1-3. (a) Anni i makoffun nittam nga mattalupaddian nga matalo ta Dios taw nga pangurianan nga aggaw? (b) Anni i ikonsidera tam taw nga artikulo?

TA PANGULTIMO na pangurianan ira nga aggaw, tulu-tuloy nga “mattalovu ta kunna kaddo” i kinarake. (Sal. 92:7) Ari gafu nga kakkadda-kaddag nga mapagurayan ngana i moral ira nga estandarte. Taw nga pallevu, kunnasi tam mabbalin tu “abbing nga awan tu ammu meyannung ta marakay” ngem “ta annonopan ay manakam” tam ngana?​—1 Cor. 14:20.

² I tabbag ay malegan ta tema nga teksto tam, nga kunna: “Danuri magaleg kani Jehova ay malippawada i ngamin nga gannug”​—ngamin nga kawagan tapenu mapagayayya yayya. (Prov. 28:5) Kunnatun gapa i mabibbig ta Proverbio 2:7, 9, nga kagianna nga si Jehova “unnuganna i praktikal nga sirib para ta matunung.” I resultana, danuri matunung ay ‘malippawada nu anni i matunung anna kinahustisia anna patas, i interu nga dalan na kinapia.’

³ Napeggan tu kunnatun nga sirib da Noe, Daniel, anni Job. (Eze. 14:14) Kunnatun gapa i totolay na Dios ta maddaggun. Kunnasi ka gapa? ‘Malippawa mu kari i ngamin nga gannug’ nga kawagan tapenu mapagayayya si Jehova? Kawagan i fustu nga pakannammu sa tapenu makua tam yatun. Ikonsidera tam gafu (1) nu kunnasi nga  nakannammuan da Noe, Daniel, anni Job i Dios, (2) nu kunnasi ira nabbenefisio tatun nga pakannammu, anna (3) nu kunnasi tam mapeggan tu kagitta na pangurugda.

4. Kunnasi nga nammuan ni Noe si Jehova, anna kunnasi nakoffun sa i fustu nga pakannammu?

⁴ Nu kunnasi nammuan ni Noe si Jehova. Egga i tallu nga kuan na matalo nga lallaki anna babbay gari tapenu mammuan i Dios: gukaban na paningan ta masingan nga pinaratu, tanakuan nga minagganassing ta Dios nga totolay, anna paka-ekspiriensa ta bendision ira na pattolay mekunnay ta matunung ira nga estandarte anna prinsipio na Dios. (Isa. 48:18) Gukaban na pangobserba ta pinaratu ira, nasingan ni Noe i napakaru nga ebidensia ari laman ta kegga na Dios, nu ari, pati i aru nga ari masingan nga kualidadna ira, gittana “mannanayun nga pakapangngua na anna ka-Dios na.” (Roma 1:20) Megafu tatun, ari laman tu nangurug si Noe ta Dios; napeggan yayya tu masikan nga pangurug sa.

5. Kunnasi nakannammuan ni Noe i gakkag na Dios ta totolay?

⁵ I pangurug ay “vunga na pagginna ta dumug.” (Roma 10:17) Kunnasi nga naginna ni Noe i meyannung kani Jehova? Siguradu nga aru i nagigiammuna ta paparientesna. Nelagum tatun i yamana nga si Lamec, nga egga pangurugna anna inaddena nga sigga-matolay si Adan. (Innan i letratu ta gafu na artikulo.) Kasali gapa tatun i kakena nga si Matusalem anna i ginafuanna nga si Jared, nga nappang-abut kani Noe tu 366 nga dagun. * (Luc. 3:36, 37) Posible nga megafu taw nga lallaki anna ta gi-attawadda nga nakannammuan ni Noe i pamegafu na tolay, i gakkag na Dios nga pannuan i davvun tu matunung nga familia na totolay, anna i rebelyon ta Eden​—nga nemammatan mismu ni Noe i resulta ira naw. (Gen. 1:28; 3:16-19, 24) Maski anni taw, natukkal i futu ni Noe ta nagigiammuna, yatutta nasserbi yayya ta Dios.​—Gen. 6:9.

6, 7. Kunnasi nga napasikan i pangurug ni Noe megafu ta iddanama?

⁶ Pasikannan na iddanama i pangurug. Nonopammu gafu nu anni i natageno ni Noe nguri ta nammuanna nga nelagum ta kebalinan na ngaganna nga “Pagibannag; Banna-bannay,” i iddanama! (Gen. 5:29, ftn.) Nainspiran si Lamec nga makkagi: “Yaw i tadday [Noe] nga mangiyawa nittam tu banna-bannay ta . . . grabe nga pinattrabahu na lima tam megafu ta davvun nga nibariaw ni Jehova.” Nagiddanama si Noe ta Dios. Kagitta da Abel anni Enoc nga nattolay nigena, nangurug yayya ta ‘gaka’ nga maddannal ta ulu na iraw.​—Gen. 3:15.

⁷ Maski nu ari nga nalippawa ni Noe i detalye ira na profesiya ta Genesis 3:15, siguradu nga nasinganna i iddanama na kapaliag megafu tatun. Mekunnay paga yatun nga Edeniko nga promesa ta mensahe nga niproklama ni Enoc, nga nangiprofesiya gapa ta panaral na Dios ta kinadake. (Jud. 14, 15) Siguradu nga napasikan i pangurug anna iddanama ni Noe megafu ta mensahe ni Enoc, nga mapeggan tu ultimo nga ketuppalan sonu Armagedon!

8. Kunnasi naprotektan si Noe na pakannammuna ta Dios?

⁸ Nu kunnasi nabenefisiowan si Noe ta fustu nga pakannammu ta Dios. Napeggan si Noe tu pangurug anna makadios nga sirib megafu ta fustu nga pakannammu, nga napprotekta sa ta peligro, neerulay ta espiritual nga peligro. Angngariganna, megafu ta “liminakag si Noe kavulu i kurug nga Dios,” ari yayya nakilakag, onu nakikavulu, ta ari makadios. Ari yayya nelogo na nabbaggi ira nga demonio, nga siguradu nga nappabbawan na awan tu pangurugna, anna alalistu nga mangurug nga totolay megafu ta extraordinario nga abilidadda​—awayyana nga nabbalin paga lagu ira tu idolo nga paddayawadda. (Gen. 6:1-4, 9) Ammu gapa ni Noe nga nekagi ta totolay nga  maggaka anna pannuadda i davvun. (Gen. 1:27, 28) Yatutta ammuna nga i seksual nga pattadday na babbay anna na espiritu ira nga nabbaggi tu tolay ay ari normal anna ugo. Nakonfirma yatun nga konklusion turi ta ari normal i gakada. Tapus, inabisowan na Dios si Noe nga mangirattal yayya tu delubio ta davvun. Megafu ta kurugan ni Noe yatun nga pamappalan, namadday yayya tu arka, yatutta nepaliag i familiana.​—Heb. 11:7.

9, 10. Kunnasi tam maparigan i pangurug ni Noe?

⁹ Nu kunnasi tam kultiban i pangurug kagitta ni Noe. Mawag tu malappo ittam nga estudiante na Biblia, ipafutu tam i nagigiammu tam, anna mappamolde anna mappegiya ittam tatun. (1 Ped. 1:13-15) Protektan gapa ittam na pangurug anna makadios nga sirib kontra ta makelogo ira nga silu ni Satanas anna kontra ta marake nga espiritu na mundo. (2 Cor. 2:11) Ipagaram natun nga espiritu i pangaya ta kinavayolente anna imoralidad. Itubba paga natun i totolay nga maffokus ta nepattaggan ira nga pakkaraga. (1 Juan 2:15, 16) Paguyuan paga lagu natun danuri makafi ta espiritual nga ari pansinan i ebidensia na karanni na dakal nga aggaw na Dios. Daddamman nga turi ta nikumpara ni Jesus i tiempo tam ta tiempo ni Noe, ari yayya naffokus ta kinavayolente onu imoralidad, nu ari, ta peligro na ari pagimporta ta espiritual.—Bibbigan i Mateo 24:36-39.

¹⁰ Iyavu ta baggim: ‘Ipasingan kari na klase na pattolè nga talaga ammammù si Jehova? Paguyuannà kari na pangurug ku ari laman nga mattolay segun ta matunung nga estandarte na Dios, nu ari, ilammuyag gapa yatun?’ Ipasingan nakuan na tabbag mu ira nga sikaw gapa ay ‘lumakag kavulu i Dios.’

11. (a) Kunnasi ipasingan na makadios nga debosion na kabataan nga si Daniel i klase na pamadakal sa? (b) Anni ira i kualidad ni Daniel nga kayà mu nga parigan?

¹¹ Nu kunnasi nakannammuan ni Daniel si Jehova. Manawag nga makasta i pinassanay na magana ni Daniel sa, sinudduadda yayya nga ayatan si Jehova anna i netura nga Uvovugna. Kunne na gapa, ari nawawan ni Daniel yatun nga aya ta interu nga pattolena. Maski ta lakay ngana yayya, masingattam nga gigiammuanna tu mapia i Katurakan. (Dan. 9:1, 2) Masingan ta napafutuan anna mapakalinno nga pakimallo ni Daniel nga mabibbig ta Daniel 9:3-19 i monag nga pakannammuna ta Dios, nelavu ngana i pakilallan na Dios ta Israel. Ngatta ariammu iyetubangngan nga bibbigan yatun nga pakimallo anna monag nga pannonopan, anna innan nu anni ira i ikagi nikaw natun meyannung kani Daniel?

12-14. (a) Kunnasi nakepasingan tu makadios nga sirib si Daniel? (b) Kunnasi nabendisionan si Daniel megafu ta magutu nga kinamatalona ta Dios?

¹² Nu kunnasi nga nabenefisiowan si Daniel ta fustu nga pakannammu ta Dios. Para ta tadday nga matalo nga Judio, talaga mariga i mattolay ta pagano nga Babilonia. Angngariganna, kunni Jehova ta Judio ira: “Alegannu gapa i imammo na siudad nu sitaw nga nepa-aripakku kamu.” (Jer. 29:7) Ngem, kiddawanna gapa i eksklusibo nga debosiodda. (Ex. 34:14) Kunnasi nga nabalanse ni Daniel yaw nga dua nga kiddaw? I nadiosan nga sirib i nakoffun sa nga malippawa i prinsipio na relatibo laman nga pakimoray ta sekular nga autoridad. Piga siglo i nappasa, nituddu ni Jesus yatun nga parehu nga prinsipio.​—Luc. 20:25.

¹³ Ikonsidera i kingngua ni Daniel turi ta nigamma na ofisial i makimallo ta maski sinni nga dios onu tolay fuera ta patul tu 30 aggaw. (Bibbigan i Daniel 6:7-10.) Awayyana tu narrason nakuan si Daniel, nga kunna, ‘Manganannuan laman mabba i 30 aggaw!’ Ngem arianna nipamavulun nga tavvunan na tadday nga dob na patul i obligasionna ira nga nebase ta Katurakan. Siempre, puede nakuan nga itataguna i makimallo. Ammuna nga kabisadu na totolay i inaggaw nga kostumbrena. Yatutta maski nu nappeligro i inangona, nadisidi ni Daniel nga ari tu mangiyawa tu impresion nga ikompromisona i paddayona.

 ¹⁴ Binendisionan ni Jehova i memmugug anna magutu nga desision ni Daniel gukaban na milagro nga pangipaliag sa ta mataki nga kapatay. Kakuruganna, narresulta yatun tu kakkasta nga pamakurug para kani Jehova nga nakadde ta tuppu-tuppag na Imperio na Medo-Persia!​—Dan. 6:25-27.

15. Kunnasi tam kultiban i kagitta na pangurug ni Daniel?

¹⁵ Nu kunnasi tam kultiban i kagitta na pangurug ni Daniel. Tapenu mapeggan tu maladda nga pangurug, ari laman nga bibbigan i Uvovug na Dios, nu ari, ‘alippawatan’ yatun. (Mat. 13:23) Kayà tam mala i pagimamma ni Jehova ta ganna-gannug, nga nelavu tatun i pakalippawa ta prinsipio ira na Biblia. Yatutta mawag tu monag nga pannonopattam i mabibbig tam. Importante gapa i regular nga napafutuan nga pakimallo, netallugaring nu mapurueban onu mariga i problema. Nu sigga-pangurug tam nga ipakimallo i sirib anna sikan, bastante nga iyawa danatun ni Jehova nittam.​—Sant. 1:5.

16, 17. Kunnasi napeggan si Job tu fustu nga pakannammu ta Dios?

¹⁶ Nu kunnasi nga nakannammuan ni Job si Jehova. Ari tu Israelita si Job. Ngem parientes yayya da Abraham, Isaac, anni Jacob. Niddan gapa ira ni Jehova tu detalye ira meyannung sa anna ta gakkagna ta totolay. Ari nga masiguradu nu kunnasi nga nesimmu ngem nammuan ni Job danatun nga nabalor nga kinakurug. (Job 23:12) “Naginna na talingà ira i meyannung nikaw,” kunna. (Job 42:5) Kinagi paga mismu ni Jehova nga kurug i kinaga-kagi ni Job meyannung Sa.​—Job 42:7, 8.

¹⁷ Nasingan gapa ni Job i napakaru nga kualidad na Dios ta masingi-singan nga pinaratu. (Job 12:7-9, 13) Turi kua, parehu nga nangusa si Elihu anna si Jehova tu aspeto ira na pinaratu tapenu iperaddam kani Job nu kunnasi kabaddi na tolay kumpara ta kadakal na Dios. (Job 37:14; 38:1-4) Nadde na uvovug ni Jehova i futu ni Job, megafu ta sigga-pakalinno nga kunna ta Dios: “Nammuakku ngana nga makuam i ngamin nga ganna-gannug anna awan tu manono mu nga kuan nga imposible para nikaw. . . . mabbabawi ngà ta gavù anna ta avu.”​—Job 42:2, 6.

18, 19. Kunnasi nipasingan ni Job nga talaga ammammuna si Jehova?

¹⁸ Nu kunnasi nabenefisiowan si Job ta fustu nga pakannammu ta Dios. Monag i pakalippawa ni Job ta makadios ira nga prinsipio.  Talaga ammammuna si Jehova, anna nagguyu yayya segun tatun nga pakannammu. Ikonsidera yaw: Ammu ni Job nga arianna puede kagian nga iddukanna i Dios tapus ari gapa yayya masippo ta kasittolena. (Job 6:14) Arianna niyatannang i baggina kumpara ta tanakuan, nu ari, nangipasingan tu pangikavurung ta ngamin nga wawwaragi, mariku onu pobre. “Ari kari nga i Tadday nga namaratu niakan ta san i namaratu gapa nira?” kunna. (Job 31:13-22) Manawag nga ari nipamavulun ni Job i dati nga kinaprominente anna kinarikuna nga killuan i paninganna ta baggina onu ta tanakuan. Talaga dakal i neruman natun ta makapangngua anna mariku ira ta mundo!

¹⁹ Nilikuran ni Job i ngamin nga klase na idolatria​—maski ta futuna. Ammuna nga i falsu nga paddayaw, nelagum i debosion ta material nga kinariku, ay panginiga ta “kurug nga Dios ta langi.” (Bibbigan i Job 31:24-28.) Imammatanna nga sagrado i pagatawa na lalaki anna babay. Nakipassinabban paga lagu yayya ta matana nga arianna mapeggan tu imoral nga pakkaraga ta tadday nga birhen. (Job 31:1) Daddamman nga nesimmu yatun turi ta ipamavulun paga na Dios i poligamia. Yatutta puede nakuan nga manga tu mekadua nga atawa si Job nu kayàna. * Ngem pinabbalinna nga ammarigan i unnug na pagatawa nga nigafu na Dios ta Eden, nga minammatanna tu dob sa yatun nga modelo. (Gen. 2:18, 24) Ma-1,600 dagun kabalinna, nituddu ni Jesu Cristo turi ira ta magginna sa nga tuttulan yatun nga parehu nga matunung nga prinsipio meyannung ta pagatawa anna seksual nga moralidad.​—Mat. 5:28; 19:4, 5.

20. Kunnasi nga makoffun i fustu nga pakannammu kani Jehova anna ta estandartena ira ta pappili tu mapia nga kakavvulu anna marenu nga dibersion?

²⁰ Nu kunnasi tam kultiban i kagitta na pangurug ni Job. Mawag tu egga i fustu nga pakannammu tam kani Jehova, anna ipamavuluttam yatun nga pakannammu nga igiya ittam ta kada aspeto na pattolay. Angngariganna, kinagi na salmista nga si David nga si Jehova “ikalussona danuri mangaya ta kinavayolente,” anna inabisowan ni David ittam kontra ta pakikavulu ta “minaggappa-appe ira.” (Bibbigan i Salmo 11:5, NW; 26:4.) Anni i malippawa mu taw ira nga teksto meyannung ta appanono na Dios? Kunnasi nga influwensian natun nga pakalippawa i prayoridad mu, pangusa ta Internet, anna pappili tu kakavvulu anna dibersion? Moffunannaka na tabbag mu ira tapenu masingan nu kunnasi konag i pakannammum kani Jehova. Tapenu kanayun nga awan tu pakaliwatattam taw nga magulu anna marake nga mundo, mawag tu “napenam [ittam] ngana nga maningan” ta nadduman ari laman na fustu ta mali, nu ari, maski i marisib anna ari masirib.​—Heb. 5:14; Efe. 5:15.

21. Anni i makoffun nittam nga ‘malippawa i ngamin nga gannug’ nga kawagan nga ammuan tapenu mapagayayya i nelangitan nga Yama tam?

²¹ Megafu ta inaleg da Noe, Daniel, anni Job si Jehova ta ngamin nga futuda, nipamavulunna nga malegadda yayya. Inuffunan ira ni Jehova nga “malippawada i ngamin nga gannug” nga kawagan tapenu mapagayayya yayya. Nabbalin gafu ira tu ehemplo na kinatunung, anna talaga makasta i nattuppalan na pattoleda. (Sal. 1:1-3) Yatutta iyavu mu ta baggim, ‘Ammammù kari si Jehova gittana pakannammu da Noe, Daniel, anni Job sa?’ Ta kakuruganna, mappabalo ittam ta umara-aru i espiritual nga nawag, mas lallagu nga makilalam ngana yayya! (Prov. 4:18) Yatutta makkokkog ka paga ta Uvovug na Dios. Nonopammu tu mapia yatun. Makimallo ka para ta masanto nga espiritu. Nu kuammu danatun, mas paga nga maddukko ka ta nelangitan nga Yamam. Makapagguyu ka paga nga egga pakalippawa anna siribna taw ta ari makadios nga mundo.​—Prov. 2:4-7.