1-3. a) ¿Chuqui mi caj i coltañonla chaʼan xucʼulonla ti Dios ti ili cojix bʌ qʼuin? b) ¿Chuqui mi caj laj qʼuel ti ili temaj?

CHUMULOÑIXLA tiʼ yujtibal jiñi cojix bʌ qʼuin. Jiñi jontoloʼ bʌ woli (choncol) i «pʼojlelob [...] cheʼ bajcheʼ miʼ pasel jam» (Sal. 92:7). Jin chaʼan, mach toj sajteloñicla cheʼ mi laj qʼuel jiñi wiñicob xʼixicob (quixtañujob) maʼañic miʼ yʌcʼob ti ñuc i mandar Dios. Cheʼ jiñi, ¿bajcheʼ yom ‹lajalonla bajcheʼ alʌlob› tiʼ chaʼan bʌ jontolil, pero lajal lac ñaʼtʌbal bajcheʼ ‹winicob añoʼ bʌ cabʌl i pusicʼal›? (1 Co. 14:20).

² I jacʼbal yaʼʌch mi lac taj yaʼ ti texto baqui chucul ili temaj baʼ miʼ tʼox al chaʼan «muʼ bʌ i tsajcañob majlel lac Yum mi luʼ chʼʌmbeñob isujm», yom i yʌl chaʼan miʼ cʼotel i ñaʼtañob yom bʌ miʼ melob chaʼan utsʼat miʼ qʼuejlelob (Pr. 28:5). Yaʼ ti Proverbios 2:7, 9 lʌcʼʌ lajalʌch miʼ yʌl. Miʼ yʌl chaʼan Jehová «miʼ chajpʌbeñob i wenlel [«wem bʌ i ñaʼtʌbal», TNM] jiñi tojoʼ bʌ», i cheʼ bajcheʼ jiñi miʼ cʼotel i cʌñob «jini toj bʌ i pusicʼal yicʼot toj bʌ i tʼan yicʼot toj bʌ i melbal», mi caj i melob «pejtelel chuqui tac wen».

³ Noé, Daniel yicʼot Job tsaʼʌch i tajayob i ñaʼtʌbal chʼoyol bʌ ti Dios (Ez. 14:14). I cheʼʌch woli (yʌquel) i yujtel jiñi i tejclum Dios ili ora. Ixcu jatet, ¿cʼotemix baʼ ñaʼtan chuqui tac yom maʼ mel chaʼan utsʼat miʼ qʼuelet Jehová? Chaʼan maʼ mejlel, yom maʼ cʌn ti wen jiñi Dios. Jin chaʼan, an uxchajp muʼ bʌ caj laj qʼuel. Ñaxam bʌ,  jiñʌch bajcheʼ tsaʼ cʼoti i cʌñob Dios jiñi Noé, Daniel yicʼot Job. I chaʼpʼejlel, jiñʌch bajcheʼ tsiʼ coltayob chuqui tsiʼ cʌñʌyob. I yuxpʼejlel, jiñʌch bajcheʼ miʼ mejlel lac taj pʼʌtʌl bʌ lac ñopoñel (chʼujbiya) bajcheʼ i chaʼañob.

4. a) ¿Bajcheʼ tsiʼ cʌñʌ Jehová jiñi Noé? b) ¿Bajcheʼ tsiʼ wen colta Noé cheʼ tsiʼ cʌñʌ Jehová?

⁴ ¿Bajcheʼ tsiʼ cʌñʌ Dios? Cʼʌlʌl tiʼ cajibal, jiñi wiñicob yicʼot xʼixicob tsaʼ bʌ i yʌcʼʌyob i ñopoñel ti Dios an uxchajp bajcheʼ tsaʼ cʼoti i cʌñob: Tsiʼ wen qʼueleyob chuqui tac melbil i chaʼan, tsiʼ ñʌchʼtʌbeyob i tʼan yambʌ i wiñicob Dios xucʼuloʼ bʌ yicʼot tsiʼ qʼuelbeyob i bendición Dios cheʼ tsiʼ jacʼbeyob i mandar yicʼot i principio tac (Is. 48:18). Cheʼ bʌ Noé tsiʼ qʼuele pejtelel chuqui an ti panchan yicʼot pañimil (mulawil) tsaʼ cʼoti i ñaʼtan chaʼan añʌch Dios yicʼot tsiʼ cʌmbe wen tac bʌ i melbal. Cheʼʌch tsaʼ cʼoti i chʼʌmben isujm «i pʼʌtʌlel yicʼot i ñaʼtibal [Dios] mach bʌ anic miʼ jilel», yom i yʌl, chaʼan Jehová jiñʌch ñumen pʼʌtʌl bʌ yicʼot cojach bʌ Dios (Ro. 1:20). Cheʼ bajcheʼ jiñi, Noé tsaʼ ñumen pʼʌtʼa i ñopoñel ti Dios.

5. ¿Bajcheʼ tsiʼ cʌñʌ Noé chuqui yom bʌ Dios chaʼan jiñi wiñicob xʼixicob?

⁵ Jiñi Biblia miʼ yʌl: «Mi lac ñop chuqui mi la cubin». Ili yom i yʌl chaʼan jiñi muʼ bʌ lac subentel ti yambʌlob miʼ mejlel i coltañonla lac taj lac ñopoñel (Ro. 10:17). ¿Majqui tiʼ sube Noé chaʼan Jehová? Tiʼ sujm, cabʌl chuqui tsiʼ cʌñʌ tiʼ tojlel i familiajob, bajcheʼ tiʼ tat, i cʼabaʼ Lamec, juntiquil tsaʼ bʌ i ñopo Dios i tsiʼ yila pañimil cheʼ cuxulto Adán (qʼuele jiñi dibujo am bʌ tiʼ tejchibal). Yambʌ i piʼʌlob jiñʌch i tatuch, i cʼabaʼ Matusalén. Yicʼot Jared, i tatuch Matusalén, tsaʼ bʌ chʌmi (sajti) cheʼ añix 366 jab i chʼocʼan Noé (Lc. 3:36, 37). * Tajol jiñʌch ili wiñicob yicʼot i yijñamob tsaʼ bʌ i subeyob Noé chaʼan Dios tsiʼ mele wiñic yicʼot xʼixic chaʼan miʼ pʼolob i bʌ, miʼ butʼob ili pañimil yicʼot miʼ melbeñob i yeʼtel (troñel). Noé tajol tsiʼ cʌñʌ jaʼel chaʼan Adán yicʼot Eva tsiʼ ñusʌbeyob i tʼan Jehová, i tsaʼʌch i qʼuelbe i wocolel i ñusatʼañob (Gn. 1:28; 3:16-19, 24). Mi cheʼ tsaʼ ujti o maʼañic, tsaʼ bʌ i cʌñʌ Noé tsaʼʌch cʼoti tiʼ pusicʼal i tsiʼ ñijca chaʼan miʼ melben i yeʼtel Dios (Gn. 6:9).

6, 7. ¿Bajcheʼ tsiʼ coltʌbe i ñopoñel Noé jiñi pijtaya?

⁶ Jiñi lac pijtaya miʼ pʼʌtʼesan lac ñopoñel. Laʼ cu lac ñaʼtan bajcheʼ yubil tsiʼ yubi Noé cheʼ bʌ tsiʼ ñaʼta chaʼan jiñi i sujmlel i cʼabaʼ miʼ yʌcʼ ti ñaʼtʌntel jumpʼejl pijtaya, come jiñi i cʼabaʼ yom i yʌl «cʼaj o» o «i ñuqʼuesʌntel lac pusicʼal» (Gn. 5:29). Tiʼ coltaya Dios, Lamec tsiʼ yʌlʌ tiʼ tojlel Noé: «Jini mi caj i ñuqʼuesan lac pusicʼal chaʼan la queʼtel, come wocol jax mi lac chaʼlen eʼtel chaʼan ili lum tsaʼ bʌ i puchʼu lac Yum». Noé tsiʼ ñopo Dios. Lajal bajcheʼ Abel yicʼot Enoc, tsiʼ ñopo chaʼan i «pʼolbal jini xʼixic» mi caj i tʼuchtʌben i jol jiñi lucum (Gn. 3:15).

⁷ Noé tajol maʼañic tsiʼ luʼ chʼʌmbe isujm jiñi profecía chaʼan Génesis 3:15. Pero tsaʼʌch i chʼʌmbe isujm chaʼan jiñi tʼan miʼ yʌqʼueñonla jumpʼejl lac pijtaya chaʼan mi caj lac taj laj coltʌntel. Enoc tsiʼ yʌlʌ jumpʼejl tʼan lʌcʼʌ lajal bʌ bajcheʼ iliyi. Tiʼ subu chaʼan Jehová mi caj i jisan jontoloʼ bʌ (Jud. 14, 15). Ili tʼan, muʼ bʌ caj i tsʼʌctiyel ti Armagedón, tsaʼʌch i pʼʌtʼesʌbe i ñopoñel yicʼot i pijtaya Noé.

8. ¿Bajcheʼ tsiʼ colta Noé cheʼ tsiʼ wen cʌñʌ Dios?

⁸ ¿Bajcheʼ tsiʼ colta Noé cheʼ tsiʼ wen cʌñʌ Dios? Jiñi tsaʼ bʌ i cʌñʌ tsiʼ colta i taj i ñopoñel yicʼot i ñaʼtʌbal chʼoyol bʌ ti Dios. I jiñʌch tsaʼ bʌ i cʌnta chaʼan maʼañic chuqui miʼ ñajtʼesan ti Dios. Jumpʼejl ejemplo, Noé «tsiʼ chaʼle xʌmbal tiʼ bijlel Dios», maʼañic tiʼ tsajca jiñi mach bʌ muqʼuic i qʼuelob ti ñuc Dios. Cheʼ jaʼel, maʼañic tsiʼ yʌcʼʌ i bʌ ti lotintel ti jiñi jontol bʌ ángelob tsaʼ bʌ jubiyob tilel bajcheʼ wiñic ila ti Pañimil. Pero jiñi mach bʌ añobic  i ñopoñel tsaʼ toj sajtiyob i pusicʼal cheʼ tsiʼ qʼuelbeyob i pʼʌtʌlel yicʼot chuqui tac miʼ mejlelob i mel, tajol tsaʼto i ñopoyob i chʼujutesan (Gn. 6:1-4, 9). Cheʼ jaʼel, Noé yujil chaʼan Dios tiʼ sube jiñi quixtañujob chaʼan miʼ pʼolob i bʌ yicʼot miʼ butʼob Pañimil (Gn. 1:27, 28). Jin chaʼan, yujil chaʼan mach weñic cheʼ jiñi xibajob miʼ pʌyob i yijñam yicʼot miʼ pʼolob i bʌ come mach cheʼic acʼbilob. Tsaʼ cʼoti i ñumen cʌn cheʼ tsiʼ qʼuele chaʼan jiñi i yalobilob ñumen colemob yicʼot pʼʌtʌlob bajcheʼ yañoʼ bʌ. Ti wiʼil, Dios tsiʼ wʌn sube Noé chaʼan mi caj i chʼʌm tilel butʼjaʼ. Noé tsaʼʌch i ñopo jiñi, jin chaʼ an tsiʼ mele jiñi arca tsaʼ bʌ colta i familia (He. 11:7).

9, 10. ¿Bajcheʼ miʼ mejlel lac lajiben i ñopoñel Noé?

⁹ ¿Bajcheʼ miʼ mejlel lac taj pʼʌtʌl bʌ lac ñopoñel bajcheʼ i chaʼan Noé? Junchajp ñuc bʌ i cʼʌjñibal jiñʌch cheʼ mi lac pejcan i Tʼan Dios, mi lac chʼʌm ti ñuc chuqui mi laj cʌn i mi laj cʌy chaʼan miʼ weñʼesañonla yicʼot miʼ tojʼesañonla ti chuqui mi lac ñaʼtan lac mel (1 P. 1:13-15). Cheʼ jiñi, pejtelel i yac Satanás yicʼot i pʼʌtʌlel ili pañimil maʼañic chuqui mi caj i tumbeñonla, come an lac ñopoñel yicʼot lac ñaʼtʌbal chʼoyol bʌ ti Dios (2 Co. 2:11). Ili jontol bʌ i pʼʌtʌlel pañimil miʼ ñijcan jiñi quixtañujob chaʼan miʼ mulañob jontolil yicʼot tsʼiʼlel, i cojach miʼ yʌcʼob i ñaʼtʌbal ti chuqui bajñel yomob (1 Jn. 2:15, 16). Muʼto i mejlel i yʌcʼ chaʼan jiñi cʼuñoʼ bʌ i ñopoñel maʼañic miʼ yʌcʼob ti ñuc pejtelel muʼ bʌ i pʌs chaʼan lʌcʼʌlix i qʼuiñilel Jehová. Yom mi laj cʼajtesan chaʼan Jesús mach jiñic tsiʼ ñumen taja ti tʼan jiñi jontolil yicʼot tsʼiʼlel cheʼ bʌ tsiʼ laji ili ora bajcheʼ tiʼ yorajlel Noé, tsaʼ bʌ i yʌlʌ jiñʌch jiñi wocol chaʼan miʼ mejlel lac ñajʌtesan i chaʼan bʌ Dios (pejcan Mateo 24:36-39).

¹⁰ Cʼajtiben a bʌ: «¿Muʼ ba c pʌs bajcheʼ chumulon chaʼan j cʌñʌyʌch Jehová? ¿Mucʼʌch ba i ñijcañon j cʌcʼ ti cʌñol i mandar Jehová jiñi c ñopoñel, i mach cojach mic jacʼ?». Cheʼ bajcheʼ maʼ jacʼ mi caj a ñaʼtan mi wolʌch a xʌn tiʼ bijlel jiñi isujm bʌ Dios.

11. a) ¿Bajcheʼ yilal bʌ cʌntesʌntel tsaʼ aqʼuenti Daniel? b) ¿Baqui bʌ i melbal Daniel a wom a lajin?

¹¹ ¿Bajcheʼ tsiʼ cʌñʌ Dios? Daniel tsaʼʌch wen cʌntesʌnti ti i tat i ñaʼ. Jiñobʌch tsiʼ pʌsbeyob i cʼuxbin Jehová yicʼot i Tʼan. I la cujil chaʼan maʼañic tsaʼ wis qʼuextʌyi jiñi cʼuxbiya, come maʼañic tsiʼ cʌyʌ i pejcan jiñi Chʼujul bʌ Tsʼijbujel anquese ñoxix (Dn. 9:1, 2). Jiñi oración tsaʼ bʌ i mele tiʼ pecʼlel yicʼot ti jumpʼejl i pusicʼal miʼ pʌs chaʼan wen i cʌñʌyʌch Dios yicʼot pejtelel chuqui melbil i chaʼan tiʼ tojlel Israel, i yaʼ mi lac taj ti Daniel 9:3-19. ¿Ixcu cheʼ muqʼuic a wʌqʼuen i yorajlel a pejcan jiñi oración yicʼot maʼ wen ñaʼtan? Wen qʼuele chuqui maʼ cʌn tiʼ tojlel Daniel.

12-14. a) ¿Bajcheʼ tsiʼ pʌsʌ Daniel chaʼan añʌch i ñaʼtʌbal chʼoyol bʌ ti Dios? b) ¿Bajcheʼ tsiʼ colta Jehová jiñi Daniel chaʼan i xucʼtʌlel yicʼot i chʼejlel?

¹² ¿Bajcheʼ tsiʼ colta Daniel cheʼ tsiʼ wen cʌñʌ Dios? Jiñi xucʼul bʌ judíojob wocolʌch tsiʼ ñusayob cheʼ tsaʼ ajñiyob ti Babilonia, baʼ maʼañic miʼ chʼujutesañob Jehová. Jumpʼejl ejemplo, Jehová tiʼ subeyob chaʼan yom miʼ sʌclañob bajcheʼ miʼ yajñelob ti ñʌchʼʌl yaʼ ti tejclum baʼ tsaʼ pʌjyiyob majlel (Jer. 29:7). Pero tiʼ ñaʼta jaʼel chaʼan cojach yom miʼ chʼujutesañob Dios ti jumpʼejlob i pusicʼal (Éx. 34:14). ¿Bajcheʼ tsaʼ mejli i tsʼʌctesan Daniel ili chaʼpʼejl mandar? Jiñi i ñaʼtʌbal chʼoyol bʌ ti Dios tsiʼ colta i chʼʌmben isujm chaʼan ñaxan yom miʼ jacʼben i tʼan Jehová, i mach jiñic yumʌlob ti pañimil. Cheʼ ñumeñix cabʌl jabil, Jesús tsiʼ chaʼ pʌsʌ jiñi principio chaʼan an jach baʼ jaxʌl mi lac jacʼben i tʼan yumʌlob (Lc. 20:25).

¹³ Ñaʼtancu tsaʼ bʌ i mele Daniel cheʼ bʌ tsaʼ ajli chaʼan ti jumpʼejl uw maʼañic majqui yom miʼ melben oración i dios o juntiquil quixtañu, cojach yom miʼ pejcʌntel jiñi rey (pejcan Daniel 6:7-10). Cheʼic yom Daniel, tsaʼ mejli i yʌl: «Mach tiʼ pejtelelic ora, jumpʼejl jach uw». Pero maʼañic tsiʼ ñumen acʼʌ ti ñuc i mandar juntiquil wiñic, jiñʌch i chʼujutesʌntel  Dios. Anquese tajol tsaʼʌch mejli i mel ti mucul jiñi i yoración. Pero Daniel yujil chaʼan wen cʌmbil chaʼan ñʌmʌl ti oración ti jujumpʼejl qʼuin. Jin chaʼan, anquese yujil chaʼan miʼ mejlel ti tsʌnsʌntel, maʼañic tsiʼ wis mele muʼ bʌ i yʌcʼ ti ñaʼtʌntel chaʼan tsaʼix i cʌyʌ i chʼujutesan Jehová.

¹⁴ Chaʼan Daniel tsiʼ pʌsʌ i xucʼtʌlel yicʼot i chʼejlel, Dios tsiʼ colta chaʼan maʼañic miʼ cʼuxtʌl ti bajlum. Jiñi milagro tsiʼ yʌcʼʌ ti tsictiyel i ñuclel Jehová tiʼ pejtelel i yumʌntel Medopersia (Dn. 6:25-27).

15. ¿Bajcheʼ miʼ mejlel lac taj lac ñopoñel bajcheʼ i chaʼan Daniel?

¹⁵ ¿Bajcheʼ miʼ mejlel lac taj pʼʌtʌl bʌ lac ñopoñel bajcheʼ i chaʼan Daniel? Mach jasʌlic yom mi lac pejcʌben i Tʼan Dios. Chaʼan miʼ mejlel ti pʼʌtʼan lac chʼujbiya, yom mi lac chʼʌmben isujm (Mt. 13:23). Yom miʼ cʼotel laj cʌn chuqui miʼ ñaʼtan Jehová, yaʼ ochem jiñi principio tac am bʌ ti Biblia. Jin chaʼan, yom mi lac wen ñaʼtan muʼ bʌ lac pejcan. Ñuc i cʼʌjñibal jaʼel cheʼ ti bele ora mi lac melben oración ti jumpʼejl lac pusicʼal, ñumento cheʼ woli lac ñusan tsʌts tac bʌ wocol. Miʼ mejlel lac ñop chaʼan Jehová mi caj i yʌqʼueñonla lac ñaʼtʌbal yicʼot lac pʼʌtʌlel cheʼ mi laj cʼajtiben (Stg. 1:5).

16, 17. ¿Bajcheʼ tsaʼ cʼoti i wen cʌn Jehová jiñi Job?

¹⁶ ¿Bajcheʼ tsiʼ cʌñʌ Jehová? Job mach tilemic tiʼ pʼolbal Israel, pero ñajti i piʼʌlʌch Abrahán, Isaac yicʼot Jacob. Jehová tsiʼ yʌcʼʌ i bʌ ti cʌjñel tiʼ tojlel ili wiñicob yicʼot jiñi ñaʼtʌbil i chaʼan tiʼ tojlel quixtañujob. Mach la cujilic bajcheʼ, pero Job cabʌlʌch chuqui tsiʼ cʌñʌ chaʼan jiñi wʌn ñaʼtʌbil bʌ i chaʼan Dios (Job 23:12). Tiʼ sube Jehová: «Ti yambʌ ora tsaʼ jach j cʌñʌyet chaʼan i tʼan yañoʼ bʌ» (Job 42:5). Dios tiʼ tsictesa chaʼan isujmʌch pejtelel tsaʼ bʌ i yʌlʌ Job tiʼ tojlel (Job 42:7, 8).

¹⁷ Cheʼ bʌ Job tsiʼ wen qʼuele chuqui tac melbil i chaʼan Dios, tsaʼ cʼoti i cʌn yan tac bʌ bajcheʼ yilal (Job 12:7-9, 13). Ti wiʼil, Elihú yicʼot Jehová tsiʼ tajbeyob ti tʼan pejtelel chuqui an ti pañimil yicʼot ti panchan chaʼan miʼ cʼajtesan chaʼan tiʼ wut Dios cheʼ jach wistʌlonla (Job 37:14; 38:1-4). Tsaʼ bʌ i yʌlʌ Jehová tsiʼ wen ñijcʌbe i pusicʼal Job, i tiʼ sube: «Cujil melel awujil melol pejtel chuqui an. Maʼanic majqui mi mejlel i mʌctañet cheʼ an chuqui maʼ ñaʼtan a mel». I tsiʼ chaʼ alʌ: «Mic tsic c pusicʼal chaʼan c mul [...]. Mic mujlan c bʌ tiʼ tʌñil cʼajc» (Job 42:2, 6).

18, 19. ¿Bajcheʼ tsiʼ pʌsʌ Job chaʼan tiʼ sujmʌch cʌmbil i chaʼan Jehová?

 ¹⁸ ¿Bajcheʼ tsiʼ colta Job cheʼ tsiʼ wen cʌñʌ Dios? Job tsiʼ wen chʼʌmbe isujm jiñi principio tac acʼbil bʌ i chaʼan Dios. Ti sujm tsiʼ cʌñʌ Jehová, i jiñi cʌmbil bʌ i chaʼan, tsiʼ ñijcʌbe i pusicʼal chaʼan miʼ mel chuqui wen. Jumpʼejl ejemplo, yujil chaʼan maʼañic miʼ mejlel i yʌl chaʼan miʼ cʼuxbin Dios, pero miʼ ticʼlan yambʌlob (Job 6:14). Maʼañic tsiʼ ñaʼta chaʼan ñumen ñuc bajcheʼ yambʌlob, anquese wen an i taqʼuin o maʼañic, tiʼ pejtelelob tsiʼ qʼuele bajcheʼ i familia. Tsiʼ yʌlʌ: «Jini c Yum tsaʼ bʌ i meleyon tiʼ ñʌcʼ c ñaʼ tsiʼ meleyob jaʼel» (Job 31:13-22). Anquese Job wen cʌmbil yicʼot cabʌl i taqʼuin, maʼañic tsiʼ yʌcʼʌ chaʼan ñumeñix ti pʼis bajcheʼ miʼ ñaʼtan i bʌ yicʼot lecoj miʼ ñaʼtan tiʼ tojlel yambʌlob. Mach wis lajalic bajcheʼ jiñi wen añoʼ bʌ i taqʼuin yicʼot ñucoʼ bʌ i yeʼtel ili ora.

¹⁹ Job cojach tsiʼ ñumen acʼʌ ti ñuc Jehová, mach jiñic yan tac bʌ, bajcheʼ chubʌʼañʌl tac, mi tsaʼicto i yʌcʼʌ ti ochel tiʼ pusicʼal. Yujil chaʼan tsaʼ yajli tiʼ chʼujutesʌntel diosteʼ tac cheʼ tsaʼic i melel jiñi. Jiñʌch tsiʼ yʌlʌ: «Cheʼic jiñi, mach xucʼulonic ti Dios» (pejcan Job 31:24-28). Cheʼ jaʼel, chʼujul tsiʼ qʼuele jiñi ñujpuñel ti juntiquil wiñic yicʼot xʼixic. Tsaʼto i mele jumpʼejl «trato» yicʼot i wut chaʼan maʼañic miʼ lecoj qʼuel yambʌ xʼixic (Job 31:1). Yom mi laj cʼajtesan chaʼan ti jim bʌ ora, Jehová tsiʼ cuchu cheʼ jiñi wiñicob ñumen ti juntiquil miʼ pʌyob i yijñam. Jin chaʼan, cheʼic yom Job, tsaʼ mejli i pʌy yambʌ i yijñam. * Pero tsiquil chaʼan tiʼ ñopo i tsajcan cheʼ bajcheʼ tsiʼ mele Jehová yaʼ ti pʌcʼʌbʌl Edén, cheʼ juntiquil jach i yijñam tsiʼ yʌqʼue jiñi wiñic (Gn. 2:18, 24). Cheʼ ñumeñix cheʼ bʌ 1600 jab, Jesús tsiʼ pʌsʌ chaʼan yomʌch mi lac bej chʼʌm ti ñuc jiñi toj bʌ principio tac muʼ bʌ i yʌl chaʼan jiñi piʼleya yicʼot ñujpuñel (Mt. 5:28; 19:4, 5).

20. ¿Bajcheʼ miʼ coltañonla lac yajcan la camigojob yicʼot ñusaqʼuin tac cheʼ wen cʌmbil lac chaʼan Jehová yicʼot i mandar?

²⁰ ¿Bajcheʼ miʼ mejlel lac taj pʼʌtʌl bʌ lac ñopoñel bajcheʼ i chaʼan Daniel? Miʼ mejlel lac chaʼ al chaʼan jiñʌch cheʼ mi lac wen cʌn Jehová i mi laj cʌy chaʼan jin miʼ tojʼesañonla ti laj cuxtʌlel. Jumpʼejl ejemplo, jiñi Biblia miʼ cʌntesañonla chaʼan Jehová «miʼ tsʼaʼlen [...] jini muʼ bʌ i mulan jisaya» o jatsʼ, i chaʼan mach yomic mi la cajñel yicʼot jiñi ‹chaʼpʼejl bʌ i pusicʼal› (pejcan Salmo 11:5; 26:4). ¿Chuqui miʼ pʌsbeñonla ili texto chaʼan bajcheʼ yilal chuqui miʼ ñaʼtan Jehová? ¿Bajcheʼ yom miʼ coltañonla lac ñaʼtan baqui bʌ ñuc i cʼʌjñibal, bajcheʼ mi laj cʼʌn Internet, mi lac yajcan la camigojob yicʼot lac ñusaqʼuin? Jiñi i jacʼbal mi caj i yʌqʼueñonla lac ñaʼtan mi wen cʌmbilʌch lac chaʼan Jehová. Mi sʌc la com ajñel ti ili jontol bʌ pañimil, yom yʌxʌl laj co chaʼan mach cojach mi laj cʌn chuqui wen yicʼot mach bʌ weñic, yom tsajilonla jaʼel (He. 5:14; Ef. 5:15).

21. ¿Chuqui mi caj i coltañonla lac chʼʌmben isujm pejtelel chuqui la com chaʼan utsʼat miʼ qʼuelonla Jehová?

²¹ Jehová tsiʼ yʌcʼʌ i bʌ ti tajtʌl tiʼ tojlel Noé, Daniel yicʼot Job come tsaʼʌch i sʌclayob. Tsiʼ coltayob i «luʼ chʼʌmbeñob isujm», yom i yʌl pejtelel i cʼʌjñibal bʌ i chaʼañob chaʼan utsʼat miʼ qʼuejlelob. Cheʼʌch tsaʼ sujtiyob bajcheʼ yom bʌ mi lac tsajcañob tiʼ melol chuqui toj, i tsiʼ wen tajayob i tijicñʌyel (Sal. 1:1-3). Jin chaʼan, laʼ laj cʼajtiben lac bʌ: «¿Wen j cʌñʌ ba Jehová cheʼ bajcheʼ Noé, Daniel yicʼot Job?». Tiʼ sujm, ili ora ñumento miʼ mejlel laj cʌn bajcheʼob come cabʌlix chuqui acʼbil i chaʼan chaʼan mi laj cʌn (Pr. 4:18). Jin chaʼan, laʼ lac wen qʼuel bajcheʼ an i sujmlel muʼ bʌ i yʌl i Tʼan Dios, laʼ lac wen ñaʼtan chuqui mi lac pejcan yicʼot laʼ laj cʼajtiben chʼujul bʌ i yespíritu Jehová. Cheʼ bajcheʼ jiñi, ili jontol bʌ pañimil maʼañic mi caj i ticʼlañonla. Mi caj laj cʼʌn lac ñaʼtʌbal ti chuqui mi lac mel yicʼot ñumen pʼʌtʌl mi caj la cajñel la quicʼot Jehová (Pr. 2:4-7).