1, 2. 1) ¿Keniuj kinpaleuiani miakej tokniuan mokauaskej maj kinixyekana yektikatsin espíritu? 2) ¿Toni netajtanilmej tiknankiliskej?

SE TOKNIUJ siuat kayot Canadá kijtoua ke mokauas maj kiixyekana yektikatsin espíritu kichiua maj okachi yolpaki uan maj ueli kiixnamiki kuejmolmej tein kipia mojmostaj. Se tokniuj takat kayot Brasil akin monamiktij veintitrés xiujmej achto kijtoua ke mokauaskej maj kinixyekana yektikatsin espíritu kinpaleuiani yejua uan inamik maj yolpakikan. Uan se tokniuj kayot Filipinas kijtoua ke mokauas maj kiixyekana yektikatsin espíritu kipaleuia maj yolseujto uan maj okachi kuali mouika iniuan nochi tataman tokniuan.

² Kemej tikitaj, semi tepaleuia komo se mokaua maj teixyekana yektikatsin espíritu. Tinochin tiknekij tikpiaskej nejon nepaleuil. Yejua ika, xa timotajtaniskej keniuj uelis okachi titanemiliskej kemej Dios tanemilia. Achto moneki kuali tikajsikamatiskej tein Biblia tamachtia ika nejin. Itech nejin tamachtilis, tiknankiliskej eyi netajtanilmej. Yekinika, toni kijtosneki se mokauas maj teixyekana yektikatsin espíritu.  Ojpatika, toni neskayomej techpaleuiskej maj okachi titanemilikan kemej Dios tanemilia. Uan expatika, keniuj techpaleuis maj timokauakan maj techixyekana yektikatsin espíritu komo timochikauaj titanemiliskej kemej Cristo.

3. ¿Keniuj kijtoua Biblia ke tanemilia akin mokaua maj kiixyekana yektikatsin espíritu uan akin sayoj kitayekanaltia itanejnekilis?

³ Tatitanil Pablo kimelauak keniuj tanemilia akin mokaua maj kiixyekana yektikatsin espíritu uan akin sayoj kitayekanaltia itanejnekilis (xikonixtajtolti 1 Corintios 2:14-16, TNM). Akin sayoj kitayekanaltia itanejnekilis “amo kiselia tein temaka iespíritu Dios, porin kiita ke sayoj mijmikiloyot; uan amo ueli kiixmati”. Sayoj ke, akin mokaua maj kiixyekana yektikatsin espíritu “kiyekixejekoua nochi” uan kipia “itanemilil Cristo”. Ompa, Pablo techyolmajxitij maj timokauakan maj techixyekana yektikatsin espíritu. ¿Keniuj no monextiaj nejin ome tanemililmej?

4, 5. ¿Keniuj tanemilia akin sayoj kitayekanaltia itanejnekilis?

⁴ ¿Keniuj tanemilia akin sayoj kitayekanaltia itanejnekilis? Tanemilia kemej akin amo kitekitiliaj Dios. Pablo kijtoj ke nejin tanemilil “kinyoltekitilijtok nochi nekes ten axkan kixnamiktinemij Totajtsin Dios” (Efes. 2:2). Nejin tanemilil kinolinia miakej maj kichiuakan tein oksekin kichiuaj. Sayoj kichiuaj tein kinemiliaj ke kuali yetok uan amo mochikauaj kitakamatiskej itanauatiluan Dios. Akin sayoj kitayekanaltia itanejnekilis okachi ika motekipachoua tomin, keniuj kiitaskej oksekin, oso tein kinemilia ke kinamiki.

⁵ Nejin taltikpakneminij kichiuaj “[tanejnekilis] ten kuika tajtakol” (Gál. 5:19-21). Itech yekinika amat tein kintitanilij tokniuan itech nechikol Corinto, Pablo kijtoj okseki taman tein kichiuaj akin kitayekanaltiaj inintanejnekilis: mokalakiaj itech ininkuejmoluan oksekin, kitemouaj kinxexeloskej taltikpakneminij, kichiuaj maj oksekin taixnamikikan, moteteiluiliaj, amo kinpoujkaitaj akin kipiaj tanauatil uan semi kitayekanaltiaj takuaskej uan tatayiskej. Uan no, amo mochikauaj amo tajtakoskej (Prov. 7:21, 22). Judas kijtoj ke sekin hasta senkis amo kipiaj iespíritu Jiova (Jud. 18, 19).

6. ¿Keniuj tanemilia akin mokaua maj kiixyekana yektikatsin espíritu?

⁶ Akin mokaua maj kiixyekana yektikatsin espíritu semi taman tanemilia. Kitayekanaltia ikuali uikalis iuan Dios uan kitemoua kichiuas teisa kemej yejuatsin (Efes. 5:1). Mochikaua tanemilis kemej Jiova. Kiita ke Dios yekmelauj nemi. Nochipa kitakamati itanauatiluan (Sal. 119:33; 143:10). Kitemoua kinextis itakilo espíritu uan amo kichiuas “[itanejnekilis] ten kuika tajtakol” (Gál. 5:22, 23).

7. ¿Keniuj kijtoua Biblia ke nemij akin mokauaj maj kinixyekana yektikatsin espíritu?

⁷ Jesús kijtoj ke akin mokauaj maj kinixyekana yektikatsin espíritu yolpakij. Yejua kijtoj: “Yolpakij akin kimachiliaj ke moneki motokiskej iuan Dios, porin yejuan pouiskej itech iluikaktekiuajyot” (Mat. 5:3, TNM). Uan Romanos 8:6 kijtoua keyej okachi kuali maj se mokaua maj teixyekana yektikatsin espíritu. Kijtoua: “Kuak tikyoltanemilijtinemij sayo itech totalnamikilis ten kualkui tajtakol, ijkuakon yejua ne techuika ya tech in ixpoliuilis. Pero kuak tiyoltanemilijtinemij sayo itech in tamachilis ten kualkui in [y]ektikatsin [e]spíritu, ijkuakon yejua nojon techualkuilia se yankuik nemilis uan se kualtsin yolseukanemilis”. Komo tiktayekanaltiaj tokuali  uikalis iuan Dios, axkan tikpiaskej yolseuilis iuan uan kuali timomachiliskej, uan satepan uelis tinemiskej nochipaya.

8. ¿Keyej moneki timochikauaskej tiksentokaskej titanemiliskej kemej Dios?

⁸ Tanemilil tein noyampa onkak uelis semi kijtakos tokuali uikalis iuan Dios. Techyoualouaj miakej akin amo tanemiliaj kemej Dios, yejua ika moneki timochikauaskej tikyekpiaskej totanemilil. Komo amo titanemiliaj kemej Jiova, taltikpakneminij uelis techmauaskej ika inintanemilil uan timonejnemiltiskej kemej yejuan. ¿Toni techpaleuis maj amo techpano nejon? Uan ¿keniuj uelis okachi titanemiliskej kemej Dios tanemilia?

9. 1) ¿Toni techpaleuis maj okachi tikchikauakan tokuali uikalis iuan Dios? 2) ¿Toni kuali neskayomej tikitaskej?

⁹ Ijkon kemej konemej kimatij kichiuaskej tein kuali porin kiitaj tein kichiuaj inintatuan, tejuan no techpaleuia maj tikchikauakan tokuali uikalis iuan Dios komo tikchiuaj kemej akin kipiaj se kuali uikalis iuan. Uan no, tein kichiuaj akin sayoj kitayekanaltiaj inintanejnekilis techmachtia tein moneki amo tikchiuaskej (1 Cor. 3:1-4). Itech Biblia, tikajsij ininneskayo akin kichiujkej tein kuali uan tein amo kuali. Itech nejin tamachtilis, tikitaskej kuali neskayot tein kikaujkej Jacob, María uan Jesús.

10. ¿Keniuj kinextij Jacob ke chikauak katka ikuali uikalis iuan Jiova?

¹⁰ Jacob kipanok miak ouijkayomej, ijkon kemej tejuan. Iikniuj, Esaú, kinekik kimiktis. Uan no, imontat kitemoj kikajkayauas miakpa. Sayoj ke, Jacob amo kikauak maj akin kitayekanaltiayaj inintanejnekilis kichiuanij maj kielkaua tein Jiova motenkaujka. Takuaujtamatia ke Dios kichiuaskia tein kiluijka Abrahán, uan nochipa kinyekpiak ichankauan, akin inintech mochiuaskia tein Dios kiixtalijtoya (Gén.  28:10-15). Tein kijtoj uan tein kichiuak kinextij ke semi kipatiuitaya itanauatiluan uan itanejnekilis Jiova. Kemej neskayot, keman kinemilij ke Esaú kiteuiskia, kitataujtij Dios maj kimakixtiani. Kiluij itech inetataujtil: “Tikijtoj: ‘Yekmelauj nimitschiuilis tein kuali, uan nikinchiuas mokoneuan kemej xal itech ueyiat, tein amo ueli se kipoua porin tel miak’” (Gén. 32:6-12). Jacob senkis kinextij ke takuaujtamatia itech tein Jiova motenkaujka iuan uan iniuan iuejkaujtatuan.

11. ¿Toni kinextia ke María kipiaya se kuali uikalis iuan Dios?

¹¹ Axkan maj tikitakan ineskayo María. ¿Keyej Jiova kiixpejpenak maj mochiua imomaj Jesús? Porin kikauak maj iespíritu Dios kiixyekanani. Tikmatij nejin porin kiueyitalij Jiova ika kualtsitsin tajtolmej keman kinkalpanoj ichankauan, Zacarías uan Elisabet (xikonixtajtolti Lucas 1:46-55). Tein kijtoj kinextia ke semi kitasojtaya iTajtol Dios uan ke kuali kiixmatia Escrituras Hebreas (Gén. 30:13; 1 Sam. 2:1-10; Mal. 3:12). Uan keman yejua uan José monamiktijkej, amo mosentekkej hasta satepan ke yolik Jesús. Nejin kinextia ke yejuan okachi kitayekanaltiayaj itanejnekilis Jiova ke inintanejnekilis (Mat. 1:25). Uan no, María kiitak ika nejmachkayot tein kichiuak uan kijtoj Jesús, uan “yoltanemiliaya de toni kijtosnekia” (Luc. 2:51). Semi itech tanemiliaya keniuj mochiuaskia tein Dios motenkaujka ke panoskia iuan Mesías. Maj tikchiuakan kemej yejua uan maj tiknemilikan keniuj tiktayekanaltiskej itanejnekilis Dios.

12. 1) ¿Keniuj Jesús tamati kemej iTajtsin? 2) ¿Keniuj uelis tikchiuaskej kemej Jesús? (Xikonita taixkopin ipeujyan tamachtilis.)

¹² Axkan maj ika titajtokan Jesús. Amo akin okachi kuali mouikani iuan Jiova kemej yejua. Itech nochi inemilis uan keman tanojnotstinemik, kinextij ke kinekia kichiuas kemej iTajtsin, Jiova. Kemej tanemiliaya, tein kimachiliaya uan tein kichiuaya kinextij ke kitayekanaltiaya itanauatiluan uan itanejnekilis Jiova (Juan 8:29; 14:9; 15:10). Kemej neskayot, maj tikitakan tein kijtoj Isaías ika iteiknelilis Dios uan tein kijkuiloj Marcos ika tein kimachiliaya Jesús (xikonixtajtolti Isaías 63:9; Marcos 6:34). ¿Titanemiliaj kemej Jesús uan nochipa tikinikneliaj akin moneki maj se kinpaleui? ¿Tiktayekanaltiaj, ijkon kemej yejua, titanojnotsaskej uan titamachtiskej tein kichiuas iTekiuajyo Dios? (Luc. 4:43.) Komo ijkon tikchiuaj, tiknextiaj ke titanemiliaj kemej Jiova.

13, 14. 1) ¿Toni kuali neskayot techkauiliaj akin tanemiliaj kemej Jiova? 2) Xikonijto se neskayot.

¹³ Axkan, moajsij miakej tokniuan akin tanemiliaj kemej Cristo. Yejuan semi kiuelitaj tanojnotsaskej, kualtakamej uan teikneliaj. Maski tajtakouanij, mochikauaj kipiaskej kualtsitsin kualneskayomej uan kichiuaskej tein Jiova kineki. Rachel, se tokniuj siuat kayot Brasil, kijtoua: “Achto, nikuelitaya nimotalilis tilmaj tein yankuixtok kisaya. Yejua ika, notilmaj amo kuali moitaya. Sayoj ke, keman nimomachtij Biblia, nikajsikamatik ke monekia nimochikauas nitanemilis kemej Dios. Ouij nechkisak nimopatas, sayoj ke okachi niyolpakik”.

¹⁴ Taman tein kipanok Reylene, se tokniuj siuat kayot Filipinas. Maski katka itaixpantijkauj Jiova, kitayekanaltij kiselis se ueyi nemachtil uan kipias se kuali tekit. Satepan, kielkaujtiyajki tein kiixtalijtoya kichiuas itech itekiyo Dios. Yejua kijtoua: “Peuak nikita ke nechpolouaya  teisa, okse taman tein kipiaya okachi ipatiuj ke notekiuj. Yejua ika oksepa peuak niktayekanaltia itekiyo Jiova”. Axkan yejua takuaujtamati itech netenkaualis tein moajsi itech Mateo 6:33, 34. Yejua kijtoua ke senkis kineltoka ke Jiova kiyekpias. Xa itech tonechikol moajsij tokniuan akin kichiuanij teisa kemej nejon. Keman tikitaj keniuj kichiuaj kemej Cristo, ¿melauj ke no tiknekij tikchiuaskej kemej yejuan? (1 Cor. 11:1; 2 Tes. 3:7.)

15, 16. 1) ¿Keniuj uelis tikchiuaskej kemej Cristo? 2) ¿Toni techpaleuis maj tikmatikan keniuj tanemiliaya Jesús?

¹⁵ ¿Keniuj uelis tikchiuaskej kemej Cristo? Itech 1 Corintios 2:16 moijtoua ke moneki titanemiliskej kemej Cristo. Uan Filipenses 2:5 techiluia maj tikpiakan “kuali tamachilis tenika Cristo Jesús tanemilijtinemia”. Yejua ika, komo tiknekij tiyeskij kemej Cristo, moneki tikixmatiskej keniuj tanemiliaya uan keniuj kichiuaya teisa. Yejua okachi kitayekanaltiaya ikuali uikalis iuan Dios. Tiyeskij kemej Jesús okachi techtokia iuan Jiova. Yejua ika, motelneki maj timochikauakan titanemiliskej kemej Jesús.

¹⁶ ¿Keniuj uelis titanemiliskej kemej Cristo? Imomachtijkauan kiitakej keman kichiuak uejueyi tachiualismej, keman kitemakak tanojnotsmej, keniuj kinitaya nochi tataman taltikpakneminij uan keniuj moixyekanaya ika itanemilil Jiova. Yejuan kijtojkej: “Ten Jesús kichiuak tejuan tikitakke” (Hech. 10:39). Tejuan amo ueli tikitaj Jesús. Sayoj ke Jiova kichiuak maj tikpiakan amatajkuilolmej Mateo, Marcos, Lucas uan Juan tein techpaleuiaj maj tikmatikan keniuj tanemiliaya. Komo tikinixtajtoltiaj uan itech titanemiliaj, okachi tikmatiskej nejon. Uan ijkon uelis tiktojtokaskej ineskayo ika miak nejmachkayot tein techpaleuis maj titanemilikan kemej yejua (1 Ped. 2:21; 4:1).

17. ¿Keniuj techpaleuia komo titanemiliaj kemej Jesús?

¹⁷ ¿Keniuj techpaleuis komo titanemiliaj kemej Cristo? Maj tiktalikan se neskayot. Komo tikuaj kuajkuali takual mochikaua tonakayo. No ijkon, komo titanemiliaj itech itanemililuan Cristo kichikaua tokuali uikalis iuan Dios. Ijkon, yolik tikmattiyouij tein yejua kichiuaskia itech tataman ouijkayot. Uan nejin techpaleuis maj tikixpejpenakan tein kiyolpaktis Dios uan tein amo techkuejmolos itech totanemilil. Senkis moita ke motelneki “ma timokemiloltikan ika in uelilis den Totekotsin Jesucristo” (Rom. 13:14).

18. ¿Keniuj nejin tamachtilis kimelauak tein kijtosneki se mokauas maj teixyekana yektikatsin espíritu?

¹⁸ Itech nejin tamachtilis, tikmelaujkej tein kijtosneki se mokauas maj teixyekana yektikatsin espíritu. No tikitakej ke semi techpaleuia ininneskayo taltikpakneminij akin mokaujkej maj kinixyekana yektikatsin espíritu. Uan no tikitakej ke tikpiaskej itanemilil Cristo techpaleuia maj titanemilikan kemej Jiova uan maj okachi kuali timouikakan iuan. Sayoj ke moajsi okseki taman tein no moneki timomachtiskej. Kemej neskayot, ¿keniuj uelis tikmatiskej ox chikauak tokuali uikalis iuan Dios?, ¿keniuj uelis okachi tikchikauaskej? uan ¿keniuj techpaleuis komo chikauak tokuali uikalis iuan Dios? Tiknankiliskej nejin netajtanilmej itech okse tamachtilis.