1, 2. (a) Momo ese lauma ḡaudia ilalodia bada karana be ede e laloa tomamu? (b) Ededia henanadai badadia baita herevalaimu?

CANADA ai, taihu ta na eto: “Lauma ḡaudia na lalo badamu dainai na moalemu, bona una ese e durugumu dina ta ta ai na davarimu hekwakwanaidia baina hanaidia totona.” Brazil ai, tadikaka ta na eto: “Laḡani 23 lalodiai emai headava maurina na a moalelaia, badina lauma ḡaudia a lalo badava.” Bona Philippines ai, tadikaka ta na eto: “Lauma ḡaudia ilalodia bada karana ese lalomaino e henigumu, bona e durugumu mauri dala idauidau taudia baina kara namo henidia.”

² Unu ekspiriens ese e hahedinaraimu lauma ḡaudia baita lalo badamu neganai, hahenamo momo baita davarimu. Una dainai, siboda baita henanadai, ‘Edena dala ai lauma ḡaudia baina lalo bada bona atai ai e herevalai hahenamodia baina moalelai?’ Una henanadai do asita haerelaia lalonai, namona na Baibul ese lauma ḡaudia e lalo badamu taudia e herevalaidia dalana baita lalopararalaia namonamo. Ina stadi ai, ita ese henanadai badadia toi baita haerelaimu. (1) Lauma ḡaudia baita lalodia bada anina be dahaka? (2) Ededia haheitalai ese bae duruda lauma dalana ai baita goada totona? (3) Edena dala ai “Keriso darana” baita abia karana ese baine duruda lauma ḡaudia baita lalodia bada totona?

3. Baibul ese tauani ḡaudia e lalo badamu tauna bona lauma ḡaudia e lalo badamu tauna edia idau be ede e herevalaia toma?

³ Aposetolo Paulo ese “tau-anina iabidadama-henina tauna” bona “lauma iabidadama-henina tauna” edia idau e herevalaia, unu amo lauma ḡaudia ilalodia bada karana baita lalopararalaia. (1 Korinto 2:14-16 ba duahi.) Edia idau be dahaka? “Tau-anina iabidadama-henina tauna” ese Dirava ena ‘lauma ḡaudia se abi daemu, badina be idia na kavakava ienai; lalona se pararamu.’ To, “lauma iabidadama-henina tauna” ese “ḡau iboudiai e dibamu” bona ia ese “Keriso darana” vada e abia. Paulo ese e hagoadadamu lauma ḡaudia baita lalodia bada totona. Ededia dala ma haida ai tauani ḡaudia e lalo badamu tauna bona lauma ḡaudia e lalo badamu tauna na idau?

4, 5. Tauani ḡaudia e lalo badamu tauna ena kara haida be dahaka?

⁴ Tauani ḡaudia e lalo badamu tauna ena kara aita laloa guna. Ia na tanobada ena lalohadai e badinaiamu bona sibona ena ura e tahumu. Paulo na eto, “laumana bunai gwau-edeede memerodia lalodia ai e ḡaukaramu.” (Efe. 2:2) Una lauma eiava tanobada ena lalohadai ese momo na e hakaudia kereremu. Idia na tauani ena ura mo e lalomu. Una dainai, idia momo na edia lalohadai heḡereḡerena abi hidi e karamu to Dirava ena taravatu na asie badinamu. Tauani ḡaudia e lalo badamu tauna na nega momo ena dagi, kohu bona moni, eiava e uramu baine kara ḡaudia mo e lalo badamu.

⁵ Tauani ḡaudia e lalo badamu tauna ena kara ma haida be dahaka? Unu kara haida na Baibul ese e gwauraidia “tau-anina ena kara.” (Gal. 5:19-21) Paulo ese ena revareva ginigunana ai Korinto kongrigeisen taudia e tore henidia neganai, tauani ḡaudia e lalo badamu taudia edia kara haida e gwaurai hedinarai. Unu kara haida bini: e heiri-heirimu, ma haida edia kaha ai e taomu, e gwau-edeedemu, ma haida kota ai e atodiamu, kwara dagina asie matauraiamu, aniani bona inuinu ḡaudia e lalo badamu. Danu, tauani ḡaudia e lalo badamu tauna na hedibaḡani negadiai se haheaukamu bona e kara dikamu. (Her. 7:21, 22) Iuda na eto, unu e kara tomamu taudia ese Dirava ena lauma helaḡa na asie abia.​—Iuda 18, 19.

6. Lauma ḡaudia e lalo badamu tauna ena kara be ede bamona?

⁶ To, lauma ḡaudia e lalo badamu tauna ena kara be ede bamona? Ia ese ena hetura karana Dirava ida na e laloa badamu, dia tauani ḡaudia e lalo badamu tauna heḡereḡerena. Lauma ḡaudia e lalo badamu tauna na e hekwarahimu “Dirava [baine] haḡoia” eiava tohotohoa totona. (Efe. 5:1) Anina na abi hidi ta do asie karaia neganai, Iehova ena lalohadai e tahua gunamu bena una heḡereḡerena abi hidi e karamu. Idia ese Dirava na e abia dae momokanimu. Bona e karamu ḡaudia iboudiai lalodiai Iehova ena taravatu e badinamu, tauani ḡaudia e lalo badamu tauna na dia unu heto. (Sal. 119:33; 143:10) Lauma ḡaudia e lalo badamu tauna ese tauani ena kara e dadaraimu, bona e ḡaukara goadamu “lauma huahuana” baine hahedinaraia. (Gal. 5:22, 23) Lauma ḡaudia ilalodia bada karana baita lalopararalaia namonamo totona, mani ina aita laloa: Bisnes ḡaukaradia ai mai ena diba tauna na e gwauraiamu bisnes e lalo badamu tauna. Una heḡereḡerena, tomadiho ḡaukaradia e ura henimu tauna na e gwauraiamu lauma ḡaudia e lalo badamu tauna.

7. Baibul ese lauma ḡaudia e lalo badamu taudia be ede e herevalaidia toma?

⁷ Baibul ese lauma ḡaudia e lalo badamu taudia edia namo e herevalaia. Mataio 5:3 (NWT) na e gwaumu: “E dibamu lauma ḡaudia bae tahu na namo taudia na e moalemu,  badina be guba basileiana na idia edia.” Roma 8:6 ese e hahedinaraia lauma ḡaudia baita lalo bada na mai ena namo, e gwaumu: “Tau-anina ilalona be mase; a lauma ilalona be mauri bona maino.” Lauma ḡaudia baita lalo badamu neganai, Dirava ena maino baita abiamu bona vaira negana ai mauri hanaihanai baita abiamu.

8. Dahaka dainai baita hekwarahi lauma dalanai baita goada totona?

⁸ To, ita na tanobada dikana ai, tauanina ena ura e lalo badamu taudia bogaraḡidiai ta nohomu dainai, namona na baita hekwarahi lauma dalanai baita goada bona baita henahua toho. Bema ta na lauma dalanai basine goadamu, tanobada ena kara bona lalohadai ese be hakaua kerere dibamu. Una basine vara totona dahaka ese baine duruda diba? Edena dala ai lauma dalanai baita goada diba?

9. (a) Dahaka ese baine duruda diba lo taudia ai baitala totona? (b) Lauma ḡaudia e lalo badamu taudia haida be daidia?

⁹ Natu ta na tamana sinana edia haheitalai namodia be itamu bona be tohotohomu neganai, lo tauna ai be lao dibamu. Una heḡereḡerena, lauma dalanai e goadamu taudia edia haheitalai baita haeromu bona baita tohotohomu neganai, lo taudia ai baita lao dibamu. To, tauani ḡaudia e lalo badamu taudia edia haheitalai amo danu diba baita abi diba. (1 Kor. 3:1-4) Baibul lalonai haheitalai namodia bona dikadia e herevalai. To, ita na ta uramu lo taudia ai baitala dainai, mani haheitalai namodia e hahedinarai taudia haida aita herevalaidia. Idia na Iakob, Maria, bona Iesu.

10. Edena dala ai Iakob ese e hahedinaraia ia na lauma ḡaudia e lalo badava?

¹⁰ Mani Iakob ena haheitalai aita laloa guna. Iakob ena mauri na auka, hari ita momo edai e varamu heḡereḡerena. Ia kakana Esau, tauani ḡaudia e lalo badava tauna, na e urava ia baine alaia. Danu, ravana tauna ese nega momo e koiava. Ena be Iakob na tauani ḡaudia e lalo badava taudia bogaraḡidiai e nohova, to ia ese lauma ḡaudia e lalo badava. Ia ese Dirava ena gwauhamata  Abraham enai na e abidadama henia bona ena ruma bese na e naria namonamova badina gabeai idia ese Iehova ena ura bae haḡuḡurua. (Gen. 28:10-15) Iakob na ena hereva bona kara amo e hahedinaraia Dirava ena taravatu bona ura na e lalodia bada. Heḡereḡere, Iakob na Esau ena kara dainai e gari neganai, Dirava e noia, eto: “Na noimumu . . . ba hamaurigu; . . . oi vada oto ‘Momokani, lau ese baina hanamomu, bona garamu baina hahutumadia kone mirina na heto.’” (Gen. 32:6-12) Ia ese Iehova ena gwauhamata ienai bona tubuna ediai na e abidadama henia bona e ura Dirava ena ura baine badinaia.

11. Dahaka ese e hahedinaraia Maria na lauma ḡaudia e lalo badava?

¹¹ Mani Maria ena haheitalai ma aita laloa. Dahaka dainai Iehova ese Maria e abia hidi Iesu sinana ai bainela? Badina ia ese lauma ḡaudia e lalo badava. Ede ta diba tomamu? Ia ese varavarana Sakaria bona Elisabeta e vadivadidia neganai, e gwaurai hahenamo herevadia amo e hahedinaraia ia ese lauma ḡaudia na e lalo badava. (Luka 1:46-55 ba duahi.) Maria ena hereva ese e hahedinaraia Dirava ena Hereva na e ura henia bada bona Heberu Revarevadia na mai dibana namonamo. (Gen. 30:13; 1 Sam. 2:1-10; Mal. 3:12) Danu, ena be ia bona Iosef na vada e headava, to asie mahuta hebou ela bona Iesu e vara. Una ese dahaka e hahedinaraiamu? E hahedinaraiamu idia ese Iehova ena ura na e laloa bada, to edia ura na asie laloa. (Mat. 1:25) Gabeai, Maria ese Iesu ena mauri ai e vara ḡaudia bona ena aonega herevadia na e lalodia bada. Danu, ia ese “ini hereva iboudiai e lalo tao.” (Luka 2:51) Ia ese Dirava ena ura Mesia enai na e laloa bada. Maria ena haheitalai ese e durudamu eda mauri lalonai Dirava ena ura baita laloa bada.

12. (a) Edena dala ai Iesu ese Tamana e tohotohoa? (b) Edena dala ai Iesu baita tohotohoa diba? (Rau 18 ai laulau ba itaia.)

¹² To, lauma ḡaudia ilalodia bada karana ai haheitalai hereadaena e hahedinaraia tauna be daika? Ia na Iesu. Ena mauri bona hesiai ḡaukara ibounai lalonai, e hahedinaraia ia na e urava Tamana, Iehova, baine tohotohoa. Ena lalohadai, hemami, bona kara na Iehova ena heḡereḡerena, bona Dirava ena ura bona taravatu e badinava. (Ioa. 8:29; 14:9; 15:10) Heḡereḡere, mani peroveta tauna Isaia ese Iehova ena hebogahisi karana e herevalaia dalana ba laloa, bona Evanelia bukana e torea tauna Mareko ese Iesu ena hemami e herevalaia dalana ida ba haheḡereḡerea. (Isaia 63:9; Mareko 6:34 ba duahi.) Iesu heḡereḡerena, heduru e uramu taudia baita davaridia neganai, ita be heḡaeḡae hebogahisi karana baita hahedinaraia totona, a? Danu, Iesu ese ena nega bada e ḡaukaralaia sivarai namona e harorolaia bona e hahedibalaia. (Luka 4:43) Lauma ḡaudia e lalo badamu tauna ena hemami bona kara na unu bamona.

13 14. (a) Hari ina negai lauma ḡaudia e lalo badamu taudia edia haheitalai amo dahaka ta dibamu? (b) Haheitalai ta ba gwauraia.

¹³ Hari ina negai danu lauma ḡaudia e lalo badamu taudia momo na e ḡaukara goadamu Keriso ena kara bae tohotohoa. Reana o itadiamu haroro ḡaukara e goadalaiamu, heabidae karadia e hahedinaraimu, e hebogahisimu, bona kara namodia ma haida e hahedinaraimu. Ena be idia na dia ḡoevadae to e hekwarahimu unu kara namodia bae hahedinarai totona. Brazil ai e nohomu taihuna ta, Rachel, na eto: “Tanobada ena sitaelo idauidau na ura heniva. Una dainai, dia hemataurai dabuadia na hahedokilaiva. To hereva momokani na diba neganai na hekwarahiva lauma ḡaudia baina lalodia bada totona. Ena be ḡau haida baina haidau na  auka, to na moale bona mauri korikorina na davaria.”

¹⁴ Philippines ai e nohomu taihuna, Reylene, ena hekwakwanai na ma idau. Ia na e urava sikuli badana ta bainela bona moni ḡaukara namona ta baine karaia. Ia na eto: “Taina ruana lauma ḡaudia na lalodia maraḡiva. To gabeai na laloparara lau ese mai anina bada ḡauna, egu moni ḡaukara e hereaia ḡauna, na asina laloa badava. Una dainai, egu lalohadai na haidaua bona Iehova ihesiai henina ḡaukarana na laloa bada.” Una nega amo, Reylene ese Iehova ena gwauhamata Mataio 6:33, 34 ai na e abidadama henia. Ia na eto: “Na diba momokanimu Iehova ese lau na be narigumu!” Reana emu kongrigeisen ai unu bamona taudia haida na mai dibamu. Idia ese Keriso e badinaiamu dainai baita tohotohodia na namo.​—1 Kor. 11:1; 2 Tes. 3:7.

15, 16. (a) Keriso baita tohotohoa totona, dahaka baita kara na namo? (b) Edena dala ai “Keriso darana” baita abia diba?

¹⁵ Edena dala ai Keriso baita tohotohoa diba? Korinto Ginigunana 2:16 ai “Keriso darana” baita abia karana e herevalaia. Bona Filipi 2:5 ese e hadibadamu ‘Keriso Iesu lalonai e miava darana ita laloda ai danu baine mia.’ Una dainai, Keriso baita tohotohoa totona, namona na ena lalohadai bona ena kara baita stadilai namonamo. Bena aena gabudia ai baita raka. Iesu ese ena hetura karana Dirava ida na e laloa badava. Una dainai Iesu baita tohotohoamu neganai, Iehova baita tohotohoa dibamu. Unu badi daidiai, Iesu ena lalohadai dalana baita diba na ḡau badana.

¹⁶ Edena dala ai unu baita kara toma? Iesu ena hahediba ese iena hoa karadia na e ita, ena hahediba herevadia e kamonai, taunimanima iboudiai e kara henidiava daladia e ita, bona hahekau herevadia e badinava daladia e haerodia. Idia na eto: “Ḡau idoidiai ia ese . . . e karava, ai danu dibamai.” (Kara 10:39) To, ita ese Iesu na basita itaia dibamu. To Iehova na mai lalokauna ida Evanelia bukadia amo Iesu ena kara sivaraidia e hadibadamu. Mataio, Mareko, Luka, bona Ioane bukadia baita duahimu bona baita haerodiamu neganai, Keriso darana eiava ena lalohadai baita abia dibamu. Unu amo Keriso “aena gabudia ai [baita] raka” namonamomu, bona eda “lalo-hadai na iena ida [baita] haheḡereḡere” dibamu.​—1 Pet. 2:21; 4:1.

17. Edena dala ai Keriso ena lalohadai baita abia karana ese baine duruda?

¹⁷ Edena dala ai Keriso ena lalohadai baita dibaia karana ese baine duruda? Aniani ese tauanida e hagoadaiamu heḡereḡerena, Keriso ena lalohadai baita abiamu neganai lauma dalanai baita goadamu. Hekwakwanai negadiai Keriso ese baine kara karadia na taina ruana baita dibamu. Una ese be durudamu baita karamu abi hididia daidiai laloda mamina be ḡoevamu bona Dirava ena lalonamo baita abiamu. Unu hahenamo daidiai “Lohiabada Iesu Keriso [baita] hadokilaia” eiava ena kara baita tohotohoa diba.​—Roma 13:14.

18. Ina stadi ai, lauma ḡaudia ilalodia bada karana amo dahaka ome diba?

¹⁸ Ita ese lauma ḡaudia baita lalo bada anina na tame herevalaia. Danu lauma ḡaudia e lalo badamu taudia edia haheitalai namodia amo diba tame abi. Bona tame diba “Keriso darana” baita abia karana ese baine duruda lauma dalana ai baita goada totona. To, lauma dalana ai baita goada daladia ma haida baita diba na namo. Heḡereḡere, ede baita diba toma bema ita na lauma dalanai ta goadamu eiava lasi? Dahaka baita kara diba lauma dalanai baita goada totona? Bona edena dala ai una ese eda dina ta ta maurina ai baine duruda? Unu henanadai na gabe stadina ese be haerelaimu.