1-3. (a) Wanem samting inap helpim yumi long stap gut long God long dispela taim bilong las de? (b) Yumi bai skelim wanem ol samting long dispela stadi?

PINIS bilong las de i wok long i kam klostu, na ol manmeri nogut i ‘kamap olsem gras.’ (Sng. 92:7) Yumi lukim olsem ol manmeri i no bihainim ol stretpela pasin. Olsem na “long olgeta kain pasin nogut [yumi] mas i stap olsem ol liklik pikinini.” Tasol long wankain taim, yumi mas “kamap olsem ol man i bikpela pinis long pasin bilong skelim gut ol samting.” Olsem wanem yumi inap mekim olsem?—1 Kor. 14:20.

² Bekim bilong dispela askim i stap long tim skripsa bilong yumi. Em i tok: “Ol man i laik bihainim Bikpela, ol i save tru long stretpela pasin.” (Snd. 28:5) Wankain tok i stap long Sindaun 2:7, 9, dispela ves i tok olsem Jehova “i save stiaim tingting bilong ol stretpela man na ol i save skelim gut ol pasin ol i mas bihainim.” Olsem na ol inap ‘bihainim gutpela tingting bai ol i save long olgeta gutpela rot bilong wokabaut. Bai ol i save long bihainim ol gutpela na stretpela pasin na long mekim wankain pasin long olgeta man.’

³ Noa, Daniel, na Jop i bihainim gutpela tingting na wokabaut long stretpela pasin. (Ese. 14:14) Ol manmeri bilong God long nau, ol tu i  bihainim gutpela tingting long olgeta samting ol i mekim. Olsem wanem long yu yet? Yu “save tru long stretpela pasin” bambai yu ken amamasim Jehova? Pastaim, yu mas kisim stretpela save long God. Orait nau yumi ken skelim (1) olsem wanem Noa, Daniel, na Jop i kisim save long God, (2) olsem wanem dispela save i helpim ol, na (3) olsem wanem yumi inap kisim wankain bilip olsem bilong ol.

4. (a) Olsem wanem Noa i kisim save long Jehova? (b) Olsem wanem stretpela save i helpim em?

⁴ Noa i kisim save long Jehova. Kirap long bipo tru na i kam inap long nau, ol bilipman i kisim save long God long 3-pela rot: ol i lukim ol samting God i wokim, long ol eksampel bilong ol narapela bilip manmeri, na long ol blesing ol i kisim taim ol i bihainim ol stretpela lo na ol stiatok bilong God. (Ais. 48:18) Taim Noa i lukim ol samting God i wokim, ating dispela i helpim em long bilip olsem God i stap tru, na tu, em i kliagut long ol pasin bilong God i stap hait, kain olsem “bikpela strong bilong en i stap oltaim na [em] i save olsem tru tru em i God.” (Rom 1:20) Olsem na Noa i kisim pasin bilong bilip strong long God.

5. Olsem wanem Noa i save long samting God i tingting pinis long kamapim long graun?

⁵ Baibel i tok: “Ol man i harim tok pastaim na bihain ol i save bilip.” (Rom 10:17) Olsem wanem Noa i harim ol stori long ol pasin na wok em Jehova i mekim? Ating ol wanfamili bilong em i skulim em long God. Wanpela bilong ol em papa bilong em, Lamek. Lamek i gat strongpela bilip, na em i stap long taim Adam i stap laip yet. (Lukim piksa long kirap bilong stadi.) Ol narapela wanfamili bilong Noa em tumbuna papa bilong em Metusela, na tumbuna papa bilong Metusela, em Jaret. Jaret i stap laip yet taim Noa i bon. Em i stap laip long taim bilong Noa inap 366 yia moa na em i dai. * (Luk 3:36, 37) I luk olsem papa na ol tumbuna papa bilong Noa na ol meri bilong ol i stori long em long taim God i wokim Adam na Iv, laik bilong God long Adam na Iv long kamapim pikinini na bai ol stretpela manmeri i go stap long olgeta hap bilong graun, na pasin bikhet i kirap long gaden Iden. Noa yet i luksave long pen na hevi ol dispela samting i kamapim. (Stt. 1:28; 3:16-19, 24) Ol samting Noa i kisim save long en i kirapim em long mekim wok bilong God.—Stt. 6:9, 10.

6, 7. Olsem wanem ol samting bai kamap bihain i strongim bilip bilong Noa?

⁶ Taim yumi wet long lukim ol gutpela samting i kamap, dispela bai strongim bilip bilong yumi. Ating Noa i amamas tru taim em i painimaut mining bilong nem bilong em. Mining bilong nem bilong Noa em “Malolo,” na dispela i helpim em long bilip long ol samting bai kamap bihain! (Stt. 5:29) Holi spirit i kirapim Lamek long tok olsem: “Bipo Bikpela i bin mekim strongpela tok bilong bagarapim graun na mipela i mas hatwok tru long mekim kaikai i kamap gut. Tasol dispela pikinini [Noa] bai i mekim kaikai i kamap long graun.” Noa i bilip long God wankain olsem Abel na Enok, em i bilip long “pikinini” husat bai krungutim het bilong snek.—Stt. 3:15, NW.

⁷ Ating Noa i no kliagut long olsem wanem tok profet i stap long Stat 3:15 bai kamap tru. Maski i olsem, em i bilip olsem long rot bilong dispela pikinini, God bai kisim bek ol manmeri. Na tu, dispela tok promis i kamap long gaden Iden i stret wantaim tok profet Enok i mekim long God bai skelim ol manmeri nogut long kot. (Jut 14, 15) Laspela truim bilong tok Enok i mekim bai kamap long Armagedon, na dispela i strongim bilip bilong Noa!

8. Olsem wanem stretpela save bilong God i lukautim Noa?

⁸ Stretpela save bilong God i helpim Noa. Stretpela save i helpim Noa long kisim savetingting na pasin bilong bilip, na dispela i lukautim em long sait bilong bilip. Olsem, Noa “em i pren tru bilong God,” olsem na em i no save bung  wantaim ol man i no lotuim God. Noa i no bilip na givim biknem long ol bikhet ensel taim ol i soim bikpela strong na save bilong ol long ol manmeri—ating dispela i mekim na ol manmeri i tingim ol dispela ensel olsem ol god. (Stt. 6:1-4, 9, 10) Na tu, Noa i save olsem God i laik bai ol manmeri i mas kamap planti na i go sindaun long olgeta hap bilong graun. (Stt. 1:27, 28) Em i save olsem i no stret long ol ensel i kisim bodi bilong graun na slip wantaim ol meri. Dispela i kamap ples klia long ol pikinini ol i kamapim, em ol i traipela man tru. Bihain, God i tokim Noa olsem Em bai kamapim Bikpela Tait long graun. Noa i bilip long dispela tok lukaut na em i wokim wanpela sip, olsem na em wantaim famili bilong em i abrusim bagarap.—Hib. 11:7.

9, 10. Olsem wanem yumi inap bihainim pasin bilong Noa long bilip?

⁹ Kisim wankain bilip olsem Noa. Yumi mas stadi gut long Tok Bilong God, tingim tingim long bel ol samting yumi lainim, na larim dispela save i stretim na stiaim yumi. (1 Pita 1:13-15) Sapos yumi mekim olsem, bilip na savetingting bilong God bai lukautim yumi long trap bilong Satan na ol pasin nogut bilong dispela graun. (2 Kor. 2:11) Pasin na tingting bilong dispela graun i kirapim ol man long pait na mekim pasin pamuk. Na tu, dispela i kirapim ol manmeri long tingting tasol long ol laik nogut bilong bodi. (1 Jon 2:15, 16) Dispela inap mekim na ol lain i no strong long bilip i no luksave olsem de bilong God i kam klostu pinis. Taim Jisas i tok long haptaim bilong yumi bai wankain long taim bilong Noa, em i no tingim pasin bilong pait na pasin pamuk, nogat. Em i tingim ol samting we inap mekim yumi kamap slek long sait bilong bilip.—Ritim Matyu 24:36-39.

¹⁰ Askim yu yet: ‘Pasin bilong mi i soim olsem mi save gut long Jehova? Bilip bilong mi i kirapim mi long bihainim ol stretpela lo bilong God na tokaut long ol dispela lo?’ Ating ol bekim bilong yu i soim olsem yu tu i ‘stap pren bilong God tru.’

11. (a) Bilong wanem Daniel i laikim tru God taim em i yangpela yet? (b) Wanem gutpela pasin bilong Daniel yu laik bihainim?

¹¹ Daniel i kisim save long Jehova. Papamama bilong Daniel i skulim em long laikim Jehova na Tok Bilong God. Daniel i kisim pasin bilong laikim God long laip olgeta bilong em. Maski Daniel i go lapun, yumi luksave olsem em i givim bel long stadi long Tok Bilong God. (Dan. 9:1, 2) Daniel i save gut long God na ol samting God i mekim bilong lukautim lain Israel. Olsem na Daniel i kamapim klia save bilong em taim em i beten long God, olsem i stap long Daniel 9:3-19. Yumi ken lusim sampela haptaim long ritim dispela beten na tingim tingim long bel, na dispela bai helpim yumi long save gut long Daniel.

12-14. (a) Olsem wanem Daniel i soim olsem em i bihainim savetingting bilong God? (b) Olsem wanem God i blesim Daniel long pasin bilong em long sanap strong na stap gut long God?

¹² Stretpela save bilong God i helpim Daniel. Daniel em man Juda, olsem na taim em i stap long Babilon, dispela i givim bikpela hevi tru long em. Jehova i tokim lain Juda olsem: “Mi bin bringim yupela i go long dispela ples nau yupela i stap long en. Olsem na yupela i mas wok long helpim dispela ples i stap gut.” (Jer. 29:7) Maski i olsem, God i laik bai ol i mas lotuim em wanpela tasol. (Kis. 34:14) Wanem samting i helpim Daniel long bihainim ol dispela tok bilong God? Savetingting bilong God i helpim Daniel long luksave olsem em i mas daun long gavman bilong Babilon, tasol bikpela samting moa, em i mas daun long God. Planti handret yia bihain, Jisas i skulim ol disaipel long bihainim wankain stiatok.—Luk 20:25.

¹³ Tingim samting Daniel i mekim taim king i putim lo long ol manmeri i mas beten long king tasol, na ol i no ken beten long wanpela god o wanpela man inap 30 de. (Ritim Daniel 6:7-10.) Daniel inap mekim ol eskius na tok: ‘Em 30 de tasol, dispela lo i no inap i stap oltaim!’ Tasol em i  no larim dispela lo i pasim em long bihainim ol stiatok bilong Baibel. Ating Daniel inap hait na beten bambai ol man i no ken lukim em. Em i save olsem olgeta man i save long pasin bilong em long beten long olgeta de. Daniel i save olsem em inap lusim laip bilong em. Maski i olsem, em i no laik bai ol man i ting olsem em i givim baksait long God tru na lusim bilip bilong em.

¹⁴ Jehova i blesim Daniel long pasin bilong em long skelim gut ol samting na sanap strong, olsem na Daniel i abrusim bagarap long han bilong ol birua. Ol manmeri i stap long ol longwe ples long kantri Midia-Persia i kisim save long olsem wanem God i lukautim Daniel, na dispela i opim rot long ol inap kisim save long Jehova!—Dan. 6:25-27.

15. Yumi inap mekim wanem bilong kisim wankain bilip olsem Daniel?

¹⁵ Kisim wankain bilip olsem Daniel. Yumi mas ritim Tok Bilong God na “kisimgut mining bilong en.” (Mat. 13:23) Taim yumi kliagut long ol stiatok bilong Baibel, dispela bai helpim yumi long holim wankain tingting olsem bilong Jehova long ol samting yumi mekim. Olsem na em i bikpela samting long yumi mas tingim tingim long bel ol tok yumi ritim. Na tu, em i bikpela samting long yumi mas beten oltaim, na moa yet taim yumi bungim ol hevi. Taim yumi beten askim God long givim yumi savetingting na strong, Jehova bai amamas long givim ol dispela samting long yumi.—Jems 1:5.

16, 17. Olsem wanem Jop i kisim stretpela save long God?

¹⁶ Jop i kisim save long Jehova. Jop i no bilong lain Israel. Tasol Jop em hap famili bilong Abraham, Aisak, na Jekop bikos ol i kam long wanpela tumbuna tasol. Jehova i kamapim em yet long ol dispela 3-pela wanfamili bilong Jop, na tokim ol long samting em i tingting pinis long kamapim long ol manmeri. Yumi no save long olsem wanem Jop i kisim save long ol dispela tok i tru. (Jop 23:12) Jop i tok: “Bipo mi bin harim tok bilong ol man tasol na mi kisim save long yu.” (Jop 42:5) Na tu, Jehova yet i tok Jop i save mekim tok tru long Em.—Jop 42:7, 8.

¹⁷ Jop i luksave long planti gutpela pasin bilong God long rot bilong ol samting Em i wokim. (Jop 12:7-9, 13) Bihain, Jehova na Elihu i stori long ol samting God i wokim bambai Jop i luksave olsem God i gat bikpela strong na save winim yumi ol man. (Jop 37:14; 38:1-4) Jop i pilim tru ol tok Jehova i givim long em, na long pasin daun em i tok: “Bikpela, mi save nau, yu tasol inap mekim olgeta samting. Na taim yu laik mekim ol wok bilong yu, i no gat wanpela samting inap pasim yu. . . . Na mi sindaun long das na long sit bilong paia, bilong soim yu olsem mi tanim bel pinis.”—Jop 42:2, 6.

18, 19. Olsem wanem Jop i soim olsem em i save gut long Jehova?

 ¹⁸ Stretpela save bilong God i helpim Jop. Jop i save gut tru long ol stretpela pasin. Em i save gut long Jehova na em i larim dispela save i stiaim pasin bilong em. Tingim: Jop i save olsem em i no inap laikim God na long wankain taim em i givim baksait long ol narapela. (Jop 6:14) Em i no ting olsem em i winim ol narapela, nogat, em i soim pasin laikim long olgeta man, maski ol i maniman o rabisman. Jop i tok: “God yet i mekim mi i kamap long bel bilong mama, na em tasol i mekim ol wokboi na wokmeri i kamap long bel bilong mama bilong ol.” (Jop 31:13-22) Jop i no larim biknem na mani kago bilong em i mekim na em i luk daun long ol narapela. Tasol planti man em ol i gat biknem na mani kago, ol i save luk daun long ol narapela!

¹⁹ Jop i sakim olgeta kain pasin bilong lotuim ol god giaman. Em i save olsem pasin bilong lotu long god giaman, dispela i makim tu pasin bilong laikim tumas mani kago, inap mekim na man i givim baksait long “God Antap Tru.” (Ritim Jop 31:24-28.) Em i luksave olsem taim man na meri i marit, dispela em samting i holi. Na tu, em i mekim strongpela tok promis olsem em i no ken aigris long ol yangpela meri. (Jop 31:1) Long taim bilong Jop, God i larim ol man i maritim planti meri. Olsem na Jop inap kisim namba 2 meri. * Maski i olsem, em i tingim namba 1 marit God i kamapim long Iden, na em i strong long bihainim dispela lo. (Stt. 2:18, 24) Klostu 1 tausen 6 handret yia bihain, Jisas Krais i skulim ol manmeri i harim tok bilong em long wankain stiatok long sait bilong marit na ol stretpela lo long sait bilong maritpasin.—Mat. 5:28; 19:4, 5.

20. Olsem wanem stretpela save na lo bilong Jehova inap helpim yumi long makim gut ol poroman na ol amamas yumi kisim?

²⁰ Kisim wankain bilip olsem Jop. Em i bikpela samting long yumi mas kisim stretpela save long Jehova, na larim dispela save i stiaim yumi long olgeta samting yumi mekim. Kain olsem, Devit i tok Jehova “i no laikim tru ol man i sakim lo bilong em,” na Devit i tok lukaut olsem yumi no ken bung “wantaim ol man bilong giaman.” (Ritim Song 11:5; 26:4.) Ol dispela tok bilong Baibel i givim wanem save long yumi long God? Olsem wanem yumi inap larim ol dispela save i stiaim ol samting yumi putim i stap namba 1, pasin bilong yumi long yusim Intenet, pasin bilong poroman wantaim ol narapela, na ol amamas yumi kisim? Bekim bilong yu bai helpim yu long save olsem yu save gut long Jehova o nogat. Sapos yumi laik sakim ol pasin nogut bilong dispela graun, orait yumi mas “lainim gut tingting” bilong yumi bambai yumi ken save wanem pasin i stret na wanem pasin i no stret.—Hib. 5:14; Efe. 5:15.

21. Wanem samting bai helpim yumi long “save tru long stretpela pasin” bambai yumi ken amamasim Papa bilong yumi long heven?

²¹ Noa, Daniel, na Jop i wok strong long kisim save long Jehova, olsem na em i helpim ol long save long em. God i helpim ol long “save tru long stretpela pasin” ol i mas bihainim bambai em i ken orait long ol. Ol dispela bilipman i stap gutpela eksampel long pasin bilong bihainim stretpela pasin, na laip bilong ol i kamap gutpela tru. (Sng. 1:1-3) Askim yu yet olsem, ‘Mi save gut long Jehova wankain olsem Noa, Daniel, na Jop?’ Yumi amamas olsem save bilong tok i tru i go bikpela, olsem na yumi inap save gut tru long ol pasin bilong God! (Snd. 4:18, 19) Yumi mas stadi gut tru long Tok Bilong God, tingim tingim long bel ol tok bilong en, na beten long holi spirit. Taim yumi mekim olsem, yumi bai go klostu moa long Papa bilong yumi long heven. Na tu, yumi bai bihainim savetingting long dispela taim nogut.—Snd. 2:4-7.