1, 2. (a) Ovandu ovengi ve noumune uṋe ohunga nokukara noupanga ouwa kuna Jehova? (b) Omapuriro yeṋe omananḓengu ohunga noupanga wetu kuna Jehova ngu matu katara ko nai?

OMUKAZENDU omukambure moKanada wa tja: “Okurira omundu ngu noupanga ouwa kuna Jehova ku ndji pa ondjoroka, nu kwe ndji vatera kutja mbi kare nonḓoneno momauzeu ngu mbi muna.” Omurumendu omukambure moBrazil wa tja: “Otjiṋa tji tje tu vatera okukara nouṋingandu morukupo rwetu rwozombura 23, omena rokutja twa kondja okukara noumune wa Jehova ohunga noviṋa.” Omurumendu omukambure moPhilippines wa tja: “Okurira omundu ngu noupanga ouwa kuna Jehova, kwe ndji vatera kutja mbi kare nohange momuinyo, nu kwe ndji vatera kutja mbi ungure nawa ku novakambure ovakwetu mba za mozombazu pekepeke.”

² Oukahu kutja tu muna ouwa momiano omingi, indu tji tu noupanga ouwa kuna Jehova. Nu mape ya aku tu hingi okupura kutja, ‘Me sokutjita vi kutja mbi kurise oupanga wandje kuna Jehova, nu mbi yorokere ozondaya nḓa tamunwa kombanda mba?’ Posi yokutja, ngunda atu hiya zira epuriro ndi, matu sokuzuva nawa kutja Ombeibela i tja vi ohunga nomundu ngu noupanga ouwa kuna Jehova, ngu hongorerwa i  ombepo ya Mukuru ondjapuke nu ngu noumune wa Jehova ohunga noviṋa. Morupa ndwi matu kazira omapuriro 3 omananḓengu nga: (1) Okurira omundu ngu noupanga ouwa kuna Jehova ku heya tjike? (2) Ovihorera viṋe mbi mavi tu vatere okukurisa oupanga wetu kuna Jehova? (3) Ozongondjero nḓu matu tjiti kutja tu kare “nOmbepo ya Kristus,” maze tu vatere vi okukara noupanga ouwa kuna Jehova?

3. Ombeibela i kahurura vi ombangu ndji ri pokati komundu ngu hi noupanga ouwa kuna Jehova, na ingwi ngu noupanga ouwa kuna ye?

³ Omuapostele Paulus we tu vatera okumuna ombangu ndji ri pokati ‘komundu ngu nOmbepo,’ poo ngu noupanga ouwa kuna Jehova, na ingwi “ngu hina Ombepo,” poo ngu hina oupanga ouwa kuna Jehova. (Lesa 1 Ovakorinte 2:14-16.) Nu hapo pe nombangu yaye? “Omundu ngwi ngu hi nOmbepo,” wa kahururwa otjomundu ngu ha yakura “oviyandjewa, mbi za kOmbepo Ondjapuke ya Ndjambi. Ku ye ovyo oviporoporo. Eye wina ke nokuvizuva nawa.” Nungwari “omundu ngu nOmbepo u sora okusosonona oviṋa avihe,” neye u “nOmbepo ya Kristus.” Paulus u tu tunduuza kutja tu rire ovandu mbe noupanga ouwa kuna Jehova. Ovandu mbe noupanga ouwa kuna Jehova, na imba mbe hi noupanga ouwa kuna ye, va panguka vi momiano vyarwe?

4, 5. Omundu ngu hi noupanga ouwa kuna Jehova u raisa ovikaṋena viṋe?

⁴ Hapo omundu ngu hi noupanga ouwa kuna Jehova u ripurira ku ye? Eye u horera kongaro youye, yokuripurira kozonḓero ze omuini. Paulus wa kahurura ongaro ndji, otja “ombepo nambano ndji ungura movandu mbe hi nonḓuviro ku Ndjambi.” (Ef. 2:2) Ombepo ndji i ṱuna kovandu ovengi, nu i tjita kutja ve horere kotjingi tjovandu. Otjingi tjawo ve tjita mbi mave munu kutja ovisemba ku wo, nokuhina okuripurira komirari vya Mukuru. Omundu ngu ripurira koviṋa vyongaro youndu, potuingi u yandja ombango tjinene koviṋa tjimuna otjihako tje, ovimariva, nousemba we. Nu imbi ombi rira oviṋa ovisemba tjinene ku ye kombanda yoviṋa vyarwe.

⁵ Ovikwaye vyarwe ku ku tjiukirwa omundu ngu hina oupanga ouwa kuna Jehova? Omundu otja ingo u tjita oviṋa mOmbeibela mbi vi isanewa “oviungura vyongaro youndu.” (Gal. 5:19-21) Orutuu rwa Paulus orutenga ndwa tjanga kombongo yOvakorinte, ru tamuna ovikaṋena vya imba mbe raisa ongaro youndu. Ovyo vi kamburira mo okutoorora omunda tji pe nozondjakaha, okueta ohaṋi, okutunduuza varwe okupirukira ouvara, okutwarasana kotjombanguriro, okuhina ondengero kouvara, nokutjita kutja ovikurya nomanuwa vi rire oviṋa ovinanḓengu tjinene mehupo rawo. Ovandu mbe ripurira koviṋa vyongaro youndu tji va wirwa i omarorero, kave kara nomasa wokupirukira omarorero ngo. (Omiano 7:21, 22) Judas wa hungira ohunga na imba mbu mave kongorere ozonḓero zawo zourunde, nga tji ve hi “nOmbepo ya Ndjambi,” poo oupanga ouwa kuna ye rukwao.—Judas 18, 19.

6. Omundu ngu noupanga ouwa kuna Jehova u raisa ovikaṋena viṋe?

⁶ Nu hapo okurira “omundu ngu nOmbepo,” poo oupanga ouwa kuna Jehova ku heya tjike? Omundu ngu nombepo, keri tjimuna omundu ngu ripurira koviṋa vyongaro youndu, nungwari u rikendera koupanga we kuna Mukuru. Eye u ‘kondja okuhorera ku Ndjambi.’ (Ef. 5:1) Ihi matji hee kutja eye u kondja okutjiwa omuano Jehova mbwe ripura, nokumuna oviṋa otja Jehova tje vi muna. Mukuru u rira omundu wakatjiri ku ye. Eye keri tjimuna omundu ngu hina oupanga ouwa kuna Jehova. Nungwari u kondja okuyenenisa omirari vya Jehova mehupo re. (Eps. 119:33; 143:10) Moruveze rokuyandja ombango koviungura vyoundu, omundu ngu noupanga ouwa kuna Jehova u kondja okuraisa “ovihape vyOmbepo.”—Gal. 5:22, 23.

7. Ombeibela i tja vi ohunga novandu mbe noumune wa Jehova ohunga noviṋa?

⁷ Ombeibela i hungira oviṋa oviwa ohunga novandu mbe noumune wa Jehova ohunga noviṋa.  Mateus 5:3 ri tja: “Ovaṋingandu imba mbe ritjiwa kutja owo ovasyona mombepo,” poo mbe ritjiwa kutja ve hepa Mukuru, “ouhona womayuru tjinga au ri owawo!” Ovaroma 8:6 ri raisa ouwa mbu za mokukara noumune wa Jehova ohunga noviṋa. Oro ri tja: “Ozonḓero zongaro yomundu ze eta onḓiro; nozonḓero zOmbepo ze eta omuinyo nohange.” Indu tji matu yandja ombango koviṋa mbi tjama noupanga wetu kuna Mukuru, tu kara nohange kuna Mukuru nu tu kara nohange momuinyo. Nu moruyaveze matu kamuna omuinyo waaruhe.

8. Ongwaye tji pe hepa ozongondjero kutja tu kare noupanga ouwa kuna Mukuru?

⁸ Tu hupa mouye ounaumba. Nu mena rokutja twa koverwa i ovandu mbe hi nouripura wa Mukuru, ku hepa ozongondjero zatjiri kutja tu kurise oupanga wetu kuna Jehova nokuutjevera. Indu tji tu hina okukondja okuripura otja Jehova tje ripura, matu utu okuhara omeripura wovandu mouye. Matu yenene okutjita vi kutja tu nakaure omeripura nga? Matu yenene vi okukurisa oupanga wetu kuna Mukuru?

9. (a) Ovikwaye mbi mavi tu vatere okukurisa oupanga wetu kuna Jehova? (b) Matu katara kovihorera viṋe vyovandu mba ri noupanga ouwa kuna Mukuru?

⁹ Tjimuna omuatje tje hepa okurihongera kovanene ve nokuhorera kovihorera vyawo oviwa, eṱe wina tu hepa okuhorera ku imba mbe noupanga ouwa kuna Jehova. Ihi matji tu hongo omuano wokuhara oumune wa Jehova ohunga noviṋa. Posi yokutja, tji matu munu ongaro youndu ovandu tjiva ndji ve raisa, matu rihongo oviṋa mbi tu ha sere okutjita. (1 Kor. 3:1-4) MOmbeibela mu novihorera oviwa na imbi ovivi. Mena rokutja tu vanga okukurisa oupanga wetu kuna Mukuru, ngatu katare kovihorera oviwa tjiva vyovandu ku matu yenene okuhorera ko. Matu katara kovihorera vya Jakob, Maria na Jesus.

10. Jakob wa raisa vi kutja eye omundu ngu noupanga ouwa kuna Jehova?

¹⁰ Rutenga ngatu tare kotjihorera tja Jakob. Jakob kanaa wa ri nehupo epupu, tjimuna otjingi tjetu ndino. Erumbi re Esau aa vanga okumuzepa.  Ihe yomukazendu wa Jakob wa kondja povikando ovingi okumutjita ovineya. Posi yokutja, nandarire kutja Jakob wa kovererwe i ovandu mbe ha ri noupanga ouwa kuna Jehova, eye wa ri noupanga ouwa kuna Jehova. Ongamburiro ya Jakob momakwizikiro Jehova nga tjita ku Abraham ya ri nomasa. Jakob wa tjevera eṱunḓu re nawa, orondu aa tjiwa kutja eṱunḓu re ri norupa momayenenisiro womakwizikiro omawa ngo. (Gen. 28:10-15) Jakob wa raisa momambo na movitjitwa vye, kutja omirari nombango ya Mukuru ombya ri oviṋa ovinanḓengu tjinene ku ye. Okutara kotjihorera, indu tja kunwa emuma i Esau, Jakob wa tja nai ku Mukuru: “Arikana, ndji yama . . . Ove we ndji raera no tja: ‘Ami me ku tjitire ouwa, tjiri, nu me takavarisa ozondekurona zoye pu pe ṱeki eheke meṋe yomuronga.’” (Gen. 32:6-12) Eye wa ri nongamburiro momakwizikiro Jehova nga tjita ku ye na kooihe mukururume, nu aa vanga okutjita oviṋa mbi mavi hitasana nombango nondando ya Mukuru.

11. Otjikwaye tji matji raisa kutja Maria wa ri omundu ngu noupanga ouwa kuna Jehova?

¹¹ Nambano ngatu tare kotjihorera tja Maria. Ongwaye Jehova tja toorora Maria okurira ina ya Jesus? Omena rokutja eye wa ri omundu ngwa ri noumune wa Jehova ohunga noviṋa. Matu tjiwa vi? Matu munu momambo we omawa wondangero nga hungira, indu tja karyangera ovazamumwe ve Sakarias na Elisabet. (Lesa Lukas 1:46-55.) Kunao, oukahu kutja Maria wa suverere Embo ra Mukuru, nu aa tjiwa Omatjangwa wOtjiheberi nawa. (Gen. 30:13; 1 Sam. 2:1-10; Mal. 3:12) Wina yandja ombango kokutja, nandarire indu Maria na Josef tji va kupasana, va undja ngandu Jesus tja kwatwa, amaave hakaene monyama. Ihi matji raisa tjike? Matji raisa kutja otjiungura tji va pewa i Mukuru tja ri otjinanḓengu tjinene ku wo, kombanda yozonḓero zawo. (Mat. 1:25) Wina Maria aa tarere oviṋa avihe mbyaavi kayenda po, otja Jesus tjee kuru, nu wa yandja ombango komambo wa Jesus wounongo ngaa hungire. Neye wina “wa ṱakamisa oviṋa avihe mbi momutima we.” (Luk. 2:51) Eye tjiri wa ri nonḓero momakwizikiro wa Mukuru ohunga na Messias. Hapo otjihorera tja Maria hi, katji nokutuhinga kutja tu horere ku ye, nokutjita imbi Mukuru mbye vanga kutja tu tjite?

12. (a) Omomuano uṋe Jesus ma horera ku Ihe? (b) Eṱe matu yenene vi okuhorera ku Jesus? (Tara kotjiperendero pomautiro worupa ndwi.)

¹² Movandu avehe mba hupire, Jesus ootjihorera otjisembasemba tjomundu ngwa ri noupanga ouwa kuna Jehova. Mehupo re, na motjiungura tje tjokuzuvarisa, eye wa raisa kutja aa vanga okuhorera ku Ihe, Jehova. Jesus wa ri noumune wa Jehova nu ee ripura nokuungura oviṋa otja Jehova. Eye aa tjiti ombango ya Mukuru, nu wa yandja ondengero komirari vye. (Joh. 8:29; 14:9; 15:10) Otjotjihorera, sasaneka omuano Jesaja mbwa kahurura otjari tja Jehova, ku nomuano Markus ma kahurura otjari tja Jesus. (Lesa Jesaja 63:9; Markus 6:34.) Hapo tu horera ku Jesus ngwe rirongerere okuraisa otjari, indu tji twa hakaene novandu mbu mave hepa okuraisirwa otjari? Hapo eṱe tu yandja ombango kotjiungura tjokuhonga nokuzuvarisa ombuze ombwa, tjimuna Jesus tjaa tjiti? (Luk. 4:43) Ongaro novitjitwa avihe mbi, oviraisiro vyomundu ngu noupanga ouwa kuna Jehova.

13, 14. (a) Matu yenene okurihongera tjike kovandu mbe noumune wa Jehova ohunga noviṋa ndino? (b) Yandja otjihorera.

¹³ Ndino, tu novakambure ovakwetu mbe noumune wa Jehova ohunga noviṋa, nu mbe kondja okuhorera ku Kristus. Ngahino wa rora okumuna omuano mbu ve ungura oukukutu motjiungura tjokuzuvarisa, omuano mbu ve sekirisa varwe, nomuano mbu ve raisa otjari, poo ovikaṋena vyarwe oviwa. Owo nangarire kutja kavandu ohomonena, ve kondja nomasa okukara novikaṋena oviwa mbi, nokutjita imbi Jehova mbye vanga kutja ve tjite. Omukazendu omukambure moBrazil wena Rachel, wa tja: “Ami mba suverere omizaro vyouye wakandino. Kunao, hee rihwikike momuano omuhirona. Posi yokutja tji mbe rihonga ouatjiri, kwa tjita kutja mbi tjite omarundurukiro ngaaye heperwa po, kutja mbi rire omundu ngu noupanga  ouwa kuna Jehova. Kakwa ri oupupu kwami okutjita omarundurukiro nga, posi yokutja mba hara ondjoroka, nu e hara omuhunga omusemba mehupo.”

¹⁴ Omukazendu omukambure ngwa za koPhilippines wena Reylene, wa ri nouzeu warwe. Nandarire kutja wa ri mouatjiri, eye ee ripurire komahongero wokombanda noviungura oviwa. Eye wa tja: “Ozondando nḓu mba ri na zo motjiungura tja Jehova za uta okuyaruka ombunda. Posi yokutja mba uta okumuna kutja pa ri otjiṋa tjimwe mehupo randje tji tji hari nawa. Otjo tja ri otjiṋa otjinanḓengu poviungura vyandje. Kunao, mba uta okuyandja ombango kokukarera Jehova.” Nai Reylene u nongamburiro momakwizikiro wa Jehova nge ri mu Mateus 6:33, 34. Neye wa tja: “Ami tjiri me tjiwa kutja Jehova me ndji vatere!” Mape ya mu novakambure mombongo yeṋu mbe raisa otjihorera otjiwa otja ihi. Otja tji matu munu omuhingo mu ve horera ku Kristus, eṱe wina matu vanga okuhorera kotjihorera tjawo tjongamburiro.—1 Kor. 11:1; 2 Tes. 3:7.

15, 16. (a) Tji matu vanga okuhorera ku Kristus, matu sokutjita vi? (b) Matu yenene vi okukara “nOmbepo ya Kristus”?

¹⁵ Hapo matu yenene vi okuhorera ku Kristus? Etjangwa 1 Ovakorinte 2:16, ri hungira ohunga nokukara “nOmbepo ya Kristus.” Nu etjangwa rOvaroma 15:5, ri tja ngatu “karasane nomutima umwe wokuhorera ku Kristus Jesus.” Kunao, kutja tu kare otja Kristus matu hepa okutjiwa omuano eye mbwe ripura nomuano mbwe tjita oviṋa. Okuzambo matu sokuyata mozondambo ze. Jesus ee ripurire koupanga we kuna Mukuru. Tji matu horere ku Jesus, ku tjita kutja tu tumbuke popezu na Jehova. Kunao ounahepero okurihonga okuripura tjimuna Jesus tje ripura.

¹⁶ Hapo matu yenene vi okutjita nao? Ovahongewa va Jesus va muna ovihimise eye mbya tjita, va puratena komuano mbwaa hongo ovandu, va muna omuano mbwaa tjindi ovandu avehe, nu wina va muna omuano maa raisa oumune wa Jehova ohunga noviṋa. Nowo va tja: “Eṱe oweṱe mbu tu ri ovahongonone voviṋa avihe Eye mbya tjita.” (Oviung. 10:39) Otjiperi kutja ndino katu yenene okumuna Jesus. Posi yokutja Jehova we tu pa Omaevangeli nge hungira ohunga na ye, nge tjita kutja tu mu tjiwe nawa. Indu tji matu lese nokuripurira ko oukoto komambo wOmbeibela tjimuna Mateus, Markus, Lukas na Johanes, tu rihonga omuano Kristus mbwe ripura. Ihi tji tu vatera ‘okuyata mozondambo ze’ nu ‘eṱe wina otjinga atwa sokuripandiparisa oveni mouripura’ tjimuna Kristus.—1 Petr. 2:21; 4:1.

17. Okuripura tjimuna Kristus ku tu vatera vi?

¹⁷ Matu munu ouwa waye indu tji matu ripura tjimuna Kristus? Tjimuna ovikurya oviveruke tji vi tjita kutja orutu rwetu ru kare nomasa, okukara noumune wa Kristus wina ku tjita kutja tu kare noupanga womasa kuna Jehova. Nu kouṱiṱiṱiṱi, tu uta okutjiwa kutja Kristus atja tjita vi mongaro ngamwa aihe. Nu ihi tji tu vatera okutoora omikambo omisemba, mbi mavi yorokisa omutima wa Mukuru, nokutupa omeritjiviro omawa womomutima. Ko nokuitavera kutja indi epu esemba ndi mari sokutuhinga ‘okukara nongarero ombwa otja ovakongorere va Muhona Jesus’?—Rom. 13:14.

18. Ove we rihongo tjike ohunga nokurira omundu ngu noupanga ouwa kuna Jehova?

¹⁸ Orupa ndwi rwe tu vatere okuzuva nawa kutja ku heya tjike okurira omundu ngu noupanga ouwa kuna Jehova. Nu wina twa munu kutja matu yenene okurihongera kovihorera oviwa vyovandu mbe noupanga ouwa kuna Jehova. Korusenina, twe rihongo kutja okukara “nOmbepo ya Kristus” ku tu vatera vi okuripura otja Jehova tje ripura nokukara noupanga ouwa kuna ye. Posi yokutja, pena oviṋa vyarwe ovingi mbi matu yenene okurihonga. Otjotjihorera, hapo matu yenene vi okutjiwa kutja oupanga wetu kuna Jehova u nomasa pu pe ṱa pi? Ovikeṋa vyarwe mbi matu sokutjita kutja tu kurise oupanga wetu kuna Jehova? Nu oupanga wetu kuna Jehova u ṱuna vi kehupo retu? Orupa ndu maru kongorere ko, maru ke tu vatera okuzira omapuriro nga.