1-3. (a) Vika vitukwatha kutwalelelaho kupwa va kulongwa kuli Njambi nameme tuli mu matangwa a kukotoka? (b) Tuthimutwiya vika muno mu chilongetha?

OMWO kaye kali kuyehi na kukotoka, vuvi vuli na ‘kukola ngwe mwila.’ (Myatho 92:7) Mukemwo vanu vavangi kuvethi na kukavangeya mashiko a Njambi. Twatha kupwa vati “vanike mu vyuma vya vuvi” na kupwa “vakulunu mu viyongola [vyetu]” muno mu kaye?—1 Koli. 14:20.

² Chikumbululo tuchiwana mu chithoneka haje hanema chilongetha chetu chije chendeka ngwavo: “Vaje vathingimika Shukulu Kalunga vakevo vathzivuka Shukulu Kalunga” kulumbununa ngwavo vathzivuka vyuma vije vimuthzivitha kuvwaha ku mbunge. (Vithi. 28:5) Mu ngila imo lika, na ku mukanda wa Vithimo 2:7, 9, vanendekako ngwavo Yehova “natulikila mana vaka-vuthunga.” Awa mana anakwatha vanu va kulongwa ‘vathzivuke vyuma vyavivwa mu ngila yaivwa ya kuthungama na kuthzivuka vije vanapande kulinga.’

³ Nowa na Ndanyele na Yombi vakele na mana a vuthunga. (Ezeki. 14:14) Vanu va Njambi matangwa ano navo vali na mana a vuthunga.  Neni muli nawo ndi? ‘Muthzivuka’ vyuma vije vyatha kuthzivitha Yehova kuvwaha ku mbunge ndi? Kukala na mana a vuthunga kukekwo kumikwatha muthzivuke vyashaka Njambi. Tuchithimutwiyeni omwo (1) Nowa na Ndanyele na Yombi vathzivukililemo Njambi, (2) nomwo kuthzivuka Njambi kwavakwathelelemo, (3) nomwo twatha kutembwinina likulahelo lyavo.

4. Nowa wathzivukile vati Yehova, cho kukala na mana a vuthunga kwamukwathele vati?

⁴ Nowa wathzivukile vati Yehova? Vanalume na vanakathzi va kuthañulu vathzivukile Njambi mu vingila vitatu. Vakele na kuyongola vyuma vyanatanga Njambi na kulilongetha vyavingi kuli vangamba va Njambi na kulimwena vivethzikitho vije vyatundile mu kukavangeya mashiko a Njambi na vinangulo vyendi. (Isaya 48:18) Kumona vyuma vyanatanga Njambi, kwakwathele Nowa alimwene vukaleho vwa kukalako kwa Njambi na vifwa vyendi vyavingi vije kutwatha kumona vya kufwa ngwe “ndthzili yendi ya myaka yoshe na chifwa chendi cha vunjambi.” (Loma 1:20) Kulinga ngocho, kwakwathele Nowa akulahele manene Njambi.

5. Nowa wathzivukile vati viyongola vya Njambi ku vanu?

⁵ Likulahelo ‘likatundu ha kuthziva.’ (Loma 10:17) Nowa wathzivile vati vya Yehova? Walilongethele vyavingi ku vavushoko vwendi. Ava vanambatethelela ishe Lameki, uje wakele na likulahelo lyakama, cho lalo wayoyele myaka yayingi kutuvakana Andama. (Kengeni chikupulo ha liputa 8.) Vanu vakwavo vaje vakwathele Nowa athzivuke Njambi, vapwile kuku yendi Matusela na kukulwila yendi Njalende, uje wathsile myaka 366 kutunda ha kuthemuka kwa Nowa. * (Luka 3:36, 37) Hamo ava vanalume na vanakathzi vavo vakevo valongethele Nowa muvashangumukilile kukalako vanu na viyongola vya Njambi vya kushulitha kano kaye na vanu vavavwa, na kutengulukila kuje kwakele mu lihya lya Endeni na vukalu vuje vwatundilemo vuje vwalimwenenene Nowa. (Kusha. 1:28; 3:16-19, 24) Vyuma vyalilongethele vyamukwatele ku mbunge, cho vyamushongangeyeye kupangela Njambi.—Kusha. 6:9.

6, 7. Lilavelelo lyatakamethele vati likulahelo lya Nowa?

⁶ Kukala na lilavelelo kukakanyametha likulahelo. Achithinganyekeni mwalithzivililemo Nowa omwo wathzivukile ngwendi lithzina lyendi lilumbununa ‘Kuhwima.’ (Kusha. 5:29) Ha kumuhwiminina kuli Njambi, Lameki wendekele ngwendi: “Mbututu ou [Nowa] akatuhwimithako ku vipangi vyetu vya kukaluwa ku livu eli vene lyathingile Shukulu Kalunga.” Nowa wakele na lilavelelo kuli Njambi. Ngechi lika mwa Avele na Inoke vaje vakeleko thimbu kanda athemuke, Nowa nendi wakulahelele ngwendi “mbuto” ikathanyothzola mutwe wa linyoka.—Kusha. 3:15.

⁷ Nameme Nowa kathzivithithile mu kushula vyuma vyalivungila mu vupolofweto vuli ku Kushangumuka 3:15, oloni wakulahelele ngwendi vanu vakovoka. Kutundoho, vuje vupolofweto vwa mu Endeni vunalitombola na muthzimbu wambulwile Inoke uje umwetha ngwawo Njambi akathompa vaka-vuvi. (Yunda 14, 15) Muthzimbu wa Inoke uje ukalishulithilila ha thimbu ya Alamangindone watakamethele likulahelo na lilavelelo lya Nowa.

8. Kuthzivuka Njambi kwanyungililile vati Nowa?

⁸ Kuthzivuka Njambi kwakwathele vati Nowa? Kwatakamethele likulahelo lyendi, cho kwamunyungililile ku vushonde vwa ku sipilitu. Chakumwenako, Nowa kalikwatathanene na vaka-vuvi, mwafwa “wendele na kulitombola na Njambi.” Tungelo vavavi vaje vethzile hano hathi kuvathele kumungumuna, nameme  vakele na ndthzili ya kungumuna vanu vavangi na kushaka ku valemetha omwo ya ndthzili yavo. (Kusha. 6:1-4) Nowa wathzivukile lalo ngwendi Njambi washikile vanu ngwendi vakite na kushulitha hano hathi. (Kusha. 1:27, 28) Nameme ngocho, Nowa wathzivukile ngwendi Njambi kavwahethele ngwendi vanu valilale na tungelo. Awa majwi anapu a vuthunga, mukemwo vana vavakitile vaje tungelo vapwile makithikithi. Mu kwita kwa thimbu, Njambi wanangwile Nowa ngwendi akanyongetha kaye koshe na livathzi. Kukulahela Njambi kwalingithile Nowa ashonge vwato, ngechi ovole vaka-nanga yendi.—Heve. 11:7.

9, 10. Twatha kutembwinina vati likulahelo lya Nowa?

⁹ Twatha kutembwinina vati likulahelo lya Nowa? Tunapande kulilongetha Lijwi lya Njambi na kuthzivithitha vitulilongetha na kuvipangetha mu kuyoya kwetu. (1 Petu. 1:13-15) Kulinga ngocho kutukwatha tukale na likulahelo lije litunyungilila ku vyetheko vya Satana na ku sipilitu yaivi ya muno mu kaye. (2 Koli. 2:11) Eyi sipilitu yaivi ili na kulingitha vanu vathzeme vukenya na vilinga vikwavo vyavivi. Cho lalo ikashongangeya vanu vakale na mashungu amavi a vunu. (1 Yowa. 2:15, 16) Inatha lalo kuthzeyetha vanu vavangi ku sipilitu na kuthembulula ngwavo litangwa lya Njambi lyakama lichili kulako. Anukeni ngweni omwo Yesu wethekethele matangwa etu ku matangwa a Nowa, kendekele lika ha vukenya na vilinga vikwavo vyavivi, oloni wamwethele ngwendi vanu vavangi vakathzeya ku sipilitu.—Tandeni Mateo 24:36-39.

¹⁰ Lihuleni ngweni: ‘Kuma vuyoye vwange vumwetha ngwavo njathzema Yehova ndi? Kuma likulahelo lyange likanjikwatha njiyoye mwaya mashiko a Njambi na kulekako vakwetu vyuma vinjinalilongetha ndi?’ Vikumbululo vyeni vinapande kumwetha ngwavo muli na ‘kwenda na kulitombola na Njambi.’

11. (a) Vuthamba vwa Ndanyele na Njambi kushwa ku vwanike vwendi vutulongetha vika hali vithemi vendi? (b) Vifwa muka vya Ndanyele vimushaka kukala navyo?

¹¹ Ndanyele wathzivukile vati Yehova? Vithemi vendi vakevo vamulongethele mwamuvwa kuthzema Yehova na Lijwi lyendi. Ndanyele watwaleleleho kuthzema Njambi mu vuyoye vwendi vwoshe. Nameme mu vukulukathzi vwendi watwaleleleho kulilongetha Vithoneka. (Ndanye. 9:1, 2) Ndanyele wathzivukile mwamuvwa Njambi nomwo wapangelelemo na Vaisalele. Tuthzivuka ngocho mwafwa ya lilombelo lyendi lije lili ku mukanda wa Ndanyele 9:3-19. Tandeni eli lilombelo na kuthinganyekethethaho mwamuvwa. Cho lihuleni ngweni: ‘Eli lilombelo linjilongetha vika hali Ndanyele?’

12-14. (a) Ndanyele wamwethele vati ngwendi wathzivukile Njambi mwamuvwa? (b) Ndanyele vamuvethzikithile vati omwo wathimpile na kupwa wa kulongwa kuli Njambi?

¹² Kuthzivuka Njambi kwakwathele vati Ndanyele? Vayunda va kulongwa vaje vakele mu Mbambilone valiwanene na vukalu vwa kulithethzathethza. Chakumwenako, Yehova walekele Vayunda ngwendi: “Lingeni vyavivwa mu vinganda muje munjamitwalele kupwa vindthzinda.” (Njele. 29:7) Cho lalo Yehova washakele ngwendi vamulemethe na vimbunge vyavo vyoshe. (Kutu. 34:14) Vika vyakwethele Ndanyele ashulithilile mwamuvwa evi vyuma vivali? Kuthzivuka Njambi kwamukwathele apangethe chinangulo cha kwononoka vaka-mashiko. Munima ya myaka, Yesu nendi wendekele ha chinangulo cha kwononoka vaka-mashiko.—Luka 20:25.

¹³ Tuchithimutwiyeni vyuma vyalingile Ndanyele omwo kwakele lishiko lije lyavindikile kulombela kuli Njambi weka, kuvanga kulombela lika kuli mwene ha matangwa 30. (Tandeni Ndanyele 6:7-10.) Hamo Ndanyele nethi kuthinganyekele ngwendi: ‘Kukwethi vukalu vwakama kulikela kulombela kuli Njambi ha matangwa 30.’ Oloni lije lishiko kulyamwonowethele  kukavangeya vyuma vyalilongethele mu Vithoneka. Ndanyele wathele kukalombelela ku vushweke. Wathzivukile lalo ngwendi vanu voshe vakele na kumumona mwakele na kulombela ha litangwa na litangwa. Nameme kulinga ngocho kwakele vuyoye vwendi mu vushonde, oloni watwaleleho kulombela kuli Njambi, mwafwa kashakele ngwendi vanu vamone ngwavo nechela kulombela.

¹⁴ Yehova wavethzikithile Ndanyele mwafwa ya kuthimpa kwendi, cho wamwovwele mu kukomoketha ku vuthsi. Vyuma vyalingiwile kuli Ndanyele vyanene vukaleho hali Yehova mwafwa vavithzivile na ku mitambela ya kulyala ya mu Vumwene vwa Vamende na Vapelesha.—Ndanye. 6:25-27.

15. Twatha kutembwinina vati likulahelo lya Ndanyele?

¹⁵ Twatha kutembwinina vati likulahelo lya Ndanyele? Chuma chakama chitukwatha kulinga ngocho chinapu “kuthzivithitha” Lijwi lya Njambi. (Mateo 13:23) Tushaka kuthzivuka mwakamwenamo vyuma Yehova na kuthzivithitha mwamuvwa vinangulo vya mu Mbimbiliya. Ngechi, tunapande kuthinganyekethetha ha vyuma vitutanda. Kutundoho, tunapande kulombela kuli Njambi kutundilila kwithi ya mbunge, maneneni nga tuli mu vyetheko. Nga tulomba mu kukulahela kuli Yehova ngwetu atwane ndthzili na mana, cho atwanavyo mu kushula.—Yako. 1:5.

16, 17. Yombi wathzivukile vati Yehova?

¹⁶ Yombi wathzivukile vati Yehova? Yombi kapwile Kaisalele. Oloni wapwile kavushoko ka Avilahama na Isake na Yakomba. Yehova walekele ava vanalume viyongola vyendi vya kulutwe. Hamo Yombi walilongethele vuthunga kuli vaje vanalume va kuthañulu. (Yombi 23:12) Mukemwo wendekele ngwendi: ‘Njathzivile vyuma vije vivanjilekele vakwetu’ hali yove. (Yombi 42:5) Cho lalo Yehova wendekele ngwendi, Yombi wapwile muka-kwendeka vya vuthunga hali Njambi.—Yombi 42:7, 8.

¹⁷ Yombi wamwene vifwa vya Njambi kwitila mu vyuma vyanatanga. (Yombi 12:7-9, 13) Kutundoho lalo, Elihu na Yehova vapangethele vyuma vya kutanga mu kwanukitha Yombi ngwavo Njambi wakala na ndthzili yakama kutuvakana vanu. (Yombi 37:14; 38:1-4) Majwi a Yehova etele Yombi ku mbunge, ngechi walikehethele na kwendeka ngwendi: “Njithzivuka, Shukulu Kalunga ngechi yove u muka-ndthzili yoshe, cho watha kulinga vyoshe viushaka. . . . cho  njitumbama mu livu na mu lito kumwetha ngechi njinatenguluka.”—Yombi 42:2, 6.

18, 19. Yombi wamwethele vati ngwendi wathzivukile mwamuvwa Yehova?

¹⁸ Kuthzivuka Njambi kwakwathele vati Yombi? Yombi wathzivukile mwamuvwa vinangulo vya mu Mbimbiliya. Wathzivukile Yehova, na kupangetha vyuma vyalilongethele. Yombi wathzivukile ngwendi katha kuthzema Njambi okuni wathzinda vakwavo. (Yombi 6:14) Kalimwene kupwa wa theho kutuvakana vakwavo, oloni wathingimikile vanu voshe ipwe tuhutu nambe vaka-kufuka. Ngechi wendekele ngwendi: “Njambi uje vene wanjitangele ikeye lalo watangele vangamba vange.” (Yombi 31:13-22) Luthsimo na vufuko kuvyalingithile Yombi apwe muka-kulyaletha. Nalithethze na vanu vavangi vali muno mu kaye vaje vali na luthsimo na vufuko, vaje vakalyaletha manene.

¹⁹ Yombi wavyanene na mbunge yendi yoshe kulemetha tumponya. Wathzivukile ngwendi kulikwatathana na vulombelo vwa makuli na kuthzema manene vufuko kunapu kuvyana “Njambi wa mwilu.” (Tandeni Yombi 31:24-28.) Cho lalo wamwene vulo vwa munalume na munakathzi va kulyambata kupwa vwa kujela manene. Mukemwo walikumiyiye na mesho endi ngwendi kakakenge mumbanda na lishungu. (Yombi 31:1) Anukeni ngweni ha thimbu oyo, Njambi te nechelela vanalume kwambata lwale. Ngwe washakele, ngwe wambatele vanakathzi vavali. * Oloni wakavangeyeye viyongola vya Njambi vya kulivanga ha vulo vuje vwakeleko mu Endeni. Cho vyamukwathele mangana anyunge mbunge yendi. (Kusha. 2:18, 24) Mukemwo munima ya myaka 1,600, Yesu Kilisitu wanangwile vaka-kumutolilila vakavangeye vinangulo vya Njambi ha vulo na kulilala.—Mateo 5:28; 19:4, 5.

20. Kuthzivuka Yehova na mashiko endi kutukwatha vati kwangula mwamuvwa vavuthamba na vyuma vya kulithzima navyo vuli?

²⁰ Twatha kutembwinina vati likulahelo lya Yombi? Twatha kulinga ngocho nga tuthzivuka mwamuvwa Yehova na kupangetha vyuma vitunalilongetha mu kuyoya kwetu kwa litangwa na litangwa. Chakumwenako, Ndaviti wendekele ngwendi Yehova “wathzinda” vaka-vukenya. Cho wendekele lalo ngwendi kutwapandele kulikwatathana “na vanu vaka-makuli.” (Tandeni Myatho 11:5; 26:4.) Evi Vithoneka vimilongetha vika hali Njambi? Vyuma vivanendeka aha ha Vithoneka, vimikwatha vati omwo mwangula vya kulinga nomwo mupangetha intaneti na kwangula vavuthamba na kwangula vyuma vya kulithzima navyo vuli? Vikumbululo vyeni vimikwatha mumone indi muthzivuka Yehova mwamuvwa. Nga tushaka kupwa va kujela muno mu kaye kakavi, cho tunapande kupangetha “chashu cha kwilula vyuma” mangana twathe kwangununa vyuma vyavivwa ku vyavivi.—Heve. 5:14, NWT; Efeso 5:15.

21. Vika vitukwatha ‘tuthzivuke’ vyuma vije vithzivitha Tate yetu wa mwilu kuvwaha ku mbunge?

²¹ Nowa na Ndanyele na Yombi vashakethzekele Yehova na vimbunge vyavo vyoshe, mukemwo vamuwanene. Wavakwathele ‘vamuthzivuke’ mwamuvwa na kulinga vyuma vije vyamuthzivithile kuvwaha ku mbunge. Ava vanalume va kulongwa vanapu myanja yaivwa kuli yetu, cho vavethzikile mu kuyoya kwavo. (Myatho 1:1-3) Ngechi, lihuleni ngweni: ‘Njithzivuka Yehova ngwe mwamuthzivukilile Nowa na Ndanyele na Yombi ndi?’ Yetu twatha kumuthzivuka mwamuvwa ano matangwa mwafwa cheke chinalivwethzelela manene. (Vithi. 4:18) Ngechi, tondethetheni mwamuvwa mu Lijwi lya Najmbi. Thinganyekethetheni ha vyuma vimunawana. Kutundoho, lombeni sipilitu ya kujela. Cho mushwenya kuyehi na Ishweni wa mwilu. Cho lalo mukala na mana muno mu kaye munashulu vuvi.—Vithi. 2:4-7.