembwinina vati likulahelo na kwononoka kwa Yombi? (b) Twatha kutembwinina vati ngothzi ya Njambi?
19 Twatha kutembwinina vati likulahelo na kwononoka kwa Yombi? Nameme tuliwana na vukalu vwa kufwa vati, tukulaheleni Yehova thimbu yoshe na kumwononoka na vimbunge vyetu vyoshe. Chili vene twatha kulinga ngocho, mwafwa yetu tunathzivuka vyavingi kutuvakana Yombi. Twathzivuka Satana na matumbe endi a kulithethzathethza. (2 Koli. 2:11) Twavethzika mwafwa mu livulu lya Yombi vanatuleke vyuma vikalingitha ngwavo Njambi echelele tuyando. Twathzivuka lalo kutundilila mu vupolofweto vwa Ndanyele ngwetu Vumwene vwa Njambi vwapwa fulumende ije ili mu mavoko a Kilisitu Yesu. (Ndanye. 7:13, 14) Kutundoho, twathzivuka ngwetu ovu Vumwene ololo vumanetha tuyando twoshe.
20 Vukalu vwaliwanene navwo Yombi vutulongetha lalo kuthzivila ngothzi vakwetu vaka-Kilisitu vaje vali mu vukalu. Vamo vanatha thevuka mu kwendeka ngwe mwalingile Yombi. (Kwambu. 7:7) Kutwapandele kuvapaya, oloni tunapande kuvathzivithitha na kuvathzivila ngothzi. Nga tulinga ngocho, cho tutembwinina Yehova, Tate yetu wa chithzemo na ngothzi.—Myatho 103:8.
YEHOVA ‘AKAMYANA NDTHZILI’
21. Vyuma muka vyalingiwile mu kuyoya kwa Nowa na Ndanyele na Yombi vivanendeka ku 1 Petulu 5:10?
21 Nameme Nowa na Ndanyele na Yombi vayoyele ha vithimbu vya kulithethzathethza na kuliwana na vukalu vwa kulithethzathethza, oloni voshe vakolethelele vukalu vuvaliwanene navwo. Mithzimbu yavo ya mu kuyoya itwanukitha majwi a kapositolo Petulu uje wathonekele ngwendi: “Oloni omwo munayanda kathimbu kakandondo lika, Njambi wa kutetela kwoshe . . . ikeye vavenya akamijeletha na kumyana kwimana mbe na ndthzili na luvula lwaluvwa.”—1 Petu. 5:10.
22. Tuthimutwiya vika mu chilongetha chinatako?
22 Yehova wahwimininine Petulu kuthoneka majwi aje amwetha ngwavo Njambi akakwatha vangamba vendi na kuvakanyametha nga vali mu vyetheko. Awa majwi hanga achipanga na ku vangamba va Njambi va matangwa ano. Tuvavoshe tushaka ngwetu Yehova atwane ndthzili mangana tutwaleleleho kumulemetha. Ngechi, tushaka kutembwinina likulahelo na kwononoka kwa Nowa na Ndanyele na Yombi. Ngechi mutumwena mu chilongetha chinatako, chuma chavakwathele kupwa va kulongwa chapwile kuthzivuka mwamuvwa Yehova. Cho ‘vathzivukile’ vyuma vyoshe vyatondele Yehova ngwendi vavilinge. (Vithi. 28:5) Netu tunapande kulinga ngocho.
^ par. 2 Ezekiyele vamutwalele mu vundthzinda mu 617 B.C.E. Wathonekele majwi ali ku Ezekiyele 8:1–19:14 mu “mwaka wa mu chitanu na umo,” nambe ngwetu mu 612 B.C.E te ali mu vundthzinda.
^ par. 5 Ishe ya Nowa, Lameki, uje wapwile wa kulongwa kuli Njambi wathsile myaka itanu kunima, te livathzi kanda lije. Nga vaina ya Nowa na vayayendi na vishongo vyendi vakele na kuyoya ha thimbu ilyashangumukile livathzi, cho kuvovokele.
^ par. 13 Hamo vavuthamba vatatu va Ndanyele navo vavavethzikithile mu ngila ya kulifwa omwo vavanene moko ya kutwamenena vyuma vya mu lifuti lya Mbambilone.—Ndanye. 2:49.
