Bõe n wilgd tɩ ned sakdame tɩ vʋʋsem sõngã wilgd-a sore?
“Bɩ Wẽnnaam . . . sõng yãmb tɩ y tall yam ning Kirist Zeezi sẽn da tarã yãmb sʋka.”—ROM. 15:5, MN.
YƖƖLA: 84, 5
1, 2. a) Kẽer tagsg yaa wãna, b sẽn paam n tar zood sõma ne Wẽnnaamã? b) Bõe yell la d na n gom sõs-kãnga pʋgẽ?
KANADA saam-bi-poak a ye yeelame: “M sẽn tar zood sõma ne Wẽnnaamã, m sũ-noogã paasame. Sõngd-m lame me tɩ m tõogd n maood ne vɩɩmã zu-loeese.” Saam-biig sẽn be Berzill me yeelame: “Tõnd kãadmã yʋʋm 23 la woto, la d sẽn tar zood sõma ne Wẽnnaam, n maood n maand wa a sẽn datã sõngame tɩ d zĩid-n-taarã noomẽ.” Ad Filipin saam-biig me sẽn yeele: “M sẽn tar zood sõma ne Wẽnnaamã, m tara sũur pʋgẽ bãane. Kɩtame me tɩ m maood tɩ maam ne m tẽed-n-taasã moor noomẽ, baa b sẽn yaa buud ning fãa.”
2 Nin-kãensã sẽn yeel bũmb ningã wilgda vẽeneg tɩ ned sã n tar zood sõma ne Wẽnnaam, nafd-a-la sõma. La tõe tɩ y sokda y meng yaa: ‘Bõe la m tõe n maan n paas mam ne a Zeova zoodã pãnga, n paam nafa nins rẽ sẽn wat ne wã?’ Sẽn tar-b zood sõma ne Wẽnnaamã sakdame t’a vʋʋsem sõngã wilgd-b sore. Bɩ d reng n ges Biiblã sẽn yet nin-bãmb wɛɛngẽ. Sogsg a tãab la d na n leoke: 1) Bõe n wilgd tɩ ned sakdame tɩ vʋʋsem sõngã wilgd-a sore? 2) Ãnd dãmb mak-sõng n tõe n sõng tõnd tɩ d paas tõnd ne Wẽnnaam zoodã? La 3) d sã n mao, n wa tõog n tar ‘Kirist tagsgã’, wãn to la na n sõng-d tɩ d tar zood sõma ne Wẽnnaam?
BÕE N WILGD TƖ NED SAKDAME TƖ VƲƲSEM SÕNGÃ WILGD-A SORE?
3. Bõe la Biiblã yeta, tɩ wilgdẽ tɩ ned sẽn vɩ a mengã yĩng yaa tor ne ned vʋʋsem sõngã sẽn wilgd sore?
3 Tʋm-tʋmd a Poll togsa bũmb sẽn sõngd tõnd tɩ d bãng ned sẽn sakd tɩ vʋʋsem sõngã wilgd-a sore, n bak ne ned sẽn vɩ a mengã yĩng bala. (Karm-y 1 Korẽnt-rãmb 2:14-16.) A wilgame tɩ ned sẽn vɩ a mengã yĩng “ka tõe n deeg bũmb nins sẽn yit Wẽnnaam Sɩɩgã nengẽ ye. Bala, b yaa yalemd ne yẽnda. La a ka tõe n bãng-b ye.” Sẽn sakd-a tɩ vʋʋsem sõngã wilgd-a sor “mii bũmb fãa bʋʋd kaoobo,” la a tar ‘Kirist tagsgo.’ A Poll sagenda d fãa tɩ d mao n yɩ neb a woto. La bõe me n kɩt tɩ ned sẽn vɩ a mengã yĩng yaa tor ne ned vʋʋsem sõngã sẽn wilgd sore?
4, 5. Bõe n wilgd tɩ ned vɩɩ a mengã yĩng bala?
4 Ned sẽn vɩ a mengã yĩng manesem yaa wãn-wãna? A rɩkda dũniyã nebã togs-n-taare, tɩ yaa a mengã ratem bal n pak-a n yɩɩda. A Poll wilgame tɩ ned a woto sakda “sɩɩg ning sẽn tʋmd wẽn-kɩɩsdbã pʋgẽ moasã wã.” (Efɛ. 2:2) Kɩtame tɩ yaa nebã sẽn wae n maandẽ wã la a maanda. Ned sẽn vɩ a mengã yĩng maanda a sẽn tagsd tɩ segdame, n pa baood n na n tũ Wẽnnaam noyã ye. Naoor wʋsgo, sẽn pak-a yaa arzɛkã la yʋʋrã baoobo. Sẽn paase, a sã n tagsd t’a tara sor n maan bũmbu, a gãta rẽ dem-deme.
5 Sẽn vɩ-b b mens yĩngã nong n maanda bũmb nins Biiblã sẽn boond tɩ ‘yĩngã tʋʋmã.’ (Gal. 5:19-21) Pipi lɛtr ning a Poll sẽn gʋls n tool Korẽnt kiris-nebã pʋgẽ, a wilga bũmb a taab neb a woto buudã sẽn maande. Wala makre, b wata ne welsg nebã sʋka, b nonga no-koɛɛma, b pirsda b taabã tɩ b yɩ kɩɩsdba, b boonda taab bʋʋdo, b pa sakd taoor dãmbã, yaa rɩ la yũ wã n pak-ba. Ned sẽn vɩ a mengã yĩng pa tõogd a meng makr wakat ye. (Yel. 7:21, 22) A Zʋʋd wilgame tɩ kẽer meng na n basame tɩ b yĩngã ratmã soog-ba, hal n pa tõe n paam Wẽnnaam vʋʋsem sõngã ye.—Zʋʋd 18, 19.
6. Bõe n wilgd tɩ ned sakdame tɩ vʋʋsem sõngã wilgd-a sore?
6 Sẽn sakd-a tɩ vʋʋsem sõngã wilgd-a sor pa vɩ a mengã yĩng ye. Yaa yẽ ne Wẽnnaam zoodã n pak-a n yɩɩda. A maoodame n dɩkd Wẽnnaam togs-n-taare. (Efɛ. 5:1) Bũmb fãa pʋgẽ, a maanda a sẽn tõe fãa n na n bãng a Zeova raabo. Yaa vẽeneg a yamẽ tɩ Wẽnnaam sɩd beeme. A pa maand a toog kae ne Wẽnnaam noyã wa sẽn vɩ-b b mens yĩngã ye. A maoodame n tũud a Zeova noyã la a saglsã a sẽn maand fãa pʋgẽ. (Yɩɩn. 119:33; 143:10) A pa tʋmd “yĩngã tʋʋm” ye. A maanda a sẽn tõe fãa n bɩɩsd zʋg-sõma nins vʋʋsem sõngã sẽn sõngd ned t’a bɩɩsã. (Gal. 5:22, 23) A nonga tũudmã yɛl ne a sũur fãa.
7. Biiblã wilgdame tɩ sẽn sakd-b tɩ vʋʋsem sõngã wilgd-b sorã paamda bõe?
7 Biiblã wilgdame tɩ sẽn sakd-b tɩ vʋʋsem sõngã wilgd-b sorã paamda sũ-noogo. Wala makre, a Zeezi yeelame tɩ ‘sũ-noog rãmb n yɩɩdã la sẽn kelgd-b Wẽnnaam gomde, la b reegd-a’ wã. (Luk 11:28, Sebr Sõngo) Rom-dãmb 8:6 wilgdame tɩ yaa d sã n sakdẽ tɩ vʋʋsem sõngã wilgd-d sor la d vɩɩmã na n yɩ sõma. Ad b sẽn yeele: “Yĩngã ratem sakr wata ne kũum, la Sɩɩgã ratem sakr wata ne vɩɩm la bãane.” D sã n sakdẽ tɩ vʋʋsem sõngã wilgd-d sore, d paamda laafɩ ne Wẽnnaam masã menga, la sũur pʋgẽ bãane, la d na n wa paam vɩɩm sẽn kõn sa wã.
8. Yɩl n paam Wẽnnaam zoodo, la d tõog tɩ ra sãame, yaa tɩlɛ tɩ d mao d pãng tɛka. Bõe yĩnga?
8 La dũni ning pʋgẽ d sẽn be wã yaa wẽng wʋsgo. Nebã vɩɩ b mensã yĩnga, tɩ b toog kae ne Wẽnnaam daab ye. Rẽ n so tɩ yɩl n paam Wẽnnaam zoodo, yaa tɩlɛ tɩ d mao d pãng tɛka. D sã n paam a zood me, yaa tɩlɛ tɩ d mao tɩ ra sãam ye. D sã n pa pids d yamã ne a Zeova goamã, yaa dũniyã nebã tagsa wã n na n kẽ-do, tɩ d rat n maan wa bãmba. Bõe la d tõe n maan t’a buud ra paam-do? Bõe la d tõe n maan tɩ tõnd ne a Zeova zoodã paase?
NEB SẼN KÕ MAK-SÕNGO
9. a) Bõe n tõe n sõng-d tɩ d paas tõnd ne a Zeova zoodã? b) Ãnd dãmb yell la d na n gome?
9 Biig sã n gũusd n get a roagdb mak-sõngo, a wat n dɩka b togs-n-taare. Tõnd me sã n gũusd n get sẽn tar-b zood sõma ne a Zeova wã, d na n dɩka b togs-n-taare, tɩ sõng-d tɩ d paas tõnd ne a Zeova zoodã me. La d sã n gũus n ges sẽn vɩ-b b meng yĩngã manesem, sõngdame tɩ d bãng d sẽn pa segd n maanã. (1 Kor. 3:1-5) Neb sẽn kõ mak-sõng la neb sẽn pa kõ mak-sõng fãa kibay bee Biiblã pʋgẽ. La d na n goma neb sẽn kõ mak-sõng yelle, bala d sẽn dat yaa d bãng d sẽn tõe n maan to-to, n paas tõnd ne a Zeova zoodã. D na n goma a Zakoob ne a Maari la a Zeezi yelle.
A Zakoob kibarã sõngda tõnd tɩ d bãng bõe? (Ges-y sull 10)
10. Wãn to la a Zakoob wilg t’a tara zood sõma ne Wẽnnaam?
10 D reng n gom a Zakoob yelle. Wa tõnd sʋkã neb wʋsg vɩɩm sẽn pa nana wã, a Zakoob me vɩɩmã pa yɩ nana ye. A Ezayu sẽn yaa a kĩn-kir-taagã ra baoodame n na n kʋ-a. Naoor wʋsg me, a rɛɛmbã baoome n na n zãmb-a. La a Zakoob sẽn da kɩs sɩd t’a Zeova na n pidsa a sẽn pʋlem a Abrahaam bũmb ningã, a pa koms raood ye. A ra miime t’a Zeova na n tũu ne yẽ zakã rãmb n pids pʋlengã. Rẽ n so t’a ra maand a sẽn tõe fãa n get b yell sõma. (Sɩng. 28:10-15) Baa nebã wʋsg sẽn da vɩ b mens yĩnga, tɩ b toog kae ne Wẽnnaamã, a Zakoob no-goamã la a yel-manesmã ra wilgdame t’a mii Wẽnnaam noyã la a raabã. Wala makre, a sẽn wa n yɛɛsd a Ezayu na n wa maan-a yellã, a pʋʋsa a Zeova n yeel-a yaa: “Mam kot-y lame, tɩ y fãag maam.” A leb n yeela a Zeova yaa: “Yãmb yaool n yeela maam tɩ: ‘Mam na n maan-f-la neere, n kɩt tɩ f yagensã lebg wʋsg wa ko-kãsengã noor bĩisrã.’” (Sɩng. 32:7-13) Hakɩɩka, a Zakoob ra tẽeda a Zeova sẽn pʋlem yẽ ne a yaab-rãmbã bũmb ningã ne a sũur fãa. A sẽn da maand fãa wilgda rẽ.
A Maari kibarã sõngda tõnd tɩ d bãng bõe? (Ges-y sull 11)
11. Bõe n wilgd t’a Maari ra tara zood sõma ne a Zeova?
11 D gom a Maari yell masã. Yaa a Maari sẽn da tar zood sõma ne a Zeova wã yĩng la a sẽn yãk-a t’a na n yɩ a Zeezi ma wã. A sẽn gom goam nins n pẽg a Zeova a sẽn wa n kẽng n na n tɩ ges a Zakari ne a Elizabɛtã wilgda vẽeneg t’a sɩd nonga tũudmã yɛlã. (Karm-y Luk 1:46-55.) A sẽn yeel bũmb ninsã wilgdame t’a ra nonga Wẽnnaam goamã ne a sũur fãa, la t’a ra mii Biiblã babg ning b sẽn da gʋls ne ebre wã sõma. (Sɩng. 30:13; 1 Sãm. 2:1-10; Mal. 3:12) D tẽeg me tɩ baa yẽ ne a Zozɛf sẽn da kẽ kãadmã, sã n pa a Zeezi rogmã poore, b pa kẽ ne taab ye. Woto wilgdame tɩ yaa a Zeova raabã n da pak-b n yɩɩd b mensã tʋlsem pidsgu. (Mat. 1:25) Sẽn paase, a Maari ra gũusd n geta bũmb nins sẽn da maand a Zeezi vɩɩmã pʋgẽ wã, la a maagd a yĩng n kelgd gom-sõma nins sẽn da yit a noorẽ wã, n ‘bĩngd bõn-kãens fãa a sũurẽ.’ (Luk 2:51) Yaa vẽeneg t’a ra baood n bãnga bũmb nins Wẽnnaam sẽn da togs Mesi wã zugã sẽn na n pids to-to. A Maari mak-sõngã tõe n sõng-d lame tɩ d tags n ges d sẽn tõe n maanega, n lʋɩɩs Wẽnnaam daabã taoore.
12. a) Bõe n wilgd t’a Zeezi ra rɩkda a Ba wã togs-n-taare? b) Bõe la d tõe n maan n dɩk a Zeezi togs-n-taare? (Ges-y sõsgã sɩngrẽ fotã.)
12 Hal pĩnd wẽndẽ n tãag masã, sẽn wilg-b tɩ b sɩd tara zood sõma ne a Zeova wã sʋka, a Zeezi n yaa mak-sõng sẽn ka to. A sẽn wa n be tẽngã zug n moond koe-noogã, a wilga bũmb fãa pʋgẽ t’a rɩkda a Ba a Zeova togs-n-taare. A sẽn da tagsd to-to wã, a yel-manesmã la a tʋʋm-tʋmdɩ wã fãa ra kell n yaa wa a Zeova. A ra maanda a Zeova raabo, la a tũud a noyã. (Zã 8:29; 14:9; 15:10) Ges-y no-rɛɛs a Ezayi sẽn gom a Zeova nimbãan-zoeerã yell to-to wã, la y mak rẽ ne a Mark sẽn yeel bũmb ning a Zeezi zugã. (Karm-y Ezayi 63:9; Mark 6:34.) Rẽ yĩnga wakat fãa, tõnd wilgda wa a Zeezi tɩ d kʋmda sẽn dat-b sõngrã bɩ? D rɩkda a togs-n-taare, n wɩngd ne koe-noogã mooneg la nebã zãmsg bɩ? (Luk 4:43) D sã n kʋmd d taabã la d sõngd-ba, wilgdame tɩ d tara zood sõma ne Wẽnnaam, la tɩ d yaa ned vʋʋsem sõngã sẽn wilgd sore.
13, 14. a) Yam-bʋg la d tõe n dɩk d tẽed-n-taas wʋsg nengẽ? b) Togs-y kibare.
13 Rũndã-rũndã me, d tẽed-n-taas ka tɛk n mao sẽn na yɩl n tõog n dɩk Kiristã togs-n-taare. Tõe tɩ y gũus n gesame tɩ masã b moonda koɛɛgã ne yẽesem, n nong n deegd b taabã sõma, la b kʋmd nebã nimbãanega. Yaa sɩd tɩ bãmb me tara pãn-komsem, la b maooda b pãng tɛk n na n bɩɩs zʋgd sẽn tat Wẽnnaam yam. A Rasɛll yaa saam-bi-poak sẽn be Berzill. A yeelame: “Mam da nonga dũniyã nebã sẽn manegd b mens to-to wã. Kɩtame tɩ m futã ra yaa hobragi. La m sẽn zãms Biiblã n bãng bũmb ninsã kɩtame tɩ m mao n wa tar zood sõma ne Wẽnnaam. Yɩl n toeemã pa yɩ nana, la sõngame tɩ m sũ-noogã paase, tɩ m neẽ masã tɩ m vɩɩmã tara nenga.”
14 A Reylɛn yaa saam-bi-poak sẽn be Filipin. Yẽ maoo ne zu-loɛɛg a to. Baa a sẽn da tũud a Zeova wã, sẽn da pak-a yaa karem n zãage, n wa paam tʋʋm-sõngo. Ad a sẽn yeele: “M wa n dat n basa m sẽn da yãk yam n na n maan a Zeova tũudmã pʋgẽ wã. La m wa n getame tɩ bũmb n paoog-m vɩɩmã pʋgẽ, bũmb sẽn tar yõod wʋsg n yɩɩd m tʋʋmdã. Rẽ n so tɩ m toeem yam, n na n maneg n wɩng ne a Zeova tũudmã tʋʋmã.” Rẽ tɛka, a sẽn vɩ to-to wã wilgdame t’a tẽeda bũmb ning a Zeova sẽn pʋlem tɩ be Matye 6:33, 34. Ad a Reylɛn sẽn yeele: “M kɩsa sɩd t’a Zeova na n gesa m yell sõma!” Tõe tɩ y mii y tigingã neb sẽn maood woto me. D sã n get b sẽn maand b sẽn tõe fãa n dɩkd Kiristã togs-n-taarã, d rat n tũu b mak-sõngã.—1 Kor. 11:1; 2 Tes. 3:7.
D TALL ‘KIRIST TAGSGO’
15, 16. a) Bõe la d segd n maane, n dɩk Kiristã togs-n-taare? b) Bõe n na n sõng-d tɩ d bãng a Zeezi tagsg bũmb toor-toor zugu?
15 Bõe la d tõe n maan n dɩk Kiristã togs-n-taare? Biiblã wilgdame tɩ yaa tɩlɛ tɩ d mao n tall ‘Kirist tagsgo.’ (1 Kor. 2:16) Biiblã yeelame me tɩ d mao n tall “yam ning Kirist Zeezi sẽn da tarã.” (Rom. 15:5, MN) Dẽnd yaa tɩlɛ tɩ d reng n bao n bãng Kiristã tagsgo, a yel-manesem la a tʋʋm-tʋmdɩ, n tõog n dɩk a togs-n-taare. Sẽn da pak a Zeezi n tɩ yɩɩd yaa yẽ ne a Zeova zoodã. Dẽnd d sã n dɩkd a togs-n-taare, paasda tõnd ne a Zeova zoodã pãnga. Yaa rẽ yĩng la d sẽn segd n mao tɩ bũmb fãa pʋgẽ bɩ d tagsgã yɩ wa Kiristã.
16 Bõe n na n sõng-d tɩ d tõog n maan woto? A Zeezi karen-biisã yãa yel-soalem nins a sẽn maanã, b kelga bũmb nins a sẽn da zãmsd nebã, b yãa a manesem sẽn da yaa to-to ne neb buud toor-toore, la a sẽn da tũud Wẽnnaam noyã to-to wã. B yeelame tɩ bãmb yaa bũmb nins fãa a Zeezi sẽn maanã “kaset dãmba.” (Tʋʋ. 10:39) Rũndã-rũndã, d pa tõe n paam n yã a Zeezi ye. La a Zeova sẽn nong tõndã, a kɩtame tɩ b gʋls a Zeezi sẽn maan bũmb ninsã evãnzill-dãmbã pʋsẽ, tɩ tõe n sõng-d tɩ d bãng-a sõma. D sã n karem Matye sebrã, la Mark ne Luk la Zã sebrã, n bʋgs d sẽn karmã zugu, na n sõng-d lame tɩ d bãng a Zeezi tagsg sẽn da yaa a soab bũmb toor-toor zugu. Woto, d tõogd n ‘tũu a naoã,’ n ‘paam tagsg a yembr’ ne-a.—1 Pɩy. 2:21; 4:1.
17. D sã n tar Kiristã tagsgo, wãn to la na n naf-do?
17 D sã n tar Kiristã tagsgo, wãn to la na n naf-do? Ned sã n dɩt rɩ-sõma, paasda a yĩngã keelem. Woto me, d sã n dɩlgd d yamã ne bũmb nins Biiblã sẽn yet a Zeezi zugã, paasda tõnd ne a Zeova zoodã. Tarẽ-n-tarẽ, d wat n bãnga a Zeezi manesem sẽn da na n yɩ a soab yell buud fãa pʋgẽ. Na n sõngame tɩ d bãngd n yãkd yam sẽn noom Wẽnnaam, tɩ d sũur-kasetã me pa ningd-d taal ye. Woto fãa pa kɩt tɩ d rat ne d sũur fãa n ‘yeelg Zu-soab a Zeezi Kirist wa fuug’ sɩda?—Rom. 13:14.
18. Bõe la yãmb bãng sõs-kãnga pʋgẽ?
18 Sõs-kãnga sõnga tõnd tɩ d bãng bũmb nins sẽn wilgd tɩ ned sakdame tɩ vʋʋsem sõngã wilgd-a sorã. D bãngame me tɩ d tõe n dɩka yam neb nins sẽn kõ mak-sõngã nengẽ. D leb n bãngame tɩ d sã n mao n tall ‘Kirist tagsgo,’ na n sõngame tɩ tõnd ne a Zeova zoodã pãng paase. La sogsg a taab n kete. Wala makre: D maanda a wãn n bãng tõnd ne a Zeova zoodã sã n sɩd tara pãnga? Bõe la d tõe n maan tɩ d zoodã pãng paase? D sã n sakdẽ tɩ vʋʋsem sõngã wilgd-d sore, wãn to la na n sõng tõnd d vɩɩmã pʋgẽ, daar ne a to fãa? Sõsg ning sẽn pʋgdã na n leoka sogs-kãensã.
