1, 2. (a) Dirava ena lauma ese ia hakaua taudia be dahaka namo idia davaria? (b) Inai stadi ai edena henanadai toi do ita haerelaia?

CANADA ai ia noho taihu ta ia gwau: “Dirava ena lauma ese lau ia hakaua dainai lau moale, bona unai ese lau ia durua dina ta ta ai lau davaria hahetoho lau hanaia totona.” Brazil ai ia noho tadikaka ta ia gwau: “Emai headava laganidia 23 ai moalelaia, badina Dirava ena lauma ese ai ia hakaua.” Bona Philippines ai ia noho tadikaka ta ia gwau: “Dirava ena lauma ese lau ia hakaua dainai, lalomaino lau abia, bona mauri dala idauidau tadikaka taihu lau kara namo henidia diba.”

² Ataiai idia noho hereva ese idia hahedinaraia, bema Dirava ena lauma ese ita ia hakaua, iseda mauri be do ia namo. Unai dainai sibona ita nanadaia, ‘Dahaka lau karaia diba, unai amo Dirava ena lauma ese lau ia hakaua diba, bena ataiai idia noho hahenamo do lau moalelaia?’ Unai ita do haerelaia lasi neganai, Baibel be Dirava ena lauma ese ia hakaua taudia ia herevalaia dalana ita diba be namo. Inai stadi ai ita ese inai henanadai toi do ita haerelaia: (1) Dirava ena lauma ese ta ia hakaua ena anina be dahaka?  (2) Dahaka ese ita do ia durua lo Keristani taudia ai ita lao totona? (3) Bema “Keriso ena lalohadai” ita abia, unai ese edena bamona ita do ia durua?

3. Baibel ese sibona ena ura ese ia hakaua tauna bona Dirava ena lauma ese ia hakaua tauna edia idau be edena bamona ia gwauraia?

³ Aposetolo Paulo be “Dirava ena lauma ese ia hakaua tauna” bona “sibona ena ura ese ia hakaua tauna” edia idau ia hahedinaraia. (1 Korinto 2:14-16 duahia.) Edia idau be dahaka? “Sibona ena ura ese ia hakaua tauna be Dirava ena lauma amo idia mai gaudia ia abia lasi, badina ia dekenai unai be kavakava, bona unai gaudia do ia diba lasi.” To, “Dirava ena lauma ese ia hakaua tauna be gau ibounai ia tahua namonamo,” bona “Keriso ena lalohadai” ia abia. Paulo ese ia hahedinaraia Dirava ena lauma ese ita ia hakaua be namo. Sibona ena ura ese ia hakaua tauna bona Dirava ena lauma ese ia hakaua tauna be edena dala ma haida ai idia idau?

4, 5. Sibona ena ura ese ia hakaua tauna ena kara ma haida be dahaka?

⁴ Sibona ena ura ese ia hakaua tauna ena kara mani ita laloa. Tanobada taudia be nega momo sibodia edia ura idia tahua. Paulo ia gwau unai “lalohadai be hari kamonai lasi taudia edia lalona dekenai ia gaukara.” (Efe. 2:2) Oibe, unai lalohadai ese taunimanima momo ia hakaua kerere dainai, idia momo be ma haida edia lalohadai idia abia dae sibona. Unai dainai momo be sibodia edia lalohadai idia badinaia bona Dirava ena taravatu idia laloa bada lasi. Sibona ena ura ia laloa bada tauna dekenai ena dagi, moni, o kohu be mai anina bada.

⁵ Sibona ena ura ese ia hakaua tauna ena kara ma haida be dahaka? Ia be nega ibounai “tauanina ena kara dikadia” ia karaia. (Gal. 5:19-21) Paulo ese Korinto kongrigeisen dekenai ia siaia revareva ginigunana lalonai, sibodia edia ura ese ia hakaua taudia edia kara ma haida ia herevalaia. Unai be: orea idia hapararaia, ma ta ena kara idia durua, badu idia dogoatao, kota dekenai ta ta idia abia lao, kwara dagi idia matauraia lasi, aniani bona inuinu gaudia idia laloa bada. Danu, sibona ena ura ia laloa bada tauna be hahetoho negadiai ia moru haraga. (Aon. 7:21, 22) Iuda bukana ese ia hahedinaraia unai bamona kara idia karaia noho taudia be “Dirava ena lauma helaga idia abia lasi.”​—⁠Iuda 18, 19.

6. Edena bamona ita diba ta be Dirava ena lauma ese ia hakaua?

⁶ “Dirava ena lauma ese ia hakaua tauna” ena kara be edena bamona? “Dirava ena lauma ese ia hakaua tauna” be Dirava ia laloa bada, ia be sibona ena ura ese ia hakaua tauna bamona lasi. Unai bamona taudia be idia hekwarahi “Dirava [idia] tohotohoa” totona. (Efe. 5:1) Anina be gau ta idia do karaia lasi neganai, Iehova ena lalohadai idia tahua guna, bona unai hegeregerena idia kara. Idia dekenai Dirava be ia noho momokani. Bona edia kara ibounai lalonai Iehova ena taravatu idia badinaia, to sibona ena ura idia tahua taudia be unai bamona lasi. (Sal. 119:33; 143:10) Danu, tauanina ena kara dikadia idia dadaraia, bona idia hekwarahi “lauma helaga ena huahua” idia hahedinaraia totona. (Gal. 5:22, 23) “Dirava ena lauma ese ia hakaua tauna” ena kara ita diba namonamo totona, mani inai ita laloa: Bisinesi karadia ia diba namonamo tauna be idia gwauraia bisinesi tauna. Unai hegeregerena, tomadiho karadia ia laloa bada tauna be idia gwauraia Dirava ena lauma ese ia hakaua tauna.

7. Baibel ese edena dala ai Dirava ena lauma ese ia hakaua taudia ia gwauraia?

⁷ Baibel be Dirava ena lauma ese ia hakaua taudia ia hanamoa. Mataio 5:3 ia gwau: “Dirava dibaia totona idia hitolo taudia be idia moale, badina guba Basileia be idia edia.” Bona Roma 8:6 ia gwau: “Tauanina ena ura  gaudia laloa karana ese mase ia mailaia, to lauma helaga ena gaudia laloa karana ese mauri bona maino ia mailaia.” Oibe, Dirava tomadiho henia karadia ita laloa bada neganai, Dirava ena maino do ita abia hari bona vaira nega ai mauri hanaihanai danu.

8. Dirava ena lauma ese ita ia hakaua totona, dahaka ita karaia be namo?

⁸ Ita be tanobada dikana dekenai ita noho. Taunimanima momo be tauanina gaudia sibona idia laloa bada dainai, namona be ita hekwarahi Dirava ena lauma ese ita ia hakaua totona. Bema ta be Dirava ena lauma ese ia hakaua lasi, tanobada ena “hodahoda” dikana o lalohadai do ia badinaia matamaia. Unai ia vara lasi totona, dahaka ita karaia diba? Edena dala ai lo Keristani tauna ai ita lao diba?

9. (a) Edena dala ai lo Keristani taudia ai ita lao diba? (b) Daidia edia haheitalai namona do ita herevalaia?

⁹ Natu ta be lo tauna ai ia lao diba, bema ena tama sina edia haheitalai namodia ia itaia bona badinaia. Unai hegeregerena, ita be lo Keristani taudia ai ita lao diba, bema abidadama goada taudia edia haheitalai ita itaia bona badinaia. To, tauanina ena ura sibona idia laloa taudia edia haheitalai amo diba ita abia danu. (1 Kor. 3:1-4) Baibel lalonai haheitalai namodia bona dikadia idia noho. To ita ibounai ita ura lo Keristani taudia ai ita lao, unai dainai haheitalai namona idia hahedinaraia taudia haida edia sivarai mani ita laloa. Idia be Iakobo, Maria, bona Iesu.

10. Edena dala ai Iakobo ia hahedinaraia iena hetura karana Dirava ida ia laloa bada?

¹⁰ Mani Iakobo ena haheitalai ita laloa guna. Iakobo ena mauri be hari iseda mauri bamona, ia auka. Iena tadina, Esau, be tauanina gaudia ia laloa bada dainai, ia ura ia ia alaia mase. Bona iena ravana tauna ena koikoi karadia ia haheaukalaia danu. Ena be tauanina gaudia idia laloa bada taudia huanai ia noho, to Iakobo be Dirava ia badinaia. Iakobo be Dirava ese Aberahamo dekenai ia  karaia gwauhamatana ia abidadama henia, unai dainai iena ruma bese ia gimaia. (Gen. 28:10-15) Iakobo ese ena hereva bona kara amo ia hahedinaraia ia be Dirava ena taravatu bona ura ia laloa bada. Hegeregere, Iakobo be Esau dekenai ia gari neganai, Dirava dekenai ia gwau: “Oi dekenai lau noinoi inai, . . . Oiemu gwauhamata mani oi laloa, oi gwau, ‘Momokani, lau ese do lau hanamoa oi, bona oiemu natuna bona tubuna momo herea oi dekenai do lau henia, kone miri bamona, duahia diba lasi.’” (Gen. 32:6-12) Oibe, Iakobo ese Iehova ena gwauhamata ia bona ena sene taudia dekenai ia abidadama henia, bona ia ura Dirava ena ura hegeregerena ia kara.

11. Dahaka ese ia hahedinaraia Maria be Dirava ena lauma ese ia hakaua?

¹¹ Maria ena haheitalai namona mani ita laloa. Dahaka dainai Iehova ese Maria ia abia hidi Iesu ena sinana ai ia lao totona? Badina ia be Dirava ena lauma ese ia hakaua. Edena bamona unai ita diba? Iena varavara Sekaraia bona Elisabeta ia vadivadi henidia neganai, ia gwauraia hanamoa herevadia ese unai idia hamomokania. (Luka 1:46-55 duahia.) Maria ena hereva amo ita diba ia be Dirava ena Hereva ia ura henia bada bona Heberu Toretoredia ia diba namonamo. (Gen. 30:13; 1 Sam. 2:1-10; Mal. 3:12) Danu, ena be ia bona Iosepa be idia headava vadaeni, to idia mahuta hebou lasi ela bona Iesu ia vara. Unai ese dahaka ia hahedinaraia? Ia hahedinaraia idia be Iehova ena ura idia laloa bada, to sibodia edia ura lasi. (Mat. 1:25) Nega ia hanaia lalonai, Maria be Iesu ena mauri lalonai idia vara gaudia ia laloa bona ia gwauraia aonega herevadia ia kamonai namonamo. Danu, ia ese “unai hereva ibounai be ena kudouna dekenai ia atoa.” (Luka 2:51) Unai amo ia hahedinaraia ia be Dirava ese ia gwauhamatalaia Mesiana ia laloa bada. Maria hegeregerena, iseda mauri ai Dirava ena ura ita atoa guna, a?

12. (a) Iesu ese edena dala ai ena Tamana ia tohotohoa? (b) Edena dala ai Iesu ena haheitalai ita tohotohoa diba? (Laulau ginigunana herevalaia.)

¹² Tanobada dekenai idia noho taudia ibounai amo, daika be Dirava ena dala ia badinaia namonamo? Unai be Iesu. Iena mauri bona haroro gaukara ai, ia hahedinaraia ia ura ena Tamana, Iehova, ia tohotohoa. Iena laloa, hemami, bona kara be Iehova ena bamona, bona ena mauri ai Dirava ena ura bona taravatu ia badinaia. (Ioa. 8:29; 14:9; 15:10) Hegeregere, peroveta tauna Isaia ese Iehova ena hebogahisi ia herevalaia dalana bona Evanelia torea tauna Mareko ese Iesu ena hemami ia herevalaia dalana mani oi hahegeregerea. (Isaia 63:9; Mareko 6:34 duahia.) Iesu bamona, nega ibounai ita noho hegaegae heduru idia ura taudia ita durua totona, a? Ma danu, Iesu ese sivarai namona harorolaia bona hadibaia gaukarana ia goadalaia. (Luka 4:43) Oibe, unai be Dirava ena laloa dalana ia badinaia tauna ena kara.

13, 14. (a) Hari Dirava ena lauma ese ia hakaua taudia amo dahaka ita dibaia? (b) Haheitalai ta gwauraia.

¹³ Baibel negadia sibona lasi, to hari danu tadikaka taihu momo be Dirava ena lauma ese ia hakaua bona idia gaukara goada Keriso ena kara idia tohotohoa totona. Reana oi itaia idia be haroro gaukara idia goadalaia, idia heabidae, bona hebogahisi o kara namodia ma haida idia hahedinaraia. Ena be idia be goevadae lasi ita bamona, to idia hekwarahi unai kara namodia idia hahedinaraia totona. Brazil ai ia noho taihu ta ia gwau: “Lau ura bada tanobada taudia edia dabua sitaelo lau tohotohoa. Unai dainai hemataurai dabuadia lau hahedokilaia lasi. To hereva momokani lau dibaia murinai, Dirava ena  laloa hegeregerena lau laloa matamaia. Gau haida lau haidaua be auka, to unai lau karaia dainai hari egu mauri lau moalelaia.”

¹⁴ Philippines taihu ta ladana, Reylene, ena hekwakwanai be idau. Ia ura bada sikuli badana dekenai ia lao bona moni gaukara namona ia abia, unai amo ena mauri ia moalelaia diba. Ia gwau: “Dirava hesiai henia karana dekenai lau atoa tahua gaudia be lau laloa maragi matamaia. To gabeai lau laloparara, egu mauri ai mai anina bada gauna ta lau reaia, bona unai ese egu moni gaukara ia hereaia. Unai dainai, egu laloa dalana lau haidaua bona Iehova lau hesiai henia matamaia.” Unai nega amo Reylene be Iehova ena gwauhamata Mataio 6:33, 34 dekenai ia abidadama henia. Ia gwau: “Lau diba momokani Iehova ese lau do ia naria!” Reana emu kongrigeisen ai, unai bamona idia karaia tadikaka taihu haida oi diba. Unai abidadama taudia be Keriso idia tohotoho bona ita ura idia ita tohotohoa danu.​—⁠1 Kor. 11:1; 2 Tes. 3:7.

15, 16. (a) Keriso ita tohotohoa totona, dahaka ita karaia be namo? (b) Edena dala ai “Keriso ena lalohadai” do ita abia?

¹⁵ Edena dala ai ita ta ta ese Keriso ita tohotohoa diba? Korinto Iharuana 2:16 ese ita ia hagoadaia “Keriso ena lalohadai” ita abia totona. Bona Roma 15:5 ia gwau “Keriso Iesu ena laloa dalana” ita abia be namo. Unai dainai Keriso ita tohotohoa totona, namona be iena lalohadai, hemami, bona kara ita diba namonamo. Bena ena aena gabudia ai ita raka. Iesu ese ena hetura karana Dirava ida ia laloa bada. Unai dainai ia ita tohotohoa neganai, ita be Iehova ita tohotohoa. Unai badina idauidau dainai, Iesu ena laloa dalana hegeregerena ita laloa be mai anina bada.

¹⁶ Edena bamona unai do ita karaia? Iesu ena hahediba taudia be ia karaia hoa karadia idia itaia, iena haroro herevana idia kamonai, taunimanima idauidau ia kara henia dalana bona Dirava ena hakaua herevadia ia badinaia dalana idia itaia. Idia gwau: “Ia karaia gaudia ibounai ai itaia.” (Kara 10:39) Ita be Iesu ita itaia lasi. To, Iehova ese ita dekenai Evanelia bukadia ia henia dainai, Iesu ita dibaia namonamo diba. Baibel bukadia hegeregere Mataio, Mareko, Luka, bona Ioane ita duahia bona laloa dobu neganai, Keriso ena lalohadai do ita abia. Ita be Keriso ena “aena gabudia ai do [ita] raka namonamo” bona “ena laloa dalana hegeregerena do [ita] laloa.”​—⁠1 Pet. 2:21; 4:1.

17. Keriso ena lalohadai ita abia ena namo be dahaka?

¹⁷ Keriso ena lalohadai ita abia ena namo be dahaka? Aniani namodia ese iseda tauanina ia hagoadaia hegeregerena, bema nega ibounai Keriso ena laloa dalana ita abia, iseda hetura karana Dirava ida be do ia goada. Bona Keriso be hekwakwanai negadiai do ia karaia gauna be metairametaira do ita dibaia. Bena Dirava ese ia moalelaia abia hidi ita karaia diba bona iseda lalomamina do ia goeva. Unai badina namona dainai, ita ura “Lohiabada Iesu Keriso ena kara do [ita] tohotohoa,” ani?​—⁠Roma 13:14.

18. Inai stadi amo dahaka oi dibaia?

¹⁸ Inai stadi ai Dirava ena laloa hegeregerena ita laloa ena anina ita dibaia. Bona Dirava ena lauma ese ia hakaua taudia haida edia haheitalai namodia amo diba ita abia. Danu, “Keriso ena lalohadai” abia karana ese ita ia durua Dirava ena laloa hegeregerena ita laloa totona. To, ita karaia gaudia ma haida ita dibaia danu be namo. Hegeregere, edena bamona do ita diba ita be Dirava ena laloa hegeregerena ita laloa? Bona dahaka gaudia ma haida ita karaia diba? Bona unai ese edena dala ai iseda mauri ia durua diba? Stadi gabena ese unai henanadai do ia haerelaidia.