1-3. (a) Oshike tashi ke tu kwathela tu kale aadhiginini kuKalunga pomasiku ngaka gahugunina? (b) Otatu ka kundathana shike moshitopolwa muno?

SHO omasiku gahugunina tage ende gu uka pehulilo, aakolokoshi otaya tsikile ‘okukala muulinawa ya fa omwiidhi omutalala.’ (Eps. 92:7) Onkee ano, itashi tu kumitha sho aantu inaaya simaneka omithikampango dhopamikalo. Mokati kaantu ya tya ngawo, ongiini tatu vulu okukala ‘twa fa uunona kombinga yuuwinayi’ nosho wo “aakuluntu mokudhiladhila”? — 1 Kor. 14:20.

² Eyamukulo otali adhika moohapu dhoshipalanyolo shoshitopolwa shetu, shoka tashi ti: “Mboka haa kongo Omuwa oyu uvite ko ayihe,” ano iinima ayihe mbyoka tayi mu nyanyudha. (Omayel. 28:5) Edhiladhilo lya faathana, olya popiwa mOmayeletumbulo 2: 7, 9, ndhoka tadhi ti kutya “aayuuki ote ya kwatha.” Shoka oshe ya ningitha yu ‘uve ko uuyuuki neuko nuunashili — ondjila kehe yo opala.’

³ Noa, Daniel naJob oya li ya mono uunongo mboka. (Hes. 14:14) Aapiya yaKalunga kunena nayo ohaya mono uunongo mboka. Ongiini kombinga yoye? Mbela owu “uvite ko ayihe” mbyoka tayi nyanyudha Kalunga? Osha simanenena okukala tu na ontseyo yashili kombinga ye. Tu na oshinima shoka momadhiladhilo, natu taleni (1) nkene  Noa, Daniel naJob ya li ya tseya Kalunga, (2) nkene ya mona mo uuwanawa montseyo ndjoka (3) nankene tatu vulu okukokeka eitaalo lya fa lyawo.

4. Ongiini Noa a li a tseya Jehova, nontseyo yashili oya li ye mu kwathele ngiini?

⁴ Nkene Noa a li a tseya Jehova. Petameko lyondjokonona yaantu, aalumentu naakiintu aadhiginini oya li yi ilongo kombinga yaJehova momikalo ndatu dha simanenena ngaashi: mokutala keshito, kaantu yalwe mboka ya li aatilikalunga nosho wo mokumona nkene ya yambekwa sho ya kala metsokumwe nomithikampango nonomakotampango gaKalunga ge li pauyuuki. (Jes. 48:18) Mokutala keshito, Noa ka li owala a vulu okumona uushili owundji kutya Kalunga oko e li, ihe okwa li wo a mono omaukwatya ogendji gaKalunga ngaashi “oonkondo dhe dhaaluhe nuukalunga we.” (Rom. 1:20) Oshizemo? Noa okwa li a ningi oshindji kaashi shi owala okwiitaala muKalunga. Okwa kala e na eitaalo lya kola lela muye.

5. Ongiini Noa a li i ilongo kombinga yelalakano lyaKalunga li na ko nasha naantu?

⁵ Eitaalo “ohali zi mokuuva.” (Rom. 10:17) Ongiini Noa a li u uvu kombinga yaJehova? Kapu na omalimbililo kutya okwa li i ilongo oshindji kaapambele ye. Maapambele mboka omwa kwatelwa he Lamek, ngoka a li omudhiginini nokwa li a valwa manga Adam inaa sa. (Tala kethano lyopetameko.) Omwa li wo mwa kwatelwa hekulu Metusala nahekululululwa Jared, ngoka a ka sa konima yomimvo 366, * sho Noa a valwa nale. (Luk. 3:36, 37) Otashi vulika aalumentu mboka naakulukadhi yawo oyo ya li ya longo Noa kombinga yokushitwa kwaantu, yelalakano lyaKalunga li na ko nasha naantu yu udhithe evi alihe nosho wo kombinga yokwaavulika hoka kwa holoka po muEden. Noa shoka okwa li e shi imonene ko ye mwene. (Gen. 1:28; 3:16-19, 24) Shoka Noa i ilongo, osha li she mu gumu komutima e tashi mu inyengitha a longele Kalunga. — Gen. 6:9.

6, 7. Ongiini etegameno lya li lya koleke eitaalo lyaNoa?

⁶ Etegameno ohali koleke eitaalo. Dhiladhila owala kuNoa nkene a li u uvite, sho i ilongo kutya edhina lye otali ti “epupalitho netalaleko.” (Gen. 5:29) Jehova okwa li a nwetha mo Lamek a tye: ‘Omunona nguka Noa, ote tu etele epupalitho netalaleko momaupyakadhi giikaha yetu mevi ndika lya thingwa kuKalunga.’ Noa okwa li i inekela muKalunga. Ngaashi Abel naEnok mboka ya li ko manga inaa valwa, naye okwa li i itaala ‘moluvalo’ ndwoka talu ka nyanyagula omutse gweyoka. — Gen. 3:15.

⁷ Nonando Noa ka li u uvite ko lela ehunganeko ndyoka li li muGenesis 3:15, okwa li u uvite kutya otali gandja etegameno kombinga yonakuyiwa. Shimwe ishewe, euvaneko ndyoka lya li lya ningwa muEden, olya li metsokumwe netumwalaka ndyoka lya li tali uvithwa kuEnok, ngoka wo a li a hunganeke epangulo lyaKalunga kombinga yaakolokoshi. (Jud. 14, 15) Etumwalaka lyaEnok ndyoka tali ka gwanithwa thiluthilu puArmagedon, kalya li tuu lya koleke eitaalo netegameno lyaNoa!

8. Omomikalo dhini ontseyo yashili ya li ya gamene Noa?

⁸ Nkene ontseyo yashili kombinga yaKalunga, ya li ye etele Noa uuwanawa. Ontseyo yashili oya li ya kwathele Noa a kale e na eitaalo nuunongo wopakalunga. Iinima mbyoka oya li ye mu gamene kwaashoka sha nika oshiponga, unene tuu kuupambepo we. Pashiholelwa, molwaashono Noa okwa ‘kala nokweenda pamwe naKalunga kashili,’ ina kala he endathana naakeenakonashanakalunga. Ka li a pukithwa koompwidhuli ngaashi dha li dha pukitha aantu mboka ya li kaaye na eitaalo nohayi itaale mbala, tashi vulika nokuli sigo ya tameke oku dhi longela. (Gen. 6:1-4, 9) Oshikwawo, Noa okwa li e shi kutya aantu oya lombwelwa ya valathane nokuudhitha evi. (Gen. 1:27, 28) Onkee  ano, oku na okukala a li e shi kutya omilalo pokati kaantu niishitwa yopambepo kadhi li paunshitwe nodha puka. Shoka osha ka kala shi iwetikile, sho aanona mboka ya ka valwa kaaya li paunshitwe. Mokweendela ko kwethimbo, Kalunga okwa li a londodha Noa kutya ote ke eta eyelu kombanda yevi. Molwaashoka Noa okwa li i itaala elondodho ndyoka, shoka osha li she mu inyengitha a tunge onguluwato, moka a hupile pamwe naanegumbo lye. — Heb. 11:7.

9, 10. Ongiini tatu vulu okuholela eitaalo lyaNoa?

⁹ Nkene tatu vulu okukala tu na eitaalo lya fa lyaNoa. Shoka sha simanenena okukala aalongwa aawanawa yOohapu dhaKalunga, okutaamba ko shoka tatu ilongo nokweetha ontseyo ndjoka yi tu zule noyi tu wilike. (1 Pet. 1:13-15) Kungawo, eitaalo nuunongo wopakalunga otayi ke tu gamena komakoto gaSatana nokombepo yuuyuni. (2 Kor. 2:11) Ombepo yuuyuni ohayi humitha komeho ohole yokuhola elongithonkondo nosho wo oluhondelo. Ohayi ningitha wo aantu ya gandje eitulomo kuuhalu wopanyama. (1 Joh. 2:15, 16) Otashi vulika wo yi ningithe mboka ya nkundipala pambepo, yi idhimbike uushili mboka tawu ulike kutya esiku enene lyaJehova oli li popepi. Ndhindhilika kutya sho Jesus a yelekanitha ethimbo lyetu nolyaNoa, ka li a gandja eitulomo kelongithonkondo nenge koluhondelo, ihe okunkene sha nika oshiponga okukala twaa na ko nasha nuupambepo wetu. — Lesha Mateus 24:36-39.

¹⁰ Ipula ngeyi: ‘Mbela ohedhi yandje yokukalamwenyo otayi ulike lela kutya ondi shi Jehova? Mbela eitaalo lyandje oli inyengitha ndje owala ndi kale metsokumwe nomithikampango dhaKalunga dhuuyuuki nenge oli inyengitha ndje ngaa ndi dhi tseyithile yalwe?’ Omayamukulo goye nagu ulike kutya nangoye ‘oto ende pamwe naKalunga kashili.’

11. (a) Ohole yaDaniel yokuhola Jehova sho a li omugundjuka, otayi tu longo shike kombinga yaavali ye? (b) Omaukwatya gaDaniel geni wa hala okuholela?

¹¹ Nkene Daniel a li a tseya Jehova. Osha yela kutya Daniel okwa li a longwa nawa kaavali ye a kale e hole Jehova nOohapu dhe. Onkee ano, okwa kala e hole Jehova onkalamwenyo ye ayihe. Naasho a li a kulupa, okwa kala ta konakona Omanyolo nuukeka. (Dan. 9:1, 2) Daniel okwa li a tseya nawa Kalunga, nokwa li e shi nawa nkene a kala tu ungaunga nAaisraeli. Shoka otu shi iwetele megalikano lye lyeifupipiko, ndyoka li li muDaniel 9: 3-19. Omolwashike itoo kongo okathimbo wu leshe nowu tedhatedhe kombinga yegalikano ndyono, nokutala kutya otali ku longo shike kombinga yaDaniel?

12-14. (a) Omomikalo dhini Daniel a li u ulike uunongo wopakalunga? (b) Daniel okwa li a yambekwa ngiini kuKalunga, omolwuulaadhi nuudhiginini we?

¹² Nkene ontseyo yashili kombinga yaKalunga ya li ye etele Daniel uuwanawa. Kasha li oshipu kOmujuda omudhiginini, okulongela Jehova muBabilonia moka mwa li mu udha aapagani. Pashiholelwa, Jehova okwa li a lombwele Aajuda a ti: “Longeni uuwanawa wiilando mbyoka nde mu fala kuyo muupongekwa.” (Jer. 29:7) Pethimbo opo tuu mpoka, okwa li a tegelela ye mu longele oye awike. (Eks. 34:14) Oshike sha li sha kwathele Daniel a gwanithe po iitegelelwa mbyono iyali? Uunongo wopakalunga owo we mu kwathele u uve ko ekotampango li na ko nasha nokuvulika kaapangeli. Konima yomathelemimvo, Jesus okwa li a longo aantu kombinga yekotampango olyo tuu ndyo. — Luk. 20:25.

¹³ Tala kwaashoka Daniel a li a ningi po, sho pwa shainwa oshipango shoka sha li shi indike aantu kaaya galikane kukalunga kalwe nenge komuntu gulwe, ihe okomukwaniilwa awike, uule womasiku omilongo ndatu. (Lesha Daniel 6:7-10.) Daniel okwa li ta vulu okuninga omaipopilo ta ti: ‘Omasiku omilongo ndatu omashona.’ Ihe pehala lyaashono, ka li e etha ompango ndjoka ya tulwa po kaantu yi kale ya simanenena kiinima ye yopambepo. Odhoshili kutya okwa li ta vulu okugalikana meholamo, opo kaa monike. Daniel okwa li e shi kutya shoka ha ningi esiku kehe osha li sha tseyika nawa  kaantu. Nonando osha li tashi vulu oku mu fala moshiponga, okwa li a tokola kaa ningithe aantu ya dhiladhile kutya okwe etha po okulongela Kalunga.

¹⁴ Jehova okwa li a yambeke Daniel omolwuulaadhi nuudhiginini we, sho e mu hupitha pashikumithalonga kaa like po koonkoshi. Oshizemo? Aantu ayehe muukwaniilwa waMedo-Persia oya li ya tseya Jehova. — Dan. 6:25-27.

15. Ongiini tatu vulu okukala neitaalo lya fa lyaDaniel?

¹⁵ Nkene tatu vulu okukala tu na eitaalo lya fa lyaDaniel. Shoka sha simanenena tashi vulu oku tu kwathela tu kale tu na eitaalo lya kola, kashi shi owala okulesha Oohapu dhaKalunga, ihe ‘oku dhi dhiginina’ wo. (Mat. 13:23) Otwa hala tu mone nkene Jehova a tala ko iinima, shoka sha kwatela mo okukala tu uvite ko omakotampango gOmbiimbeli. Onkee ano, otwa pumbwa okutedhatedha kwaashoka tatu lesha. Shimwe ishewe sha simana, okugalikana pandjigilile tashi zi komutima, unene tuu ngele twa taalela omashongo nenge oonkalo dhilwe oondhigu. Uuna tatu galikana tu na eitaalo tu mone uunongo noonkondo, Jehova ote ke yi tu pa. — Jak. 1:5.

16, 17. Ongiini Job a li a mono ontseyo yashili kombinga yaKalunga?

¹⁶ Nkene Job a li a tseya Jehova. Job ka li Omuisraeli. Ihe okwa li a pamba Abraham, Isak naJakob, mboka Jehova e ya longo kombinga ye nosho wo yelalakano lye li na ko nasha naantu. Job okwa li i ilongo wo oshindji kombinga yoshili ndjoka, momukalo gulwe. (Job 23:12) Job okwa popi kuJehova a ti: “Onda li nde ku uvu omufofoto.” (Job 42:5) Jehova okwa li a ti kutya Job okwa popi oshili kombinga Ye. — Job 42:7, 8.

¹⁷ Job okwa li wo a mono omaukwatya ogendji gaKalunga sho a tala keshito. (Job 12:7-9, 13) Konima, Jehova naElihu oya longitha iinima yimwe yomeshito ya dhimbulukithe Job kutya omuntu ita vulu okuyelekanithwa nuunene waKalunga. (Job 37:14; 38:1-4) Oohapu dhaJehova odha li dha gumu omutima gwaJob. Odhe mu ningitha i ifupipike, e ta ti kuye: ‘Omuwa, onda tseya kutya ayihe oto yi vulu; kaku na shoka tashi ku nyenge. Otandi itedhulula nokukuutumba montsi nomomutoko.’ — Job 42:2, 6.

18, 19. Omomikalo dhini Job a li u ulike shili kutya oku shi Jehova?

 ¹⁸ Nkene ontseyo yashili kombinga yaKalunga ya li ye etele Job uuwanawa. Job okwa li u uvite ko omakotampango gopakalunga. Okwa li lela e shi Jehova, naashoka oshe mu ningitha a katuke pandunge. Pashiholelwa, Job okwa li e shi kutya ita vulu okukala e hole Kalunga, omanga ihu ungaunga nawa naantu ooyakwawo. (Job 6:14) Ka li ha dhiladhila kutya oku vule yalwe, ihe peha lyaashono okwa li hu ungaunga nayo shi thike pamwe, kutya nduno aayamba nenge oohepele. Okwa popi ta ti: “Kalunga ngoka a shiti ndje, oye wo e ya shita.” (Job 31:13-22) Osha yela kutya Job ka li e etha nando esimano lye nuuyamba we yi mu ningithe a kale e na uuntsa nenge i itale ko a simana e vule yalwe. Job ina yooloka ko tuu kaantu oyendji aanankondo naayamba kunena muuyuni!

¹⁹ Job ka li nando e etha sha, shi kale sha simana shi vulithe Jehova. Okwa li e shi kutya okulongela iikalunga nokupititha komeho omaliko, otayi ke mu ethitha po okulongela ‘Kalunga kashili komegulu.’ (Lesha Job 31:24-28.) Okwa li a tala ko ondjokana yi li ehanganitho eyapuki pokati komulumentu nomukiintu. Okwa li nokuli a ningi etokolo lya kola, kaa tale omukadhona e mu haluka. (Job 31:1) Ndhindhilika kutya Job okwa li ko pethimbo mpoka Jehova a pitika okuhokana ombanda. Onkee ano, okwa li ta vulu okukala e na omukulukadhi omutiyali. * Ihe otashi ulike kutya okwa li a landula oshiholelwa shondjokana ndjoka ya dhikilwe po tango kuKalunga muEden. (Gen. 2:18, 24) Konima yomimvo 1 600, Jesus Kristus okwa li a longo aalanduli ye ya landule omithikampango dhuuyuuki dhi na ko nasha nondjokana nosho wo noluhondelo. — Mat. 5:28; 19:4, 5.

20. Ongiini ontseyo yashili kombinga yaJehova nomithikampango dhe, tayi vulu oku tu kwathela tu hogolole nawa ookuume nosho wo omainyanyudho?

²⁰ Nkene tatu vulu okukala tu na eitaalo lya fa lyaJob. Shoka sha simana, okukala tu na ontseyo yashili kombinga yaJehova nokweetha yi tu wilike monkalamwenyo yetu ayihe. Pashiholelwa, omupisalomi David okwa ti kutya Jehova “oku tonde unene ookakombwiilitha,” naDavid okwe tu londodha kaatu endathane “naantu yaa fele.” (Lesha Episalomi 11:5; 26:4.) Mbela omanyolo ngano otage tu longo shike kombinga yankene Kalunga ha dhiladhila? Mbela omayele ngoka ge li mo otage ke tu kwathela ngiini ngele tashi ya piinima mbyoka tu na okupititha komeho monkalamwenyo yetu, nkene tu na okulongitha ointaneta nosho wo okuhogolola ookuume ketu nomainyanyudho? Omayamukulo goye otashi vulika ge ku kwathele wu mone kutya Jehova owu mu shi shi thike peni. Opo kaatu nwethwe mo kuuyuni mbuka wa kolokosha, katu na owala okwiigilila “okuyoolola shoka shu uka nenge sha puka,” ihe otu na wo okutseya shoka shi li pandunge naashoka kaashi li pandunge. — Heb. 5:14; Ef. 5:15.

21. Oshike tashi ke tu kwathela ‘tu uve ko ayihe’ mbyoka twa pumbwa, opo tu nyanyudhe Tate yetu gwomegulu?

²¹ Molwaashoka Noa, Daniel naJob oya li ya kongo Jehova nomutima aguhe, okwa li e ya kwathele ye mu tseye. Okwe ya kwathele ‘yu uve ko ayihe,’ opo ye mu nyanyudhe. Oya tula po iiholelwa iiwanawa yokulonga shoka sho opalela Kalunga, noya li shili ye shi enditha nawa moonkalamwenyo dhawo. (Eps. 1:1-3) Onkee ano, ipula to ti: ‘Mbela ondi shi nawa Jehova ngaashi Noa, Daniel, naJob ya li ye mu shi?’ Odhoshili kutya otatu vulu okutseya nawa Jehova shi vulithe puyo, molwaashono otu na iikulya yopambepo oyindji mbyoka tayi tu kwathele. (Omayel. 4:18) Onkee ano, konakona muule Oohapu dhaKalunga, tedhatedha kudho, e to pula Jehova e ku pe ombepo ondjapuki. Ngele owa ningi ngawo, oto ka hedha kuTate gwoye gwomegulu shi vulithe nale. Oto ka katuka wo pandunge muuyuni mbuka waakenakonashanakalunga. — Omayel. 2:4-7.