1-3. a) Kaba íderaguawa lun úaragua wamá lun Bungiu lidan lagumuhóun dan le? b) Kaba wakutiha lidan arütíkulu le?

WAWINWANDUÑA yarafa lun lagumuchagüle lagumuhóun dan. Gíbetimarügaaña gürigia wuribatiña kei híduru (Sal. 92:7). Ligía maweiridun tubéi wanigi eibu lan dan meneben lan lilurudun Bungiu houn gürigia. Ligíati, ida luba ítara wamá “kei irahüñü lun burí katei le wuribati” ani ítara wagíame, “kei wéinamuhaña lidan ligaburi hasaminarun” luagu le gunfuranda habéi? (1 Ko. 14:20).

² Dariwati óunabagülei lidan bérusu le anúadirubei lun arütíkulu le, ani ariñagati aban fánreinti lidan “ánhaña ha áluahabalin Bungiu, gunfuranda hamuti buidu”, lidan amu dimurei gunfuranda humuti sun le mégeiwabei lun lagundaarun hau (Ari. 28:5). Genegeguati saminaü le luma le lídanbei Ariñawagúni 2:7, 9. Ñein lubéi lariñaga “íderagua lumutiña ani góunigi laña” Heowá gürigia ha abagaridubaña lidan úarani, ladüga katei le, hasubudirubei giñe “ísuruni luma irichaü” teni hagíame lun sun katei le buídubei.

³ Ibiha lumuti Noé, Danieli luma Hobu lichú aau le lúmagiñeti Bungiu (Ese. 14:14). Ligiaméme giñe ariñawagúbei hawagun lubúeingu  Bungiu uguñe weyu. Agia huguya? Gunfuranda humuti san sun le mégeiwabei lun hagundaaragüdüni Heowá? Lun lira mosu hasubudiruni Bungiu buidu. Ligíati, akutiha wamá ǘrüwa katei. Furumiñe, ida liña lasubudiruni Noé, Danieli luma Hobu Bungiu? Libiaman, ida liña lahuudun houn hasubudiruni? Luma lǘrüwan, kaba wadüga lun ítara lan wafiñen kei hagía?

4. a) Ida liña lasubudiruni Noé Heowá? b) Ida liña lahuudun lun Noé lasubudiruni Heowá?

⁴ Ida liña lasubudiruni Noé Heowá? Lúmagiñe hagumeserun gürigia awinwanda ubouagu, furendeihaña dandu wügüriña afiñetiña kei würiña luagu Bungiu lidan ǘrüwa igaburi súdiniti: lau harihini le adüga laalibei, lau haganbuni le hariñagubei binadu lubúeingu Bungiu luma lau harihini abiniruni le lanügübei gaganbadiwa lan lun lilurudun luma lun lugumadin (Isa. 48:18). Dan le letenirunbei Noé lun le adüga laalibei Bungiu, arihati saragu katei le achoururagüdübalin lun anihein lan Bungiu ani ru ligía fe luagu anihein lan saragu igaburi buiti luagu. Ítara liña gunfuranda lani “magumuchadi lan lubafu” (Rom. 1:20). Lárigiñe, adügati Noé lóugiñe lira, aba lederebudagüdüni lafiñen luagu Bungiu.

5. Ida liña lasubudiruni Noé le labuserunbei Bungiu Houn gürigia?

⁵ Ariñagatu Bíbülia: “Lídangiñe haganbuni gürigia uganu hafiñera”. Mini lan le gayara lan líderaguniwa le hariñagubei amu lun wafiñerun (Rom. 10:17). Ka ayanuhabei luagu Heowá lun Noé? Chóuruti furendei lan saragu luagu Heowá hámagiñe liduheñu kéiburi lúmagiñe lúguchi, aba meha wügüri afiñeti Lamekü ani dan le lágurahounbei wínwangili meha Adán (ariha huméi dibuhu le lídanbei lagumesehan arütíkulu). Ámuya liduheñu Noé ha ayanuhabaña lun luagu Heowá Matusalén le láruguti luma Héredi le láruguti láruguti, le óunwebei 366 irumu lárigiñe lágurahoun Noé (Luk. 3:36, 37). * Másiñati arufudaha hamá wügüriña ha hama hani weiriou lun Noé luagu Bungiu lan adügübaliña gürigia ani le lan labuserunbei lun gasaanigu hamá, buíngüda hameime Ubóu luma lun heseriwidun lun. Háfuga giñe furendei lan aba lan maganbadi lan Adán tuma Ewa lun Heowá, ani arihaléi le ladügübei maganbadi hamá (Agu. 1:28; 3:16-19, 24). Meberesenga ka lan uma lafurendeira Noé luagu Heowá, le lafurendeirubei chülüti tidoun lanigi ani aban línchahani lun leseriwidun lun Bungiu (Agu. 6:9).

6, 7. Ka ladügübei emenigini lau lafiñen Noé?

⁶ Derebugüda lumuti giñe emenigini lafiñen Noé. Gayaraati wasaminaruni ida liña lan lasandiragun Noé lungua dan le líchugubei fe anihein lan emenigini lidan le mini lubéi liri, genegeti “Lemeraaguagüdübadiwa” lan mini lubéi liri (Agu. 5:29). Ariñagati Lamekü lau lídehan Heowá luagu Noé: “Íñaragua lumuti Bungiu múa, mósuti wawadigimaridun here lun wábunaguni; gama lumoun irahü le, lemeraaguagüdübadiwa”. Afiñeti meha Noé luagu Heowá. Ítara kei Aweli luma Enoku, afiñetiña meha luagu “adügawaguni” le lunbei lachuinruni tábulugu hewe (Agu. 3:15).

⁷ Másiñati ua lan gunfuranda lani Noé sun ariñahani le lídanbei Agumesehani 3:15. Gama lumoun, gunfuranda lumuti ru lan dimurei ligía emenigini lau hesefuruba lan gürigia lídangiñe le gádanbaliña. Apurichihati meha Enoku aba uganu genegeguati luma profesía le. Ariñagati lagünrinchagubaña lan Heowá gürigia wuribatiña (Hud. 14, 15). Lagunfuliruba uganu le sunsuinagubei lidan Arümahedón, chóuruti derebugüda laani katei le lafiñen luma lemenigin Noé.

8. Ida liña lahuudun lun Noé lasubudiruni Bungiu buidu?

⁸ Ida liña lahuudun lun Noé lasubudiruni Bungiu? Adügati le lafurendeirubei Noé lun lafiñerun luma lun leresibiruni lichú aau le lúmagiñeti Bungiu. Adügati katei le lun lóunigiragun lungua  luéitima lagadeirun lumadagua luma Heowá. Kei winwan lubéi “lau lugundan Bungiu”, mamadaguti lungua hama gürigia ha minebenbei Bungiu houn. Mígiraguagüdünti giñe lungua lun heyeeduni ánheligu, ha awinwandubaña ubouagu lau hágubu gürigia. Chóuruti aba lan hígiraguagüdün gürigia ha mafiñenbaña houngua dan le harihini ubafu burí le hawagubei ánheligu ha, háfuga áluga hama háhuduragun houn (Agu. 6:1-4). Luagu amu oubaü, subudi lumuti meha Noé ariñaga lan Bungiu houn gürigia lun gasaanigu hamá luma lun habuinchagüdüni Ubóu (Agu. 1:27, 28). Ligíati, másiñati subudi lani meha Noé siñá lan ani mabuidun lan hamarieidun máfianu hama würiña ni lun gasaanigu hamá hau. Chóuruti aba lan furangu lan katei lira lun, dan le larihinbei hanarime lan here ani wéinamu hagía harahüñü máfianu hagía sügǘ hawéi ha híbiri irahüñü. Wisá lumuti Bungiu Noé ladagara lan aban guran. Afiñeti Noé lun le lariñagubei Bungiu, ligía ladügübarun árüka lun hesefurun liduheñu.

9, 10. Ida luba wáyeihani lafiñen Noé?

⁹ Kaba wadüga lun ítara lan wafiñen kei lafiñen Noé? Le lunbei wadügüni waturiahanu Lererun Bungiu, hínsiñe ligíame le wafurendeirubei woun ani ígira wagíame lun taransehani wabagari luma lun tadundehaniwa lidan le lunbei wadügüni (1 Fe. 1:13-15). Ligíati, góunigi lumutiwa afiñeni luma lichú aau le lúmagiñebei Bungiu tuéi lisadaran Mafia luma luéi wuribani le ubouagubei (2 Ko. 2:11). Adügati wuribani le lun hínsiñe lan anarimeni houn gürigia luma magíaguni luma lun hadügüni luriban hayumahan (1 Huan 2:15, 16). Ani gayaraati giñe ladügün lun meberesen hamá ha débilibei hafiñen yarafaali lan luéyuri Heowá. Dan le layanuhabei Hesusu luagu ítara luba lan wadaani kei lidaani Noé, mama meha layanuhaña luágurügü anarimeni o magíaguni, layanuhaña meha luagu dencha lan wadireiruni warihin luéi katei le lúmagiñeti Bungiu (aliiha huméi Matéu 24:36-39).

¹⁰ Álügüdagua humá hungua: “Arufuda lumuti san ligaburi nawinwandun subudi nani Heowá? Lúnrügüñein san gaganbadi nan lun lilurudun Bungiu línchahana nafiñen o ínchaha lumutina lun nasubudiragüdüni houn amu?”. Larufudunbei hóunabagüle anhein habagariduña lubéi keisi lugundan Bungiu.

11. a) Ka luwuyeri arufudahani leresibirubei Danieli? b) Ka ligaburi Danieli hínsiñetimabei hun lun háyeihani

¹¹ Ida liña lasubudiruni Danieli Heowá? Chóuruti arufudaha hamá lagübürigu Danieli lun buidu. Arufudahatiña lun lun hínsiñe lan Heowá lun tuma Lererun. Masansiragunti ínsiñeni ligía lugundun subudi wamuti aturiaha lanu Sandu Bürütu íbini derebuguhali lan (Dan. 9:1, 2). Arufudati furíei le ladügübei Danieli tídangiñe sun lanigi lau ǘnabuguni lidan Danieli 9:3-19 subudi lumuti lan Bungiu buidu buidu luma sun le ladügübei luagu hafulesein Ísüraelina. Ka uagu madireirun hubéi fiu minutu lun haliihani furíei burí le luma lun hasaminarun luagu? Teni humá lun le larufudahabei luagu Danieli.

12-14. a) Ida liña larufuduni Danieli lichú aau le lúmagiñeti Bungiu? b) Ida liña labiniruni Heowá Danieli ladüga úaragua lan ani ganigi ligía?

¹² Ida liña lahuudun lun Danieli lasubudiruni Bungiu? Hénrenguti meha ibagari houn huríu ha úaraguabaña, Babilónia, aban uburugu le buinbei hau guáriua. Ariñagati meha Heowá houn huríu lun háluahani darangilaü le lídanbei “uburugu” le ñeinhin lubéi lanügaña (Her. 29:7). Gama lumoun, agurabati lúnrügü lan heseriwida tau sun hanigi (Afu. 34:14). Ida liña lagunfuliruni Danieli bián gumadi le? Íderagua lumuti lichú aau le lúmagiñebei Bungiu lun gunfuranda lani lunti lan gaganbadi lan lun Heowá lubaragiñe gaganbadi lan houn gumadimatiña. Átiri irumu lárigiñe aba larufudahani Hesusu ligiaméme gumadi (Luk. 20:25).

¹³ Samina humá luagu le ladügübei Danieli dan le lichugúnbei gumadi siñá lan lafurieidúniwa ni lun layumuragun lun ni aban bungiu o gürigia luagu darandi weyu luéidügü lun urúei (aliiha huméi  Danieli 6:7-10). Gayaraati hamuga láluahan Danieli lun mafurieidun lan o lariñagun: “Mama lun súnwandan lúrudu le, darandirügüba weyu lau”. Gama lumoun, mígirunti lun ladüraaguni lúrudu ligía láhuduragun lun Bungiu, katei meha le súdinitimabei lun. Gayaraati hamuga lafurieidun aramudaguarügü luéi harihini gürigia. Subudi lumuti Danieli subudi lan houn saragu gürigia hechu lan afurieida sagü weyu. Ligíati, íbini subudi lani lídanñein lan meha denchaü libagari, máluahati ladügün somu katei lun hasaminaruba lan gürigia máhuduragun haali lan lun Heowá.

¹⁴ Biní lumuti Heowá Danieli lau lesefuruni hawéi liñún ladüga úaraguni le larufudubei luma ganigi. Adügati milaguru ligía lun laganbahóun luagu Heowá darí lumoun lagumuhóun larigeirugu fulasu le lábugiñebei hagumadihan Médiana hama Pérüsiana (Dan. 6:25-27).

15. Kaba wadüga lun ítara lan wafiñen kei Danieli?

¹⁵ Kaba wadüga lun ítara lan wafiñen kei lafiñen Danieli? Úati buídurügü lan waliihanu Bíbülia. Lun lederebugudun wafiñen lunti gunfuranda wamanu (Mat. 13:23). Busentiwa wasubudiruni ka lan lisaminanbei Heowá luagu ítaga katei, mini lan le mosu lan gunfuranda wamani adundehani le tídanbei Bíbülia. Lun lira mosu wasaminarun hulili luagu le waliihabei. Súdiniti giñe wafurieidun súnwandan tídangiñe sun taruman wanigi, dántima wagagibudagun luma katei hénrenguti. Gayaraabei wafiñerun líchuguba lan Heowá lichú aau luma erei le wemegeirubei woun (Sant. 1:5).

16, 17. Ida liña lasubudiruni Hobu Heowá buidu?

¹⁶ Ida liña lasubudiruni Hobu Heowá? Mama meha ísüraelina Hobu, gama lumoun, gaduheñuguati meha luma Abüraámü, Isaakü, Hakobu íbini diseguaña lan. Ruti meha Heowá ariñahani luougua houn wügüri ha luagu lisuuni houn gürigia. Ibidiñeti woun ida liña la lasubudiruni Hobu sun burí inarüni gebegiti ligía (Hob. 23:12). Ariñagati Hobu lun Heowá: “Aganbaharügütina meha buagu” (Hob. 42:5). Ani ariñagati Bungiu inarüni lan katei le lariñagubei Hobu luagu (Hob. 42:7, 8).

¹⁷ Ariha lumuti giñe Hobu ligaburi Heowá lidan sun le ladügübei (Hob. 12:7-9, 13). Dan lárigiñe, yusu lumuti Heowá sun le adüga laalibei lun laritaguagüdüni Hobu luagu ñüraü wamá lóubawagu Bungiu ani adüga lumuti giñe Eliú ligiaméme (Hob. 37:14; 38:1-4). Ñuluguagüda lumuti dimurei le lariñagubei Heowá lanigi Hobu, darí lun lariñagun: “Subudi numuti luagu gayara bani sun katei ani úa lan ni kata básiñarun adüga”. Ani ábaya lariñagun: “Ligía nasakürihanbei, ñun lidan kaliki luma baligi” (Hob. 42:2, 6).

18, 19. Ida liña larufuduni Hobu subudi lan Heowá lun buidu?

 ¹⁸ Ida liña lahuudun lun Hobu lasubudiruni Bungiu? Gufuranda lumuti meha Hobu sun ladundehan Bungiu. Subuditi meha Heowá lun buidu, ani ínchaha lumuti subudi ligía lun ladügüni le buídubei. Subudi lumuti meha siñá lan lariñagun hínsiñe lan Bungiu lun ani anihame óuseraña gürigia wuriba (Hob. 6:14). Masaminarunti íñutima lan hawéi amu gürigia, óusera lumutiña gürigia kamá hamuga liduheñu meberesenga anhein meha gudeme habéi o risi habéi. Ariñagati: “Ábanmeme Bungiu adügübaliwa turageirugu wáguchu” (Hob. 31:13-22). Furanguti, mígirun lan Hobu lun ladügün subudiwa lan meha o lirisin lun lasansirun ligaburi lisaminan hawagu amu. Ámuti meha ligaburi hawéi saragu rísitiña hama gabafutiña ha lídanbaña dan le.

¹⁹ Mígirunti meha Hobu lun ñein lan somu katei kei umegeguni lun leberesehani lumadagua luma Heowá. Subuditi meha lun anhein lan hamuga ladüga lira, lanügüñein lan hamuga kei lubungiute. Ligía guánarügü ariñagubei: “Ítara liña hamuga kei neyeedagun lau Bungiu le siélubei” (aliiha huméi Hobu 31:24-28). Gama lumoun, ariha lumuti maríei kei aban óundaruni sagüráuti. Ani füramaseti lúniwagua mawamadirunbei lan ni aban würi (Hob. 31:1). Haritagua waméi lidan lan meha dan lügüra, ánhati meha Heowá lun gámari hamá wügüriña tóugiñe aban wuri. Ligíati lun hamuga busén lan Hobu, biámañanu hamuga meha lánigu weiriou. * Gama lumoun, genegeti aban lan lasigiruni le ladügübei Heowá lidan fuluri-agei Edén lau lamarieidagüdüni aban wügüri tuma ábanrügü würi (Agu. 2:18, 24). Kéiburi milu sisi san irumu lárigiñe aba lariñaguni Hesusu ligiaméme dimurei luáguti lunti lan gaganbadi wamá sun wagía lun adundehani luagu agamariduni luma maríei (Mat. 5:28; 19:4, 5).

20. Ida luba líderaguniwa wasubudiruni Heowá buidu luma lugumadin lun wanúadahaniña wamadagu luma wisebáhari?

²⁰ Kaba wadüga lun ítara lan wafiñen kei lafiñen Hobu? Kei buga wariñaguni, mosu wasubudiruni Heowá buidu ígira wagíame lun ladundehaniwa lisubudin lidan sun le lunbei wadügüni lidan wabagari. Arufudahatu Bíbülia woun iyereegu hamá ha “hínsiñehabubaña lun anarimeni” lun Heowá ani moun lumuti gamadagua wamá hama “yéetiña” (aliiha huméi Sálumu 11:5; 26:4). Ka lariñagubei bérusu le luagu ligaburi lisaminan Heowá? Ida luba wíchuguni subudi le lidan katei le wadügübei, kéiburi lidan tayusurún Internet, hanuadahóun umadagu luma lidan isebáhari? Líderagubadiwa lóunabagüle asubudirei anhein subudi lubéi Heowá woun buidu. Anhein busén wabéi lun haruma lan wabagari lidan ubóu wuribati le, lunti wasubudirunu Lererun Bungiu buidu, ani úati buídurügü lan wasubudiruni le buídubei lumoun le wuribabei, lunti giñe wabagaridun kei chu tau mama kei ibidiougua tau (Ebü. 5:14; Efe. 5:15).

21. Kaba íderaguawa gunfurandei sun le wemegeirubei lun wagundaaragüdüni Heowá?

²¹ Áluaha lumuti Noé, Danieli, luma Hobu Heowá tau sun hanigi, ligía, lígirubei lun hasubudiruni. Íderagua lumutiña lun gufuranda hamani sun katei, lidan amu dimurei, sun le mégeiwabei lun hagundaaragüdüni. Adügati lira lun gürigia hamá ha richaguatiña ani gúndaatiña le tímatimaati (Sal. 1:1-3). Ligíati, álügüdagua wamá wóuniwagua: “Subuditi san Heowá nun buidu kei meha lasubudiruni Noé, Danieli, luma Hobu?”. Le linarün katei gayaraati wasubudiruni buidu buidu sügǘ hawéi, lugundun ru haali Heowá saragu ariñahani luougua woun (Ari. 4:18). Ligíati, aturiaha wamoun Lererun Bungiu buidu, samina wamá hulili luagu le waliihabei ani amuriaha wamá sífiri sandu luma Heowá. Gama lumoun, madügün wabéi le hadügübei lílana ubóu wuribati le. Wóuseruba lau lichú aau ani ábame lederebugudun wafiñen luagu Heowá sagü weyu (Ari. 2:4-7).