1-3. (a) Yisinke ngayi tu vatera tu twikire kulimburukwa Karunga momazuva aga gopouhura? (b) Yisinke natu ka konakona mosirongwa esi?

NGOMU mazuva aga gopouhura gana kuhedera pepi, vadinikarunga kuna ‘kukura ngwendi wayi.’ (Epis. 92:7) Eyi yiyo ayi dilire kututetukisa pokumona vantu wovanzi kapi vana kulimburukwa konompango domoBibeli. Nye ngapi natu ‘kara sinona moudona, nye monondunge tu kare sikurona’ mouzuni ou woudona?—1 Kol. 14:20.

² Elimbururo kuligwana metjangwa lyosirongwa setu asi: ‘Ava ava karere Karunga, kukwata egano nawa-nawa’ nayinye eyi ya hepa po mokumuhafesa. (Yis. 28:5) Nonkango odo kwa liza nedi domoYisewe 2:7, 9 edi adi tanta asi: Jehova “kugava [unongo] kovantu wovahungami.” Unongo owo kuvavatera va ‘dive eyi ya hungama, yousili neyi yoyiwa, ntani va dive eyi va hepa kurugana.’

³ Nowa naNdaniyera ntani Joba kwa gwene nounongo owo. (Hes. 14:14) Naina vantu vaKarunga nawo va gwana unongo owo. Nove wa gwana unongo owo ndi? Wa ‘kwata egano nawa-nawa’  nayinye eyi ya hepa po mokuhafesa Jehova ndi? Mokutompoka oyo, wa hepa kudiva nawa Karunga. Ngesi tatu ka konakona (1) omu Nowa naNdaniyera ntani Joba va ya divire Karunga, (2) nomu va gwanene mo mauwa mediwo olyo ntani (3) omu natu tunga po epuro lyokulifana.

4. Ngapi omu Nowa ga ya divire Jehova ntani ngapi lya mu vaterere ediwo lyosili?

⁴ Omu Nowa ga ya divire Jehova. Kutundilira mosiruwo sanare, vagara novakadi wovalimburukwi kwa lironga kuhamena Karunga mononkedi ntatu: kupitira mounsitwe, kovakareli vaKarunga vamwe wovalimburukwi ntani pokulimonena mauwa aga tundu mokulimburukwa Karunga. (Jes. 48:18) Kupitira mounsitwe, Nowa kapi tupu ga mwene undipo asi Karunga yipo ga kara, nye ga ya divire hena yikara yendi eyi ayi dili kumoneka ngwendi “nonkondo dendi danarunye noukarunga wendi.” (Rom. 1:20) Ngoyitundwamo, Nowa ga ya kere nepuro lyokupama mwendi.

5. Ngapi omu Nowa ga ya divire sitambo saKarunga kovantu?

⁵ Epuro ‘kutunda mokuzuvha mbudi.’ (Rom. 10:17) Ngapi omu Nowa ga ya divire Jehova? Age kwa ya divire kuhamena Jehova kekoro lyendi. Vamwe vekoro lyendi kuna kara oguhwe Rameki mugara gomulimburukwi ogu ga parukire posiruwo esi ga parukire Adamu. (Tara efano pepenuno 8.) Vamwe hena kuna kara ozinakuru Matusara ntani ozinakuru wokononkokona Jaredi ava va ya fire konyima zonomvhura 366 apa Nowa va ya mu hampurukire. * (Ruk. 3:36, 37) Vagara owo novakadi vawo nampo yiwo va rongere Nowa kuhamena esito lyovantu, sitambo saKarunga sokuzwida evhu novantu wovalimburukwi ntani nourwanesi moEdeni ou ga limonenene Nowa. (Gen. 1:28; 3:16-19, 24) Eyi ga lirongere kwa mu gumine komutjima nokumutumangeda a karere Karunga.—Gen. 6:9.

6, 7. Ehuguvaro musinke lya nkondopekere epuro lyaNowa?

⁶ Ehuguvaro kunkondopeka epuro lyetu. Gazadara ko tupu omu Nowa ngano ga lizuvhire pokudiva asi edina lyendi eli ali tanta asi ‘ehengagwido,’ kwa karere po ehuguvaro lyokomeho. (Gen. 5:29) Rameki kwa tente asi: “Munona ogu nga tu hengagwida koyirugana yetu yoyidigu, eyi ayi tundu mevhu eli ga fingilira” Jehova. Nowa ga kere nehuguvaro mwaKarunga. Age kwa honenene Abeli naHenoka pokuhuguvara ‘moruvharo’ oru ngaru myona mutwe gezoka.—Gen. 3:15.

⁷ Nowa kapi ga kwete nawa egano uporofete va tumbura mwaGenesis 3:15. Nye ga yi divire asi uporofete owo kwa gava ehuguvaro lyokomeho. Henoka kwa divisire mbudi zokulifana apa ga tente asi Jehova ngaya zonagura po vadinikarunga. (Juda 14, 15) Mbudi zaHenoka ezi ngazi ka sika mo poHarumagedoni, nampo kwa nkondopekere epuro lyaNowa nokumupa ehuguvaro.

8. Ngapi omu ediwo lyosili kuhamena Karunga lya poperere Nowa?

⁸ Omu ediwo lyosili lya vaterere Nowa. Ediwo kwa vaterere Nowa a kare nepuro ntani nounongo, eyi ya mu poperere kwa nkenye udona nye unene po mokudira kuguvisa Jehova. Pasihonena, Nowa kapi ga kere novakaume wovadona morwa age ‘kwa kere momalikwatakano naKarunga.’ Age kapi va mu pukisire vaengeli wovadona ava va  wizire pevhu. Nye vantu wovanzi kwava tetukisire nonkondo dovaengeli owo nokuhara kuvakarera. (Gen. 6:1-4, 9) Nowa ga divire asi Karunga kwa geve mpangera kovantu va livhare va zwide evhu. (Gen. 1:27, 28) Oyo ya ninkisire Nowa a dive asi eligwanekero panyama pokatji kovakadi vena novaengeli kwa kere epuko lyenene. Eyi kwa ya lihorwere apa vakadi owo va ya hampurukire mamuturungu. Konyima, Karunga yipo ga tanterere Nowa asi ta ka reta ruhanzo pevhu. Eyi ya tumangedere Nowa a tunge emuwato mokuparura epata lyendi.—Heb. 11:7.

9, 10. Ngapi natu tunga po epuro ngwendi Nowa?

⁹ Omu natu tunga po epuro ngwendi Nowa. Mokututompoka oyo twa hepa kulironga nkenye apa Nonkango daKarunga nokuteda ko ntani nokuruganesa ediwo olyo meparu lyetu. (1 Pet. 1:13-15) Nsene tu yi rugana ngoso ngatu kara nepuro nounongo ou ngau tu popera komakoto gaSatana nokompepo zondona zouzuni ou. (2 Kol. 2:11) Mpepo ozo kuninkisa vantu va hare yininke yonyanya neyi yokunyata. Azo kuninkisa vantu va demenene kweyi yopanyama. (1 Joh. 2:15, 16) Azo hena kuninkisa vantu va ncenune yidiviso yopomazuva gopouhura. Koneka asi apa Jesus ga hetakanesere siruwo saNowa nesi setu, age kapi ga uyungire kuhamena nyanya ndi ruhonda nye kosiponga sokuncenuna nompango daKarunga.—Resa Mateusa 24:37-39.

¹⁰ Lipura asi: ‘Mparukiso zange kulikida asi na diva nawa Jehova ndi? Epuro lyange kutumangeda nge ni zuvhise ntani ni paruke kuliza nonompango daKarunga ndi?’ Ngano malimbururo goge ga likide asi ove kwa ‘kara nelikwatakano lyewa naKarunga.’

11. (a) Ngapi omu Ndaniyera ga ya divire Jehova? (b) Yikara musinke yaNdaniyera ono hara kuhonena?

¹¹ Omu Ndaniyera ga ya divire Jehova. Vakurona vaNdaniyera kwa mu rongere a hare Jehova noNonkango dendi. Ndaniyera kwa sikisire mo mapukururo nagenye ogo meparu lyendi. Nampili moukurupe, age nga konakona Matjangwa. (Ndan. 9:1, 2) Ediwo eli ga kere nalyo Ndaniyera kuhamena Jehova nomu nga ruganene kumwe noVaisraeli, kwa yi likida mekanderero lyendi eli va tjanga mwaNdaniyera 9:3-19. Li tulira po siruwo mokuresa nokuteda ko kekanderero olyo ntani koneka eyi lina kukuronga kuhamena Ndaniyera.

12-14. (a) Mononkedi musinke Ndaniyera ga likidire unongo? (b) Ngapi va mu tungikire Ndaniyera morwa uradi ou ga likidire?

¹² Omu ediwo lyosili lya vaterere Ndaniyera. NgoMujuda, kuparuka mositata saBabironi kwa kere udigu morwa vantu vamo kapi ngava karere Jehova. Pasihonena, Jehova kwa tanterere vaJuda asi: “Tuliseni po mbili mositata esi mwa kara ngovanayirongo.” (Jer. 29:7, NW) Nampili ngoso, Jehova kwa here simpe va mu karere gelike. (Ex. 34:14) Yisinke ya vaterere Ndaniyera a kare nehetakano koyihepwa eyi? Unongo wokutunda kwaKarunga kwa mu vaterere a fumadeke veta zovantu nezi zaKarunga. Konyima zonomvhura dongandi, Jesus ga ya rongere hena omu natu limburukwa kepangero ntani kwaJehova.—Ruk. 20:25.

¹³ Tarurura eyi ga rugene Ndaniyera apa va tokwere paveta asi kutupu gokutongamena karunga nagepeke ntudi va tongamene hompa Daliusi gelike mazuva nomurongo ntatu. (Resa Ndaniyera 6:7-10.) Ndaniyera ngano  ga ligusa-gusire mo pokutanta asi: ‘Mazuva nomurongo ntatu nayimwesi.’ Nye age kapi ga pulisilire veta ozo zi mu kondere mokulimburukwa Jehova. Age ngano ga vhulire simpe kukanderera mokahorehore yipo va dire kumumona vantu. Age ga yi divire asi vantu ngava mu nomene kwankenye eyi nga rugana. Nampili ngomu Ndaniyera ga divire asi eparu lyendi kuvhura li kare mosiponga, age kapi ga kweme veta zina nampili nakauke.

¹⁴ Jehova kwa tungikire Ndaniyera ketokoro lyendi lyouradi pokurugana sitetu a mu parure konomfa donondona. Ngoyitundwamo, vantu navenye vemepangero lyoVaperesiya va ya divire Karunga gosili.—Ndan. 6:25-27.

15. Ngapi natu tunga po epuro ngwendi Ndaniyera?

¹⁵ Omu natu tunga po epuro ngwendi Ndaniyera. Twa hepa kuresa Nonkango daKarunga nokuteda ko yipo tu di kwate egano. (Mat. 13:23) Mokudiva omu Jehova a gazara nomu a lizuvhu kuhamena yuma yongandi, twa hepa kuteda ko kweyi atu resa. Ekanderero lyokutundilira komutjima nalyo mulyo unene po nsene kuna kuligwanekera nomaudigu. Nsene tu hundira Jehova a tu nkondopeke nokutupa unongo, age nga yi tu pa.—Jak. 1:5.

16, 17. Ngapi omu Joba ga ya kere nediwo lyosili kuhamena Karunga?

¹⁶ Omu Joba ga ya divire Jehova. Joba kapisi Muisraeli ga kere. Nye age kwa kere gekoro lyaAbirahamu naIsaka naJakopo ntani Jehova ga lidivisire mwene nositambo sendi kovantu owo. Nampo monkedi ezi yimo Joba ga ya divire usili. (Joba 23:12) Age kwa tanterere Jehova asi ‘ame na diva eyi va tantera nge wopeke’ kukuhamena. (Joba 42:5) Ntani hena, Jehova kwa tente asi Joba kwa rongere wopeke usili kumuhamena.—Joba 42:7, 8.

¹⁷ Joba ga ya divire yikara yaJehova kupitira mounsitwe. (Joba 12:7-9, 13) Konyima, Elihu naJehova kwa ya ruganesere unsitwe mokudiworokesa Joba kuhamena nonkondo edi ga kara nado Jehova. (Joba 37:14; 38:1-4) Nonkango daJehova kwa gumine Joba komutjima, yipo nye ga uyungire asi: ‘Na yi diva HOMPA, asi ove gononkondo nadinye; ove  hena kuvhura kurugana nkenye eyi ono hara. . . . Tani litezwilire mombundu nemenoto.’—Joba 42:2, 6.

18, 19. Ngapi omu Joba ga likidire asi age sili ga divire Jehova?

¹⁸ Omu ediwo lyosili lya vaterere Joba. Age kwa kwete nawa egano nompango daKarunga. Ntani ga divire nawa Jehova nokumulimburukwa. Koneka asi: Joba ga yi divire asi kapi ta vhuru kuhara Karunga nye a nyenge vantu. (Joba 6:14) Age kapi ga linenepekere ntani ga here vantu navenye yi kare asi nongawo ndi nohepwe. Age kwa tente asi: “Ano Karunga ogu ga unga nge, yige ga unga hena vakareli vange.” (Joba 31:13-22) Nampili apa ga ya kere ngawo zonene nokufumana, simpe kwa litere mwene asi ga hetakana novakwawo. Oyo ya lisiga novantu ava va kara nongawo ntani ava va fumana mouzuni ou.

¹⁹ Joba kwa nyokerere po kukarera yikarunga yoyimpempa mwankenye rupe, nampili kuyigazara kooku. Age ga divire asi kukarera yikarunga oyo kukwatera mo kuhara unene emona kwa kere ngwendi kuna kunyoka “Karunga Munankondo.” (Resa Joba 31:24-28.) Age kwa tere nonkwara asi elikwatakano lyokukarerera pokatji komugara nomukadi. Eyi yiyo ga tulilire po mugano asi nokanunu si kutara mukadona a mu hore. (Joba 31:1) Diworoka asi posiruwo sina, Karunga kwa pulisilire vantu va kware masupareko. Joba nage ngano ga vhulire kukwara masupareko. * Nye age kwa tokwere kukwama ngendeseso ezi ga tulisire po Karunga moEdeni asi mugara a kare nomukadi gumwe tupu. (Gen. 2:18, 24) Konyima zonomvhura 1 600, Jesus Kristusa kwa rongere vantu va kwame nompango dokuhamena kononkwara neligwanekero panyama.—Mat. 5:28; 19:4, 5.

20. Ngapi ediwo lyosili kuhamena Jehova nonompango dendi, nayi tu vatera pokuhorowora yilihafeso yoyiwa novakaume wovawa?

²⁰ Omu natu tunga po epuro ngwendi Joba. Mokukara nepuro twa hepa kukara nediwo lyosili kuhamena Jehova ntani nokuruganesa ediwo olyo meparu lyetu. Pasihonena, Ndafita kwa tjenge asi Jehova “kwa nyenga ava va hana Veta.” Ntani hena ga rondwere kuhamena siponga sokukara “nava woyimpempa.” (Resa Episarome 11:5; 26:4.) Yisinke no lirongera ko komatjangwa aga kuhamena omu a gazara Karunga? Ngapi naga kuvatera o dive monkedi omu o ruganesa Intaneta, yilihafeso ntani vakaume ava o horowora? Malimbururo goge nga ga kuvatera o dive nsene wa diva nawa Jehova. Nsene tuna hara kunyokera po uzuni ou u dire kutupukisa, twa hepa kudeura ‘nondunge’ detu kapisi mokuhangura uwa koudona tupu, nye hena mokukara vanandunge.—Heb. 5:14; Efe. 5:15.

21. Yisinke ngayi tu vatera tu ‘kwate egano nawa-nawa’ nayinye ya hepa po mokuhafesa Guhyetu?

²¹ Nowa naNdaniyera ntani Joba kwa li tulire mo unene mokudiva Jehova. Age ga va vaterere va ‘kwate egano nawa-nawa’ nayinye ya hepere po mokumuhafesa. Yipo nye, awo kwa ya kere sihonena soulimburukwi ntani ngayi va tompoka meparu. (Epis. 1:1-3) Yipo nye, lipura asi, ‘Na diva Jehova ngwendi Nowa, Ndaniyera ntani Joba ndi? Ngesi pana kara nonkedi dononzi omu no vhura kulironga kuhamena Jehova. (Yis. 4:18) Yipo nye, konakona nkenye apa Nonkango daKarunga nokuteda ko. Ntani kanderera kwaJehova a ku pe mpepo zokupongoka. Eyi ngayi kuvatera o hedere pepi naGuhyetu gemeguru. Ntani ngo vhura kutura po matokoro gomawa mouzuni ou woudona.—Yis. 2:4-7.