1, 2. (a) Dikon e ehèmpelnan di Noe, Daniel i Yòb por ta un animashon pa nos? (b) Bou di ki sirkunstansianan Ezekiel a skirbi e palabranan na Ezekiel 14:14?

BO TA konfrontando difikultat manera problema ku salú, problema finansiero òf persekushon? Tin biaha ta difísil pa bo sigui sirbi Yehova ku goso? Si ta asina, e ehèmpelnan di Noe, Daniel i Yòb por ta un animashon pa bo. E hòmbernan akí tabata imperfekto meskos ku nos i a enfrentá hopi di e pruebanan ku nos ta enfrentá. Algun di e pruebanan akí a asta pone nan bida na peliger. Apesar di esei, nan a keda fiel na Yehova i a bira ehèmpel di fe i obedensia.—Lesa Ezekiel 14:12-14.

² Ezekiel a skirbi e palabranan di nos teksto sentral tempu e tabata na Babilonia na aña 612 promé ku Kristu. * (Eze. 1:1; 8:1) Tabata falta solamente sinku aña pa Herúsalèm ser destruí na aña 607, manera Yehova a profetisá. Ta algun hende so a demostrá e mesun kualidatnan ku Noe, Daniel i Yòb tabatin, i ta nan a haña e señal pa sobrebibí. (Eze. 9:1-5)  Yeremías, Baruk, Ebed-melek i e rekabitanan tabata entre e hendenan akí.

3. Kiko nos lo analisá den e artíkulo akí?

³ Di mes manera awe, ta solamente hende ku den bista di Yehova ta hustu, manera Noe, Daniel i Yòb tabata, lo sobrebibí e fin di e mundu malbado akí. (Rev. 7:9, 14) P’esei, laga nos wak dikon Yehova a usa e hòmbernan akí komo ehèmpel di fe i obedensia. Den e artíkulo akí, nos lo analisá (1) ki pruebanan nan a enfrentá i (2) kon nos por imitá nan fe i obedensia.

4, 5. Ki pruebanan Noe a enfrentá, i dikon su perseveransia ta impreshonante?

⁴ Pruebanan ku Noe a enfrentá. Den tempu di Enok, Noe su bisawelo, hende tabata hopi malbado. Nan tabata asta papia “kosnan ofensivo” kontra Yehova. (Hudas 14, 15) Hende a bira mas i mas violento. De echo, den tempu di Noe, “tera tabata yen di violensia.” Angel malbado ku a tuma kurpa humano a kasa ku hende muhé i a produsí yunan bastá ku a bira gigante i violento. (Gén. 6:2-4, 11, 12) Pero, tur hende por a mira ku Noe tabata diferente. Beibel ta bisa: “Noe a haña grasia den bista di SEÑOR. . . . Noe tabata un hòmber hustu, perfekto den su generashonnan: Noe tabata kana ku Dios.”—Gén. 6:8, 9.

⁵ Kiko e palabranan ei ta bisa tokante Noe? Di promé, e tempu ku Noe a kana ku Dios promé ku e Diluvio no tabata djis 70 òf 80 aña, e kantidat di aña ku hopi hende ta biba awe. Mas bien, el a biba kasi 600 aña den e mundu malbado ei. (Gén. 7:11) Di dos, no tabatin un kongregashon di fiel sirbidónan di Yehova ku e por a akudí na dje, i aparentemente ni su rumannan karnal no a apoy’é den sentido spiritual. *

6. Kon Noe a demostrá kurashi?

⁶ Noe no kier tabata djis un bon hende. P’esei, e tabata “un predikadó di hustisia,” kende ku kurashi a konta otro hende tokante su fe den Yehova. (2 Ped. 2:5) Relashoná ku Noe, apòstel Pablo a skirbi: “Pa medio di e fe akí el a kondená mundu.” (Heb. 11:7) P’esei, ta di komprondé ku hende a hasi bofon di Noe, a purba di opon’é i kisas a asta menas’é ku violensia. Pero Noe no tabatin miedu di hende. (Pro. 29:25) Mas bien, e tabatin e kurashi ku Yehova ta duna su fiel sirbidónan.

7. Ki prueba Noe tabatin ku enfrentá ora e mester a traha e arka?

⁷ Despues ku Noe a kana ku Dios pa mas ku 500 aña, Yehova a bis’é pa e traha un arka pa asina salba hende i bestia. (Gén. 5:32; 6:14) E proyekto grandi ei lo a parse algu masha difísil pa Noe! Ademas, Noe tabata sa ku lo el a hañ’é ku mas chèrchi i oposishon. Apesar di tur esei, ku fe el a obedesé Dios i a hasi manera Dios a orden’é.—Gén. 6:22.

8. Kon Noe a demostrá ku e tabata konfia ku Yehova lo a perkurá p’e?

⁸ Un otro prueba ku Noe a enfrentá tabata e echo ku e mester a perkurá materialmente pa su esposa i yunan. Promé ku e Diluvio, hende tabatin ku traha masha duru pa kultivá tera pa nan por a kome, i Noe no tabata un eksepshon. (Gén. 5:28, 29) Asina mes, el a enfoká su bida riba Dios i no riba kosnan material. Noe a keda enfoká riba kosnan spiritual asta tempu ku e tabata konstruí e arka, kisas pa 40 òf 50 aña largu. I el a sigui hasi esei te na su morto, 350 aña despues  di e Diluvio. (Gén. 9:28) Ki un bunita ehèmpel di fe i obedensia!

9, 10. (a) Kon nos por imitá Noe su fe i obedensia? (b) Kiko nos por tin sigur di dje ora nos ta biba segun e normanan di Dios?

⁹ Kon nos por imitá Noe su fe i obedensia? Nos ta imitá Noe ora nos ta apoyá Dios su normanan di hustisia, ta pone interesnan di e Reino na promé lugá den nos bida i ta keda separá for di e mundu di Satanas. (Mat. 6:33; Huan 15:19) Ta klaru ku mundu no ta gusta e manera ku nos ta hiba nos bida. Por ehèmpel, komo ku nos ta determiná pa sigui e leinan di Dios relashoná ku matrimonio i sèks, medionan di komunikashon di algun pais ta kritiká nos. (Lesa Malakías 3:17, 18.) Sinembargo, meskos ku Noe, nos ta teme Yehova i no hende. Nos sa ku ta Yehova so por duna nos bida eterno.—Luk. 12:4, 5.

¹⁰ Pero kiko di abo? Lo bo sigui “kana ku Dios” asta ora hende ta chèrchè bo òf kritiká bo? Lo bo sigui konfia den Yehova ora bo haña bo ku preshon ekonómiko ku ta pone bo fe na prueba? Si bo imitá e fe i obedensia di Noe, bo por tin sigur ku Yehova lo perkurá pa bo.—Flp. 4:6, 7.

11. Ki pruebanan difísil Daniel i su tres amigunan a enfrentá na Babilonia? (Wak e promé plachi.)

¹¹ Pruebanan ku Daniel a enfrentá. Daniel a biba den koutiverio na Babilonia, un stat yen di idolatria i spiritismo. Ademas, e babilonionan tabata menospresiá e hudiunan i tabata tormentá nan, òf hasi bofon di nan i di nan Dios, Yehova. (Sal. 137:1, 3) Esaki sigur lo a hasi hudiunan fiel, manera Daniel, tristu. Ademas, hopi hende tabatin bista riba Daniel i su tres amigunan hudiu, Hananías, Misael i Azarias, pasobra e hóbennan akí mester a haña entrenamentu pa traha pa e rei di Babilonia. E rei a asta disidí loke nan mester a kome, i esei a inkluí kosnan ku Yehova a prohibí su pueblo di kome. Pero, Daniel tabata determiná pa “no kontaminá su mes ku e mihó kuminda di rei.”—Dan. 1:5-8, 14-17.

12. (a) Ki bon kualidatnan Daniel a demostrá? (b) Kiko Yehova tabata pensa di Daniel?

¹² Daniel tabata hopi inteligente, i el a haña privilegionan spesial serka e rei. Esaki por a bira un prueba sutil p’e. (Dan. 1:19, 20) Pero, en bes di bira arogante i un persona ku no tabata tene kuenta ku opinion di otronan, el a keda humilde i modesto i semper a duna onor na Yehova. (Dan. 2:29, 30) De echo, Yehova a menshoná Daniel komo un ehèmpel di fe huntu ku Noe i Yòb, kendenan a sirbi Yehova fielmente te na morto. Pero, e tempu ku Yehova a papia di nan, Daniel tabata yòn ainda. Yehova tabata robes? Nò, sigur ku nò! Daniel a keda fiel i obediente durante henter su bida. Sí, ora Daniel tabatin kasi 100 aña, e angel di Dios a bis’é ku kariño: “O Daniel, hòmber masha stimá [òf, “presioso,” NW].”—Dan. 10:11.

13. Kon bini Daniel por a yuda e otro hudiunan?

¹³ Ku yudansa di Yehova, Daniel a haña un puesto haltu den e imperio di Babilonia i den e imperio di Medo-Persia. (Dan. 1:21; 6:1, 2) Podisé Yehova a yuda Daniel pa e por a yuda su pueblo, meskos ku Yosef a hasi na Egipto i Èster i Mardokeo na Persia. * (Dan. 2:48) Imaginá bo ki un konsuelo tabata pa Ezekiel i e otro hudiunan ku tabata den koutiverio mira Yehova su man den e asuntu akí.

14, 15. (a) Den ki sentido nos situashon ta meskos ku esun di Daniel? (b) Ki bon ehèmpel e mayornan di Daniel a pone pa mayornan djawe?

 ¹⁴ Kon nos por imitá Daniel su fe i obedensia? Awe, na moda di papia, nos ta biba komo estranhero den un mundu yen di inmoralidat i adorashon falsu. Hende ta ser influensiá pa Babilonia e Grandi, e imperio mundial di religion falsu, ku Beibel ta yama “un lugá di biba di demoño.” (Rev. 18:2) Sinembargo, nos ta diferente, i p’esei hende ta hasi bofon di nos. (Mar. 13:13) Pues, meskos ku Daniel, laga nos hala serka Yehova, nos Dios. Ora nos ta humilde, ta obediente i ta konfia den Yehova, nos tambe por ta “presioso” (NW) manera rikesa den su bista.—Ageo 2:7.

¹⁵ E mayornan di Daniel a pone bon ehèmpel pa mayornan djawe. Kon asina? Apesar di tur e maldat ku tabata reina den Huda tempu ku Daniel tabata mucha, Daniel a siña stima Dios. Esaki no tabata pa kasualidat. Daniel a haña bon edukashon serka su mayornan. (Pro. 22:6) Asta Daniel su nòmber, ku ta nifiká “Mi Hues Ta Dios,” ta mustra ku su mayornan tabata teme Dios. P’esei, mayornan no entregá, siña boso yunan ku pasenshi. (Efe. 6:4) Ademas, hasi orashon pa nan i huntu ku nan. Ora boso ta hasi esfuerso pa inkulká e bèrdatnan di Beibel den nan kurason, Yehova lo bendishoná boso.—Sal. 37:5, NW.

16, 17. Ki pruebanan Yòb a enfrentá durante su bida?

¹⁶ Pruebanan ku Yòb a enfrentá. Yòb a eksperensiá kambionan grandi durante su bida. Na prinsipio, e tabata “esun di mas grandi di tur e hòmbernan di oriente.” (Yòb 1:3) E tabata riku, bon konosí i masha respetá. (Yòb 29:7-16) Apesar di esei, e no a pensa ku e tabata mas ku otro hende ni ku e no tabatin mester di Dios. De echo, Yehova a yam’é “mi sirbidó.” Ademas, el a bisa ku Yòb tabata “un hende perfekto i rekto, ku ta teme Dios i ku ta apartá su mes for di maldat.”—Yòb 1:8.

¹⁷ Pero Yòb su bida a kambia drástikamente di un dia pa otro. El a pèrdè tur loke ku e tabatin, i el a bira asina deprimí ku e tabata ke muri. Awe, nos sa ku ta Satanas e kalumniadó a kousa tur e problemanan di Yòb. El a akusá Yòb falsamente di a adorá Dios pa motibunan egoista. (Lesa Yòb 1:9, 10.) Yehova a tuma e akusashon akí di Satanas mashá na serio. Pues, Yehova a duna Yòb chèns di demostrá  ku e tabata leal na dje i ku e tabata sirbié pasobra e tabata stim’é.

18. (a) Kiko a impreshoná bo di e relato di Yòb? (b) Kiko nos por siña tokante Yehova for di e manera ku el a trata Yòb?

¹⁸ Satanas a lansa un seri di atake kruel kontra Yòb pa lag’é kere ku ta Dios tabata kousa su problemanan. (Yòb 1:13-21) Despues tres supuesto amigu a bini pa konsolá Yòb. Pero nan tabata kruel i a bis’é ku Dios tabata kastig’é. (Yòb 2:11; 22:1, 5-10) Apesar di tur e kosnan ei, Yòb a keda leal na Yehova. Ta bèrdat ku tabatin biaha ku Yòb a papia sin pensa. Pero Yehova a komprondé ku Yòb a papia asina pasobra e tabata sufriendo. (Yòb 6:1-3) Dios a mira ku apesar ku Yòb tabata hopi deprimí, el a keda fiel na dje asta ora Satanas, na moda di papia, tabata gòlpi’é i insult’é. Despues di tur e pruebanan akí, Yehova a duna Yòb dòbel di loke e tabatin promé i 140 aña mas di bida. (Sant. 5:11) Durante tur e añanan ei, el a sigui sirbi Yehova ku henter su kurason. Dikon nos por ta sigur di esei? Pasobra Ezekiel 14:14, nos teksto sentral, a ser skirbí siglonan despues ku Yòb a muri.

19, 20. (a) Kon nos por imitá Yòb su fe i obedensia? (b) Kon nos por imitá Dios su kompashon den nos trato ku nos rumannan?

¹⁹ Kon nos por imitá Yòb su fe i obedensia? Sea kual sea nos sirkunstansia, laga Yehova semper ta e Persona di mas importante den nos bida. Nos mester tin pleno konfiansa den Yehova i obedes’é di henter nos kurason. De echo, nos tin asta mas motibu ku Yòb pa keda leal na Yehova. Pensa riba esaki: Nos sa muchu mas tokante Satanas i su trikinan. (2 Kor. 2:11) Debí na Beibel, spesialmente e buki di Yòb, nos ta komprondé dikon Dios ta permití sufrimentu. For di e profesia di Daniel, nos ta komprondé ku e Reino di Dios ta un berdadero gobièrnu ku Kristu Hesus komo Rei. (Dan. 7:13, 14) Nos sa tambe ku pronto e Reino akí lo kaba ku tur sufrimentu pa semper.

²⁰ Ademas, e relato di Yòb ta siña nos dikon ta importante pa mustra kompashon na nos rumannan ku ta sufri. Meskos ku Yòb, tin biaha algun di nos rumannan tambe sa papia sin pensa. (Ekl. 7:7) Pero en bes di pensa malu di nan, nos mester mustra komprondementu i kompashon. Di e manera akí, nos ta imitá Yehova, nos Tata miserikòrdioso ku ta stima nos.—Sal. 103:8.

21. Kon e palabranan na 1 Pedro 5:10 ta apliká na Noe, Daniel i Yòb?

²¹ Aunke Noe, Daniel i Yòb a biba den époka i sirkunstansianan masha diferente, nan tur a perseverá bou di e pruebanan ku nan a enfrentá. Nan relatonan ta laga nos kòrda e palabranan ku apòstel Pedro a skirbi: “Despues ku boso a sufri pa un poko tempu, e Dios di tur bondat inmeresí . . . mes lo terminá boso formashon; lo e hasi boso firme, lo e hasi boso fuerte.”—1 Ped. 5:10.

22. Kiko nos lo siña den e siguiente artíkulo?

²² Mediante e palabranan ku Pedro a skirbi bou di inspirashon, Yehova ta duna e garantia ku lo e hasi su sirbidónan firme i fuerte. Esaki ta konta tambe pa e pueblo di Dios awe. Nos tur ke pa Yehova hasi nos fuerte i keda fiel na dje. P’esei, nos ke imitá e fe i obedensia di Noe, Daniel i Yòb. Den e siguiente artíkulo, nos lo siña ku e hòmbernan akí por a keda fiel na Yehova pasobra nan tabata konos’é di bèrdat. De echo, nan a “komprondé tur kos” ku e tabata ferwagt di nan. (Pro. 28:5) Nos tambe por siña konosé Yehova bon i komprondé loke e ta ferwagt di nos.