1, 2. a) ¿Tlenon kijtouaj miyekej itech timoyekanas ika iespíritu santo ToTajtsin? b) ¿Katlejua tlajtoltilistin tikinnankiliskej?

SE TOKNIUJ akin chanti Canadá kijtoua: “Ninoyekanas ika iespíritu santo toTajtsin yokichiuj melak manipaki, niman yonechpaleui manikixnamiki tlaueltin tlen onka mojmostla”. Niman se tokniuj akin chanti Brasil kijtoua: “Nejua iuan nosiuauj itikpiyaj 23 xiuitl ika otonamiktijkej niman melak tipakij pampa tochikauaj toyekanaskej ika iespíritu santo toTajtsin”. Niman se tokniuj akin ualeua Filipinas kijtoua: “Ninoyekanas ika iespíritu santo toTajtsin yokichiuj manikpiya yolseuilistli, niman yonechpaleui kuajli maninouika iuan nochimej tokniuan”.

² Yejuin tlen kijtouaj, techititia ika melak kuajli tla toyekanaj ika iespíritu santo toTajtsin. Ipampa yejuin, kanaj aman totlajtoltiaj: ¿Tlenon noneki nikchiuas niman ijkon ninoyekanas ika iespíritu santo toTajtsin niman noijki nikmachilis tlen kimachiliaj tokniuan? San ika, achto ika tiknankiliskej yejuin, noneki kuajli matikasikamatikan tlen kijtoua Biblia intech akin noyekanaj ika iespíritu santo toTajtsin. Ipan yejuin tlamachtijli, tikinnankiliskej yeyi tlajtoltilistin. 1) ¿Tlenon kijtosneki timoyekanas ika iespíritu santo toTajtsin? 2) ¿Katlejua neskayomej techpaleuiskej matoyekanakan ika iespíritu santo toTajtsin? 3) ¿Kenon techpaleuis matoyekanakan  ika iespíritu santo toTajtsin tla tokojtiliaj tikpiyaskej “itlamachilis Cristo”?

3. Itech tlen kijtoua Biblia, ¿kenon xsan noijki “akin noyekana ika iileuilisuan itlalnakayo” itech se “akin noyekana ika iespíritu santo toTajtsin”?

³ Pablo, itlatitlankauj Cristo, techijlia kenon xsan noijki “akin noyekana ika iespíritu santo toTajtsin” itech se “akin noyekana ika iileuilisuan itlalnakayo” (xpoua 1 Corintios 2:14-16, TNM). * Okijto ika “akin noyekana ika iileuilisuan itlalnakayo xkiselia yejon tlemach tlen ualeuaj itech iespíritu toTajtsin, pampa yejua kita ika xitlaj kijtosnekij; niman yejua xuelis kimixmatis”. Niman “akin noyekana ika iespíritu santo toTajtsin kitlachilia nochi tlemach” niman kipiya “itlamachilis Cristo”. Pablo techyolchikaua matoyekanakan ika iespíritu santo toTajtsin. ¿Itech tlenon okseki xsan noijki se “tlakatl akin noyekana ika iileuilisuan itlalnakayo” itech se “akin noyekana ika iespíritu santo toTajtsin”?

4, 5. ¿Kenon inemilis akin noyekana ika iileuilisuan itlalnakayo?

⁴ Kachtopa matikitakan kenon tlanemilia akin noyekana ika iileuilisuan itlalnakayo. Yejua san itech tlanemilia pampa kinokauilia makijtlakokan tlaltikpakchanejkej akin noyekanaj ika iileuilisuan. Pablo kijtoua ika yejuin tlanemilijli “tekiti ipan inyojlo on yejuan xkitlakamatij Dios” (Efes. 2:2). Yejuin tlanemilijli kichiua ika miyekej makichiuakan tlen oksekimej kichiuaj. Yejuamej tlanemiliaj itech tlen kineki intlalnakayo. Yejua ika, kichiuaj tlen kinemiliaj kuajli niman xnokojtiliaj kitlakamatiskej itlanauatiluan toTajtsin. Se tlaltikpakchane akin “noyekana ika iileuilisuan itlalnakayo” melak kineki ika nochimej makitlakaitakan niman kineki kipiyas miyek tlemach noso makitlakaitilikan tlen kinemilia kinamiki kichiuas.

⁵ Noijki san kichiua “on tlen xkuajli keleuiya” itlalnakayo (Gál. 5:19-21). Ipan kachtopa iamatlajkuilol tlen okintitlanili tlanechikojli Corinto, Pablo kiteneua miyek tlemach tlen kichiuaj yejuin tlaltikpakchanejkej: nokalaktiaj ipan tlauejli, texexelouaj, kichiuaj ika oksekimej mateixnamikikan, notlateiluiliaj, xkintlakaitaj akin tlanauatiaj niman san kinemilijtokej tlakuaskej niman tlaoniskej. Niman ijkuak kixnamikij tlatlatalistin, nion achijtsin xnokojtiliaj kinxikoskej (Prov. 7:21, 22). Judas, inomachtijkauj Cristo, okijto ika sekimej hasta kipoloskiaj iespíritu santo toTajtsin (Jud. 18, 19).

6. ¿Kenon inemilis akin noyekana ika iespíritu santo toTajtsin?

⁶ Akin noyekana ika iespíritu santo toTajtsin xijkon ken oksekimej. Melak kineki nouikas iuan toTajtsin niman kiyejyekoua kixkopinas (Efes. 5:1). Yejuin kijtosneki ika kiyejyekoua tlanemilis ken Jehová, niman kitas nochi ijkon ken yejua kita. Yejua kimati ika toTajtsin yemelak nemi niman kitlakaita itlanauatiluan ipan nochi tlen kichiua (Sal. 119:33; 143:10). Nokojtilia xkichiuas tlen kineki itlalnakayo niman kiyejyekoua kiteititis “itlakilyo espíritu santo” (Gál. 5:22, 23, TNM).

7. ¿Tlenon kijtoua Biblia intech akin noyekanaj ika iespíritu santo toTajtsin?

⁷ Jesús okijto ika akin noyekanaj ika iespíritu santo toTajtsin melak pakij. Ipan Mateo 5:3, itech Traducción del Nuevo Mundo, kijtoua: “Yolpakij akin kimatstokej ika kipiyaj ika kitejtemoskej tlen ualeua itech toTajtsin, pampa yejuamej intlatki Tekiuajyotl tlen onka iluikak”. Niman Romanos 8:6 kijtoua ika melak kuajli tla toyekanaj ika iespíritu  santo toTajtsin. Kijtoua: “Tla tikomatstikaj on tlajtlamach yejuan motlalnakayo kineki, sa no yejua mitsmiktis, pero tla tikomatstikaj on tlajtlamach yejuan on Espíritu Santo kineki, sa no yejua mitsmakas nemilistli niman yolseuilistli”. Tla titlanemiliaj itech tlen toTajtsin kineki, tinemiskej ika toyojlo niman noijki tikpiyaskej yolseuilistli iuan toTajtsin, niman ika tlayekapan uelis tinemiskej nochipa.

8. ¿Tleka melak noneki matokojtilikan niman ijkon nochipa toyekanaskej ika iespíritu santo toTajtsin?

⁸ Kampa tinemij nochiua tlen xkuajli niman uelis techijtlakos. Techyeualouaj tlaltikpakchanejkej akin xtlanemiliaj ken toTajtsin. Ika yejon, noneki tokojtiliskej niman ijkon tiktlajpiyaskej ken titlanemiliaj. Ijkuak yakaj xok noyekana ika iespíritu santo toTajtsin, kikauilia ika yejuin xkuajli tlaltikpaktli makiueliti makichiua tlen xkuajli niman matlanemili itech tlen kineki itlalnakayo. ¿Tlenon techpaleuis maka ijkon topan manochiua? ¿Tlenon uelis tikchiuaskej niman ijkon nochipa toyekanaskej ika iespíritu santo toTajtsin?

9. a) ¿Tlenon techpaleuis nochipa matoyekanakan ika iespíritu santo toTajtsin? b) ¿Intech akinomej titlajtoskej?

⁹ Se konetl ueli tlen kuajli pampa kita tlen itajuan kichiuaj niman kimixkopina. Ijkon tej, tejuamej noijki uelis tinemiskej ken toTajtsin kineki ijkuak tikchiuaj ken oksekimej akin kuajli nouikaj iuan toTajtsin. Niman intech akin noyekanaj ika iileuilis intlalnakayo, tomachtiaj tlenon xkipiya ika tikchiuaskej (1 Cor. 3:1-4). Ipan Biblia tiknextiaj yejuin neskayomej. San ika, pampa tiknekij tomachtiskej kenon nochipa toyekanaskej ika iespíritu santo toTajtsin, matitlajtokan intech akin kuajli onouikakej iuan toTajtsin niman akin uelis tikimixkopinaskej. Titlajtoskej itech Jacob, María niman Jesús.

10. ¿Kenon Jacob okiteititi ika noyekanaya ika iespíritu santo toTajtsin?

¹⁰ Kachtopa matitlajtokan itech Jacob. Noijki ken aman, inemilis Jacob ouijtika katka. Ikniuj, akin itoka katka Esaú, okinek kimiktis. Niman xsan yejon, imontaj okiyejyeko kikajkayauas niman melak kitekitiltis.  San ika, maski iyeualiyan nemiyaj akin noyekanayaj ika iileuilis intlalnakayo, Jacob onoyekan ika iespíritu santo toTajtsin. Yejua kineltokaya tlen Jehová okijlika Abrahán, niman kuajli okintlajpix inchanejkauan, akin toTajtsin kintekitiltiskia niman ijkon kichiuas tlen kineki (Gén. 28:10-15). Itlajtoluan Jacob niman tlen okichiuj okiteititijkej ika kipatiojkaitaya itlanauatiluan toTajtsin niman tlen kinekiya kichiuas. Se neskayotl, ijkuak okinemili ika Esaú kixnamikiskia, Jacob okijli toTajtsin: “Xnechmakixti, nimitstlatlaujtilia [...]. Tejua yotikijto: ‘Nejua melauak nimitschiuilis tlen kuajli, niman nikchiuas ika mochanejkauan manochiuakan ken xajli tlen onka ipan mar’” (Gén. 32:6-12). Ken onen Jacob kuajli okiteititi ika kineltokaya tlen Jehová okijlika niman tlen okimijlika iuejkachanejkauan.

11. ¿Kenon tikmatstokej ika María noyekanaya ika iespíritu santo toTajtsin?

¹¹ Aman matitlajtokan itech María. ¿Tleka Jehová okitlapejpeni María niman ijkon manochiua inan Jesús? Pampa yejua noyekanaya ika iespíritu santo toTajtsin. ¿Kenon tikmatstokej? Yejua ijkon okiteititi itech tlajtoltin tlen ika okiueyiteneuj Jehová ijkuak okimitato ichanejkauan Zacarías niman Elisabet (xpoua Lucas 1:46-55). Tlen okijto María okiteititi ika melak kitlasojtlaya itlajtol toTajtsin niman ika kuajli kixmatiya Tlajkuiloltin ika Hebreo (Gén. 30:13; 1 Sam. 2:1-10; Mal. 3:12). Noijki, matikitakan ika yejua niman José, maski yononamiktijkaj, xonotekakej hasta ijkuak onemiko Jesús. ¿Tlenon kijtosneki yejuin? Kijtosneki ika omemej kachtopa kitejtemouayaj kichiuaskej tlen toTajtsin kinekiya xijkon ken kitejtemoskej kichiuaskej tlen kineki intlalnakayo (Mat. 1:25). Itech xiujtin tlen opanokej, María kuajli okitak tlen kichiuaya Jesús niman “kejeuaya ipan iyojlo nochi on tlajtlamach yejuan onochiu” (Luc. 2:51). María melak kineltokaya tlen Jehová okijtoka kichiuas itech Mesías. Melak techpaleuis tiknemiliskej kenon tikixkopinaskej María niman ijkon kachtopa tikchiuaskej tlen toTajtsin kineki niman itlanauatiluan.

12. a) ¿Kenon Jesús kichiua ijkon ken iTaj? b) ¿Kenon uelis tikchiuaskej ken Jesús? (Xkita tlaixkopinajli kampa peua tlen tomachtijtokej).

¹² Aman tej, itech nochimej tlaltikpakchanejkej akin yonenkej, ¿akinon yokiteititi ika melak noyekana ika iespíritu santo toTajtsin? Kema, Jesús. Itech nochi inemilis niman itenojnotsalis, yejua okiteititi ika kinekiya kixkopinas iTaj, Jehová. Itech ken tlanemiliaya, tlen kimachiliaya niman tlen kichiuaya, okiteititi ika noyekanaya ika itlanauatiluan niman ika tlen kinekiya Jehová (Juan 8:29; 14:9; 15:10). Xtlanemili itech tlen teotlajtoketl Isaías okijto itech iteiknelilis Jehová, niman noijki xtlanemili itech tlen Marcos okijto itech tlen okimachili Jesús (xpoua Isaías 63:9; * Marcos 6:34). ¿Tikchiuaj ken Jesús niman tikimikneliaj akin noneki makinpaleuikan? Jesús noijki melak onokojtili tenojnotsas niman temachtis kuajli tlajtoltin (Luc. 4:43). Tla ijkon tikchiuaj, tikteititiaj ika toyekanaj ika iespíritu santo toTajtsin.

13, 14. a) ¿Tlenon kuajli kichiuaj akin noyekanaj ika iespíritu santo toTajtsin? b) Xteneua tlen okichiuj se tokniuj.

¹³ Ipan yejuin tonaltin miyekej noijki melak youelkej kichiuaj ken Cristo. Yejuamej noyekanaj ika iespíritu santo toTajtsin niman tenojnotsaj ika pakilistli, kuajli kinseliaj oksekimej niman teikneliaj, niman kipiyaj okseki kualneskayomej. Ken tejuamej, noijki noxixikouaj iuan tlen kintekiyomaka kichiuaskej niman ijkon kipiyaskej yejuin kualneskayomej. Se tokniuj siuatl akin ualeua Brasil niman itoka Rachel kijtoua: “Melak nikuelitaya niktlalis tlakentli tlen nochimej kitlaliaj. Yejon kichiuaya maka maninotlakenti ken kinamikiya. San ika, ijkuak oniuel tlen  melauak, yejon onechyolmapeuj manikchiua tlen nonekiya niman ijkon ninoyekanas ika iespíritu santo toTajtsin. Onechtekiyomakak ninopatlas, san ika, yejuin yokichiuj manipaki niman maninemi ika noyojlo”.

¹⁴ Se tokniuj siuatl akin ualeua Filipinas niman itoka Reylene okixnamik okse itlaj tlen ouijtika. Yejua melak okitejtemo nomachtis niman kipiyas se kuajli tekitl niman ijkon kuajli nemis. Yejua kijtoua: “Nochi tlen yoniknemilijka nikchiuas ipan itekiyo toTajtsin, opeuj nikilkaua. San ika, nimantsin onikitak ika itlaj poliuiya ipan nonemilis, itlaj tlen melak ueyi kijtosneki xijkon ken notekiyo. Kuakon, opeuj niktejtemoua niktekichiuilis kachtopa Jehová”. Ijkuak okichiuj yejon, Reylene okiteititi ika inemilis ika tlaneltoka ipan tlen kijtoua Mateo 6:33, 34. Yejua kijtoua: “¡Melak kuajli nikmatstok ika Jehová nechtlajpiyas!”. Kanaj tikimixmati oksekimej tokniuan ipan motlanechikol akin noijki ijkon yokichiujkej. Ijkuak tikitaj kenon kixkopinaj Cristo, ¿xmelak ika tiknekij tikchiuaskej ken yejuamej? (1 Cor. 11:1; 2 Tes. 3:7).

15, 16. a) ¿Tlenon noneki tikchiuaskej niman ijkon tikixkopinaskej Cristo? b) ¿Tlenon techpaleuis matikpiyakan “itlamachilis Cristo”?

¹⁵ ¿Kenon uelis tikixkopinaskej Cristo? Ipan 1 Corintios 2:16 Biblia techijlia ika noneki tikpiyaskej itlamachilis Cristo. Niman ipan Romanos 15:5 techijlia matitlanemilikan ken Cristo Jesús. Kuakon, noneki tikmatiskej kenon yejua, kenon tlanemilia niman tlenon kichiua niman ijkon tikixkopinaskej Cristo. Yejua melak kitejtemouaya nochipa nouikas iuan toTajtsin. Tikchiuaskej ken Jesús kichiua matonisiuikan itech Jehová. Yejua ika, melak noneki matiuelikan matitlanemilikan ken Jesús.

¹⁶ ¿Tlenon techpaleuis matikpiyakan “itlamachilis Cristo”? Inomachtijkauan Jesús okitakej imilagros, okikakej itlamachtiluan, okitakej kenon nouikaya imiuan nochimej tlaltikpakchanejkej, niman okitakej kenon kitlakamatiya itlajtolyekanalisuan toTajtsin. Yejuamej okijtokej: “Tejuamej tikteixpantiliaj nochi  ika on tlajtlamach tlinon Jesús okichiu” (Hech. 10:39). Melauak ika tejuamej xueli tikitaj Jesús. San ika, Jehová ika itlasojtlalis yotechmakak Evangelios niman ijkon matikasikamatikan kenon katka Jesús. Ijkuak tikpouaj niman titlanemiliaj itech tlen kijtoua Mateo, Marcos, Lucas niman Juan tomachtiaj kenon tlanemiliaya Jesús. Yejuin techpaleuis matinemikan ken Cristo onen niman matitlanemilikan ken yejua otlanemili (1 Ped. 2:21; 4:1).

17. ¿Tleka techpaleuiya titlanemiliskej ken Jesús?

¹⁷ ¿Tleka techpaleuiya titlanemiliskej ken Jesús? Xnemili yejuin: Ijkuak kuajli totlakualtiaj techpaleuiya matikpiyakan chikaualistli. Noijki ijkon, ijkuak titlanemiliaj ken Cristo, techpaleuiya nochipa matoyekanakan ika iespíritu santo toTajtsin. Ika yolik, peua tikasikamatij tlenon kichiuaskia Cristo maski san tlenon panoskia. Niman yejuin, techpaleuiya matiktlapejpenikan tlen makiyolpakti toTajtsin niman matikpiyakan chipauak totlamachilis. ¿Xmelak ika yejuin tlateochiualistin techyolchikaua matouikakan “ken toTeko Jesucristo?” (Rom. 13:14).

18. ¿Tlenon yotiuelkej ipan yejuin tlamachtijli itech timoyekanas ika iespíritu santo toTajtsin?

¹⁸ Yotomachtijkej tlenon kijtosneki timoyekanas ika iespíritu santo toTajtsin. Noijki yotikitakej ika uelis tomachtiskej intech akin ijkon okichiujkej. Sa ika tlami, otiuelkej ika tla tikpiyaj “itlamachilis Cristo” techpaleuiya matoyekanakan ika iespíritu santo toTajtsin. San ika, onka okseki tlen ok poliui tikitaskej itech yejuin. Se neskayotl, ¿kenon uelis tikmatiskej tla nochipa tiktejtemouaj toyekanaskej ika iespíritu santo toTajtsin?, ¿tlenon okseki uelis tikchiuaskej niman ijkon nochipa ijkin toyekanaskej? niman ¿kenon nesis ipan tonemilis tla toyekanaj ika iespíritu santo toTajtsin? Ipan okse tlamachtijli tikinnankiliskej yejuin tlajtoltilistin.