你系咪好似挪亚、但以理同约伯噉认识耶和华？
“经常作恶嘅人，唔能够领悟公正；寻求耶和华嘅，凡事都能领悟。”——箴言28:5
1-3．（甲）喺最后嘅日子，我哋可以点样对上帝保持忠贞？（乙）呢篇课文会讨论乜嘢？
随住最后嘅日子临近终结，世上嘅恶人恶事不断“如杂草丛生”。（诗篇92:7）呢个一啲都唔出奇，因为今日好多人完全无视道德标准。喺噉样嘅社会风气之下，我哋点样先可以“喺恶事上……做婴孩”，“喺理解力上……长大成人”？（哥林多前书14:20）
2 我哋可以从呢篇课文嘅主题经文揾到答案。经文话：“寻求耶和华嘅，凡事都能领悟。”（箴言28:5）经文所讲嘅“凡事”系指，我哋为咗取悦耶和华而需要符合嘅所有条件。箴言2:7,9都表达咗类似嘅思想。经文提到，耶和华“为正直人珍藏实用嘅智慧”。所以，正直嘅人能够“领悟正义、公正、公平，明白善道嘅全貌”。
3 挪亚、但以理同约伯都从上帝嗰度得到呢种智慧。（以西结书14:14）今日上帝嘅子民都一样。你自己又点呢？你有冇“领悟”到，点样做先可以取悦耶和华？关键在于要有确切嘅知识，即系正确认识耶和华上帝。所以，呢篇课文会讨论以下三方面：（1）挪亚、但以理同约伯点样深入认识耶和华；（2）对上帝有正确嘅认识点样使佢哋得益；（3）我哋可以点样培养佢哋噉样嘅信心。
挪亚喺邪恶嘅世界与上帝同行
4．挪亚点样深入认识耶和华？对耶和华有正确嘅认识点样使佢得益？
4 挪亚点样深入认识耶和华。从人类历史初期开始，上帝嘅忠心子民一直以来主要通过三种方式认识上帝，就系观察受造物，效法其他忠仆嘅榜样，同埋体验按照上帝嘅正义标准及原则生活而得到嘅福分。（以赛亚书48:18）通过观察受造物，挪亚唔单止睇出耶和华上帝的确存在，仲睇出佢有好多我哋睇唔见嘅特质，例如“佢嘅永恒力量同神性”。（罗马书1:20）结果，挪亚除咗相信上帝存在之外，佢仲对耶和华培养出坚强嘅信心。
5．挪亚点样深入了解上帝对人类嘅旨意？
5 “要听见信息先能够强化信心”。（罗马书10:17）挪亚点样认识耶和华呢？佢肯定从亲人嗰度听过好多关于耶和华嘅事。呢啲亲人包括父亲拉麦，同埋爷爷玛土撒拉。拉麦系一个忠于上帝嘅人，而且佢出世嘅时候亚当仲在生。（请睇吓课文开头嘅图片）甚至挪亚爷爷嘅爷爷雅列，都有成366年嘅时间同挪亚一齐生活过。 *（路加福音3:36,37）通过呢啲亲人同佢哋嘅妻子，挪亚了解到同上帝创造人类有关嘅事，知道上帝定意要正义嘅人类遍满地球，亦都听讲过伊甸园嘅反叛事件。而反叛所带嚟嘅后果，挪亚都可以亲眼睇到。（创世记1:28;3:16-19,24）挪亚学到嘅每一件事都触动佢嘅内心，推动佢事奉耶和华。（创世记6:9）
6,7．挪亚嘅信心点样因希望而受到强化？
6 信心可以因希望而受到强化。挪亚呢个名嘅意思可能系“休息”或“安慰”。想象吓，当挪亚知道自己嘅名同全人类嘅希望有关嗰时，佢嘅信心一定大受强化！（创世记5:29）喺圣灵启示下，拉麦话：“耶和华咀咒土地，加重我哋……手中嘅劳苦，但系我哋一定会因为呢个仔［挪亚］而得到安慰。”同过去嘅忠仆亚伯、以诺一样，挪亚对上帝所赐嘅希望怀具信心，相信应许嘅“后代”会打碎蛇头。（创世记3:15）
7 挪亚唔清楚创世记3:15预言嘅所有细节，不过佢肯定从呢个预言睇到得救嘅希望。另外，以诺亦都预告上帝会对一切恶人恶事施行审判，呢个信息同伊甸园嘅应许一致。（犹大书14,15）以诺宣布嘅信息肯定使挪亚充满希望，强化咗佢嘅信心，而呢啲预言最终会喺哈米吉多顿嘅时候完全应验！
8．正确认识上帝点样使挪亚得到保护？
8 正确认识上帝点样使挪亚得益。挪亚对上帝有正确嘅认识，所以佢对上帝有信心，亦都充满上帝嘅智慧。信心同智慧保护咗挪亚，特别喺属灵上可以使佢免受伤害。例如，挪亚“与上帝同行”，所以佢冇同嗰啲唔敬畏上帝嘅人做朋友。挪亚冇俾化身为人嘅邪灵呃到，而好多对上帝缺乏信心嘅人见到邪灵拥有超自然嘅能力就轻易上当，甚至仲崇拜佢哋。（创世记6:1-4,9）挪亚亦都知道上帝吩咐人类要生儿育女，遍满地面。（创世记1:27,28）所以佢清楚知道，人间嘅女子同呢啲邪灵结合，系一种违反自然嘅错误行为。结果，佢哋结合之后生出异于常人嘅后代，证明挪亚嘅判断一啲都冇错。结果，上帝发出警告，话俾挪亚知佢会喺地上降下大洪水。挪亚对上帝发出嘅警告有信心，佢采取行动建造方舟，最终使全家人可以得救。（希伯来书11:7）
9,10．我哋可以点样效法挪亚嘅信心？
9 我哋点样培养挪亚噉嘅信心。关键系要研读上帝嘅话语，认真沉思学到嘅知识，而且用呢啲知识嚟塑造同指引自己。（彼得前书1:13-15）噉样，信心同上帝嘅智慧就会保护我哋，使我哋避开撒但嘅诡计，免受世界邪恶精神嘅影响。（哥林多后书2:11）世界嘅精神会助长暴力同不道德嘅行为，使人专注于肉体嘅欲望。（约翰一书2:15,16）呢种精神甚至会使灵性软弱嘅基督徒无视上帝大日子嘅临近。请留意，耶稣将我哋而家呢个时代同挪亚嘅时代做对比嗰时，佢特别想我哋留意嘅系，对属灵嘅事漠不关心嘅态度所带嚟嘅危险，而唔系暴力同不道德嘅行为。（请读马太福音24:36-39）
10 请问吓自己：“我嘅生活方式有冇表明自己真正认识耶和华？我嘅信心有冇推动自己除咗按照上帝嘅标准生活之外，仲积极传讲上帝嘅正义？”你嘅答案可以帮助你知道自己系咪都好似挪亚噉“与上帝同行”。
但以理喺信奉异教嘅巴比伦表现上帝嘅智慧
11．（甲）但以理受到父母点样嘅教导？（乙）你想效法但以理嘅边啲特质？
11 但以理点样深入认识耶和华。显然，但以理喺父母良好嘅教导下，自细就培养对耶和华同对上帝话语嘅爱。佢一生都持守住呢种爱，直到年老都仍然细心查考经文。（但以理书9:1,2）但以理书9:3-19记载咗一个充满痛悔之情嘅祷告。我哋从呢个祷告可以睇出，但以理清楚知道耶和华点样一直恩待以色列人。但以理的确同耶和华有亲密嘅关系，深入认识上帝。你可以用啲时间阅读同沉思呢个祷告，特别留意呢个祷告反映出但以理嘅为人系点嘅。
12-14．（甲）但以理喺边方面表现出上帝嘅智慧？（乙）但以理表现勇气忠于耶和华，点样得到上帝嘅赐福？
12 正确认识上帝点样使但以理得益。对一个忠心嘅犹太人嚟讲，喺信奉异教嘅巴比伦生活系个巨大嘅挑战。例如，耶和华同犹太人讲：“你哋要为我放逐你哋所到嘅城求平安”。（耶利米书29:7）不过，耶和华亦都表明佢系要求专一爱戴嘅上帝，所以犹太人只可以效忠佢。（出埃及记34:14）对于以上两个要求，但以理点样保持平衡呢？上帝嘅智慧帮助佢明白，首先要服从嘅系耶和华，然后至系人间嘅统治者。几百年之后，耶稣都教导同样嘅原则。（路加福音20:25）
13 大流士王颁布咗一条禁令，规定所有人喺30日内唔可以向王以外嘅任何神或任何人祷告。但以理点样做呢？（请读但以理书6:7-10）佢其实可以帮自己揾借口话：“三十日，好快就过啦！”不过，佢将崇拜耶和华睇得比王嘅命令更加重要。当然，佢都可以揾一个冇人留意到嘅地方私下祷告。不过但以理清楚知道，好多人都见过佢每日向上帝祷告，所以就算有生命危险，佢都唔想令人觉得喺崇拜嘅事上佢会妥协。
14 但以理表现勇气，忠于耶和华。所以上帝赐福俾佢，施行奇迹将佢从狮子坑拯救出嚟。呢件事后来传遍成个米底亚-波斯帝国，结果为耶和华作咗一次有力嘅见证。（但以理书6:25-27）
15．我哋可以点样培养但以理噉嘅信心？
15 点样培养但以理噉嘅信心。强化信心嘅关键唔系只系阅读圣经，而系要真正“明白”上帝嘅话语。（马太福音13:23）我哋想用耶和华嘅观点嚟睇问题，就要透彻理解圣经嘅原则。所以，我哋要沉思读过嘅内容。经常衷心祷告亦都非常重要，特别系我哋面对患难同挑战嘅时候。如果我哋满怀信心向耶和华祷告求取智慧同力量，佢就会慷慨噉将我哋所求嘅赐俾我哋。（雅各书1:5）
约伯无论情况好坏都实践上帝嘅原则
16,17．约伯点样深入认识耶和华？
16 约伯点样深入认识耶和华。约伯唔系以色列人，不过佢系亚伯拉罕、以撒同雅各嘅远亲。耶和华向佢哋透露有关佢自己嘅事同佢对人类嘅旨意。约伯肯定通过某啲途径认识好多关于耶和华嘅宝贵真理。（约伯记23:12）佢话：“我以前风闻你嘅事，而家就亲眼睇见你。”（约伯记42:5）另外，耶和华指出，约伯正确谈论有关上帝嘅事。（约伯记42:7,8）
我哋通过观察受造物嚟了解上帝各种睇唔见嘅特质，就可以使信心得到强化。（请睇第17段）
17 约伯亦都通过观察受造物认识上帝好多睇唔见嘅特质。（约伯记12:7-9,13）后来，以利户同耶和华都通过一啲受造物嚟提醒约伯，同上帝嘅伟大相比，人类系几咁渺小。（约伯记37:14;38:1-4）耶和华所讲嘅话打动咗约伯嘅心。佢谦卑噉同上帝讲：“而家我知道你无所不能，冇乜嘢意念系你唔能够成就嘅。……［我］喺尘土同灰烬中懊悔。”（约伯记42:2,6）
18,19．约伯喺边方面表明自己真正认识耶和华？
18 正确认识上帝点样使约伯得益。约伯对上帝嘅原则有好好嘅洞悉力。佢确切认识上帝而且将有关嘅知识运用出嚟。请谂吓：约伯知道佢唔能够一边声称爱上帝，但一边又恶待同胞。（约伯记6:14）佢冇抬高自己，轻视其他人。无论对方系乜嘢身份，佢都关注佢哋，向人表现弟兄之情。佢话：“嗰位造我喺母腹中嘅，唔系亦都造咗我嘅仆婢咩？”（约伯记31:13-22）虽然约伯有好多财富，又有好高嘅声望，但系佢冇变得骄傲，亦都冇认为自己比其他人更重要。喺呢方面，约伯同世上好多有财有势嘅人真系完全唔同！
19 约伯发自内心拒绝任何形式嘅偶像崇拜。佢知道错误嘅崇拜，包括追求物质财富，都系背弃“在上嘅上帝”嘅行为。（请读约伯记31:24-28）约伯将男女之间嘅婚姻关系视为神圣嘅，佢甚至同自己双眼立约，唔会怀住淫念注视女性。（约伯记31:1）要记得，喺约伯嘅时代耶和华容许一个男子可以娶多个妻子。所以，如果约伯想嘅话，佢都可以娶多一个妻子。 *不过，佢显然将上帝喺伊甸园设立嘅婚姻安排视为典范，一直按照呢个原则嚟生活。（创世记2:18,24）大约1600年之后，耶稣教导门徒喺婚姻方面要遵守同样嘅原则。（马太福音5:28;19:4,5）
20．认识耶和华同佢嘅标准点样帮助我哋选择有益嘅交往同娱乐？
20 我哋点样培养约伯噉嘅信心。关键同样系要对耶和华有正确嘅认识，而且根据确切嘅知识嚟指引自己生活嘅方方面面。诗篇执笔者大卫提到，“凡喜爱暴力嘅人，［耶和华］必恨恶”，佢亦都提醒人唔好同“狡诈嘅人”交往。（请读诗篇11:5;26:4）呢啲经文点样帮助你清楚明白上帝嘅观点？喺娱乐交往同使用互联网方面，上帝嘅观点点样帮助你作出明智嘅选择？你嘅答案可以帮助你睇出自己对耶和华嘅认识有几深。如果我哋唔想受到今日呢个又复杂又邪恶嘅世界影响，就一定要锻炼自己嘅辨识力，学识辨别是非对错，分辨智慧同愚昧。（希伯来书5:14；以弗所书5:15）
21．我哋点样做就可以“凡事”取悦耶和华？
21 因为挪亚、但以理同约伯全心寻求耶和华，所以耶和华帮助佢哋“领悟”到点样先可以“凡事”取悦佢。佢哋嘅榜样证明，用耶和华嘅方式行事为人可以拥有成功嘅人生。（诗篇1:1-3）所以，请你问吓自己：“我系咪好似挪亚、但以理同约伯噉深入认识耶和华呢？”我哋好感激耶和华俾机会我哋认识佢。随住属灵嘅亮光越照越明，我哋可以更加全面认识耶和华！（箴言4:18）所以，我哋要深入研读同认真沉思上帝嘅话语，亦都要祈求上帝赐圣灵俾我哋。噉样，我哋就可以同天父耶和华有更亲密嘅关系，而且喺今日呢个不敬虔嘅世界，可以运用洞悉力同上帝嘅智慧行事为人。（箴言2:4-7）
^ 5段 挪亚爷爷嘅父亲以诺亦都“一直与上帝同行”。不过喺挪亚出世之前，上帝已经“将佢带走”。（创世记5:23,24）
