1, 2. (a) Ngapi omu vantu wovanzi ava lizuvhu kuhamena kukura pampepo? (b) Mapuro musinke gomulyo natu ka zogera mosirongwa esi?

MUNAZINYETU gomukadi gomoKanada kwa tanta asi: “Kukura pampepo kwa retera nge ruhafo, ntani kwa vatera nge ni lididimikire yinka yankenye ezuva.” Munazinyetu gomugara gomoBrasilia kwa tanta asi: “Ose kwa kara noruhafo mononkwara detu ure wonomvhura 23, ano eyi kwa tu tompoka tupu morwa kukura pampepo.” Munazinyetu gomoPhilippines nage kwa tanta asi, “Kukura pampepo kwa vatera nge ni kare nombili zomomutjima nokuwapukurura monkedi omu ani tekura vanavazinyetu wokonontudiliro dokulisiga-siga.”

² Eyi va uyunga vanavazinyetu owo kulikida asi kukura pampepo kureta mauwa. Kuvhura tu lipure asi, ‘Ngapi nani twikira kukura pampepo yipo ni gwane mauwa aga vana tumbura?’ Mokugwana elimbururo, twa hepa kukwata egano eyi za uyunga ko Bibeli kuhamena muntu ga kura pampepo ndi ogu a demenene kweyi yopampepo. Mosirongwa esi tatu ka limburura mapuro gatatu gomulyo. (1) Yisinke ayi tanta kukura pampepo?  (2) Yihonena musinke ngayi tu vatera tu kure pampepo? (3) Ngapi kukara “nomatedo gaKristusa” nayi tu vatera tu kare vantu ava va kura pampepo?

3. Ngapi Bibeli za singonona elisigo lya kara pokatji komuntu ga kura pampepo nomuntu gopaunsitwe?

³ Mupositoli Paurusa kutuvatera tu kwate egano eyi ayi tanta kukura pampepo apa ga tumbwire malisigo ga kara pokatji ‘komuntu gopaunsitwe’ nomuntu ‘ga kura pampepo.’ (Resa 1 Vakolinte 2:14-16.) Malisigo musinke ga kara po? ‘Muntu gopaunsitwe’ kapi a tambura ‘yomompepo zaKarunga, yeeyi kwendi ayo ugova, age kapi ayi kwata egano.’ Ano ‘muntu ga kura pampepo’ “kuyereka nayinye” ntani “kwa kara nomatedo gaKristusa.” Mupositoli Paurusa kwa tu korangedere tu kure pampepo. Mononkedi musinke dimwe muntu ga kura pampepo ga lisiga nomuntu gopaunsitwe?

4, 5. Ngapi no dimburura muntu gopaunsitwe?

⁴ Nkareso musinke ga kara nazo muntu gopaunsitwe? Age kulikida nkareso zouzuni ou pokuligazara tupu mwene. Paurusa kwa singonona nkareso ozo asi “mpepo ezi zina kurugana ntaantani movantu ava ava dili kulimburukwa kwaKarunga.” (Efe. 2:2) Mpepo ezi kuninkisa wovanzi va kwame yovantu. Awo kudemenena tupu kweyi yopanyama. Ngoyitundwamo, awo kurugana tupu yeeyi vana hara mevango lyokukwama nompango daKarunga. Muntu gopaunsitwe ndi ogu a demenene kweyi yopanyama, kugazara asi kukara noyimaliwa yoyinzi nokudivikwa mulyo unene kupitakana nkenye eyi.

⁵ Ngapi no dimburura hena muntu gopaunsitwe? Age kurugana eyi va singonona moBibeli asi, “yirugana yorutu.” (Gar. 5:19-21) Mombilive zokuhova zaPaurusa ezi ga tjangerere mbungakriste zoVakolinte, age kwa tumbagwire eyi ava rugana vantu ava kara nonkareso zopaunsitwe. Awo kuretesa po maligaunuko nomadiro kulizuvha movantu, awo kwa hara kulitwara konompanguro, kapi ava fumadeke upangeli, ntani awo kutura nondya noyikunwa muhowo meparu lyawo. Ntani age kugwira momazedo nsene tava mu heteke. (Yis. 7:21, 22) Juda kwa tjenge kuhamena vantu owo asi nkareso zawo ngazi donapa kapi ngava kara ‘nompepo zaKarunga.’—Juda 18, 19.

6. Ngapi ga kara muntu ogu ga kura pampepo?

⁶ Nye yisinke ayi tanta ‘kukura pampepo’? Muntu ga kura pampepo kwa kara nosinka sokunkondopeka elikwatakano lyendi naJehova. Age hena ‘kuhetekera ko kukara moomu ga kara’ Karunga. (Efe. 5:2) Eyi kutanta asi age kuhetekera ko kutara yininke ngamoomu ayi tara Jehova. Age kwa pura nawa-nawa asi Karunga yipo ga kara. Ntani kwa fumadeka nompango daKarunga nokudilimburukwa nkenye ezuva. (Epis. 119:33; 143:10) Age kapi a rugana “yirugana yorutu,” nye age kuyima ‘yiyimwa yompepo.’ (Gar. 5:22, 23) Mokukwata egano eyi ayi tanta ‘kukura pampepo’ tarurura sifanekeso esi: Muntu ogu ga diva kugendesa nawa ngesefa kumutumbura asi munangesefa gomuwa. Mokulifana, muntu ogu a mono mulyo goyininke yopampepo kumutumbura asi muntu ga kura pampepo.

7. Mauwa musinke aga tundu mokukara muntu ga kura pampepo?

⁷ Jesus kwa tente asi vantu ava va kura pampepo kwa kara noruhafo. Mateusa 5:3 kwa tanta asi: “Vanerago vava va kara  nousigona womomutjima, yeeyi Untungi weguru wawo.” Bibeli kwa tumbura hena mauwa gamwe moVaroma 8:6 asi kudemenena ndi “kugongama yopasintu kureta nomfa. Ano kugongama yopaMpepo kureta mwenyo nombili.” Yipo nye, nsene tu demenena kweyi yopampepo ngatu kara nombili mokatji ketu ntani naKarunga. Ose hena ngatu kara nehuguvaro lyokukaparuka narunye.

8. Morwasinke ya karera udigu kukura pampepo?

⁸ Ose kwa tunga monkarapamwe zondona omu va tu kundurukida vantu ava ava dili kugazara ngamoomu a gazara Karunga. Eyi yiyo nye twa hepera kukondja mokupopera magazaro getu ntani tu kure hena pampepo. Nsene tu dira kukara nelikwatakano naJehova, uzuni ou ngau zwida magazaro getu noyininke yoyidona. Yisinke nayi tu vatera mokuyinyokera po oyo? Ngapi natu twikira kukura pampepo?

9. (a) Yisinke nayi tu vatera tu kure pampepo? (b) Yihonena musinke natu ka konakona?

⁹ Munona kulironga nonkedi donongwa kosihonena sosiwa sovakurona vendi. Mokulifana, nose kukura pampepo apa atu lirongere ko koyihonena yava va kere nelikwatakano lyewa naJehova. Ano yihonena yoyidona kuturonga eyi natu nyokera po. (1 Kol. 3:1-4) MoBibeli kwa kara mo yihonena yoyiwa neyi yoyidona. Nye mokumona asi sitambo setu kuna kara sokukura pampepo, tu tareni eyi natu lirongera ko koyihonena yoyiwa. Tatu ka konakona sihonena saJakopo naMariya ntani Jesus.

10. Ngapi ga yi likidire Jakopo asi age ga kura pampepo?

¹⁰ Pomuhowo, tu tareni sihonena saJakopo. Nage kwa ligwanekerere nomaudigu. Mukurwendi Esau kwa here kumudipaga. Ano tamweyi zendi kwa mu tekwire momudona. Nye age kapi ga pulisilire maudigu  ogo ga mu dompese. Age ga kere nepuro metumbwidiro eli Jehova ga pere Abirahamu. Jakopo ga pakerere mbili epata lyendi morwa ga yi divire asi etumbwidiro lina ngali ka sikilira mo kupitira moruvharo rwendi. (Gen. 28:10-15) Eyi nga rugana Jakopo kwa likidire asi age nga kwama nompango daKarunga. Pasihonena, apa ga kere nowoma morwa kutjira mukurwendi Esau, age kwa likwamberere kwaKarunga asi: “Na kanderere, popera nge . . . Nyamoge wa yi tanta asi: ‘Ngani ku ruganena uwa, ano ruvharo roge ngani ru ninka ru hure pomuheke gemefuta.’” (Gen. 32:6-12) Jakopo kwa kere nepuro lyokupama momatumbwidiro gaJehova ntani age kwa here kuparuka kuliza nonompango daJehova nositambo sendi.

11. Yisinke ayi likida asi Mariya kwa kere muntu ogu ga kulire pampepo?

¹¹ Tu tareni sihonena saMariya. Morwasinke Jehova ga mu horowerere a kare zinya Jesus? Morwa age kwa kere muntu ogu ga kulire pampepo. Ngapi twa yi diva oyo? Ayo kwa yi likida mononkango edi ga uyungire apa ga ka dingwire ekoro lyendi Sakaliya naElisabeta. (Resa Rukasa 1:46-55.) Eyi ga uyungire Mariya kulikida asi age kwa here unene Nonkango daKarunga ntani ga divire nawa Matjangwa goRuhebeli. (Gen. 30:13; 1 Sam. 2:1-10; Mara. 3:12) Koneka asi komeho Jesus va ya mu hampuruke, Mariya naJosefa kapi va ligwanekerere panyama. Yisinke ayi likida oyo? Ayo kulikida asi kusikisa mo sitambo saJehova kwa kere nomulyo kwawo kupitakana madowo gawo gopanyama. (Mat. 1:25) Ngomu siruwo sa pitire, Mariya nga nomene eyi nga rugana Jesus ntani nga purakene kweyi nga uyunga. Age hena nga ‘pungura nayinye oyo momutjima gwendi.’ (Ruk. 2:51) Age kwa demenene mokudiva omu sitambo saJehova sa likwatakana naMesiyasa. Ngano tu honene Mariya pokurugana nkenye apa eyi ana tu harere Karunga.

12. Ngapi omu Jesus ga honenene Oguhwe? (b) Ngapi natu honena Jesus? (Tara efano pepenuno 18.)

¹² Sihonena salye sosiwa po somuntu ogu ga kura unene pampepo? Age kuna kara Jesus. Apa ga ya kere pevhu age ga yi likidire asi kwa here kuhonena Oguhwe, Jehova. Age nga paruka kuliza nonompango doGuhwe. (Joh. 8:29; 14:9; 15:10) Pasihonena, koneka omu muporofete Jesaya ga singwenene nkenda zaJehova ntani hetakanesa eyi ga tjenge Marukusa kuhamena malizuvho gaJesus. (Resa Jesaya 63:9; Marukusa 6:34.) Nose kuhonena Jesus mokulikida nkenda nokuvatera ava vana hepa evatero ndi? Jesus hena kwa demenene kokuronga vantu nokuzuvhisa mbudi zongwa. (Ruk. 4:43) Vantu ava va kura pampepo kwa kara nonkenda ntani awo kuvatera wopeke.

13, 14. (a) Yisinke natu lirongera ko kwava va kura pampepo momazuva getu? (b) Gava yihonena.

¹³ Momazuva getu, vanavazinyetu wovanzi ava va kura pampepo kukondja mokuhonena Jesus. Ove nampo wa yi dimburura asi awo kulikida nkenda ntani kulihameka unene mokuzuvhisa nokutambura vagenda momambo gawo. Nawo kapi va sikilira mo, nye awo simpe kukondja va tunge po yikara yoyiwa yipo va hafese Jehova. Rachel munazinyetu gomoBrasilia kwa tanta asi: “Ame kwa here sili kukwama mode. Ngoyitundwamo, kapi ngani dwara yidwara yokuwapera. Nye apa na lirongere Bibeli, tani tameke kurundurura ndwareso zange yipo ni kure pampepo. Ayo kapi ya kere ureru, nye na ya hefe ntani na kere nositambo meparu.”

 ¹⁴ Munazinyetu gomukadi Reylene gomoPhilippines kwa ligwanekerere noudigu wapeke. Age kwa kondjerere elirongo lyokuzeruka nampili ngomu nga lirongo Bibeli. Age kwa tanta asi: “Tani ya tengura monyima pampepo. Yipo na ya dimbwilire asi kosili esi na zumbanesere meparu lyange esi sa kara nomulyo unene kupitakana yirugana yange. Makura tani tokora kulitura mo unene mokukarera Jehova.” Kutunda pena, Reylene kwa karera Jehova noulimburukwi nokuhuguvara metumbwidiro lyendi lya kara mwaMateusa 6:33, 34. Age kwa tanta asi: “Na yi diva nawa-nawa asi Jehova nga pakera nge mbili.” Nampo wa diva ko vamwe mombungakriste zeni ava ava likida yihonena yangesi. Ngano tu va honeneni ngomu vana kukwama sihonena saKristusa.—1 Kol. 11:1; 2 Tes. 3:7.

15, 16. (a) Yisinke twa hepa kurugana mokuhonena Kristusa? (b) Ngapi natu kara “nomatedo gaKristusa”?

¹⁵ Ngapi natu honena Jesus? Bibeli kutanta mo-1 Vakolinte 2:16 asi twa hepa kukara “nomatedo gaKristusa.” Ano Vafilipi 2:5 kutanta asi tu kare ‘nomagazaro gokufana ngwendi ga Jesus Kristusa.’ Mokukara ngwendi Kristusa twa hepa kulironga yipo tu dive omu nga gazara nomu nga lizuvhu ntani nonkareso zendi. Jesus kwa kere nosinka sosinene kuhamena elikwatakano lyendi naJehova kupitakana nkenye eyi. Yipo nye, mokuhonena Jesus ose ngoso kuna kuhonena Jehova. Eyi yiyo ya karera nomulyo tu lironge kugazara ngwendi Jesus.

¹⁶ Ngapi natu yi rugana oyo? Varongwa vaJesus va mwene yitetu eyi nga rugana nomu nga tekura vantu navenye ntani nomu nga sikisa mo nompango daKarunga. Awo kwa tente asi: “Ose nyose nombangi danayinye eyi nga rugana.” (Yirug. 10:39) Naina, ose kapi tatu vhuru kumona Jesus. Nye Jehova ga tu pa Mavangeli gane aga naga tu vatera tu dive nawa nkareso zaJesus. Nsene tu resa nokuteda ko kobuke zaMateusa naMarukusa naRukasa ntani Johanesa, ngatu diva matedo gaKristusa. Eyi ngayi tu vatera tu “rugane moomu nga rugana age” ntani ngatu ‘pama momagazaro’ gaKristusa.—1 Pet. 2:21; 4:1.

17. Mauwa musinke ngatu gwanena mo mokugazara ngwendi Kristusa?

¹⁷ Mauwa musinke ngatu gwanena mo mokugazara ngwendi Kristusa? Moomu tupu nondya donongwa adi pameke marutu getu, kugazadara ko komatedo gaKristusa kutupameka pampepo. Mwaza siruwo ngatu ya diva eyi ngano na rugana Kristusa moukaro wongadi. Eyi kutuvatera mokutura po matokoro aga aga hafesa Jehova nokutupa ezwi lyewa lyokomutjima. Yosili, edi kuna kara nokonda donongwa deyi ‘natu lidwarekera yaHompa Jesus Kristusa.’—Rom. 13:14.

18. Yisinke ono lirongere ko kosirongwa esi kuhamena kukura pampepo?

¹⁸ Sirongwa esi sina tu vatere tu kwate egano eyi ayi tanta kukura pampepo. Tuna lirongere ko koyihonena yoyiwa yovantu ava za pitisilire mpepo zokupongoka. Ntani tuna lirongo hena asi kukara “nomatedo gaKristusa” kutuvatera tu kare vantu va kura pampepo. Nampili ngoso, pwa kara hena yoyinzi eyi twa hepa kukonakona. Pasihonena, ngapi natu yi diva asi twa kura pampepo? Yisinke natu rugana tu twikire kukura pampepo? Ntani ngapi kukura pampepo nga ku kundama eparu lyetu? Mapuro ogo ngatu ka ga limburura mosirongwa sokukwama ko.