1, 2. a) ¿Ndáaña káʼa̱n sava na̱ hermano xa̱ʼa ña̱ kuuyó na̱ yiví espiritual? b) ¿Ndáa pregunta ndakuiinyó ti̱xin artículo yóʼo?

IIN ñá hermana ñuu Canadá ni̱ka̱ʼa̱nñá: “Xa̱ʼa ña̱ kéʼíi̱ ña̱ káʼa̱n Ndióxi̱ kúsi̱íní-inii̱ ta ña̱yóʼo chíndeé yi̱ʼi̱ ña̱ va̱ʼaka yáʼi̱ nu̱ú tu̱ndóʼo”. Iin ta̱ hermano ñuu Brasil ni̱ka̱ʼa̱nra: “Miíi̱ xíʼin ñá síʼíi̱ xa̱a̱ 23 ku̱i̱ya̱ ku̱a̱ʼa̱n ña̱ ti̱ndaʼa̱ndi̱ ta si̱íní íyondi̱ xa̱ʼa ña̱ chíka̱a̱ndi̱ ndée kéʼéndi̱ ña̱ káʼa̱n Ndióxi̱”. Ta inka ta̱ hermano ñuu Filipinas káchira xa̱ʼa ña̱ kéʼéníra ña̱ káʼa̱n Ndióxi̱ va̱ʼa kúnira xíʼin miíra ta va̱ʼa kítáʼanra xíʼin ndiʼi na̱ hermano.

² Xíʼin ña̱yóʼo xítoyó tá kéʼéyó ña̱ káʼa̱n Ndióxi̱ ku̱a̱ʼání ña̱ va̱ʼa ndákiʼinyó. Ña̱kán sana ndáka̱tu̱ʼunyó miíyó ndáaña keʼéyó ña̱ va̱ʼa kuukayó na̱ yiví espiritual. Yóʼo sakuaʼayó xa̱ʼa ña̱yóʼo. Soo, siʼna xíniñúʼu kunda̱a̱ va̱ʼa iniyó ndáaña káʼa̱n Biblia xa̱ʼa ña̱ kuuyó na̱ yiví espiritual. Nu̱ú artículo yóʼo, ndakuiinyó u̱ni̱ pregunta. Siʼna ka̱ʼa̱nyó, ¿ndáaña kúni̱ kachiña ña̱ kuuyó na̱ yiví espiritual? Ña̱ u̱vi̱, ¿ndáa ejemplo kivi chindeé miíyó ña̱ va̱ʼa kuukayó na̱ yiví espiritual? Ta ña̱ u̱ni̱, tá ná ndakanixi̱níyó táki̱ʼva ndákanixi̱ní ta̱ Cristo, ¿nda̱saa chindeéña miíyó?

3. Táki̱ʼva káchi ña̱ Biblia, ¿ndáaña kéʼé na̱ kúú espiritual ta ndáaña kéʼé na̱ kǒo kúú espiritual?

³ Ta̱ apóstol Pablo ni̱ka̱ʼa̱nra ndáa ki̱ʼva íyo na̱ yiví espiritual á na̱ kúúmií espíritu Ndióxi̱, ta ndáa ki̱ʼva íyo na̱ yiví na̱ va̱ása kúú espiritual á na̱ kǒo kúúmií espíritu Ndióxi̱ (kaʼvi 1 Corintios 2:14-16). * Na̱ kǒo kúú espiritual kǒo kútóona keʼéna ña̱ káʼa̱n Ndióxi̱, chi kǒo xa̱ʼaña nu̱úna; ta va̱ása xáa̱na kúnda̱a̱-inina xíʼin ña̱ káʼa̱n Ndióxi̱. Soo na̱ espiritual xíto va̱ʼana ndáaña keʼéna ta ndákanixi̱nína táki̱ʼva ndákanixi̱ní ta̱ Cristo. Ña̱kán ni̱ka̱ʼa̱n ta̱ Pablo ña̱ xíniñúʼu kuuyó espiritual. ¿Ndáaña kéʼé na̱ kúú espiritual ta ndáaña kéʼé na̱ kǒo kúú espiritual?

4, 5. ¿Ndáa ki̱ʼva íyo na̱ kǒo kúú espiritual?

⁴ Siʼna ná kotoyó ndáa ki̱ʼva ndákanixi̱ní na̱ kǒo kúú espiritual. Kéʼéna ña̱ kúni̱ miína táki̱ʼva kéʼé na̱ íyo ñuyǐví yóʼo, ta̱ Pablo ni̱ka̱ʼa̱nra xa̱ʼaña ʻta̱chí ña̱ íyo ñuyǐví yóʼo kúú ña̱ sándáʼvi na̱ yiví na̱ kǒo xíín kuniso̱ʼo ña̱ káʼa̱n Ndióxi̱ʼ (Efes. 2:2). Ta̱chí yóʼo kúú ña̱ sándáʼvi na̱ yiví ña̱ keʼéna táʼan ña̱ kéʼé savaka na̱ yiví. Na̱kán kúú ña̱ kéʼé ña̱ kúni̱ miína ta kǒo chíka̱a̱na ndée ña̱ keʼéna ña̱ káʼa̱n Ndióxi̱. Na̱ kǒo kúú espiritual nina xa̱ʼa miína ndíʼi̱-inina ta kútóonína xu̱ʼún.

⁵ Na̱ kǒo kúú espiritual kéʼéna ña̱ kútóo kuñuna (Gál. 5:19-21). Nu̱ú carta ña̱ ka̱ʼyí ta̱ Pablo ku̱a̱ʼa̱n ndaʼa̱ na̱ congregación Corinto ni̱ka̱ʼa̱nra xa̱ʼa sava ña̱ íxaana: kútóona ki̱ʼvina nu̱ú ku̱a̱chi inkana, ndátaʼvina na̱ yiví, kǒo íxato̱ʼóna ta chínúuna nu̱ú inkana ña̱ keʼéna saá, ku̱a̱ʼa̱nna xákinna ku̱a̱chi xa̱ʼa inkana nu̱ú na̱ chíñu, kǒo íxato̱ʼóna na̱ chíñu, nina ña̱ kuxuna á ña̱ koʼona ndíʼi̱-inina xa̱ʼa. Va̱ása chíka̱a̱na ndée ña̱ sandákoona ña̱ kini (Prov. 7:21, 22). Ta̱ discípulo Judas ni̱ka̱ʼa̱nra ña̱ savana nda̱a̱ xáana nándosó-inina xa̱ʼa Ndióxi̱ (Jud. 18, 19).

6. ¿Ndáa ki̱ʼva íyo na̱ yiví espiritual?

⁶ Ta na̱ yiví espiritual síínní íyo na̱yóʼo. Ndíʼi̱ní-inina xa̱ʼa ña̱ kutáʼanna xíʼin Ndióxi̱ ta chíka̱a̱na ndée ña̱ koona táki̱ʼva íyora (Efes. 5:1). Ña̱yóʼo kúni̱ kachiña, ña̱ chíka̱a̱na ndée ña̱ ndakanixi̱nína táki̱ʼva ndákanixi̱ní Jehová. Kándíxanína Jehová ña̱ ndixa kúú ña̱ íyora nu̱úna. Íxato̱ʼóna ndiʼi ña̱ káʼa̱nra (Sal. 119:33; 143:10). Chíka̱a̱na ndée ña̱ keʼéna ña̱ kúni̱ Ndióxi̱ su̱víka ña̱ keʼéna ña̱ kútóo kuñuna (Gál. 5:22, 23).

7. ¿Ndáaña káʼa̱n Biblia xa̱ʼa na̱ yiví espiritual?

⁷ Ta̱ Jesús ni̱ka̱ʼa̱nra na̱ yiví espiritual si̱íní íyona. Mateo 5:3 káchiña: “Si̱í íyo ini na̱ xíni̱ ña̱ xíniñúʼu sakuaʼana xa̱ʼa Ndióxi̱, saáchi na̱yóʼo kúú na̱ koo nu̱ú kaʼndachíñura”. Romanos 8:6 káʼa̱nña nda̱chun kúú ña̱ va̱ʼaní tá ná kooyó na̱ yiví espiritual. Káchiña: “Chi tá ná ndakanixi̱níyó xa̱ʼa ña̱ kútóo ku̱ñuyó nda̱a̱ kivi kuviyó, soo tá ná ndakanixi̱níyó xa̱ʼa ña̱ espíritu ña̱yóʼo taxi ña̱ kutakuyó”. Tá nina ña̱ kúni̱ Ndióxi̱ ná ndakanixi̱níyó xa̱ʼa, va̱ʼaníka kutáʼanyó xíʼinra ta va̱ʼatu kuni miívayó. Ta chí nu̱únínu va̱ʼa xa̱a̱yó kutakuyó ndiʼi tiempo.

8. ¿Nda̱chun xíniñúʼu chika̱a̱níyó ndée ña̱ kuuyó na̱ yiví espiritual?

⁸ Ña̱ ñuyǐví yóʼo kivi sandáʼviña miíyó ta sandákooyó ña̱ kúúyó na̱ yiví espiritual. Saáchi ndóoyó nu̱ú ndóo na̱ yiví na̱ kǒo  ndákanixi̱ní táki̱ʼva ndákanixi̱ní Ndióxi̱, ña̱kán xíniñúʼu chika̱a̱níyó ndée ña̱ kundaayó miíyó. Tá iinna sándákoona ña̱ kúúna na̱ yiví espiritual, kíxaʼána kéʼéna ña̱ íyo ñuyǐví yóʼo ta kíxaʼána ndákanixi̱nína xa̱ʼa ña̱ kini. ¿Ndáaña chindeé miíyó ña̱ va̱ása ndoʼoyó saá? Ta ¿ndáaña chindeé miíyó ña̱ kuukayó na̱ yiví espiritual?

9. a) ¿Ndáaña chindeé miíyó ña̱ kuukayó na̱ yiví espiritual? b) ¿Ndáana sakuaʼayó xa̱ʼa?

⁹ Táki̱ʼva íyo na̱ va̱lí xítona ña̱ kéʼé na̱ yiví ta kíxaʼána kéʼénaña, saátu miíyó kivi xa̱a̱yó kuukayó na̱ yiví espiritual tá ná kundiku̱nyó yichi̱ na̱ xa̱a̱ kúú espiritual. Ta ná kǒo kundiku̱nyó yichi̱ na̱ kéʼé ña̱ kúni̱ miína (1 Cor. 3:1-4). Ña̱ Biblia káʼa̱nña xa̱ʼa na̱ ke̱ʼé ña̱ va̱ʼa ta saátu na̱ kǒo níkeʼé ña̱ va̱ʼa. Nu̱ú artículo yóʼo sakuaʼayó xa̱ʼa na̱ ke̱ʼé ña̱ va̱ʼa, tá kúú: ta̱ Jacob, ñá María xíʼin ta̱ Jesús. Tasaá sakuaʼakayó kuuyó na̱ yiví espiritual.

10. ¿Nda̱saa ni̱na̱ʼa̱ ta̱ Jacob ña̱ xi̱kuura iin ta̱a espiritual?

¹⁰ Siʼna ná ka̱ʼa̱nyó xa̱ʼa ta̱ Jacob. Ku̱a̱ʼání ña̱ ndo̱ʼora, nda̱a̱ táki̱ʼva ndóʼo miíyó. Ñanira ta̱ Esaú kǒo níxindi̱ʼi̱-inira keʼéra ña̱ káʼa̱n Ndióxi̱, ta xi̱kuni̱ra kaʼníra ta̱ Jacob. Inka tuku ña̱ ndo̱ʼora, si̱sora sa̱ndáʼvi-ñaʼá ta ku̱a̱ʼákaña i̱xaara xíʼinra. Soo ta̱ Jacob iin ta̱a espiritual xi̱kuura, ni ni̱xi̱yora xíʼin na̱ yiví na̱ kǒo kéʼé ña̱ káʼa̱n Ndióxi̱. Xi̱kandíxaníra ña̱ saxínu Ndióxi̱ ña̱ ni̱ka̱ʼa̱nra xíʼin ta̱ Abrahan, ta va̱ʼaní xi̱ndaara na̱ veʼera chi na̱yóʼo kúú na̱ kuniñúʼu Ndióxi̱ ña̱ xi̱nu ña̱ ni̱ka̱ʼa̱nra (Gén. 28:10-15). Xíʼin tu̱ʼun ña̱ xi̱ka̱ʼa̱nra xíʼin ndiʼi ña̱ ke̱ʼéra ni̱na̱ʼa̱ra ña̱ kúni̱níra keʼéra ña̱ káʼa̱n Jehová. Chi ke̱ʼéra iin oración nu̱ú Jehová ta ka̱chira: “Ta miíún káʼa̱n: ‘Keʼíi̱ ña̱ va̱ʼa xíʼún ta taxii̱ ña̱ koo ku̱a̱ʼá se̱ʼún, koona táki̱ʼva íyo yu̱ti ña̱ íyo chí mar, ni iin na̱ yiví va̱ása kivi kaʼvinanaʼ” (Gén. 32:6-12). Xíʼin ña̱ ke̱ʼéra ni̱na̱ʼa̱ra ña̱ xi̱kandíxaníra  ña̱ ni̱ka̱ʼa̱n Jehová xíʼinra saátu ña̱ ni̱ka̱ʼa̱n xíʼin na̱ táʼanra na̱ xi̱ndoo tá ya̱chi̱ka.

11. ¿Nda̱chun káʼa̱nyó ña̱ xi̱kuu ñá María iin ñaʼá espiritual?

¹¹ Ta vitin ná ka̱ʼa̱nyó xa̱ʼa ñá María. ¿Nda̱chun nda̱ka̱xin Jehová ñáyóʼo ña̱ kuuñá siʼí ta̱ Jesús? Nda̱kaxinrañá xa̱ʼa ña̱ kúúñá ñaʼá espiritual. Kúnda̱a̱-iniyó xa̱ʼa ña̱yóʼo, saáchi liviní tu̱ʼun ni̱ka̱ʼa̱nñá xíʼin Jehová tá ni̱xa̱ʼa̱nñá nu̱ú na̱ táʼanñá, ta̱ Zacarías xíʼin ñá Elisabet (kaʼvi Lucas 1:46-55). * Tu̱ʼun ña̱ ni̱ka̱ʼa̱n ñá María náʼa̱ña ña̱ xi̱ndayáʼviní tu̱ʼun Ndióxi̱ nu̱úñá ta xi̱xini̱ va̱ʼañá ña̱ káʼa̱n tutu Escrituras Hebreas (Gén. 30:13; 1 Sam. 2:1-10; Mal. 3:12). Tá ti̱ndaʼa̱ñá xíʼin ta̱ José kǒo níkisina xíʼin táʼanna nda̱a̱ tá ka̱ku ta̱ Jesús. Ña̱yóʼo kúni̱ kachiña, u̱vi̱ saána xi̱ndi̱ʼi̱ní-inina keʼéna ña̱ kúni̱ Jehová, su̱víka ña̱ keʼéna ña̱ kúni̱ miína (Mat. 1:25). Tá ni̱ya̱ʼa tiempo, ñá María xi̱kiʼinníñá kuenta xíʼin ña̱ xi̱keʼé ta̱ Jesús, saátú xíʼin ña̱ xi̱ka̱ʼa̱nra ta “xi̱ndakanixi̱níñá xa̱ʼa ndiʼi ña̱yóʼo” (Luc. 2:51). Xi̱kuni̱níñá kunda̱a̱-iniñá xa̱ʼa ña̱ ni̱ka̱ʼa̱n Ndióxi̱ xa̱ʼa ta̱ Mesías. Va̱ʼaní yichi̱ sa̱ndákoo ñá María nu̱úyó ña̱ siʼnaka ña̱ kúni̱ Ndióxi̱ kundi̱ʼi̱-iniyó xa̱ʼa.

12. a) ¿Nda̱chun káʼa̱nyó ña̱ inkáchi íyo ta̱ Jesús xíʼin yivára? b) ¿Ndáa ki̱ʼva kundiku̱nyó yichi̱ ta̱ Jesús? (Koto na̱ʼná ña̱ va̱xi chí xa̱ʼa).

¹² Vitin ná ka̱ʼa̱ntuyó xa̱ʼa ta̱ Jesús. Mií ta̱yóʼo kúú ta̱ espiritual va̱ʼaka nu̱ú ndiʼi na̱ íyo nu̱ú ñuʼú yóʼo. Ndiʼi tiempo ña̱ xi̱takura nu̱ú ñuʼú yóʼo ni̱na̱ʼa̱ra ña̱ xi̱kuni̱ra koora táki̱ʼva íyo yivára Jehová. Xíʼin ña̱ xi̱ndakanixi̱níra, xíʼin ña̱ xi̱keʼéra ni̱na̱ʼa̱ra ña̱ nina ña̱ kúni̱ yivára xi̱keʼéra (Juan 8:29; 14:9; 15:10). Ná kotoyó ña̱ ni̱ka̱ʼa̱n ta̱ Isaías xa̱ʼa Ndióxi̱, ta ná kototuyó ña̱ ni̱ka̱ʼa̱n ta̱ Marcos xa̱ʼa ta̱ Jesús (kaʼvi Isaías 63:9; * Marcos 6:34). * ¿Á táki̱ʼva íyo Jesús íyoyó ta kúndáʼvi-iniyó xíniyó na̱ yiví na̱ ndíka̱a̱ iin tu̱ndóʼo? ¿Á ndíʼi̱ní-iniyó natúʼunyó xa̱ʼa Ndióxi̱ táki̱ʼva i̱xaa ta̱ Jesús? (Luc. 4:43). Tá saá ná keʼéyó na̱ʼa̱yó ña̱ kúúyó na̱ yiví espiritual.

13, 14. a) ¿Ndáa yichi̱ va̱ʼa kúú ña̱ sándákoo savana nu̱úyó ña̱ kéʼéna táki̱ʼva ke̱ʼé ta̱ Jesús? b) Ka̱ʼa̱n iin experiencia.

¹³ Tiempo vitin ku̱a̱ʼání na̱ yiví kéʼéna táki̱ʼva ke̱ʼé ta̱ Jesús. Chíka̱a̱nína ndée ña̱ xíkana nátúʼunna xa̱ʼa tu̱ʼun Ndióxi̱, va̱ʼaní inina xíʼin inka na̱ yiví, ta ku̱a̱ʼáka ña̱ va̱ʼa kéʼéna. Nda̱a̱ táki̱ʼva ndóʼo miíyó, xa̱ʼa ña̱ kúúna na̱ yiví ku̱a̱chi chíka̱a̱na ndée ña̱ keʼéna ña̱ va̱ʼa. Iin ñá hermana ñuu Brasil ñá naní Rachel káchiñá: “Tá ya̱chi̱ xi̱kutóoníi̱ kundixii̱ táki̱ʼva ndíxi na̱ ñuyǐví. Xa̱ʼa ña̱yóʼo va̱ása va̱ʼa níxi̱yo ti̱ko̱to̱i̱. Soo tá ki̱xaʼíi̱ káʼvii̱ tu̱ʼun Ndióxi̱, na̱kunda̱a̱-inii̱ ña̱ xíniñúʼu chika̱i̱ ndée ña̱ keʼíi̱ ña̱ kútóo Ndióxi̱. Yo̱ʼvi̱ i̱xaaña xíʼi̱n ña̱ nasamai̱ miíi̱, soo ki̱xaʼá kúsi̱íka-inii̱ xíʼin ña̱ tákui̱”.

¹⁴ Sííntu ña̱ ndo̱ʼo iin ñá hermana ñuu Filipinas ñá naní Reylene. Ni kúúñá testigo Jehová, soo ña̱ ni̱ndi̱ʼi̱ní-iniñá xa̱ʼa  kúú ña̱ kaʼvi va̱ʼañá ta ni̱ʼiñá iin chiñu va̱ʼa ña̱ kachíñuñá. Káchiñá: “Chiñu Jehová loʼo loʼo ku̱a̱ʼa̱n na̱ndosói̱ xa̱ʼaña. Soo, tándi̱ʼi kiʼi̱n kuenta ña̱ va̱ása si̱íka íyoi̱. Tasaá ki̱xaʼá kéʼé tukui̱ chiñu Jehová”. Nani saá, ñá Reylene ki̱xaʼáñá kándíxaníñá ña̱ káʼa̱n Jehová nu̱ú Mateo 6:33, 34. Ñáyóʼo kándíxaníñá Jehová kundaara miíñá. Sana ti̱xin congregación nu̱ú ku̱a̱ʼa̱nyó íyo na̱ hermano na̱ ke̱ʼé táki̱ʼva ke̱ʼé ñáyóʼo. Tá xítoyó ña̱ kéʼéna táki̱ʼva ke̱ʼé ta̱ Jesús, ¿á su̱ví kúni̱yó kúndiku̱nyó yichi̱na? (1 Cor. 11:1; 2 Tes. 3:7).

15, 16. a) ¿Ndáa ki̱ʼva kundiku̱nyó yichi̱ ta̱ Cristo? b) ¿Ndáa ki̱ʼva sakuaʼayó ndakanixi̱níyó táki̱ʼva ndákanixi̱ní ta̱ Jesús?

¹⁵ ¿Ndáa ki̱ʼva kundiku̱nyó yichi̱ ta̱ Cristo? Ña̱ Biblia káʼa̱nña xíʼinyó nu̱ú 1 Corintios 2:16 ña̱ xíniñúʼu “ndakanixi̱níyó táki̱ʼva ndákaxi̱ní ta̱ Cristo”. Romanos 15:5 káʼa̱nña xíʼinyó ña̱ ná ʻkutáʼan va̱ʼayó xíʼin inka na̱ yiví táki̱ʼva ke̱ʼé ta̱ Cristo Jesúsʼ. Ña̱ va̱ʼa kooyó táki̱ʼva ni̱xi̱yo ta̱ Cristo xíniñúʼu kunda̱a̱-iniyó ndáa ki̱ʼva ni̱xi̱yora, ndáa ki̱ʼva nda̱kanixi̱níra, ndáaña ke̱ʼéra. Ña̱ xi̱ndi̱ʼi̱ní-inira xa̱ʼa kúú ña̱ kutáʼan va̱ʼara xíʼin yivára Jehová. Tá ná kooyó táki̱ʼva ni̱xi̱yo ta̱ Cristo, kuyantikayó nu̱ú Jehová. Ña̱kán xíniñúʼu sakuaʼayó ndakanixi̱níyó táki̱ʼva ndákanixi̱ní ta̱ Jesús.

¹⁶ ¿Ndáaña chindeé miíyó? Na̱ discípulo ta̱ Jesús xi̱nina ke̱ʼéra milagro, ta̱xira discurso ta xi̱ndiku̱nra ña̱ káʼa̱n tu̱ʼun Ndióxi̱. Ta káchina: “Ndi̱ʼi̱ xi̱nindi̱ ndiʼi ña̱ʼa ña̱ ke̱ʼéra” (Hech. 10:39). Ndixa kúúña miíyó, kǒo kívi kuniyó ta̱ Jesús. Soo, Jehová sa̱ndákoora nu̱úyó tutu ña̱ káʼa̱n xa̱ʼa ta̱ Jesús ndáa ki̱ʼva ni̱xi̱yora, tá kúú tutu: Mateo, Marcos, Lucas xíʼin Juan. Tá ná kaʼviyóña ta ndakanixi̱níyó xa̱ʼaña, sakuaʼayó xa̱ʼa ta̱ Jesús ndáa ki̱ʼva xi̱ndakanixi̱níra. Tasaá kivi keʼéyó ña̱ káʼa̱n ña̱yóʼo: “Sa̱ndákoora iin yichi̱ nu̱úndó ña̱ viíní kundiku̱nndó yichi̱ra ta “saátu miíyó ná keʼéyó táki̱ʼva ke̱ʼé ta̱yóʼo” (1 Ped. 2:21; 4:1).

17. ¿Nda̱saa chindeéña miíyó tá ná ndakanixi̱níyó táki̱ʼva ndákanixi̱ní ta̱ Jesús?

¹⁷ ¿Nda̱saa chindeéña miíyó tá ná ndakanixi̱níyó táki̱ʼva ndákanixi̱ní ta̱ Jesús? Ña̱ va̱ʼa kunda̱a̱-iniyó xíʼinña ná ka̱ʼa̱nyó xa̱ʼa iin ña̱ʼa. Tá ná kuxu va̱ʼayó va̱ʼa kuniyó, á ndeéka kooyó. Ta saátu íyo ña̱yóʼo, tá ná sakuaʼaníyó xa̱ʼa ta̱ Jesús xa̱a̱yó kuukayó na̱ yiví espiritual. Tasaá loʼo tá loʼo xa̱a̱yó kunda̱a̱-iniyó ndáaña keʼé ta̱ Jesús tá ná ndoʼora táʼan ña̱ ndóʼoyó. Ta ña̱yóʼo chindeéña miíyó ña̱ ndaka̱xin va̱ʼayó ña̱ keʼéyó ta sakusi̱íyó-ini Ndióxi̱. Ña̱kán, va̱ʼaní tá ná kundiku̱nyó ña̱ káʼa̱n consejo yóʼo: “Keʼéndó táki̱ʼva ke̱ʼé ta̱ Jesucristo” (Rom. 13:14).

18. ¿Ndáaña sa̱kuaʼayó nu̱ú artículo yóʼo xa̱ʼa ña̱ kuuyó na̱ yiví espiritual?

¹⁸ Nu̱ú artículo yóʼo, xa̱a̱ ni̱ka̱ʼa̱nyó ndáaña kúni̱ kachi ña̱ kuuyó na̱ yiví espiritual. Sa̱kuaʼayó ña̱ va̱ʼaní chíndeéña miíyó ña̱ kundiku̱nyó yichi̱ na̱ kúú espiritual. Sa̱kuaʼatuyó nda̱saa chíndeéña miíyó ña̱ “ndakanixi̱níyó táki̱ʼva ndákanixi̱ní ta̱ Cristo”. Soo íyoka ña̱ kúma̱ní sakuaʼayó xa̱ʼa ña̱yóʼo. Tá kúú ña̱yóʼo, ¿nda̱chun va̱ʼa kúnda̱a̱-iniyó á ndixa kúúyó na̱ yiví espiritual?, ¿ndáaña kivi keʼékayó ña̱ xa̱a̱yó kuukayó na̱ yiví espiritual? ta ¿nda̱saa chindeéña miíyó tá ná kuukayó na̱ yiví espiritual? Nu̱ú inka artículo sakuaʼayó xa̱ʼa ña̱yóʼo.