1-3. (a) Kiko lo yuda nos keda fiel na Dios durante e último dianan akí? (b) Kiko nos lo analisá den e artíkulo akí?

SEGUN ku e fin di e último dianan akí ta aserkando, e malbadonan ta sigui “sprùit manera yerba.” (Sal. 92:7) P’esei, no ta un sorpresa ku ménos hende ta sigui normanan moral di Dios. Awor, kon nos por ta “manera mucha chikitu pa loke ta maldat” pero tòg “madurá den [nos] forma di pensa”?—1 Kor. 14:20.

² Nos por haña e kontesta den nos teksto sentral, ku en parte ta bisa: “Esnan ku ta buska SEÑOR ta komprondé tur kos,” esta, tur kos ku nan mester sa pa agradá Yehova. (Pro. 28:5) Nos ta haña un idea similar na Proverbionan 2:7 i 9. Einan Beibel ta bisa ku Yehova “ta warda sabiduria sano [òf, “práktiko,” NW] pa esnan ku ta rekto.” Komo resultado, ta esnan ku ta rekto por “diserní hustisia i huisio i rektitut, sí, tur bon kaminda.”

³ Noe, Daniel i Yòb tabatin e sabiduria di Dios. (Eze. 14:14) Esei ta konta pa e pueblo di Dios awe tambe. Kiko di abo? Bo ta “komprondé tur kos” ku bo mester sa pa agradá Yehova? Pa esei por ta e kaso, bo mester tin konosementu eksakto di  Dios. Ku esei na mente, laga nos analisá (1) kon Noe, Daniel i Yòb a siña konosé Yehova, (2) kon e konosementu ei a benefisiá nan i (3) kon nos por kultivá fe manera esun di nan.

4. Kon Noe a siña konosé Yehova, i kon e konosementu ei a yud’é?

⁴ Kon Noe a siña konosé Yehova? For di prinsipio di humanidat, tabatin tres manera ku hende ku a pone fe den Yehova a siña konos’é: mediante su kreashon, for di otro sirbidónan di Dios i for di e bendishonnan ku nan a haña, bibando segun Dios su normanan i prinsipionan hustu. (Isa. 48:18) Ora Noe a opservá kreashon, e por a mira hopi prueba ku Dios ta eksistí. Ademas, el a mira prueba di Dios su kualidatnan invisibel, manera “su poder eterno i Divinidat.” (Rom. 1:20) Debí na esei, Noe a hasi mas ku djis kere den Dios; el a kultivá un fe fuerte den dje.

5. Kon Noe por a siña tokante Yehova su propósito pa hende?

⁵ Beibel ta bisa: “Fe ta bini despues ku un hende tende e palabra.” (Rom. 10:17) Kon Noe a tende tokante Yehova? Probablemente, el a siña hopi for di su famianan, manera su tata, Lamèk, kende tabatin fe i a nase promé ku Adam a muri. (Wak e promé plachi.) Ademas, lo el a siña for di su tawela Metusalèm i su tatarawela Yared, kende a muri ora Noe tabatin 366 aña. * (Luk. 3:36, 37) Podisé tabata e hòmbernan akí i nan kasá a siña Noe ku Yehova a krea hende i ku su propósito tabata pa nan haña yu, yena tera i sirbié. Nan lo a siñ’é tokante e rebelion den Eden, i e mes por a mira e mal konsekuensianan di esaki. (Gén. 1:28; 3:16-19, 24) Sea kual sea e kaso, loke Noe a siña a konmové su kurason i a motiv’é pa sirbi Dios.—Gén. 6:9.

6, 7. Ki speransa a hasi e fe di Noe fuerte?

⁶ Speransa ta hasi fe mas fuerte. Imaginá bo kon Noe lo mester a sintié ora el a haña sa ku su nòmber, ku probablemente ta nifiká “Sosiegu” òf “Konsuelo,” ta inkluí e idea di speransa. (Gén. 5:29) Bou di inspirashon, Lamèk a bisa: “Esun akí [Noe] lo konsolá nos . . . den e trabou duru di nos mannan, pa motibu di e tera ku SEÑOR a maldishoná.” Pues, Noe tabatin speransa ku Dios lo kaba ku sufrimentu. Meskos ku Abel i Enok ku a biba promé kuné, e tabatin fe ku e “simia” lo heridá kabes di e kolebra.—Gén. 3:15.

⁷ Aunke Noe kisas no a komprondé tur e detayenan di e promesa di Dios ku nos ta haña na Génesis 3:15, e tabata sa sí ku esaki ta duna speransa pa futuro. Ademas, e promesa akí ta similar na e mensahe ku Enok a prediká ora el a bisa ku Dios lo destruí e malbadonan. (Hudas 14, 15) E mensahe di Enok, ku lo haña su kumplimentu final na Armagedon, sigur lo mester a hasi Noe su fe i speransa fuerte!

8. Kon konosementu eksakto di Dios a protehá Noe?

⁸ Kon konosementu eksakto di Dios a benefisiá Noe? Komo ku Noe a haña konosementu eksakto di Yehova, e por a kultivá fe i sabiduria. Esakinan a yud’é protehá su relashon ku Yehova. Por ehèmpel, Noe tabata “kana ku Dios,” p’esei e no tabata kana, òf anda, ku hende ku no tabata sirbi Dios. Noe no a ser engañá pa angelnan malbado ku a tuma kurpa di  hende, kendenan a impreshoná hende ku nan poder sobrehumano; algun hende kisas a asta purba di adorá nan. (Gén. 6:1-4, 9) Tambe Noe tabata sa ku Dios a manda hende haña yu i yena tera. (Gén. 1:27, 28) Pues, e tabata sa ku tabata robes i innatural pa hende muhé i angel malbado kasa i haña yu. Esaki a bira bisto ora ku e yunan a krese i a bira mas grandi i mas fuerte ku otro muchanan. Ku tempu, Dios a bisa Noe ku lo El a trese un diluvio riba tera. Noe su fe den e spièrtamentu ei a motiv’é pa e traha e arka i salba e i su famia.—Heb. 11:7.

9, 10. Kon nos por imitá e fe di Noe?

⁹ Kon nos por kultivá fe manera esun di Noe? Pa nos kultivá fe, ta importante pa nos studia e Palabra di Dios kuidadosamente, tuma loke nos ta siña na pechu i laga e konosementu ei forma i guia nos. (1 Ped. 1:13-15) E ora ei, fe i sabiduria di Dios lo protehá nos for di Satanas su trikinan i for di e spiritu malbado di mundu. (2 Kor. 2:11) E spiritu ei ta promové amor pa violensia i inmoralidat, i e ta motivá hende pa sigui tras di deseo di karni. (1 Huan 2:15, 16) E por asta pone hende ku no tin un fe fuerte ignorá e pruebanan ku e gran dia di Dios ta serka. Kòrda ku ora Hesus a kompará nos tempu ku e tempu di Noe, e no a enfoká riba violensia i inmoralidat sino riba e peliger ku hende ta kore ora nan no ta interesá den e mensahe di Dios.—Lesa Mateo 24:36-39.

¹⁰ Puntra bo mes: ‘E manera ku mi ta hiba mi bida ta indiká ku di bèrdat mi konosé Yehova? Mi fe ta motivá mi pa no solamente biba segun e normanan hustu di Dios, sino tambe pa papia ku otro hende tokante nan?’ Kontesta riba e preguntanan akí lo yuda bo mira si bo tambe ta kana ku e Dios berdadero.

11. (a) Kiko e amor ku e hóben Daniel tabatin pa Dios ta siña nos tokante su mayornan? (b) Ki kualidat di Daniel abo ke imitá?

¹¹ Kon Daniel a siña konosé Yehova? Evidentemente, Daniel su mayornan a instruyé bon, nan a siñ’é stima Yehova i su Palabra skirbí. I Daniel a sigui stima e Palabra di Dios henter su bida. Asta den su behes, e tabata studia e Palabra di Dios kuidadosamente. (Dan. 9:1, 2) For di Daniel su orashon sinsero i humilde registrá na Daniel 9:3-19, nos por mira bon kla ku e tabatin bon konosementu di Dios i di e manera ku Dios a trata ku Israel. Dikon no tuma un tiki tempu pa lesa e orashon akí, meditá riba dje i tuma nota di loke e ta siña bo di Daniel?

12-14. (a) Kon sabiduria di Dios a yuda Daniel? (b) Kon Dios a bendishoná Daniel pa su kurashi i lealtat?

¹² Kon konosementu eksakto di Dios a benefisiá Daniel? Pa un hudiu fiel, bida na Babilonia, un stat pagano, no tabata nada fásil. Por ehèmpel, Yehova a bisa e hudiunan: “Buska pas pa e stat kaminda mi a manda boso den eksilio.” (Yer. 29:7) Pero na mes momento, Dios a bisa nan pa adorá é so. (Éks. 34:14) Kon Daniel por a kumpli ku e dos mandamentunan akí? Sabiduria di Dios a yud’é komprondé ku e mester a obedesé Dios promé ku gobernantenan humano. Siglonan despues, Hesus a siña su siguidónan e mesun prinsipio.—Luk. 20:25.

¹³ Tuma por ehèmpel loke Daniel a hasi ora un lei a prohibí hende di hasi orashon pa 30 dia largu na kualke dios òf hende ku no tabata e rei. (Lesa Daniel 6:7-10.) Daniel por a bini ku èksküs i bisa: ‘Ta pa 30 dia so!’ Pero el a nenga di laga e dekreto di rei bira mas importante  ku su adorashon na Dios. Klaru ku e por a hasi orashon kaminda hende no tabata mir’é. Pero, hopi hende tabata sa ku e tabata hasi orashon tres biaha pa dia. P’esei maske lo el a riska su bida, e no kier a duna hende ni e chèns di pensa ku el a kambia su rutina di adorá Dios.

¹⁴ Yehova a bendishoná Daniel su kurashi i desishon sabí i a skap’é milagrosamente for di un morto kruel. Debí na e milager ei, hende den henter e imperio di Medo-Persia a haña sa tokante Yehova.—Dan. 6:25-27.

15. Kon nos por kultivá fe manera esun di Daniel?

¹⁵ Kon nos por kultivá fe manera esun di Daniel? Pa nos por tin un fe fuerte, nos mester hasi mas ku djis lesa e Palabra di Dios. Nos mester ‘kapta sentido’ di loke nos ta lesa. (Mat. 13:23) Nos ke sa kiko ta Yehova su punto di bista, p’esei nos mester komprondé prinsipionan bíbliko. P’esei, nos mester meditá riba loke nos ta lesa. Ta masha importante tambe pa regularmente nos hasi orashon sinsero, spesialmente ora nos ta enfrentá prueba òf situashonnan difísil. Ora nos ta hasi orashon ku fe i pidi Yehova sabiduria i forsa, lo e duna nos esakinan generosamente.—Sant. 1:5.

16, 17. Kon Yòb a haña konosementu eksakto di Dios?

¹⁶ Kon Yòb a siña konosé Yehova? Yòb no tabata un israelita. Ma, e tabata famia djaleu di Abraham, Isak i Yakòb, na kendenan Yehova a revelá detayenan tokante su mes i su propósito pa hende. Di un manera òf otro, Yòb a siña tokante e bèrdatnan presioso ei. (Yòb 23:12) Yòb a bisa: “Ta tende mi a tende di bo.” (Yòb 42:5) Ademas, Yehova mes a bisa ku Yòb a papia loke ta bèrdat di dje.—Yòb 42:7, 8.

¹⁷ Yòb a mira tambe hopi di Dios su kualidatnan den kreashon. (Yòb 12:7-9, 13) Mas despues, tantu Eliú komo Yehova a usa aspektonan di kreashon pa rekordá Yòb kon insignifikante hende ta kompará ku Dios su grandesa. (Yòb 37:14; 38:1-4) E palabranan di Yehova a konmové e kurason di Yòb asina tantu ku el a bisa Dios humildemente: ‘Mi sa ku bo por hasi tur kos, i ku ningun di bo propósitonan no por wòrdu strobá. Mi ta arepentí den stòf i shinishi.’—Yòb 42:2, 6.

18, 19. Den ki manera Yòb a mustra ku e konosé Yehova di bèrdat?

 ¹⁸ Kon konosementu eksakto di Dios a benefisiá Yòb? Yòb tabata komprondé prinsipionan di Dios bon. E tabata konosé Yehova di bèrdat, i e konosementu akí a motiv’é pa hasi loke ta korekto. Por ehèmpel, Yòb tabata sa ku e no por bisa ku e ta stima Dios i a la bes trata su próhimo malu. (Yòb 6:14, BPK) E no a pensa ku e tabata mas ku otro hende, mas bien el a trata tur hende manera ruman, sea nan tabata riku òf pober. El a puntra: “No ta Esun ku a traha mi den barika a traha nan?” (Yòb 31:13-22) Ta bisto ku Yòb no a laga e rikesa i prestigio ku e tabatin anteriormente pon’é pensa ku e ta mas importante ku otro hende. Esei ta diferente for di e manera ku hende riku i poderoso ta hasi awe.

¹⁹ Yòb a rechasá tur sorto di idolatria, asta den su kurason. E tabata sa ku adorashon falsu, inkluso amor pa kos material, lo a pon’é “nenga e Dios aya riba.” (Lesa Yòb 31:24-28.) El a mira matrimonio komo un union sagrado entre ún hende hòmber i ún hende muhé. El a asta sera un aliansa, òf pakto, ku su wowonan pa e no wak un bírgen na un manera inmoral. (Yòb 31:1) Tene na mente ku el a sera e pakto akí tempu ku Dios tabata permití poligamia. Pues, si Yòb tabata ke, e por a tuma un di dos esposa. * Pero evidentemente, el a sigui e patronchi di matrimonio ku Dios a establesé den Hòfi di Eden, i el a skohe pa biba asina. (Gén. 2:18, 24) Un 1.600 aña despues, Hesukristu a siña su oyentenan pa sigui e mesun prinsipio hustu ei tokante matrimonio i sèks.—Mat. 5:28; 19:4, 5.

20. Kon konosementu eksakto di Yehova i su normanan ta yuda nos ora di skohe bon amigu i entretenimentu sano?

²⁰ Kon nos por kultivá fe manera esun di Yòb? Den e kaso akí tambe, ta masha importante pa nos gana konosementu eksakto di Yehova i laga e konosementu ei guia nos den tur aspekto di nos bida. Por ehèmpel, e salmista David a bisa ku Yehova ‘ta odia esun ku ta gusta violensia,’ i el a bisa nos pa no anda ku “hòmbernan gañadó.” (Lesa Salmo 11:5; 26:4) Kiko e tekstonan akí ta siña bo di Dios su manera di pensa? Ki efekto nan mester tin riba bo prioridatnan, ora di usa Internet i ora di skohe amigu i entretenimentu? Bo kontesta riba e preguntanan akí lo yuda bo mira kon bon bo konosé Yehova. Pa nos por keda sin kulpa den e mundu kompliká i malbado akí, nos mester entrená nos “kapasidat di komprondé” pa nos por distinguí no solamente loke ta bon for di malu, ma tambe loke ta sabí for di loke ta imprudente.—Heb. 5:14; Efe. 5:15.

21. Kiko lo yuda nos “komprondé tur kos” ku nos mester sa pa agradá nos Tata selestial?

²¹ Noe, Daniel i Yòb a buska Yehova ku henter nan kurason. P’esei, Yehova a yuda nan “komprondé tur kos,” esta, tur loke nan mester tabata sa pa por a agrad’é. Di e manera ei, nan a bira ehèmpel di hustisia i tabata realmente felis. (Sal. 1:1-3) P’esei puntra bo mes: ‘Mi konosé Yehova bon manera Noe, Daniel i Yòb a konos’é?’ De echo, debí ku nos tin mas komprondementu awe, bo por konosé Yehova asta mihó! (Pro. 4:18) Pues, studia e Palabra di Dios profundamente. Meditá riba loke bo ta siña. I hasi orashon i pidi Dios pa spiritu santu. E ora ei, e mundu malbado lo no influensiá bo. Mas bien, lo bo tuma desishonnan sabí, i lo bo hala mas i mas serka di bo Tata selestial.—Pro. 2:4-7.