1, 2. 1) Dios chuyma jaqëñat ¿kamsapjjesa walja jilat kullakanakajja? 2) ¿Kuna jisktʼanakarus qhanañchaskañäni?

CANADÁ markankir mä kullakajj akham siwa: “Sapür jan walinakajj utjki ukar saykatañatakisa, kusisitäñatakisa Dios chuyma jaqëñaw yanaptʼitu” sasa. Brasil markankir mä jilatajja, 23 maranakaw casaratäjje, jupajj akham sarakiwa: “Espíritu santompi irpayasiñaw chacha warmjam kusisit jakasiñatak yanaptʼapjjetu” sasa. Filipinas markankir mä jilatajja, Dios chuyma jaqëtap laykuw chuymapan sumaki jikjjatasi, jilat kullakanakampis sum apasiraki.

² Dios chuymäñajj wal yanaptʼistu. Ukhamajja, ¿kunjamatsa jukʼamp Dios chuyma jaqësna, kunjamsa ukajj yanaptʼistaspa? Uka jisktʼaruw aka yatichäwin qhanañchaskañäni, ukampis nayraqatjja, Bibliarjamajj Dios chuyma jaqëñajj kamsañsa muni ukwa yatjjataskañäni. Aka kimsa jisktʼanakarurakiw qhanañchaskañäni: Maya, ¿Espíritu santompi irpayasir jaqejj kunjamasa? Paya, ¿khitinakatsa Dios chuyma jaqëñ yateqassna? Kimsa, ¿“kunjamtï Cristojj amuyki” ukham amuyañatak chʼamachasiñajj kunjamsa yanaptʼistani?

3. Bibliarjamajja, ¿kunansa espíritu santompi irpayasir jaqempi munañapampi apayasir jaqempejj jan pachpakïpki?

³ “Espíritu santompi irpayasir jaqe[mpi]”, “munañapampi apayasir jaqe[mpejj]” kunansa jan pachpäpki ukwa apóstol Pablojj qhanañchäna (1 Corintios 2:14-16 liytʼañataki). “Munañapampi apayasir jaqejja”, “kunatï Diosan espíritu santopat jutki ukanakjja janiw katoqkiti, jupatakisti ukanakajj jan kunatak serviriwa, janirakiw ukanak amuykaspati” sasaw Pablojj säna. Ukampis “espíritu santompi irpayasir jaqesti”, “taqe kunwa yatjjati” ukatjja, ‘Cristjamarakiw amuyi’ sasaw sarakïna. Ukhamajja, apóstol Pablojj espíritu santompi irpayasiñatakiw ewjjtʼistu. Ukampis ¿uka pä kasta jaqenakajj kunanakansa jan pachpäpki?

4, 5. ¿Munañapampi apayasir jaqejj kunjamasa?

⁴ Munañapampi apayasir jaqejj kunjamsa amuyi uk nayraqat uñjañäni. Ukham jaqejj aka pachan munañanakapampiw apayasi, ukatwa munañanakap nayrar uchi. Apóstol Pablojj uka toqet akham sänwa: “Akapachan amuyupaw jan istʼasirinakarojj apnaqaski” sasa (Efes. 2:2). Uka amuyuw jaqenakarojj mayninakjam jan walinak lurapjjañapatak chʼamañchi. Ukatwa kunatï jupanakatak walïki ukak lurapjje, janiw Diosan arunakapar istʼañatakis chʼamachasipkiti. Ukhamajj munañapampi apayasir jaqejja, jupa pachpata, qollqeta, jan ukajj derechonakapat llakisi, ukanakakiw taqe kunat sipansa nayranki.

⁵ Munañapampi apayasir jaqejja, ‘jañchin lurañanakapakwa’ luri (Gál. 5:19-21). Corintonkirinakar qellqat nayrïr cartanjja, uka kasta jaqenakajj kunjamäpjjesa ukwa Pablojj qhanañchäna. Jupajj akham sänwa: ‘Chʼajjwañanakan mitisipjje, jaqenakar tʼaqjjtayapjje, jan istʼasirïñatakiw chʼamañchapjje, maynit maynikamaw tribunalanakar apayasipjje, autoridadarus janiw istʼapkiti, manqʼañampit umañampit jukʼamp llakisipjje’ sasa. Janirakiw jan walinakar saykatañatakis chʼamachasipkiti (Prov. 7:21, 22). Uka kasta jaqenakatjja Judasajj akham sarakïnwa: “Diosan espiritupampis janiw irpayasipkiti” sasa (Jud. 18, 19).

6. ¿Espíritu santompi irpayasir jaqejj kunjamasa?

⁶ Espíritu santompi irpayasir jaqejj janiw ukhamäkiti. Jan ukasti Diosampi sum apasiñatakiw chʼamachasi, Diosat yateqasiñ munaraki (Efes. 5:1). Mä arunjja, Jehová Diosjam amuyañatakiw chʼamachasi. Jupatakejja, Diosajj cheqapuniw utjaski. Taqe kunsa Diosan Aruparjamaw luri, sarnaqaraki (Sal. 119:33; 143:10). ‘Jañchin lurañanakaparjam’ sarnaqañat sipansa, ‘espíritu santon achuparjam’ sarnaqañatakiw chʼamachasi (Gál. 5:22, 23). Ukajj kamsañsa muni uk amuytʼañäni: Mä jaqer musicajj wal gustki ukhajja, musicarukiw chuymapajj wayusi. Ukhamarakiw Diosat jukʼampi yateqañ munki uka jaqejj espíritu santompi irpayasi.

7. ¿Espíritu santompi irpayasir jaqenakat kamsis Bibliajja?

⁷ Espíritu santompi irpayasir jaqenakajj kusisitäpjjewa sasaw Jesusajj säna. Mateo 5:3 texton akham siwa: “Kusisiñanïpjjew Diosat yatjjatañajj kunja wakiskirisa uk amuyasirinakajja, alajjpachankir Reinojj jupanakankiwa” sasa. Romanos 8:6 textojja, espíritu santompi irpayasiñajj kunatsa wali wakiskiri ukwa qhanañcharaki, ukan akham siwa: “Jañchin munañanakapat lupʼiñajja, jiwañar apiriwa. Espíritu santot lupʼiñajja, jakañaru ukhamarak sumankañar apiriwa” sasa. Jiwasatï ukanakat lupʼiñänejja,  Diosampejj sum apasiñäni, chuymasanjja sumakirakiw jikjjatasiñäni, jutïrinsa wiñayatakiw jakarakiñäni.

8. ¿Kunatsa espíritu santompi irpayasiskakiñatak chʼamachasiñasa?

⁸ Aka jan wali pachajj Diosatwa jitheqtayistaspa. Jaqenakajj janiw Diosjam amuyapkiti. Ukatwa jupanakjam jan amuyañatak chʼamachasiñasa. Khititï espíritu santompi jan irpayasjje ukajja, akapachankir jaqenakjamaw sarnaqjje, jupanakjamaw amuyjjaraki. ¿Kunas ukar jan purtʼasiñatak yanaptʼistaspa? ¿Kunjamsa espíritu santompi irpayassna?

9. 1) ¿Kunas Diosar taqe chuyma serviñatak yanaptʼistani? 2) ¿Khitinakatsa yatjjataskañäni?

⁹ Wawanakajj awk taykapatwa yateqasipjje, jiwasajj ukhamarakiw Diosar taqe chuyma servipki ukanakat yateqassna. Ukampis munañapampi apayasir jaqenakatjja, jan walinakakwa yateqassna (1 Cor. 3:1-4). Biblianjja uka pä kasta jaqenakan sarnaqäwipatwa parli. Aka yatichäwinjja, kuna sumanaksa Jacob, María, Jesús jupanakat yateqassna ukwa yatjjataskañäni. Ukaw Dios chuyma jaqëñatak yanaptʼistani.

10. ¿Kunjamsa Jacob chachajj espíritu santompi irpayasitap uñachtʼayäna?

¹⁰ Jacob chachat nayraqat parltʼañäni. Jupatakejj jakañ vidajj chʼamakïnwa, kunjamatï jiwasatak chʼamäki ukhama. Esaú jilapajja, munañapampi apayasir jaqënwa, Jacobor jiwayañ kunwa munäna. Jacobon suegropasti walja kutiw engañäna, inakiw trabajiyañ munarakïna. Cheqas, munañapampi apayasir jaqenak taypins jakchïnjja, espíritu santompiw irpayasïna. Kuntï Diosajj Abrahán achachilapar siskäna ukarus taqe chuymaw confiyäna, familiaparus sum uñjarakïna, kunattejj familiap taypiw Diosan amtanakap phoqasiñapäna (Gén. 28:10-15). Jacobotakejj Diosan  arunakapar istʼaña, Diosan munañap phoqañaw nayrankäna, ukaw arunakapansa luratanakapansa qhan amuyasi. Amuytʼañataki ‘Esaú jilajaw nuwantitani’ sasin amuykäna ukhajja, uka jan walit qhespiñatakiw Diosar mayisïna. Akham sänwa: “Jumajj qhanwa sistajja: ‘Nayaw yanapaskäma, wawanakamas qota iranankir chʼallanakjama jan jaktʼkayäniw’” sasa (Gén. 32:6-12). Jacob chachajja, Jehová Diosajj kuntï juparusa nayra awkinakaparus siskäna ukarojj taqe chuymaw confiyäna, ukaw sarnaqäwipan qhan amuyasi.

11. ¿Kunatsa Mariajj espíritu santompiw irpayasïna sasajj sistanjja?

¹¹ Jichhajj Mariat parltʼarakiñäni. ¿Kunatsa Jehová Diosajj Jesusan taykapäñapatak Mariar ajllïna? Espíritu santompi irpayasitap laykuw ajllïna. Kunapachatï Zacarías, Elisabet familiaranakapar visittʼir saräna ukhajja, suma cantonakampiw Jehová Diosar jachʼañchäna (Lucas 1:46-55 liytʼañataki). Kuntï siskäna ukajja, Diosan Arupar wal munasitap ukhamarak Hebreo Arut Qellqatanak sum uñtʼatapwa uñachtʼayi (Gén. 30:13; 1 Sam. 2:1-10; Mal. 3:12). Joseampi casaraskäna ukhajja, Jesusan nasiñapkamajj janiw chacha warmjam ikthapipkänti. Jupanakatakejja, munañapampi apayasiñat sipansa, Diosan amtap phoqañaw nayrankäna (Mat. 1:25). Jesusajj kunanaktï lurkäna, kuntï siskäna “taqe ukanakwa [Mariajj] chuymapar imjjäsïna” (Luc. 2:51). Jehová Diosajj Mesías toqet kunanaktï siskäna ukanak sum amuyarakïna. Jiwasajja, kunjamatsa Mariat yateqassna uk lupʼiñasawa, ukatsti Diosan amtap phoqañatakiw chʼamachasiñasa.

12. 1) ¿Kunansa Jesusajj Awkipjamaraki? 2) ¿Kunjamsa Jesusat yateqassna? (Página 18 ukankir foto uñjjattʼäta).

¹² Jichhajj Jesusat parltʼarakiñäni. Jupajj espíritu santompiw irpayasïna, jupjam Dios chuyma jaqejj janiw utjkiti. Jakañ vidapansa, Diosan arunakap yatiykasasa, Awkipat yateqasiñatakiw wal chʼamachasïna. Jesusajja, amuyupansa, luratanakapansa, Diosan munañaparjama mayitanakaparjamaw sarnaqäna (Juan 8:29; 14:9; 15:10). Amuytʼañataki, Jehová Diosajj kunjam Diosäkitï ukjja Isaías profetajj akham sänwa: “Juparakiw taqe llakinakapatjja qhespiyi. [...] Khuyapayasiñap layku, munasiñap laykurakiw jupajj qhespiyi, jupaw wayti, amparat katuraki” sasa (Is. 63:9). Marcosasti Jesusat niya uka pachpwa sarakïna (Marcos 6:34 liytʼañataki). Yanaptʼa munapki ukanakarojja, ¿Jesusat yateqasisati munasiñampi yanaptʼasktanjja? ¿Diosan Reinopat yatiyañatakisa yatichañatakis chʼamachasisktanti? (Luc. 4:43). Jiwasatï, ukham luraskstanjja, espíritu santompi irpayasiskataswa uñachtʼaytanjja.

13, 14. 1) ¿Cristot yateqasis Dios chuymäñataki chʼamachasipki uka jilat kullakanakat kunsa yateqassna? 2) Mä experienciampi qhanañchtʼma.

¹³ Jichhürunakanjja, waljaniw Cristot yateqasiñatak chʼamachasipjje. Espíritu santompi irpayasir uka jilat kullakanakajja, taqe chuymaw Diosan arunakap yatiyapjje, ukhamarakiw wajjtʼasiri, khuyapayasiri ukham suma jaqëpjje. Jupanakajj jiwasjam pantjasir jaqëpjjarakiwa, ukhampachasa suma jaqëñatakiw chʼamachasipjje. Brasil markankir Rachel kullakajj akham siwa: “Jichhak uñstir isinakampi isisiñaw nayrajj wal gustitäna. Ukatwa, jan sum isiskayätti. Ukampis Diosan arunakap yatjjasajja, cristianjam isisiñaj wakisitapwa amuyayäta. Ukham lurañajj chʼamakïnwa, ukampis wali kusisitäjjayätwa, mä amtampiw jakasjjarakiyäta” sasa.

¹⁴ Filipinas markankir Reylene kullakajj yaqha jan walinwa uñjasirakïna. Jupajj Jehová  Diosan Testigopäkchïnsa, universidadan estudiaña, mä suma trabajonïñaw jupatakejj nayrankäna. Jupajj akham siwa: “Diosar serviñajja nayatakejj janiw nayrankjjänti. Ukampis suma trabajonïkchiyätsa, janiw kusisitäkayätti, kunas faltkitaspa ukhamänwa. Ukatwa Jehová Diosar serviñ nayrar uchjjayäta” sasa. Reylene kullakajja, Jehová Diosajj kuntï Mateo 6:33, 34 texton siski ukarojj taqe chuymaw confiyjje. Jupajj akham siwa: “Jehová Diosaw uñjaskitani, janipuniw jaytkitaniti” sasa. Inas congregacionasankir jilat kullakanakajj ukham chʼamachasipjjarakchi. Cristot yateqasiñataki chʼamachasir uñjasajja, jupanakat yateqasiñwa munaraktanjja (1 Cor. 11:1; 2 Tes. 3:7).

15, 16. 1) ¿Kunsa Cristot yateqasiñatak lurañasa? 2) ¿Jesusjam amuyunïñatakejj kunsa lurañasa?

¹⁵ ¿Kunjamatsa Cristot yateqassna? 1 Corintios 2:16 textonjja “kunjamtï Cristojj amuyki uka pachpa amuyunï[ñatakiw]” chʼamañchistu. Romanos 15:5 textonjja, “kunjamtï Cristo Jesusajj amuykänjja ukham” amuyunïñatakiw chʼamañcharakistu. Ukhamasti Cristot yateqasiñatakejja, jupajj kunjam jaqënsa, kuns amuyäna, kunanaksa luräna ukanak yatiñasawa. Jupatakejj Diosamp sum apasiñaw nayrankäna. Jesusat yateqasiñänejja, jukʼampiw Jehová Diosar jakʼachasiñäni. Ukatwa kunjamtï Cristojj amuyki ukham amuyunïñajj wali wakiskirejja.

¹⁶ ¿Kunas Jesusjam amuyunïñatak yanaptʼistaspa? Jesusan discipulonakapajja, milagronak luriri, discursonak arstʼiri, kunayman jaqenakampi sum apasiri, Diosan arunakaparjam sarnaqer uñjapjjäna. Ukatwa akham sapjjäna: “Taqe kunanaktï jupajj [...] lurkäna ukanakjja, nanakajj uñjapjjtwa” sasa (Hech. 10:39). Jiwasajj janiw Jesusar uñjksnati. Ukampis Jesusajj kunjam jaqënsa uk yatiñasatakejja, Mateo, Marcos, Lucas, Juan libronakaruw Jehová Diosajj qellqayäna. Jiwasatï ukanak liytʼañäni, amuytʼarakiñäni ukhajja, kunjamsa Jesusajj amuyäna ukanakwa yateqañäni. Ukhamatwa “wali amuyumpi kayup arkap[jjam]”, “kunjamtï Cristojj amuyirïkäna ukham amuyunïñatak wakichasipjjarakim” siski uka ewjjtʼanakarjam phoqarakiñäni (1 Ped. 2:21; 4:1).

17. ¿Kunatsa Jesusjam amuyunïñajj yanaptʼistu?

¹⁷ ¿Kunatsa Jesusjam amuyunïñajj yanaptʼistu? Uk amuytʼañäni, suma alimentonak manqʼañajja, cuerposaruw chʼamañchi. Ukhamarakiw Criston amuyunakampi pʼeqesar phoqantañajj Dios chuymäñatak chʼamañchistu. Jukʼat jukʼatwa kunsa Jesusajj luraspa, kunsa jan lurkarakispa ukanak amuytʼañäni. Ukarakiw suma amtanakar puriñatakisa, Diosatakjam sarnaqañatakisa yanaptʼistani. Cheqas “Jesucristot yateqasis sarnaqapjjam” siski uka ewjjtʼarjam sarnaqañataki chʼamachasiñajj wali wakiskiripuniwa (Rom. 13:14).

18. Espíritu santompi irpayasiñ toqetjja, ¿kunsa aka yatichäwin yatjjataniwaytanjja?

¹⁸ Aka yatichäwinjja, espíritu santompi irpayasir jaqejj kunjamasa, espíritu santompi irpayasir jaqenakan sarnaqäwipat kunsa yateqassna, ukatsti, “kunjamtï Cristojj amuyki” ukham amuyunïñajj kunjamsa Dios chuyma jaqëñatak yanaptʼistu, ukanakwa yateqaniwaytanjja. Ukampis yateqañatakejj jukʼampiw utjaskaki. Ukatwa jutïr yatichäwin aka jisktʼanakar qhanañchaskañäni: ¿Kunjamatsa espíritu santompi irpayasisktan janicha uk yatsna? ¿Kunsa jukʼamp Dios chuymäñatakejj lursna? ¿Espíritu santompi irpayasiñajj kunjamsa sapür yanaptʼistaspa?