1, 2. a) ¿Mbaʼépa ohupyty heta ermáno ijespirituál rupi? b) ¿Mbaʼe porandúpa ñahesaʼỹijóta ko artíkulope?

PETEĨ ermána Canadagua heʼi: “Añehaʼã rupi cheespirituál ahechakuaa avyʼaveha ha avei ambohovái porãveha umi provléma oñepresentáva”. Ótro ermáno Brasilgua heʼi: “Che ha che rembireko ojapóma 23 áño roiko hague vyʼápe oñondive pórke roñehaʼã oreespirituál”. Ha peteĩ ermáno Filipinasgua heʼi oñehaʼã rupi ijespirituál oikoha pyʼaguapýpe ha ojogueraha porãha diferénte kláse de ermánondi.

² Jahechaháicha, heta mbaʼe porã ohupyty umi persóna ijespirituálva. ¿Mbaʼépa ikatu jajapo ñande jerovia imbarete hag̃ua ha jahupyty hag̃ua umi mbaʼe porã oúva upévagui? Ñepyrũrã tekotevẽ ñantende mbaʼépa heʼi la Biblia umi persóna ijespirituálvare. Umi persóna ijespirituálva opensa Jehová opensaháicha ha oheja haʼe ogia chupekuéra ijespíritu rupive. Ko artíkulope ñambohováita mbohapy porandu: 1) ¿Mbaʼépa heʼise peteĩ persóna ijespiritualha? 2) ¿Máva ehémplopa ikatu ñanepytyvõ ñandeespiritualve hag̃ua? Ha 3) ¿mbaʼérepa jaʼekuaa ñañehaʼãmbaitérõ “ñapensa Cristo opensaháicha” ñanepytyvõtaha ñandeespiritualve hag̃ua?

3. ¿Mbaʼépa heʼi la Biblia pe persóna oikóvare Ñandejára espíritu poguýpe ha pe oñemeʼẽvare hete rembipotápe?

³ Apóstol Pablo ñanepytyvõ ñantende hag̃ua mbaʼépepa idiferénte “pe kuimbaʼe oikóva Ñandejára espíritu poguýpe”, ha “pe kuimbaʼe oñemeʼẽva hete rembipotápe” (elee 1 Corintios 2:14-16). Pe persóna “oñemeʼẽva hete rembipotápe, ndorresivíri umi mbaʼe oúva Ñandejára espíritugui, umíva vyrorei chupe g̃uarã, ha haʼe ndaikatúi ontende umi mbaʼe”. Péro pe persóna ijespirituálva “ohesaʼỹijo opa mbaʼe” ha opensa “Cristo opensaháicha”. Pablo ñanemokyreʼỹ ñandeespirituál hag̃ua. ¿Mbaʼépepa idiferénte avei pe persóna ijespirituálva ha pe nahániriva?

4, 5. ¿Mbaʼépa ojapo umi persóna oñemeʼẽva hete rembipotápe?

⁴ ¿Mbaʼéichapa opensa pe persóna oñemeʼẽva hete rembipotápe? Peichagua persóna ningo opensa ijehénte, ojapoháicha heta hénte ko múndope. Apóstol Pablo oñeʼẽvo umi ijehénte opensávare, heʼi voi chupekuéra oafektaha “pe espíritu omomýiva umi hénte naiñeʼẽrendúivape ha iñasãiva yvytúicha opárupi” (Efes. 2:2). La majoría umi persóna opensáva péicha ojapónte avei umi mbaʼe ohecháva ojejapo. Noñehaʼãi voi oiko Ñandejára oipotaháicha, síno ojapo umi mbaʼe chupekuéra ogustávante. Normálmente umi persóna oñemeʼẽva hete rembipotápe ojepyʼapyve iposisiónre, iplátare ha oĩ voi dispuésto oñorairõvo ideréchore.

⁵ Umi persóna nopensáiva Jehová opensaháicha ojapo “yvypóra rembipota vai” (Gál. 5:19-21). Pablo oskrivírõ guare pe primera kárta umi Corintoguápe omombeʼu mbaʼépa ojapo umi persóna oñemeʼẽva hete rembipotápe. Haʼe heʼi umichagua oñentremeteha provléma ahénope, oporomoingovai, omboliga ótrope idesovediénte hag̃ua, oñodemanda, ndorrespetái umi orekóvape autorida ha iñimportanteterei chupekuéra g̃uarã pe tembiʼu ha vevída. Umichagua persóna noñehaʼãi voi omboyke umi tentasión ha ojapónte umi mbaʼe noĩporãiva (Prov. 7:21, 22). Judas heʼi oĩha umi oñemeʼẽtereíva hete rembipotápe ha upéva káusare ndorekói “Ñandejára espíritu” (Jud. 18, 19).

6. ¿Mbaʼépa ojapo umi persóna ijespirituálva?

⁶ Pe persóna ijespirituálva idiferentete umi oñemeʼẽvagui hete rembipotápe. Pe persóna ijespirituálva oñehaʼã meme oĩ porã Jehovándi, oheja ijespíritu sánto ogia chupe ha osegi iñehémplo (Efes. 5:1). Peichagua persóna oñehaʼã opensa Jehová opensaháicha ha ohecha entéro mbaʼe Jehová ohechaháicha. Haʼe ndodudái Ñandejára ohechapaiteha opa mbaʼe, ha opaite mbaʼépe oreko enkuénta Ñandejára omandáva (Sal. 119:33; 143:10). Oñehaʼã avei ohechauka hekovépe umi mbaʼe porã oúva “Ñandejára espíritugui” ha ndojapói “yvypóra rembipota vai” (Gál. 5:22, 23). Ñantende porã hag̃ua mbaʼépa heʼise ñandeespiritualha, ñamoĩmíta peteĩ ehémplo. Peteĩ persóna ombaʼapoitereívare ningo ojeʼe itravahadorha, péicha avei peteĩ persóna omombaʼetereívare umi mbaʼe oúva Ñandejáragui, ojeʼe ijespiritualha.

7. ¿Mbaʼépa heʼi la Biblia umi persóna ijespirituálvare?

⁷ Jesús heʼi vaʼekue ovyʼaha umi persóna ijespirituálva. Mateo 5:3-pe heʼi: “Ovyʼa umi ohechakuaáva oikotevẽha Ñandejárare, pórke imbaʼekuéra hína pe Rréino yvagapegua”. Romanos 8:6 ohechauka avei mbaʼérepa iñimportánte ñapensa Jehová opensaháicha. Upépe heʼi: “Ñapensa meméramo ñande rete rembipotáre, ñamanóta. Péro ñapensa  meméramo espíritu sánto oguerohorývare, jaikovéta ha ñaiméta pyʼaguapýpe Ñandejára ndive”. Ñañehaʼãramo jajapo opaite mbaʼe Jehová oipotaháicha, ñaime porãta hendive, ñandepyʼaguapýta koʼág̃ama voi ha ikatúta jaikove opa árare.

8. ¿Mbaʼérepa ikatu ijetuʼu ñandéve jasegi hag̃ua ñapensa Jehová opensaháicha?

⁸ Ko múndope ningo heta hénte nopensái Ñandejára opensaháicha, ha umíva ikatu hína ñandegueraha vai. Upévare jajapo vaʼerã tekotevẽva guive jajeprotehe hag̃ua. Nañapensavéirõ Jehová opensaháicha, ko múndo katuete omyenyhẽta ñane akã umi mbaʼe vai ñande retépe ostirávagui, ha ñapensáta umi hénte opensaháicha. ¿Mbaʼépa ikatu jajapo ani hag̃ua jaʼa upe ñuhãme? ¿Mbaʼéichapa ikatu ñandeespiritualve?

9. a) ¿Mbaʼépa ñanepytyvõta ñandeespiritualve hag̃ua? b) ¿Máva ehémplopa ñahesaʼỹijóta ko artíkulope?

⁹ Umi mitã ningo oaprende heta mbaʼe ituakuéragui ha osegi iñehémplo. Upéicha avei ñande ikatu ñaaprende heta mbaʼe ñamaña ha ñahaʼangávo umi persóna ifiélvape. Péro ikatu avei ñaaprende mbaʼépa ndovaléi jajapo ñamañávo umi persóna oñemeʼẽvare hete rembipotápe (1 Cor. 3:1-4). La Bíbliape ningo jatopa umi ehémplo iporãva ha ivaíva. Ko artíkulope jahecháta mbohapy ehémplo iporãva ha mbaʼépa ikatu ñaaprende chuguikuéra. Ñahesaʼỹijóta Jacob, María ha Jesús ehémplo.

10. ¿Mbaʼéichapa Jacob ohechauka ijespiritualha?

¹⁰ Jahechamína ñepyrũrã Jacob ehémplo. Ñandéicha avei haʼe ohasa vaʼekue heta mbaʼe ijetuʼúva. Por ehémplo, iñermáno Esaú ojukase vaʼekue chupe. Isuégro katu heta vése ombotavy chupe ha ojaprovechase vaʼekue hese. Péro Jacob ojerovia pe promésa Jehová ojapo vaʼekuére Abrahánpe, ha upéva omombarete chupe. Oikuaa Ñandejára oipurutaha ifamiliarépe okumpli hag̃ua umi ipromésa porãita, upévare haʼe oñangareko  porã hesekuéra (Gén. 28:10-15). Jacob ndohejái umi hénte oikóva hete rembipota rapykuéri ombyesarái chupe Jehová promésagui. Por ehémplo, Esaú ojukasérõ guare chupe, Jacob ojerure asy Jehovápe osalvamínte hag̃ua chupe. Haʼe oñemboʼe Jehovápe ha heʼi: “Nde ningo ere kuri chéve: ‘Che rovendesíta ha hetaitereíta umi ne familiare. Ha hetaitereítagui umi ne familiare avave ndaikatumoʼãi okontapa, ndaiporiháicha avei ikatúva okontapa umi yvykuʼi oĩva mar rembeʼýpe’” (Gén. 32:6-12). Jacob ojeroviaiterei vaʼekue Jehová promesakuérare, ha ohechauka upéva oikove aja entéro.

11. ¿Mbaʼéichapa jaikuaa María ijespirituál hague?

¹¹ Koʼág̃a jahechami María káso. Jehová oiporavo chupe oiko hag̃ua chugui Jesús sy pórke haʼe ijespirituál. Eleemína María heʼi vaʼekue ohórõ guare ovisita ihentekuérape, haʼéva Zacarías ha Elisabet (elee Lucas 1:46-55). Umi mbaʼe heʼívare jahechakuaa haʼe ohayhuetereiha Ñandejára Ñeʼẽ ha oikuaa porãha pe Escrituras Hebreas (Gén. 30:13; 1 Sam. 2:1-10; Mal. 3:12). Avei haʼe ha José omendámarõ jepe, ohaʼãrõ Jesús onase raẽ oreko hag̃ua hikuái rrelasión sexuál. Pe asignasión orresivíva Jehovágui iñimportanteve umi deséo sexuál orekóvagui hikuái (Mat. 1:25). María ojesareko avei la oikóvare Jesús okakuaa aja, ojapysaka porã umi mbaʼe Jesús omboʼévare ha “oñongatu porã ipyʼapýpe opa koʼã mbaʼe” (Luc. 2:51). Jahechaháicha, haʼe oñeinteresaiterei vaʼekue umi promésa Ñandejára ojapo vaʼekuére pe Mesíasre. ¿Ikatúpa ñande jasegi María ehémplo ha ñañehaʼã meme jajapo Ñandejára oipotáva?

12. a) ¿Mbaʼéichapa Jesús ohaʼanga vaʼekue itúape? b) ¿Mbaʼéichapa ñande ikatu jasegi Jesús ehémplo? (Ehecha pe taʼanga oĩva iñepyrũme).

¹² Jesús ningo pe persóna ijespiritualvéva oiko vaʼekue ko yvy ape ári. Umi mbaʼe haʼe ojapo vaʼekue oikórõ guare yvyporakuéra apytépe, ohechauka osegiha itúa ehémplo. Jesús siémpre opensa ha ojapo opa mbaʼe Jehová oipotaháicha, ha okumpli itúa mandamiénto (Juan 8:29; 14:9; 15:10). Por ehémplo, jahechamína mbaʼéichapa Isaías oexplika Jehová ñandeporiahuverekoha, ha ñakomparami upéva Marcos heʼívare Jesúsre (elee Isaías 63:9 ha Marcos 6:34). Ha ñande, ¿ñahaʼangápa Jesúspe ha jahechauka meme japoroporiahuverekoha umi oikotevẽvape ajúda? ¿Ñañehaʼãmbaitépa japredika ha ñamboʼe ñande rapichápe umi marandu porã Jesús ojapo haguéicha? (Luc. 4:43). Umi persóna opensáva Jehová opensaháicha, oiporiahuvereko hapichakuérape ha oñehaʼã oipytyvõ chupekuéra.

13, 14. a) ¿Mbaʼépa ikatu ñaaprende umi ermáno ha ermána ijespirituálvagui? b) Emoĩ peteĩ ehémplo.

¹³ Ñane tiémpope avei heta ermáno ha ermána ijespirituálva oñehaʼã osegi Jesús ehémplo. Katuete oiméne rehechakuaa koʼãichagua ermáno ikyreʼỹha predikasiónpe, oporoporiahuvereko, opororresivi porãha hógape ha ojapo hetave mbaʼe porã. Iñimperféktoramo jepe hikuái, oñehaʼã ojapo entéro mbaʼe Jehová oipotaháicha. Por ehémplo, Rachel, peteĩ ermána oikóva Brasílpe, heʼi: “Che ningo añemonde vaʼekue a la móda. Upéicha rupi, heta vése naideséntei la che ao. Péro astudia rire la Biblia ahechakuaa añehaʼã vaʼerãha oiko hag̃ua chehegui peteĩ persóna ijespirituálva. Ijetuʼu kuri chéve akambia hag̃ua, péro añeñandu porãve ajapóvo upéva ha avyʼaiterei”.

¹⁴ Peteĩ ermána Filipinasgua hérava Reylene katu oreko vaʼekue ótro provléma. Haʼe ningo Testígoma voi kuri  oñepyrũrõ guare omotenondeve ijestúdio fakultápe ha itraváho. Upe tiémpope Jehová servísio ndahaʼéi vaʼekue la iñimportantevéva chupe g̃uarã. Péro upe rire Reylene heʼi: “Ahechakuaa sapyʼa ofaltaha chéve peteĩ mbaʼe iñimportantevéva che traváhogui”. Reylene okambia la opensa lája ha upe guive omotenondeve Jehová servísio. Koʼág̃a haʼe ojerovia Jehová promésa oĩvare Mateo 6:33 ha 34-pe, ha heʼi: “Aikuaa porã Jehová oñangarekotaha cherehe”. Katuete oiméne oĩ umi ermáno ne kongregasiongua ojapo vaʼekue avei Reylene ojapo haguéicha. Jahecha jave mbaʼéichapa umi ermáno osegi Jesús ehémplo, ñanemokyreʼỹ jajapo hag̃ua avei upéva (1 Cor. 11:1; 2 Tes. 3:7).

15, 16. a) ¿Mbaʼépa jajapo vaʼerã jajoguave hag̃ua Crístope? b) ¿Mbaʼépa ñanepytyvõta ñapensa hag̃ua Jesús opensaháicha?

¹⁵ ¿Mbaʼéichapa ikatu ñahaʼanga Crístope? 1 Corintios 2:16 ohechauka tekotevẽha “ñapensa Cristo opensaháicha”. Romanos 15:5 ñanemokyreʼỹ avei jajapo hag̃ua upéva. Jasegiséramo Cristo ehémplo, tekotevẽ jaikuaa mbaʼéichapa haʼe opensa, oñeñandu ha ojapo entéro mbaʼe. Jesúspe g̃uarã iñimportanteve vaʼekue iñamista Jehovándi opa mbaʼégui. Ñande ñañehaʼãramo ñahaʼanga Jesúspe, jajoguavéta avei Jehovápe. Upévare ñañehaʼã vaʼerã ñapensa Jesús opensaháicha.

¹⁶ ¿Mbaʼépa ñanepytyvõta upearã? Jesús disipulokuéra ojesareko porã kuri umi milágro haʼe ojapóvare, ohendu mbaʼéichapa haʼe omboʼe umi héntepe, ohecha mbaʼéichapa otrata opaichagua persónape ha ohechakuaa hikuái Jesús ojapoha Jehová oipotáva. Haʼekuéra heʼi: “Ore roikuaauka opa mbaʼe haʼe ojapo vaʼekue” (Hech. 10:39). Ñande koʼág̃a ndaikatúi jahecha Jesúspe. Péro jareko umi rreláto oñeʼẽva hese, umíva ñanepytyvõ jaikuaa porã hag̃ua chupe. Jalee ha jajepyʼamongeta jave umi mbaʼe jatopávare lívro de Mateo, Marcos, Lucas ha Juánpe ikatu ñaaprende Jesús opensa lája. Umi mbaʼe ñanepytyvõta jaguata hag̃ua “hekoitépe ipyporére” ha ñapensa hag̃ua “Cristo opensa haguéicha” (1 Ped. 2:21; 4:1).

17. ¿Mbaʼérepa ideprovécho ñapensa Cristo opensaháicha?

¹⁷ ¿Mbaʼérepa ikatu jaʼe ideprovechotaha ñandéve ñapensáramo Cristo opensaháicha? Ñantende hag̃ua upéva ñamoĩmi peteĩ ehémplo: Ñande ningo tekotevẽ jakaru porã ñanembarete hag̃ua, péicha avei ñañehaʼãmbaitérõ ñapensa Cristo opensaháicha, ñanembaretevéta espirituálmente. Mbeguekatúpe jaikuaáta jahávo mbaʼépa haʼe ojapóne káda situasiónpe. Upéicha jadesidíta Ñandejára oipotaháicha ha ñanekonsiénsia potĩta. Jahechaháicha, iñimportanteterei “ñahaʼanga ñande Ruvicha Jesucrístope” (Rom. 13:14).

18. ¿Mbaʼépa ñaaprende ko artíkulope?

¹⁸ Ko artíkulo ñanepytyvõ ñantende hag̃ua mbaʼépa heʼise peteĩ persóna ijespiritualha. Jahecha kuri avei umi persóna ijespirituálva ehémplo ha mbaʼépa ikatu ñaaprende chuguikuéra. Ñaaprende avei tekotevẽha “ñapensa Cristo opensaháicha” jajoguave hag̃ua jahávo Jehovápe ha ñañemoag̃uive hag̃ua hese. Péro oĩ umi mbaʼe tekotevẽva gueteri ñahesaʼỹijo. Por ehémplo, ¿mbaʼéichapa ikatu japilla imbaretépa hína ñande espiritualida? ¿Mbaʼépa ikatu jajapo ñandeespiritualve hag̃ua, ha mbaʼéichapa upéva ñanepytyvõta? Pe artíkulo oúvape jahecháta koʼã mbaʼe.