1-3. (a) Weh wahn help wi fi stay faytful tu Gaad joorin dehnya laas dayz? (b) Weh wi wahn laan eena dis aatikl?

DIS wikid werl wahn soon geh dischrai. Ahn di kloasa wi get tu di en, di moa wikidnis wi si. Wikid peepl kantinyu fi “sprowt laik graas.” (Ps. 92:7) Soh wi noh sopraiz dat peepl noh waahn liv bai Baibl standadz. Eena wahn werl laik dis, how wi ku “bee laik lee pikni wen ih kohn tu eevl” yet ‘bee laik groan-op peepl wen ih kohn tu how wi tinkʼ?—1 Kor. 14:20.

² Di ansa deh eena wi teem skripcha, di paat weh seh: “Di wan dehn weh di saach fi Jehoava ku andastan evriting.” Dat meenz dehn ku andastan weh dehn need fi du soh dat dehn ku pleez Jehoava. (Prov. 28:5) Ahn Proverbs 2:7, 9 seh dat Jehoava “di put op di kaina wizdom weh di raichos wan ku yooz.” Bikaaz a dis, di raichos wan ku “andastan weh rait ahn jos ahn fyaa, an evriting weh gud.”

³ Noawa, Danyel, ahn Joab mi ga da kaina wizdom, di kain weh onli kohn fahn Gaad. (Ezek. 14:14) Eevn wee ku ga dis kaina wizdom tudeh. How bowt yoo persnali? Yoo “andastan evriting” yu  need fi du soh dat yu ku pleez Jehoava? Wans yu noa Jehoava, yu wahn ku ga dis kaina wizdom. Soh mek wi laan (1) how Noawa, Danyel, ahn Joab mi geh fi noa Gaad, (2) how da nalij mi benifit dehn, ahn (3) how wi ku ga di kaina fayt dehn mi gat.

4. How Noawa mi geh fi noa Jehoava? Weh dis nalij mi help ahn fi du?

⁴ How Noawa mi geh fi noa Jehoava? Fahn di taim a Adam ahn Eev, faytful man ahn uman mi laan bowt Gaad eena chree mayn wayz: fahn kriyayshan, fahn ada hyoomanz weh mi stay faytful tu Gaad, ahn fahn fi dehn oan ekspeeryens wen dehn si how Gaad bles dehn bikaaz dehn obay ahn. (Isa. 48:18) Noawa mi laan fahn kriyayshan dat Gaad egzis. Ih laan dat Hihn “ga powa weh laas fareva ahn dat hihn da di chroo Gaad.” (Roam. 1:20) Dis mi help Noawa fi noh jos bileev eena Gaad, bot fi ga schrang fayt eena ahn tu.

5. How Noawa mi geh fi noa bowt Gaad perpos fi hyoomanz?

⁵ Di Baibl seh dat ‘sayka weh peepl yehr di mesij, dehn kohn fi bileev.ʼ (Roam. 10:17) Soh how Noawa mi hyaa bowt Jehoava? Ih mi laan fan ih relitiv dehn. Ih pa, Laymek, da-mi wahn faytful man. An ih mi baan bifoa Adam mi ded. (Si di picha da di biginin a dis aatikl.) Ih mi ga ih granfaada Metoosela an ih grayt-grayt-granfaada Jayred, hoo neva ded til 366 yaaz afta Noawa mi baan. * (Look 3:36, 37) Da fahn dehnya man ahn dehn waif dat Noawa mi laan dat Jehoava mi mek di fos man ahn uman, wat da-mi ih perpos fi hyoomanz, ahn how wikidnis mi staat eena di gyaadn a Eedn. Noawa mi noa dat di wikidnis rong ahn da-mi bikaaz a Adam ahn Eev. (Gen. 1:28; 3:16-19, 24) Weh Noawa mi laan mi toch ih haat ahn moov ahn fi serv Gaad.—Gen. 6:9.

6, 7. How Noawa hoap schrentn ih fayt?

⁶ Wahn persn hoap ku schrentn ih fayt. Imajin how Noawa mosi mi feel wen ih mi fain owt dat ih naym meen “Res; Komfert”—di kaina komfert weh ku gi wahn persn hoap! (Gen. 5:29, ftn.) Jehoava mi gaid Laymek fi seh: “Dis wan [Noawa] wahn gi wi komfert fahn wi werk ahn di payn a wi han bikaaz a di grong weh Jehoava mi kers.” Noawa mi ga hoap eena Gaad. Jos laik Aybl an Eenak weh mi liv bifoa hihn, Noawa mi bileev eena di prafesi bowt di Wan hoo mi wahn brooz di snayk eena ih hed.—Gen. 3:15.

⁷ Da chroo dat Noawa neva andastan evri singl deetayl bowt di prafesi da Genesis 3:15, bot ih mi noa dat di prafesi giv ahn wahn hoap fi di fyoocha. Moroava, da prafesi da nayli laik di mesij weh Eenak yoostu preech. Hihn mi preech dat Gaad wahn bring jojment pahn di wikid, ahn dis mesij wahn kohn chroo agen da Armagedon. (Jood 14, 15) Di mesij weh Eenak mi preech mosi mi reeli schrentn Noawa fayt ahn hoap!

8. How Noawa nalij bowt Gaad mi protek ahn?

⁸ How chroo nalij bowt Gaad mi benifit Noawa? Chroo nalij bowt Gaad mi gi Noawa fayt ahn wizdom. Ih mi protek ahn fahn daynja, an espeshali fahn spirichwal daynja. Fi egzampl, bikaaz Noawa “mi waak wid di chroo Gaad,” ih neva spen taim wid peepl weh neva lov Gaad. Di wikid deemonz weh mi chaynj intu hyoomanz neva fool hihn needa. Af koars, di peepl rong Noawa mosi mi-di goh aaf op oava di schrent ahn powa a dehndeh deemonz. Maybi di peepl mi  eevn staat tu wership dehn anaal. (Gen. 6:1-4, 9) Noawa mi noa dat da hyoomanz fi ga chiljren ahn ful di ert. (Gen. 1:27, 28) Soh ih mi noa dat ih rang fi mek wahn spirit persn chaynj ih badi ahn marid wahn hyooman ahn ga chiljren wid dehn—wos wen ih si di kaina chiljren dehn mi gat. Soh Gaad tel Noawa dat Ih wahn bring wahn flod pahn di ert. Bikaaz Noawa mi ga fayt, ih staat bil di aak ahn sayv ih famili.—Heeb. 11:7.

9, 10. How wi ku ga fayt laik Noawa?

⁹ How wi ku ga fayt laik Noawa? Wi haftu stodi di Werd a Gaad, lov weh wi di laan, ahn mek da nalij chaynj wi ahn gaid wi. (1 Peet. 1:13-15) Den fayt ahn wizdom wahn protek wi fahn Saytan chrap dehn ahn fahn di atichood eena dis werl. (2 Kor. 2:11) Moas peepl tudeh lov vailens ahn lov fi liv wahn loos laif. Dehn onli waahn liv fi dehnself. (1 Jan 2:15, 16) Wahn persn hoo noh schrang spirichwali mait ignoar di sainz dat di en deh kloas. Noatis dat wen Jeezas mi kompyaa fi wee dayz wid Noawa dayz, ih neva foakos pahn di vailens an aal di ada badnis di peepl mi-di du. Bot ih mi foakos pahn weh ku hapm tu wahn persn if ih alow di tingz eena laif fi dischrak ahn spirichwali.—Reed Machyu 24:36-39.

¹⁰ Aks yuself: ‘Mai laif shoa dat Ai reeli noa Jehoava? Mai fayt moov mee fi liv bai Jehoava raichos standadz ahn fi goh tel ada peepl bowt weh Gaad wahn du?ʼ Yu ansa tu dehnya kweschan wahn shoa if yoo ‘di waak wid di chroo Gaad.ʼ

11. (a) Danyel mi lov Jehoava. Weh dat tel wi bowt ih payrents? (b) Wich wan a Danyel kwalitiz yu wuda waahn gat?

¹¹ How Danyel mi geh fi noa Jehoava? Danyel payrents mi teech ahn fi lov Jehoava an ih Werd. Da lov mi stay wid Danyel fi di res a ih laif. Eevn wen ih mi geh oal, ih mi stil kantinyu fi stodi di Skripchaz chroo ahn chroo. (Dan. 9:1, 2) Ih sinsyaa ahn hombl pryaa da Daniel 9:3-19 shoa dat ih mi noa Jehoava veri gud. Ih mi noa aal weh Jehoava mi du fi di nayshan a Izrel. Tek wahn lee taim fi reed da pryaa ahn tink bowt it. Tink bowt weh da pryaa ku teech yu bowt Danyel.

12-14. (a) How Danyel mi shoa wizdom? (b) How Gaad mi bles Danyel fi ih korij ahn laayalti?

¹² How chroo nalij bowt Gaad mi benifit Danyel? Laif da Babilan neva eezi fi eni Joo hoo mi waahn serv Jehoava. Fi egzampl, Jehoava mi tel di Jooz weh mi deh da Babilan: “Werk haad fi pees eena di siti.” (Jer. 29:7) Ahn stilyet, Hihn mi ekspek dehn fi serv ahn wid aala dehn haat. (Ex. 34:14) Weh mi help Danyel fi werk haad fi ga pees eena di siti ahn stil serv Gaad wid aala ih haat? Wizdom fahn Gaad mi help ahn fi si dat ih mi need fi obay Jehoava fos, den di govament. Honjridz a yaaz layta, Jeezas mi teech da saym prinsipl.—Look 20:25.

¹³ Tink bowt weh Danyel mi du wen dehn mi paas di laa dat fi 30 dayz nobadi fi pray tu eni gaad er man ada dan di king. (Reed Daniel 6:7-10.) * Danyel kuda mi mek ekskyoos ahn seh, ‘Terti dayz noh  lang!ʼ Bot ih neva mi wahn alow da laa fi bee moa impoatant dan fi hihn wership tu Gaad. Af koars, ih kuda mi pray soh dat nobadi si ahn. Bot ih mi noa dat evribadi don mi yoostu si ahn di pray evri day. Soh eevn doa ih mi daynjaros, Danyel stil seh ih pryaaz kaaz ih neva waahn enibadi tink dat ih mi wahn stap serv Jehoava bikaaz a dis laa.

¹⁴ Jehoava mi bles Danyel bikaaz a ih korij ahn laayalti. Hihn du wahn mirakl ahn sayv Danyel kaaz dehn laiyan mi wahn eet ahn op. Sayka dat, lata peepl fahn di Meedo-Perzhan Empaiya mi laan bowt Jehoava!—Dan. 6:25-27.

15. How wi ku ga fayt laik Danyel?

¹⁵ How wi ku ga fayt laik Danyel? Fi ga schrang fayt wi kyaahn jos reed di Baibl. Wi haftu “andastan it.” (Mach. 13:23) Wi need fi andastan di prinsiplz eena di Baibl kaaz dat wahn help wi fi noa how Jehoava tink ahn feel bowt tingz. Soh wi need fi stap ahn tink bowt weh wi reed. Pray aal di taim, espeshali wen wi di fays prablemz. If wi ga fayt wen wi pray fi wizdom ahn schrent, Jehoava wahn ansa wi pryaaz.—Jay. 1:5.

16, 17. How Joab mi geh fi noa Gaad?

¹⁶ How Joab mi geh fi noa Jehoava? Joab da neva wahn Izrelait. Bot hihn da-mi wahn faar relitiv a Aybraham, Aizak, ahn Jaykop. Dehnya chree man mi noa Gaad ahn fi hihn perpos fi hyoomanz. Soh sohnhow, Joab mi geh fi laan bowt dehndeh tingz. (Job 23:12) Ih seh: “Ah mi hyaa bowt yu.” (Job 42:5) Moroava, Jehoava mi seh dat di tingz weh Joab mi seh bowt Ahn da di chroot.—Job 42:7, 8.

¹⁷ Joab mi laan bowt Gaad chroo kriyayshan. (Job 12:7-9, 13) Laytaraan, Ilaihyu ahn Jehoava mi yooz difrent tingz eena kriyayshan fi rimain Joab dat hyoomanz smaal wen yu kompyaa dehn wid Gaad. (Job 37:14; 38:1-4) Weh Jehoava mi seh toch Joab haat. Soh ih tel Gaad: “Now Ah noa dat yu ku du evriting ahn dat notn weh yu waahn du impasabl fi mek yu du. . . . Ah ripent eena dos an ashiz.”—Job 42:2, 6.

18, 19. How Joab mi shoa dat ih mi reeli noa Jehoava?

¹⁸ How chroo nalij bowt Gaad mi benifit Joab? Joab mi ga wahn gud andastandin a  gaadli prinsiplz. Ih mi reeli noa Jehoava, ahn dat mi help ahn fi du di rait tingz. Fi egzampl, Joab mi noa dat ih kudn seh ih lov Gaad ahn stil chreet ih nayba dehn eena wahn bad way. (Job 6:14) Ih neva tink dat ih mi beta dan adaz, bot ih mi chreet evribadi di saym way, noh kay if dehn mi rich er poa. Ih seh: “Yu noh tink di Wan weh mi mek mee eena di woom, mek dehn tu?” (Job 31:13-22) Eevn wen ih mi rich, ih neva tink ih mi beta dan enibadi els. Nowadayz, peepl weh rich ahn powaful noh ak laik dat ataal!

¹⁹ Joab mi rijek aal kaina aidol wership. Hihn mi noa dat faals wership mi rang, ahn dat ih mi rang fi put richiz fos eena ih laif. Ih mi noa dat if ih mi du dat, ih “wuda di rijek di chroo Gaad abov.” (Reed Job 31:24-28.) * Joab mi noa dat marij da wahn saykrid pramis bitween wahn man ahn wahn uman. Ih mi eevn mek wahn pramis tu ihself dat ih wuda neva luk pahn wahn uman ahn los afta ahn. (Job 31:1) Now memba, dis da-mi joorin di taim wen Gaad mi alow wahn man fi ga moa dan wan waif. Soh Joab kuda mi ga wahn neks waif if ih mi waahn. Bot hihn mi noa dat di fos marij da-mi bitween wan man ahn wan uman. Soh da hihn mi chooz fi liv da way. * (Gen. 2:18, 24) Bowt 1,600 yaaz layta, Jeezas mi teech da saym prinsipl. Ih mi seh dat marij fi bee bitween wahn hozban an ih waif.—Mach. 5:28; 19:4, 5.

20. How chroo nalij bowt Jehoava ahn fi hihn standadz ku help wi chooz di rait frenz ahn gud entataynment?

²⁰ How wi ku ga fayt laik Joab? Agen, wi need fi noa Jehoava ahn mek da nalij gaid wi hoal laif. Fi egzampl, di saamis Dayvid mi seh dat Jehoava “hayt enibadi weh lov vailens,” ahn fi kip weh fahn “peepl weh tel lai.” (Reed Psalm 11:5; 26:4.) * How dehnya too skripcha ku help yu fi andastan how Gaad tink? Wans yu andastan how Gaad tink, aks yuself dehnya kweschanz: ‘Wat Ah wahn put fos eena mi laif? How Ah wahn yooz di Intanet? Hoo Ah wahn spen taim wid? Weh kaina entataynment Ah wahn chooz?ʼ Yu ansa tu dehnya kweschan ku help yu fi noa humoch yu reeli noa Jehoava. Wi noh waahn dis wikid werl afek di way wi tink an ak. Soh wi haftu noa ‘how fi tel weh da di difrens bitween gud an eevl.ʼ—Heeb. 5:14; Ifee. 5:15.

21. Weh wahn help wi fi “andastan evriting” wi need fi du soh dat wi ku pleez Jehoava?

²¹ Bikaaz Noawa, Danyel, ahn Joab mi du evriting dehn kud fi noa Jehoava, Hihn mi help dehn fi noa weh dehn mi need fi du fi pleez Ahn. Fi dehn egzampl shoa wi dat if wi du tingz Jehoava way, wi wahn ga sokses eena laif. (Ps. 1:1-3) Soh aks yuself: ‘Ai reeli noa Jehoava di way how Noawa, Danyel, ahn Joab mi noa ahn?ʼ In fak, tudeh wi ku noa Jehoava eevn beta dan dehndeh faytful man, bikaaz Jehoava gi wi lat moa infamayshan bowt ihself. (Prov. 4:18) Soh dig deepa eena yu stodi a di Baibl. Tink bowt weh yu reed. Ahn pray fi hoali spirit. Den yu wahn jraa kloasa tu Jehoava. Yu wahn ga wizdom an andastandin eevn doa yu liv eena wahn werl weh noh lov Gaad.—Prov. 2:4-7.