1-3. (a) Yini letasisita sihlale setsembekile kuNkulunkulu kulamalanga ekugcina? (b) Sitawucoca ngani kulesihloko?

NJENGOBE emalanga ekugcina sekaya ngasekupheleni, bantfu lababi bayachubeka ‘bahluma njengetjani.’ (Hla. 92:7) Akusimangalisi kutsi bantfu labanyenti abasatisebentisi timiso tekutiphatsa. Kulelive lelisiphila kulo, singaba njani “bantfwana kulokubi” kepha ‘sibe ngulabavutsiwe ekucabangeni [kwetfu]’?​—1 Khor. 14:20.

² Imphendvulo singayitfola encenyeni yembhalo lokusekelwe kuwo sihloko setfu, letsi: “Labo labakhonta Simakadze bakucondzisisa kahle konkhe.” Loku kusho kutsi kufanele bacondzisise konkhe lokudzingekako kute bajabulise Nkulunkulu. (Taga 28:5) Taga 2:7, 9 titsi Jehova “ubabekele kuhlakanipha” bantfu labacotfo. Ngesizatfu saloko, bantfu labacotfo bayakhona ‘kucondza kulunga, bumsulwa, bucotfo, futsi bayakwati lokufanele.’

³ Nowa, Danyela kanye naJobe bebanako lokuhlakanipha. (Hez. 14:14) Nebantfu baNkulunkulu lamuhla banako. Kutsiwani ngawe? ‘Ukucondzisisa kahle konkhe’ yini lokudzingekako kute ujabulise Jehova? Lokubalulekile kutsi ube nelwati lweliciniso ngaye. Ngako  asesicoce ngekutsi (1) Nowa, Danyela naJobe bamati njani Nkulunkulu? (2) Lolwati lwabasita njani, kanye nekutsi (3) Singakucinisa njani kukholwa kwetfu njengobe benta?

4. Nowa wamati njani Jehova, futsi lwati lweliciniso ngaye lwamsita njani?

⁴ Indlela Nowa lamati ngayo Jehova. Kusukela ekucaleni kwemlandvo webantfu, emadvodza nebafati labetsembekile bafundza ngaNkulunkulu basebentisa letindlela letintsatfu letiyinhloko: Kubuka indalo lebonakalako, kufundza kubantfu labesaba Nkulunkulu, kanye nangekutfola tibusiso ngenca yekuphila ngekuvumelana netimiso taNkulunkulu letilungile. (Isa. 48:18) Ngekubuka indalo lebonakalako, kungenteka Nowa wabona bufakazi bekutsi Nkulunkulu ukhona kanye nebuntfu bakhe lobunyenti lobungabonakali lokufaka ekhatsi “emandla akhe langapheli nebuNkulunkulu bakhe.” (Rom. 1:20) Ngesizatfu saloko Nowa akagcinanga ngekukholwa kutsi Nkulunkulu ukhona kodvwa waba nekukholwa lokucinile kuye.

5. Nowa wayati njani injongo yaNkulunkulu ngebantfu?

⁵ Kukholwa “kulandzela kuva.” (Rom. 10:17) Nowa wafundziswa ngubani ngaJehova? Asingabati kutsi lokunyenti wakufundziswa tihlobo takhe. Lokufaka ekhatsi babe wakhe Lameki lobekayindvodza lenekukholwa futsi waphila ngesikhatsi sa-Adamu. (Buka sitfombe lesisekucaleni kwalesihloko.) Kuphindze kufake ekhatsi khokho wakhe Methusela naJarede lowafa ngesikhatsi Nowa aneminyaka lengu-366. * (Luk. 3:36, 37) Kungenteka Nowa wafundza kulamadvodza nakubafati bawo ngekutsi kuphila kwacala njani, ngenjongo yaNkulunkulu yekutsi bantfu labalungile bagcwalise umhlaba kanye nangendzaba yekuvukela kwase-Edeni futsi Nowa watibonela imiphumela yako. (Gen. 1:28; 3:16-19, 24) Loko Nowa lakufundza kwayitsintsa inhlitiyo yakhe futsi kwamenta wakhonta Nkulunkulu.​—Gen. 6:9.

6, 7. Kuba nelitsemba kwakucinisa njani kukholwa kwaNowa?

⁶ Kukholwa kuciniswa kuba nelitsemba. Cabanga ngekutsi Nowa wativa njani ngesikhatsi afundza kutsi ligama lakhe lisho “Kuphumula kanye nendvudvuto,” lokumelela litsemba. (Gen. 5:29) Aphefumulelwe, Lameki watsi: “[Nowa] nguye lotasidvudvuta . . . ekukhatsatekeni kwetfu kuwo lomhlabatsi lowacalekiswa nguSimakadze.” Nowa bekametsemba Nkulunkulu. Njenga-Abela na-Enoki labaphila asengakatalwa, bekakholelwa kutsi intalo yemfati itawufihlita inhloko yenyoka.​—Gen. 3:15.

⁷ Kungenteka Nowa akazange ayicondze imininingwane yesiphrofetho lesibhalwe kuGenesisi 3:15, kodvwa asingabati kutsi lesiphrofetho samenta waba nelitsemba lekukhululwa. Ngetulu kwaloko, lesetsembiso sivumelana nemlayeto lowamenyetelwa ngu-Enoki lobewukhuluma ngekutsi Nkulunkulu utawehlulela bantfu lababi. (Juda 14, 15) Asingabati kutsi umlayeto wa-Enoki lotawugcwaliseka ngalokuphelele e-Amagedoni wakucinisa kukholwa kwaNowa kanye nelitsemba labenalo.

8. Lwati lweliciniso ngaNkulunkulu lwamvikela njani Nowa?

⁸ Indlela lwati lweliciniso ngaNkulunkulu lolwamsita ngayo Nowa. Lwati lweliciniso lwamenta waba nekukholwa kanye nekuhlakanipha lokuvela kuNkulunkulu futsi loko kwavikela buhlobo bakhe naye. Ngenca yekutsi Nowa “abehamba naNkulunkulu” weliciniso, akazange atihlanganise nebantfu labangamkhonti Nkulunkulu. Nowa akazange adukiswe ngemadimoni lanemandla ladukisa bantfu labebete kukholwa nalabakhohliseka  kalula futsi labanye baze bawakhonta. (Gen. 6:1-4, 9) Nowa bekati kutsi bantfu bekufanele batalane futsi bagcwalise umhlaba. (Gen. 1:27, 28) Noma kunjalo, bekati kutsi bantfu bekungakafaneli baye ecasini netingilosi letimbi futsi loko bekuphambene nemvelo. Bufakazi baloko babonakala kahle ngesikhatsi kutalwa bantfwana labangakavami. Ngekuhamba kwesikhatsi, Nkulunkulu watjela Nowa kutsi utawuletsa Zamcolo emhlabeni. Ngenca yekutsi Nowa bekanekukholwa, wakha umkhumbi kute asindzise umndeni wakhe.​—Heb. 11:7.

9, 10. Yini lesingayenta kuze sibe nekukholwa lokufana nekwaNowa?

⁹ Loko lesingakwenta kuze sibe nekukholwa lokufana nekwaNowa. Kubalulekile kutsi silifundze kahle liVi laNkulunkulu, lesikufundzako sikufake etinhlitiyweni tetfu futsi sivumele lolwati kutsi lusicondzise. (1 Phet. 1:13-15) Nasenta njalo, kukholwa kanye nekuhlakanipha lokuvela kuNkulunkulu kutasivikela ekuncotjweni ngemachinga aSathane kanye nasemoyeni lomubi walelive. (2 Khor. 2:11) Lomoya ukhutsata kutsandza budlova kanye nekutiphatsa lokubi futsi wenta bantfu banake tifiso tenyama. (1 Joh. 2:15, 16) Ungaphindze wente bantfu labete buhlobo lobuhle naNkulunkulu kutsi bangabunaki bufakazi bekutsi lilanga lelikhulu laJehova selisondzele. Naka kutsi nakacatsanisa sikhatsi saNowa nesikhatsi setfu, Jesu akazange akhulume ngebudlova noma kutiphatsa lokubi, kepha wakhuluma ngetintfo letingabeka buhlobo betfu naJehova engotini.​—Fundza Matewu 24:36-39.

¹⁰ Tibute kutsi: ‘Indlela lengiphila ngayo ikhombisa kutsi ngimati kahle yini Jehova? Kukholwa kwami kungenta kutsi ngiphile ngekuvumelana netimiso taNkulunkulu letilungile yini, futsi ngitjele labanye ngato?’ Shengatsi timphendvulo takho tingakhombisa kutsi ‘uhamba naNkulunkulu’ weliciniso.

11. (a) Kutinikela kwaDanyela asemusha kusitjelani ngendlela lakhuliswa ngayo? (b) Ngubuphi buntfu baDanyela longatsandza kubulingisa?

¹¹ Indlela Danyela lamati ngayo Jehova. Batali baDanyela bamkhulisa kahle futsi bamfundzisa kutsandza Jehova kanye neliVi lakhe. Ngetulu kwaloko, Danyela watsandza Jehova kuphila kwakhe konkhe. Ngisho noma asagugile, bekahlala afundza imiBhalo. (Dan. 9:1, 2) Umthantazo waDanyela lotsintsa inhlitiyo lobhalwe kuDanyela 9:3-19 uveta ngalokucacile kutsi Danyela bekamati kahle Nkulunkulu futsi ayati nendlela laphatsa ngayo ema-Israyeli. Tinike sikhatsi sekufundza lomthantazo, uzindle ngawo futsi unake kutsi ukutjelani ngaDanyela?

12-14. (a) Danyela wakhombisa njani kutsi abenekuhlakanipha lokuvela kuNkulunkulu? (b) Danyela wabusiswa njani ngekuba nesibindzi kanye nekwetsembeka kuNkulunkulu?

¹² Indlela lwati lweliciniso ngaNkulunkulu lolwamsita ngayo Danyela. Kuphila eBhabhulona bekuwaletsela tinkinga emaJuda letsembekile. Loko sikubona kahle kuloko Jehova lakutjela emaJuda, watsi: “Funani kuthula nekuphumelela kulelo dolobha lenganitfumbela kulo.” (Jer. 29:7) Ngesikhatsi lesifanako bekafuna kutsi atinikele ngalokuphelele kuye. (Eks. 34:14) Yini leyasita Danyela wakhona kukwenta kokubili? Kuhlakanipha lokuvela kuNkulunkulu kwamsita wati kutsi kufanele alalele Nkulunkulu kunebabusi lababantfu. Emakhulwini eminyaka leyalandzela, Jesu wafundzisa bantfu ngalomtsetfo.​—Luk. 20:25.

¹³ Cabanga ngaloko Danyela lakwenta ngesikhatsi babusi bakhipha simemetelo sekutsi kute lokufanele atfolakale athantaza kulomunye umuntfu noma kulabanye bonkulunkulu ngephandle kwenkhosi kuze kuphele emalanga langu-30. (Fundza Danyela 6:7-10.) Danyela bekangatsi: ‘Emalanga langu-30 awasilutfo.’ Kodvwa akazange avumele babusi  lababantfu kutsi bamente ephule umtsetfo waNkulunkulu. Danyela abengathantaza endzaweni lesitsekile kute bantfu bangamboni. Kodvwa bekati kutsi bantfu bayati kutsi uthantaza onkhe malanga. Nanobe bekusho kubeka kuphila kwakhe engotini, Danyela wachubeka athantaza kuze bantfu bangacabangi kutsi sewuyekele kukhonta Jehova.

¹⁴ Jehova wambusisa Danyela ngekuba nesibindzi kanye nekwetsembeka ngekutsi amvikele ngalokusimangaliso ekubulaweni ngemabhubesi. Umphumela waba kutsi bantfu labanyenti eMbusweni wemaMede nemaPheresiya bamati Jehova.​—Dan. 6:25-27.

15. Yini lesingayenta kuze sibe nekukholwa lokufana nekwaDanyela?

¹⁵ Loko lesingakwenta kuze sibe nekukholwa lokufana nekwaDanyela. Kuze sibe nekukholwa lokucinile kufanele singagcini ngekufundza liVi laNkulunkulu kepha kufanele sikucondze loko lelikushoko. (Mat. 13:23) Nasifuna kutfola loko Jehova lakucabangako endzabeni letsite futsi siticondze timiso letiseBhayibhelini, kufanele sizindle ngaloko lesikufundzako. Ngetulu kwaloko kubalulekile kutsi sithantaze ngalokusuka enhlitiyweni ikakhulukati nangabe sibhekene netinkinga noma timo letimatima. Jehova utawusipha kuhlakanipha kanye nemandla nangabe sikuthantazela ngekukholwa.​—Jak. 1:5.

16, 17. Yini leyasita Jobe kutsi abe nelwati lweliciniso ngaNkulunkulu?

¹⁶ Indlela Jobe lamati ngayo Jehova. Jobe bekangesuye umIsrayeli. Noma kunjalo bekasihlobo sa-Abrahama, Isaka kanye naJakobe futsi Jehova wabaniketa imininingwane letsite ngaye kanye nangenjongo yakhe ngebantfu. Jobe wafundza lokunyenti ngemaciniso laligugu. (Jobe 23:12) Watsi: “Tindlebe tami setike teva ngawe.” (Jobe 42:5) Ngetulu kwaloko Jehova watsi Jobe bekakhulume kahle ngaye.​—Jobe 42:7, 8.

¹⁷ Indalo yenta Jobe wabona buntfu baNkulunkulu. (Jobe 12:7-9, 13) Ngekuhamba kwesikhatsi Jehova na-Elihu bakhuluma naJobe ngendalo kute bamkhumbute kutsi umuntfu akasilutfo nakacatsaniswa nebukhulu baNkulunkulu. (Jobe 37:14; 38:1-4) Emavi aJehova ayitsintsa inhlitiyo yaJobe ngoba ngekuhamba kwesikhatsi watsi kuNkulunkulu: “Ngiyati kutsi wena unemandla ekwenta konkhe, kute muntfu longaphatamisa loko lese uhlose kukwenta. . . . Ngiyaphendvuka ngitilahla elutfulini nasemlotseni.”​—Jobe 42:2, 6.

18, 19. Jobe wakhombisa njani kutsi abemati kahle Nkulunkulu?

 ¹⁸ Indlela lwati lweliciniso ngaNkulunkulu lolwamsita ngayo Jobe. Jobe bekatati kahle timiso taNkulunkulu. Bekanelwati lweliciniso ngaJehova futsi bekalisebentisa ekuphileni kwakhe. Cabanga ngaloku: Jobe bekati kutsi angeke atsi uyamtsandza Nkulunkulu kepha abe angababonisi labanye umusa. (Jobe 6:14) Akazange ababukele phasi labanye kepha bekabakhatsalela bonkhe bantfu labanjingile nalabaphuyile. Watsi: ‘Akusiye yini yena lowo lowabumba mine esiswini lona lowabumba bona?’ (Jobe 31:13-22) Kuyacaca kutsi Jobe akazange avumele ludvumo kanye nemcebo lebekanawo kutsi kumente atikhukhumete noma ababukele phasi labanye bantfu. Loku kwehluke kakhulu kuloko lokwentiwa bantfu labanyenti labanjingile nalabanemagunya kulelive.

¹⁹ Jobe akazange ahlanganyele kunoma nguluphi luhlobo lwekukhonta titfombe. Bekati kutsi kukhonta kwemanga lokufaka ekhatsi kulwela kunjinga bekutawumenta ‘angetsembeki kuNkulunkulu’ weliciniso. (Fundza Jobe 31:24-28.) Umshado bekawutsatsa njengesibopho lesingcwele lesisemkhatsini wendvodza nemfati. Waze wenta sivumelwane nemehlo akhe kutsi angeke ambuke ngenkhanuko umuntfu wesifazane. (Jobe 31:1) Khumbula kutsi ngaleso sikhatsi Jehova bekasivumele sitsembu. Ngako Jobe abengamtsatsa umfati wesibili kube bekafuna. * Noma kunjalo, Jobe bekati kutsi umshado wekucala Nkulunkulu lawusungula e-Edeni bewusemkhatsini wendvodza nemfati munye futsi naJobe wenta lokufanako. (Gen. 2:18, 24) Ngemuva kweminyaka lengu-1 600, Jesu Khristu wafundzisa bantfu kutsi baphile ngekuvumelana nesimiso lesilungile lesimayelana nemshado nekuya ecasini.​—Mat. 5:28; 19:4, 5.

20. Lwati lweliciniso ngaJehova nangetimiso takhe lusisita njani kutsi sikhetse kahle bangani kanye nekutijabulisa?

²⁰ Loko lesingakwenta kuze sibe nekukholwa lokufana nekwaJobe. Kubalulekile kutsi sibe nelwati lweliciniso ngaJehova futsi siluvumele lusicondzise kuko konkhe kuphila kwetfu. Nasi sibonelo, umhlabeleli Davide watsi Jehova “uyamtondza lomubi nalotsandza budlova.” Ngetulu kwaloko Davide wecwayisa mayelana nekutihlanganisa “nebantfu bemanga.” (Fundza Tihlabelelo 11:5; 26:4.) LemiBhalo ikusita njani kutsi wati indlela Nkulunkulu lacabanga ngayo? Loko kufanele kuyitsintse njani indlela lokhetsa ngayo tintfo letita kucala kuwe, indlela losebentisa ngayo i-Internet, indlela lokhetsa ngayo bangani kanye nekutijabulisa? Indlela lophendvula ngayo kulombuto itakusita ubone kutsi umati kahle kangakanani Jehova. Kuze sihlale setsembekile kulelive lelibi kufanele ‘siceceshe imicondvo yetfu,’ kuze sikhone kwehlukanisa lokuhle nalokubi kanye netincumo letihlakaniphile naletingakahlakaniphi.​—Heb. 5:14; Ef. 5:15.

21. Yini letasisita kutsi ‘sicondzisise kahle’ konkhe lokufanele sikwati kuze sijabulise Babe wetfu wasezulwini?

²¹ Jehova wenta Nowa, Danyela kanye naJobe bamati ngoba bebamfuna ngenhlitiyo yonkhe. Jehova wabasita kutsi “bacondzisise kahle” konkhe lebekudzingeka kute bamjabulise. Ngako baba tibonelo letinhle tekulunga futsi bebaphumelela ekuphileni. (Hla. 1:1-3) Ngako tibute: ‘Ngimati kahle yini Jehova ngendlela Nowa, Danyela kanye naJobe bebamati ngayo?’ Ecinisweni ngenca yekwandza kwelwati ngaNkulunkulu, ungakhona kumati ngalokugcwele. (Taga 4:18) Ngako lifundze ngalokujulile liVi laNkulunkulu, uzindle ngalo futsi uthantazele umoya longcwele. Nawenta njalo utawusondzela kakhulu kuBabe wetfu wasezulwini. Ngetulu kwaloko utawuba nekucondza futsi wente ngekuhlakanipha kulelive lelingamesabi Nkulunkulu.​—Taga 2:4-7.