စွမ်းအားတော် လမ်းပြမှုနောက် လိုက်တဲ့သူဆိုတာ ဘာကို ဆိုလိုသလဲ
“ဘုရားသခင်က ခရစ်တော်ယေရှုမှာရှိတဲ့ စိတ်သဘောထား ခင်ဗျားတို့မှာ ရှိလာအောင် ကူညီပေးပါစေ။”—ရော. ၁၅:၅။
၁၊ ၂။ (က) ဘုရားတရားစိတ်ဓာတ်ကို လူများစွာ ဘယ်လို ရှုမြင်ကြသလဲ။ (ခ) ဘုရားတရားစိတ်ဓာတ်နဲ့ပတ်သက်တဲ့ ဘယ်မေးခွန်းတွေကို သုံးသပ်ကြမလဲ။
“စွမ်းအားတော် လမ်းပြမှုနောက် လိုက်လို့ ပိုပျော်ရွှင်တယ်။ နေ့စဉ် စမ်းသပ်မှုတွေကို အောင်မြင်စွာ ကိုင်တွယ်ဖြေရှင်းနိုင်လာတယ်” လို့ ကနေဒါနိုင်ငံက ညီအစ်မတစ်ယောက် ပြောတယ်။ ဘရာဇီးနိုင်ငံက ညီအစ်ကိုတစ်ယောက်ကလည်း “စွမ်းအားတော် လမ်းပြမှုနောက် လိုက်ဖို့ ကြိုးစားခဲ့လို့ အိမ်ထောင်သက် ၂၃ နှစ်လုံး အလွန်ပျော်ရွှင်ခဲ့တယ်” လို့ပြောတယ်။ ဖိလစ်ပိုင်နိုင်ငံက ညီအစ်ကိုတစ်ယောက်က “စွမ်းအားတော် လမ်းပြမှုနောက် လိုက်တဲ့အတွက် စိတ်ငြိမ်သက်မှု ရတယ်။ ဒါက နောက်ခံအမျိုးမျိုးရှိတဲ့ ညီအစ်ကိုတွေနဲ့ ဆက်ဆံရာမှာ ကူညီပေးတယ်” လို့ပြောတယ်။
၂ အဲဒီလိုစကားတွေက စွမ်းအားတော် လမ်းပြမှုနောက် လိုက်ခြင်းကို နှစ်လို့ဖွယ် ဖြစ်စေတယ်။ ဒါကြောင့် ‘အထက်ပါ အကျိုးကျေးဇူးတွေကို ခံစားနိုင်ဖို့ စွမ်းအားတော် လမ်းပြမှုနောက် လိုက်တဲ့သူ ဘယ်လို ဖြစ်နိုင်မလဲ’ လို့ ကိုယ့်ကိုယ်ကိုယ် မေးပါ။ ဒါပေမဲ့ အဲဒီမေးခွန်းကို မဖြေခင် စွမ်းအားတော် လမ်းပြမှုနောက် လိုက်သူ၊ ဘုရားတရားစိတ်ဓာတ် ရှိသူနဲ့ပတ်သက်တဲ့ ကျမ်းစာအဆိုကို ရှင်းလင်းစွာ နားလည်ထားဖို့ လိုတယ်။ ဒီဆောင်းပါးမှာ မေးခွန်းသုံးခုကို သုံးသပ်ကြမယ်။ (၁) စွမ်းအားတော် လမ်းပြမှုနောက် လိုက်တဲ့သူဆိုတာ ဘာကို ဆိုလိုသလဲ။ (၂) ဘုရားတရားစိတ်ဓာတ် တိုးပွားနိုင်ဖို့ ဘယ်
ပုံသက်သေတွေက ကူညီပေးမလဲ။ (၃) “ခရစ်တော်ရဲ့ စိတ်သဘောထား” ရှိဖို့ ကြိုးစားတာက စွမ်းအားတော် လမ်းပြမှုနောက် လိုက်ဖို့ ဘယ်လို ကူညီပေးမလဲ။စွမ်းအားတော် လမ်းပြမှုနောက် လိုက်သူဆိုတာ ဘာကို ဆိုလိုသလဲ
၃။ စိတ်အလိုလိုက်သူနဲ့ စွမ်းအားတော် လမ်းပြမှုနောက် လိုက်သူကို ကျမ်းစာမှာ ဘယ်လို ခွဲခြားဖော်ပြထားသလဲ။
၃ “စွမ်းအားတော်ရဲ့ လမ်းပြမှုနောက်ကို လိုက်တဲ့သူ” နဲ့ “စိတ်အလိုလိုက်တဲ့သူ” ကို တမန်တော် ပေါလု ခွဲခြားဖော်ပြခဲ့တယ်။ (၁ ကောရိန္သု ၂:၁၄-၁၆ ကိုဖတ်ပါ။) ကွာခြားချက်က ဘာလဲ။ “စိတ်အလိုလိုက်တဲ့သူ” က “ဘုရားသခင့်စွမ်းအားတော် ဖော်ပြတဲ့အရာတွေကို လက်မခံဘူး။ ဒါတွေဟာ သူ့အတွက် မိုက်မဲတဲ့အရာ ဖြစ်နေတယ်။ . . . ဒါတွေကို . . . သူနားမလည်နိုင်ဘူး။” “စွမ်းအားတော်ရဲ့ လမ်းပြမှုနောက်ကို လိုက်တဲ့သူ” ကတော့ “အရာခပ်သိမ်းကို စစ်ဆေးတတ်တယ်။” “ခရစ်တော်ရဲ့ စိတ်သဘောထား ရှိတယ်။” စွမ်းအားတော် လမ်းပြမှုနောက် လိုက်ဖို့ ကျွန်တော်တို့ကို ပေါလု အားပေးတယ်။ စိတ်အလိုလိုက်တဲ့သူနဲ့ စွမ်းအားတော် လမ်းပြမှုနောက် လိုက်တဲ့သူတို့ ဘယ်နည်းတွေနဲ့လည်း ကွာခြားသေးသလဲ။
၄၊ ၅။ စိတ်အလိုလိုက်သူတွေရဲ့ အကျင့်စရိုက်တွေက ဘာတွေလဲ။
၄ စိတ်အလိုလိုက်တဲ့သူရဲ့ သဘောထားကို ဦးစွာ သုံးသပ်ကြည့်ပါ။ လောက,က သွေးသားဆန္ဒကို အဓိကထားတယ်။ အဲဒါက “နာခံမှုမရှိသူတွေဆီမှာ ရှင်သန်လှုပ်ရှားနေ” တဲ့ စိတ်ဓာတ်ဖြစ်တယ်လို့ ပေါလု ဖော်ပြတယ်။ (ဧ. ၂:၂) အဲဒီစိတ်ဓာတ်က လူအများ မိုးခါးရေသောက်ရင် လိုက်သောက်ပါဆိုတဲ့ သဘောထားမျိုး ရှိစေတယ်။ ဒါကြောင့် အများစုက ကိုယ်မှန်တယ် ထင်တဲ့အတိုင်း လုပ်ကြတယ်။ ဘုရားသခင့် စံနှုန်းတွေအတိုင်း ကျင့်ကြံဖို့ မကြိုးစားကြတော့ဘူး။ စိတ်အလိုလိုက်တဲ့သူဟာ ဂုဏ်၊ စည်းစိမ်အတွက် အလွန်အမင်း ပူပန်တတ်တယ်။ ကိုယ့်အခွင့်အရေးကို ကာကွယ်တတ်တယ်။
၅ စိတ်အလိုလိုက်သူဖြစ်ကြောင်း ဘယ်လို ခွဲခြားနိုင်သေးသလဲ။ “အပြစ်ရှိတဲ့ အကျင့်” ကျင့်တဲ့သူတွေ ပါတယ်။ (ဂလ. ၅:၁၉-၂၁) ကောရိန္သုအသင်းတော်ကို ရေးတဲ့ ပထမစာမှာ သွေးသားဆန္ဒနောက် လိုက်သူတွေရဲ့ တခြားအကျင့်စရိုက်တွေကို ဖော်ပြထားတယ်။ စိတ်ဝမ်းခွဲခြင်း၊ ဘက်လိုက်ခြင်း၊ ငြင်းခုံခြင်း၊ တရားစွဲခြင်း၊ ဦးစီးမှုကို မလေးမြတ်ခြင်း၊ အစားအသောက် လွန်ကြူးခြင်းတို့ ပါဝင်တယ်။ သွေးဆောင်မှုတွေ ကြုံရတဲ့အခါ စိတ်အလိုလိုက်တဲ့သူက အားနည်းပြီး အလျှော့ပေးတတ်တယ်။ (ပညာ. ၇:၂၁၊ ၂၂) “ဘုရားသခင့် စွမ်းအားတော် မရှိ” တော့တဲ့အထိ ယိုယွင်းသွားသူတွေအကြောင်း ယုဒ ပြောခဲ့တယ်။—ယု. ၁၈၊ ၁၉။
၆။ စွမ်းအားတော် လမ်းပြမှုနောက် လိုက်သူကို ဘယ်လို သိမြင်နိုင်သလဲ။
၆ “စွမ်းအားတော်ရဲ့ လမ်းပြမှုနောက်ကို လိုက်တဲ့သူ” ဆိုတာကော ဘာလဲ။ ဘုရားသခင်ကို အဓိကထားတယ်။ စိတ်အလိုလိုက်သူနဲ့ ဆန့်ကျင်တယ်။ “ဘုရားသခင်ကို အတုယူ” ဖို့ ကြိုးစားတယ်။ (ဧ. ၅:၁) ကိစ္စရပ်တွေကို ယေဟောဝါ ရှုမြင်စဉ်းစားသလို ရှုမြင်စဉ်းစားဖို့ ကြိုးစားတယ်။ သူတို့အတွက် ဘုရားသခင်ဟာ တကယ့်ပုဂ္ဂိုလ် ဖြစ်တယ်။ စိတ်အလိုလိုက်တဲ့သူနဲ့ မတူဘဲ ယေဟောဝါရဲ့ စံနှုန်းတွေအတိုင်း ကျင့်ကြံနေထိုင်ဖို့ ကြိုးစားတယ်။ (ဆာ. ၁၁၉:၃၃။ ၁၄၃:၁၀) အပြစ်ရှိတဲ့အကျင့်တွေကို အာရုံမစိုက်ဘဲ “စွမ်းအားတော်ကြောင့် ဖြစ်ပေါ်လာတဲ့ အရည်အသွေးတွေ” တင်ပြဖို့ ကြိုးစားတယ်။ (ဂလ. ၅:၂၂၊ ၂၃) “စွမ်းအားတော် လမ်းပြမှုနောက် လိုက်ခြင်း” အကြောင်း နားလည်ဖို့ ဒီအချက်ကို စဉ်းစားကြည့်ပါ– စီးပွားရေးသမားက စီးပွားရေးအကြောင်းပဲ စဉ်းစားတယ်။ အဲဒီလိုပဲ စွမ်းအားတော် လမ်းပြမှုနောက် လိုက်သူကလည်း ဘုရားတရား၊ ဘာသာတရားကို တန်ဖိုးထားတယ်။
၇။ စွမ်းအားတော် လမ်းပြမှုနောက် လိုက်သူအကြောင်း ကျမ်းစာမှာ ဘာပြောထားသလဲ။
၇ စွမ်းအားတော် လမ်းပြမှုနောက် လိုက်တဲ့သူတွေကို ကျမ်းစာမှာ ချီးမွမ်းထားတယ်။ မဿဲ ၅:၃ မှာ “ဘုရားသခင်ကို မှီခိုဖို့ လိုအပ်မှန်း သိမြင်သူတွေ ပျော်ရွှင်ချမ်းမြေ့တယ်။ ကောင်းကင်နိုင်ငံဟာ သူတို့အတွက် ဖြစ်လိမ့်မယ်” လို့ပြောတယ်။ ရောမ ၈:၆ မှာ စွမ်းအားတော် လမ်းပြမှုနောက် လိုက်ခြင်းရဲ့ အကျိုးကျေးဇူးတွေကို ဖော်ပြပြီး “အပြစ်ရှိတဲ့အရာတွေဆီ စိတ်ရောက်နေတာက သေစေနိုင်တယ်။ စွမ်းအားတော်နဲ့ဆိုင်တဲ့ အရာတွေဆီ စိတ်ရောက်နေတာက အသက်ရှင်ခြင်းနဲ့ ငြိမ်သက်ခြင်းကို ရရှိစေနိုင်တယ်” လို့ပြောထားတယ်။ ဘုရားရေးရာကိစ္စတွေကို အာရုံစိုက် ခြင်းအားဖြင့် ဘုရားသခင်နဲ့ သင့်မြတ်ငြိမ်သက်မှု၊ စိတ်ငြိမ်သက်မှု၊ ထာဝရအသက် အလားအလာ ရရှိတယ်။
၈။ ဘုရားတရားစိတ်ဓာတ် မွေးမြူဖို့၊ ထိန်းသိမ်းထားဖို့ ဘာကြောင့် ကြိုးစားရမလဲ။
၈ အန္တရာယ်ရှိတဲ့ဝန်းကျင်မှာ ကျွန်တော်တို့ နေထိုင်ကြရတယ်။ စိတ်အလိုလိုက်တဲ့ သဘောထားတွေ ပျံ့နှံ့နေတဲ့အတွက် ဘုရားတရားစိတ်ဓာတ် ရှိဖို့၊ ထိန်းသိမ်းဖို့ ကြိုးစားရမယ်။ ဘုရားရေးရာစိတ်ဓာတ် ပျောက်သွားရင် ညစ်ညမ်းတဲ့ လောက “စိတ်ဓာတ်” ဝင်လာနိုင်တယ်။ အဲဒီလို မဖြစ်အောင် ဘာက ကာကွယ်ပေးမလဲ။ ဘုရားတရားစိတ်ဓာတ် ဘယ်လို မွေးမြူနိုင်သလဲ။
သင်ယူရမယ့် ပုံသက်သေများ
၉။ (က) ဘုရားတရားစိတ်ဓာတ် မွေးမြူဖို့ ဘာက ကူညီပေးနိုင်သလဲ။ (ခ) စွမ်းအားတော် လမ်းပြမှုနောက် လိုက်တဲ့ ဘယ်သူတွေရဲ့ ပုံသက်သေတွေကို သုံးသပ်ကြမလဲ။
၉ ကလေးတစ်ယောက်ဟာ မိဘတွေကို ကြည့်ခြင်း၊ မိဘတွေရဲ့ ပုံသက်သေကောင်းကို တုပခြင်းအားဖြင့် ရင့်ကျက်လာနိုင်တယ်။ အလားတူပဲ ဘုရားတရားဘက် သန်စွမ်းသူတွေကို ကြည့်ခြင်း၊ တုပခြင်းအားဖြင့် ဘုရားတရားစိတ်ဓာတ် မွေးမြူနိုင်တယ်။ ဒါပေမဲ့ သွေးသားဆန္ဒကို အဓိကထားတဲ့သူတွေကတော့ သတိပေးပုံနမူနာတွေ ဖြစ်ကြတယ်။ (၁ ကော. ၃:၁-၄) ကျမ်းစာမှာ အဲဒီပုံသက်သေနှစ်မျိုးစလုံး ပါဝင်တယ်။ ဒါပေမဲ့ ကျွန်တော်တို့ရဲ့ ပန်းတိုင်က စွမ်းအားတော် လမ်းပြမှုနောက် လိုက်ဖို့ ဖြစ်တာကြောင့် တုပစရာကောင်းတဲ့ ပုံသက်သေတွေကိုပဲ ကြည့်ကြစို့။ ယာကုပ်၊ မာရိ၊ ယေရှုတို့ရဲ့ ပုံသက်သေတွေကို သုံးသပ်ကြရအောင်။
ယာကုပ်ရဲ့ ပုံသက်သေတွေကနေ ဘာသင်ယူနိုင်သလဲ (အပိုဒ် ၁၀ ကိုကြည့်ပါ)
၁၀။ စွမ်းအားတော် လမ်းပြမှုနောက် လိုက်ကြောင်း ယာကုပ် ဘယ်လို ဖော်ပြခဲ့သလဲ။
၁၀ အရင်ဆုံး ယာကုပ်ရဲ့ ပုံသက်သေကို သုံးသပ်ကြည့်ပါ။ ကျွန်တော်တို့ အများစုလိုပဲ ယာကုပ်ရဲ့ ဘဝဟာ ခက်ခဲတယ်။ စိတ်အလိုလိုက်တဲ့၊ မိမိကို သတ်ချင်နေတဲ့ အစ်ကို ဧသောကို သည်းခံခဲ့ရတယ်။ ကလိမ်ကျတဲ့၊ အမြတ်ထုတ်ချင်တဲ့ ယောက္ခမနဲ့လည်း ဆက်ဆံခဲ့ရတယ်။ ဒါပေမဲ့ ယာကုပ်ဟာ “စိတ်အလိုလိုက်တဲ့” လူတွေကြားမှာ စွမ်းအားတော် လမ်းပြမှုနောက် လိုက်ခဲ့တယ်။ အာဗြဟံကို ပေးတဲ့ကတိကို ယုံကြည်တယ်။ ယေဟောဝါရဲ့ ရည်ရွယ်ချက် ပြည့်စုံရေးမှာ အထူးကဏ္ဍကနေ ပါဝင်မယ့် မိသားစုကိုလည်း ပြုစုစောင့်ရှောက်ခဲ့တယ်။ (က. ၂၈:၁၀-၁၅) ယာကုပ်ရဲ့စကားနဲ့ လုပ်ရပ်တွေက ယေဟောဝါရဲ့ စံနှုန်းတွေနဲ့ အလိုတော်ကို စိတ်စွဲမှတ်ထားကြောင်း ဖော်ပြတယ်။ ဥပမာ၊ ဧသော ခြိမ်းခြောက်တဲ့အခါ ဘုရားသခင်ဆီ ယာကုပ် ဒီလိုဆုတောင်းခဲ့တယ်– “အစ်ကိုဧသောရဲ့ လက်ကနေ ကယ်တင်ပေးပါလို့ ဆုတောင်းပါတယ်။ . . . ကိုယ်တော်က ‘မင်းကို ငါကောင်းချီးပေးမယ်။ မင်းရဲ့မျိုးနွယ်ကို ပင်လယ်သဲပွင့်တွေလို မရေတွက်နိုင်အောင် များပြားစေမယ်’ လို့ပြောခဲ့ပါပြီ။” (က. ၃၂:၆-၁၂) မိမိနဲ့ ဘိုးဘေးတွေကို ပေးထားတဲ့ ယေဟောဝါရဲ့ ကတိကို ယုံကြည်ကြောင်း၊ ဘုရားသခင့် အလိုတော်၊ ရည်ရွယ်ချက်နဲ့အညီ နေထိုင်လိုစိတ်ရှိကြောင်း ထင်ရှားပါတယ်။
မာရိရဲ့ ပုံသက်သေတွေကနေ ဘာသင်ယူနိုင်သလဲ (အပိုဒ် ၁၁ ကိုကြည့်ပါ)
၁၁။ မာရိ စွမ်းအားတော် လမ်းပြမှုနောက် လိုက်ကြောင်း ဘာက ဖော်ပြသလဲ။
၁၁ မာရိရဲ့ ပုံသက်သေကိုလည်း သုံးသပ်ကြည့်ပါ။ ယေရှုရဲ့ မိခင်ဖြစ်ဖို့ မာရိကို ဘာကြောင့် ယေဟောဝါ ရွေးချယ်ခဲ့သလဲ။ စွမ်းအားတော် လမ်းပြမှုနောက် လိုက်သူ ဖြစ်လို့ပါပဲ။ ကျွန်တော်တို့ ဘယ်လို သိရသလဲ။ ဆွေမျိုး ဇာခရိနဲ့ ဧလိရှဗက်ဆီ သွားလည်တဲ့အခါ ပြောခဲ့တဲ့ မာရိရဲ့ ချီးမွမ်းစကားတွေက ဘုရားတရားစိတ်ဓာတ် ရှိကြောင်း အခိုင်အမာ ဖော်ပြတယ်။ (လုကာ ၁:၄၆-၅၅ ကိုဖတ်ပါ။) ဘုရားသခင့် စကားတော်ကို အလွန်နှစ်သက်ကြောင်း၊ ဟီဘရူးကျမ်းစောင်တွေနဲ့ အကျွမ်းတဝင်ရှိကြောင်း ဖော်ပြတယ်။ (က. ၃၀:၁၃။ ၁ ရှ. ၂:၁-၁၀။ မာလ. ၃:၁၂) မာရိနဲ့ ယောသပ်တို့ဟာ အိမ်ထောင်ကျခါစ ဖြစ်ပေမဲ့ ယေရှုကို မွေးတဲ့အထိ မပေါင်းသင်းဘူး။ အဲဒါက ဘာကို ဖော်ပြသလဲ။ နှစ်ယောက်စလုံးဟာ ကိုယ့်စိတ်အလို ဖြည့်ဆည်းရေးထက် ယေဟောဝါအလိုတော်ကို ပိုအလေးထားကြောင်း ဖော်ပြပါတယ်။ (မ. ၁:၂၅) မာရိဟာ ယေရှုဘဝမှာ ကြုံခဲ့တာတွေ၊ သူပြောခဲ့တဲ့ စကားတွေကို ‘စိတ်ထဲ အသေအချာ မှတ်ထားတယ်။’ (လု. ၂:၅၁) မေရှိယနဲ့ပတ်သက်တဲ့ ဘုရားသခင့် ရည်ရွယ်ချက်ကို တကယ် စိတ်ဝင်စားခဲ့တယ်။ မာရိရဲ့ ပုံသက်သေက ကျွန်တော်တို့လည်း ဘုရားသခင့် အလိုတော်ကို ဘဝမှာ ဘယ်လို ဦးစားထားနိုင်ကြောင်း စဉ်းစားဖို့ ကူညီပေးတယ် မဟုတ်လား။
၁၂။ (က) ယေရှုဟာ ဖခင်နဲ့ ဘယ်လိုနည်းနဲ့ ဆင်တူသလဲ။ (ခ) ယေရှုရဲ့ ပုံသက်သေကို ဘယ်လို တုပနိုင်သလဲ။ (ဆောင်းပါးအစမှာပါတဲ့ ပုံကို ကြည့်ပါ။)
၁၂ အသက်ရှင်ခဲ့သမျှမှာ စွမ်းအားတော် လမ်းပြမှုနောက် လိုက်တဲ့ အကောင်းဆုံး ပုံသက်သေရှင်က ဘယ်သူလဲ။ ယေရှုပါပဲ။ အသက်တာနဲ့ အမှုဆောင်လုပ်ငန်းတစ်လျှောက် ဖခင် ယေဟောဝါကို တုပချင်ကြောင်း ဖော်ပြခဲ့တယ်။ ယေဟောဝါလို စဉ်းစားတွေးခေါ် လုပ်ဆောင်ခဲ့တယ်။ ဘုရားသခင့် အလိုတော်နဲ့ စံနှုန်းတွေအတိုင်း နေထိုင်ခဲ့တယ်။ (ယော. ၈:၂၉။ ၁၄:၉။ ၁၅:၁၀) ဥပမာ၊ ယေဟောဝါရဲ့ ထောက်ထားစာနာမှုကို ပရောဖက် ဟေရှာယ ဘယ်လို ဖော်ပြထားကြောင်း သတိပြုပါ။ အဲဒီဖော်ပြချက်ကို ယေရှုရဲ့ ခံစားချက်နဲ့ပတ်သက်ပြီး ခရစ်ဝင်ကျမ်းရေးသူ မာကုရဲ့ ဖော်ပြချက်နဲ့ နှိုင်းယှဉ်ကြည့်ပါ။ (ဟေရှာယ ၆၃:၉။ မာကု ၆:၃၄ ကိုဖတ်ပါ။) အကူအညီ လိုအပ်သူတွေကို ကျွန်တော်တို့လည်း ယေရှုလိုပဲ ထောက်ထားစာနာဖို့ အသင့်ရှိကြသလား။ ယေရှုဟာ သတင်းကောင်း ဟောပြောသွန်သင်ခြင်းလုပ်ငန်းမှာ ကိုယ့်ကိုယ်ကိုယ် မြှုပ်နှံခဲ့တယ်။ (လု. ၄:၄၃) အဲဒီသဘောထား၊ လုပ်ရပ်အားလုံးဟာ စွမ်းအားတော် လမ်းပြမှုနောက် လိုက်သူဖြစ်ကြောင်း မှတ်သားဖော်ပြတယ်။
၁၃၊ ၁၄။ (က) စွမ်းအားတော် လမ်းပြမှုနောက် လိုက်နေတဲ့ မျက်မှောက်ခေတ် ပုံသက်သေရှင်တွေဆီကနေ ဘာသင်ယူနိုင်သလဲ။ (ခ) ဥပမာတစ်ခု ပြောပြပါ။
၁၃ ကျမ်းစာပုံသက်သေတွေအပြင် ဒီနေ့ခေတ်မှာလည်း ခရစ်တော်ရဲ့ စိတ်သဘောမျိုး တင်ပြဖို့၊ စွမ်းအားတော် လမ်းပြမှုနောက် လိုက်ဖို့ ကြိုးစားနေတဲ့သူ များစွာ ရှိပါတယ်။ အမှုဆောင်လုပ်ငန်းမှာ သူတို့ရဲ့ ဇွဲ၊ ဧည့်ဝတ်ကျေပွန်မှု၊ ထောက်ထားစာနာမှု၊ တခြား အရည်အသွေးကောင်းတွေကို သတိပြုမိနိုင်ပါတယ်။ ကျွန်တော်တို့လိုပဲ သူတို့လည်း ဘုရားရေးရာ အရည်အသွေးတွေ မွေးမြူဖို့ ကြိုးစားရင်း အားနည်းချက်တွေ၊ မစုံလင်မှုတွေကို တိုက်လှန်နေကြရတယ်။ ဘရာဇီးနိုင်ငံက ညီအစ်မ ရေချယ် ဒီလိုပြောတယ်– “လောကရဲ့ ဖက်ရှင်တွေကို ကြိုက်လို့ ဣန္ဒြေရှိရှိ မဝတ်စားခဲ့ဘူး။ ဒါပေမဲ့ အမှန်တရား သိလာတော့ စွမ်းအားတော် လမ်းပြမှုနောက် လိုက်ဖို့ ကြိုးစားခဲ့တယ်။ ပြောင်းလဲဖို့ မလွယ်ဘူး။ ဒါပေမဲ့ အခု ပိုပျော်နေပြီ။ ဘဝရဲ့ စစ်မှန်တဲ့ ရည်ရွယ်ချက် ရှာတွေ့နေပြီ။”
၁၄ ဖိလစ်ပိုင်နိုင်ငံက ရေလင်းမှာ အခက်အခဲ နောက်တစ်မျိုး ရှိတယ်။ ဘဝရှေ့ရေးအတွက် အဆင့်မြင့်ပညာရေး မဿဲ ၆:၃၃၊ ၃၄ မှာပါတဲ့ ယေဟောဝါရဲ့ ကတိကို ယုံကြည်တဲ့ သက်ရှိပုံသက်သေ ဖြစ်လာတယ်။ “ကျွန်မကို ယေဟောဝါ စောင့်ရှောက်မယ်ဆိုတာ အသေအချာ သိထားတယ်” လို့ ရေလင်း ပြောတယ်။ ကိုယ့်အသင်းတော်မှာ အလားတူ ပုံသက်သေရှင်တွေ ရှိနိုင်ပါတယ်။ ခရစ်တော်နောက် လိုက်နေတဲ့ အဲဒီသစ္စာရှိသူတွေကို တုပဖို့ လှုံ့ဆော်ခံရတယ် မဟုတ်လား။—၁ ကော. ၁၁:၁။ ၂ သက်. ၃:၇။
လိုက်စားဖို့၊ အလုပ်ကောင်းကောင်း ရဖို့ အာရုံစိုက်ခဲ့တယ်။ “ဘုရားရေးရာ ပန်းတိုင်တွေ ဝေဝါးလာတယ်။ ဒါပေမဲ့ ဘဝမှာ အလုပ်ထက် အရေးကြီးတဲ့အရာတစ်ခုခု လိုနေတယ်ဆိုတာ သိလာတယ်။ ဒါကြောင့် ယေဟောဝါကို အမှုဆောင်ဖို့ ပြန်အာရုံစိုက်ခဲ့ရတယ်” လို့ ပြောတယ်။ အဲဒီအချိန်ကစပြီး ရေလင်းဟာ“ခရစ်တော်ရဲ့ စိတ်သဘောထား” ရှိပါ
၁၅၊ ၁၆။ (က) ခရစ်တော်နဲ့ တူဖို့ ဘာလုပ်ရမလဲ။ (ခ) “ခရစ်တော်ရဲ့ စိတ်သဘောထား” မျိုးရှိကြောင်း ဘယ်လို တင်ပြနိုင်သလဲ။
၁၅ ခရစ်တော်ကို ကျွန်တော်တို့တစ်ဦးစီ ဘယ်လို တုပနိုင်သလဲ။ ၁ ကောရိန္သု ၂:၁၆ မှာ “ခရစ်တော်ရဲ့ စိတ်သဘောထား” ရှိခြင်းအကြောင်း ဖော်ပြထားတယ်။ ရောမ ၁၅:၅ မှာ “ခရစ်တော်ယေရှုမှာရှိတဲ့ စိတ်သဘောထား” ရှိခြင်းအကြောင်း ပြောထားတယ်။ ခရစ်တော်နဲ့တူဖို့ ခရစ်တော်ရဲ့ စဉ်းစားပုံ၊ ကိုယ်ရည်ကိုယ်သွေးတွေကို အပြည့်အဝ သိထားရမယ်။ ပြီးတော့ ခရစ်တော်ရဲ့ ခြေရာအတိုင်း လိုက်လျှောက်ရမယ်။ ယေရှုရဲ့ စိတ်သဘောက ဘုရားသခင်နဲ့ ဆက်ဆံရေးကို အဓိကထားတယ်။ ဒါကြောင့် ယေရှုနဲ့တူရင် ယေဟောဝါနဲ့ ပိုတူလာတယ်။ ဒီအချက်တွေက ယေရှုလို စဉ်းစားဖို့ ဘယ်လောက် အရေးကြီးကြောင်း ရှင်းလင်းစွာ ဖော်ပြတယ်။
၁၆ ယေရှုလို ဘယ်လို စဉ်းစားနိုင်သလဲ။ ယေရှုရဲ့ တပည့်တွေက ယေရှုရဲ့ အံ့ဖွယ်အမှုတွေကို မြင်ခဲ့ကြတယ်။ ဟောပြောချက်တွေ ကြားခဲ့ကြတယ်။ လူပေါင်းစုံနဲ့ ဘယ်လို ဆက်ဆံခဲ့ကြောင်း တွေ့ခဲ့ကြတယ်။ ဘုရားရေးရာ အခြေခံမူတွေကို ဘယ်လို ကျင့်သုံးခဲ့ကြောင်း သတိပြုခဲ့ကြတယ်။ “သူလုပ်ခဲ့တဲ့အရာတွေနဲ့ ပတ်သက်လာရင် ကျွန်တော်တို့ဟာ မျက်မြင်သက်သေတွေပဲ” လို့ ပြောကြတယ်။ (တ. ၁၀:၃၉) ကျွန်တော်တို့ကတော့ ယေရှုကို တိုက်ရိုက် မမြင်တွေ့နိုင်ဘူး။ ဒါပေမဲ့ ကျွန်တော်တို့ရဲ့ စိတ်ထဲမှာ ယေရှုရဲ့ ကိုယ်ရည်ကိုယ်သွေးတွေ အသက်ဝင်လာစေဖို့ ခရစ်ဝင်ကျမ်းမှတ်တမ်းတွေကို ယေဟောဝါ မေတ္တာပါစွာ ပြင်ဆင်ပေးထားတယ်။ မဿဲ၊ မာကု၊ လုကာ၊ ယောဟန်ကျမ်းတွေကို ဖတ်ရှုတွေးတောခြင်းအားဖြင့် ခရစ်တော်ရဲ့ စိတ်သဘောကို ရရှိနိုင်ပါတယ်။ ဒီနည်းနဲ့ “သူ့ခြေရာကို ထက်ကြပ်မကွာ လိုက်လျှောက်” နိုင်ပြီး “ခရစ်တော်လို စိတ်သဘောထားနဲ့ ကိုယ့်ကိုယ်ကိုယ် အားဖြည့်ထား” နိုင်ပါတယ်။—၁ ပေ. ၂:၂၁။ ၄:၁။
၁၇။ ခရစ်တော်လို စဉ်းစားတွေးခေါ်ခြင်းက ဘယ်လို ကူညီပေးမလဲ။
၁၇ ခရစ်တော်လို စဉ်းစားဖို့ သင်ယူခြင်းက ကျွန်တော်တို့ကို ဘယ်လို ကူညီပေးမလဲ။ အာဟာရရှိတဲ့ အစားအစာက ခန္ဓာကိုယ်ကို အားရှိစေသလို ခရစ်တော်ရဲ့ စဉ်းစားပုံကို တွေးတောခြင်းက ဘုရားတရားစိတ်ဓာတ်ကို အားရှိစေတယ်။ ဘယ်အခြေအနေမှာ ခရစ်တော် ဘယ်လို လုပ်မယ်ဆိုတာ တဖြည်းဖြည်း သိလာတယ်။ ဒါက သိစိတ် ကြည်လင်စေတဲ့၊ ဘုရားသခင့် မျက်နှာသာ ရစေတဲ့ ဆုံးဖြတ်ချက်ကောင်းတွေ ချဖို့ ကူညီပေးတယ်။ အဲဒီအကျိုးကျေးဇူးတွေက “ယေရှုခရစ်ကို အတုယူ” ဖို့ အကြောင်းကောင်းတွေ ဖြစ်မှန်း သဘောတူတယ် မဟုတ်လား။—ရော. ၁၃:၁၄။
၁၈။ စွမ်းအားတော် လမ်းပြမှုနောက် လိုက်သူဖြစ်ခြင်းအကြောင်း ဆွေးနွေးမှုကနေ ဘာသိရှိခဲ့ရသလဲ။
၁၈ စွမ်းအားတော် လမ်းပြမှုနောက် လိုက်ခြင်းဆိုတာ ဘာကို ဆိုလိုမှန်း သုံးသပ်ခဲ့ကြပြီ။ စွမ်းအားတော် လမ်းပြမှုနောက် လိုက်သူတွေရဲ့ ပုံသက်သေတွေဆီကနေ သင်ယူနိုင်ကြောင်းလည်း သိရှိခဲ့ရပြီ။ “ခရစ်တော်ရဲ့ စိတ်သဘောထား” ရှိခြင်းက ဘုရားသခင်နဲ့ ဆက်ဆံရေး ခိုင်မာလာအောင် ကူညီပေးကြောင်း သိခဲ့ရပြီ။ ဒါပေမဲ့ ကျွန်တော်တို့ စဉ်းစားသင့်တဲ့ တခြားကဏ္ဍတွေလည်း ရှိသေးတယ်။ ဥပမာ၊ ကိုယ့်ရဲ့ ဘုရားတရားစိတ်ဓာတ် ဘယ်လောက် ခိုင်မာကြောင်း ဘယ်လို ဆန်းစစ်နိုင်သလဲ။ အဲဒီစိတ်ဓာတ်ကို ပျိုးထောင်ဖို့ ဘာလုပ်နိုင်သေးသလဲ။ နေ့စဉ် ဘဝအပေါ် ဘယ်လို အကျိုးသက်ရောက်မလဲ။ ဒီမေးခွန်းတွေကို နောက်ဆောင်းပါးမှာ အဖြေပေးသွားပါမယ်။