1, 2. (a) Kiko hopi ruman ta pensa tokante e importansia di ser un persona spiritual? (b) Ki preguntanan importante nos lo kontestá den e artíkulo akí?

UN RUMAN muhé na Canada a bisa: “Despues ku mi a bira un persona spiritual, mi a bira mas felis i mi por a trata mihó ku mi pruebanan di tur dia.” Un ruman hòmber na Brazil a bisa: “Ami ku mi kasá tin 23 aña kasá i nos ta masha felis debí ku nos ta hasi esfuerso pa ta personanan spiritual.” I un ruman hòmber na Filipinas a bisa ku debí ku e ta un persona spiritual, e tin pas mental anto ku esaki tambe a yud’é mehorá e manera ku e ta trata rumannan di diferente background.

² E rumannan akí a mustra bon kla ku nan tabatin bon resultado debí ku nan a bira personanan spiritual. P’esei nos por puntra nos mes: ‘Kiko por yuda mi bira un persona spiritual i asina disfrutá di e benefisionan ku e rumannan a menshoná?’ Sinembargo, promé ku nos kontestá e pregunta ei, nos mester komprondé bon kla kiko Beibel ta bisa di un persona spiritual, òf un persona ku ta laga spiritu santu gui’é òf ku ta pensa manera Yehova ta pensa. Den e artíkulo akí nos lo kontestá tres pregunta importante. (1) Kiko ser un persona spiritual ta enserá? (2) Ki ehèmpelnan por yuda nos bira personanan spiritual?  (3) Kon “e mente di Kristu” por yuda nos ser un persona spiritual?

3. Kon Beibel ta deskribí e diferensia entre un hende físiko i un hende spiritual?

³ Apòstel Pablo ta yuda nos komprondé e diferensia entre un persona spiritual, òf “hende spiritual,” i un “hende físiko.” (Lesa 1 Korintionan 2:14-16, nota.) Kiko ta e diferensia? E “hende físiko” no ta aseptá “e kosnan di e spiritu di Dios, pasobra nan ta bobedat p’e; i e no por komprondé nan.” Di otro banda, “e hende spiritual” ta un persona ku ta “evaluá tur kos” i ku tin “e mente di Kristu.” Pablo ta animá nos pa nos ta personanan spiritual. Pero tin mas diferensia entre un hende físiko i un hende spiritual.

4, 5. Menshoná algun karakterístika di un hende físiko.

⁴ Kon un hende físiko ta pensa? Un hende físiko ta sigui e manera di pensa di mundu i ta enfoká riba su deseonan egoista. Pablo a deskribí e aktitut akí komo “e spiritu ku awor ta obra den e yunan di desobedensia.” (Efe. 2:2) E spiritu akí ta influensiá mayoria di hende pa hasi loke otro hende ta hasi. Nan ta enfoká riba e karni. Komo resultado, mayoria di nan ta hasi loke nan ta pensa ta bon i no ta hasi esfuerso pa kumpli ku e normanan di Dios. Generalmente, un hende físiko hopi biaha ta preokupá ku su reputashon i su metanan materialista òf ta interesá pa defendé loke e ta pensa ta su derechi.

⁵ Na ki otro manera nos por rekonosé un hende físiko? Un hende físiko ta praktiká ‘obra di karni.’ (Gal. 5:19-21) Pablo su promé karta na e korintionan ta menshoná algun otro karakterístika di un hende físiko. El a menshoná entre otro ku nan ta promové divishon, ta tuma parti den desakuerdo, ta kousa problema, ta hiba otro korte, ta falta rèspèt pa hende ku Yehova ta skohe pa dirigí su pueblo i ta kome i bebe di mas. Un hende físiko no ta resistí ora e hañ’é ku tentashon pa hasi malu. (Pro. 7:21, 22) Hudas a bisa ku un hende físiko por asta pèrdè “e spiritu di Dios.”—Hudas 18, 19, nota.

6. Kon nos por rekonosé un hende spiritual?

⁶ Awor, kiko ser un “hende spiritual” ta enserá? Kontrali na un hende físiko, un hende spiritual ta masha interesá den su relashon ku Dios. Un hende spiritual ta hasi esfuerso pa “imitá Dios.” (Efe. 5:1) Esaki ta nifiká ku e ta hasi esfuerso pa sa kiko Yehova ta pensa tokante un asuntu i ta purba di wak kosnan for di e punto di bista di Dios. P’e, Dios ta un Persona real. Distinto for di un hende físiko, e ta purba di hasi tur kos na armonia ku Yehova su normanan. (Sal. 119:33; 143:10) En bes di enfoká riba e obranan di karni, un hende spiritual ta hasi esfuerso pa kultivá e “fruta di spiritu.”—Gal. 5:22, 23.

7. Kiko Beibel ta bisa tokante hende spiritual?

⁷ Beibel ta papia bon di hende spiritual. Mateo 5:3 ta bisa: “Felis ta esnan ku ta konsiente di nan nesesidat spiritual, ya ku e Reino di shelu ta di nan.” Romanonan 8:6 ta mustra e benefisionan di ser un hende spiritual, bisando: “Mente fihá riba karni ta nifiká morto, ma mente fihá riba spiritu ta nifiká bida i pas.” Ora nos ta enfoká riba kosnan spiritual, nos por ta na pas ku Dios i ku nos mes, i nos por tin e speransa di biba pa semper den futuro.

8. Dikon nos mester hasi esfuerso pa bira i keda un persona spiritual?

⁸ Sinembargo, nos ta biba den un mundu peligroso. Komo ku nos ta rondoná di  hende ku no ta pensa manera Dios, nos tin ku hasi hopi esfuerso pa bira i keda un persona spiritual. Si nos no yena nos mente ku Yehova su pensamentunan, mundu lo yena nos mente ku su aktitut i pensamentunan karnal. Kiko por yuda nos evitá esei? Kon nos por sigui krese den sentido spiritual?

9. (a) Kiko por yuda nos bira spiritualmente mas fuerte? (b) Ki bon ehèmpelnan nos ta bai analisá?

⁹ Ora un mucha opservá su mayornan i imitá nan bon ehèmpel, e por madurá. Di mes manera, nos por madurá spiritualmente ora nos ta opservá i imitá sirbidónan di Yehova ku ta spiritualmente fuerte. Di otro banda, hende ku ta enfoká riba deseonan karnal ta sirbi komo spièrtamentu pa nos. (1 Kor. 3:1-4) Beibel ta kontené tantu bon komo mal ehèmpel. Pero, komo ku nos meta ta pa bira spiritualmente mas fuerte, laga nos wak algun bon ehèmpel di sirbidónan di Dios ku nos por imitá. Nos lo analisá e ehèmpelnan di Yakòb, Maria i Hesus.

10. Kon Yakòb a demostrá ku e tabata un hòmber spiritual?

¹⁰ Promé, laga nos wak e ehèmpel di Yakòb. Meskos ku ta e kaso awe ku mayoria di nos, Yakòb su bida no tabata fásil. E mester a soportá su ruman Esou ku tabata enfoká riba deseonan karnal i ku  kier a mat’é. Riba tur esei, e mester a soportá su suegro, kende bes tras bes a purba di gañ’é i probechá di dje. Sinembargo, apesar ku e tabata rondoná di hende karnal, e tabata un hòmber spiritual. E tabatin fe den e promesa ku Yehova a hasi na Abraham, i semper el a kuida su famia ku lo tabatin un papel spesial den kumplimentu di e propósito di Yehova. (Gén. 28:10-15) Yakòb su palabra- i echonan a demostrá ku Dios su  normanan i boluntat tabata importante p’e. Por ehèmpel, un biaha ku Yakòb a pensa ku Esou tabata bai mat’é, el a bisa Dios: “Mi ta pidi bo, libra mi . . . Bo a bisa: ‘Siguramente lo mi hasi bo prosperá, i hasi bo desendientenan manera santu di laman.’” (Gén. 32:6-12) Ta bisto ku Yakòb tabatin fe den e promesanan ku Yehova a hasi na dje i na su antepasadonan i ku e kier a biba na armonia ku Dios su boluntat i propósito.

11. Kon Maria a demostrá ku e tabata un hende spiritual?

¹¹ Awor, laga nos wak e ehèmpel di Maria. Dikon Yehova a skohe Maria pa bira mama di Hesus? Sin duda, esei tabata pasobra Maria tabata un hende spiritual. Kon nos por sa esei? Nos por mira esei na e bunita palabranan di alabansa ku el a dirigí na Yehova ora el a bishitá su famianan Zakarías ku Elisabèt. (Lesa Lukas 1:46-55.) Loke Maria a bisa a demostrá ku e tabatin amor profundo pa e Palabra di Dios i ku e tabata konosé e Skritura Hebreo bon. (Gén. 30:13; 1 Sam. 2:1-10; Mal. 3:12) Tuma nota tambe ku aunke Maria ku Hose tabata resien kasá, nan no a tene relashon seksual promé ku Hesus a nase. Kiko esei ta indiká? Esei ta mustra ku pa nan, Yehova su boluntat tabata mas importante ku nan deseonan personal. (Mat. 1:25) Segun ku tempu tabata pasa, Maria a tuma nota kuidadosamente di tur loke tabata pasa den Hesus su bida i a presta atenshon na e palabranan di sabiduria ku Hesus tabata papia. Ademas, Maria ‘a warda tur e palabranan akí den su kurason.’ (Luk. 2:51) Pues, ta bisto ku e tabata hopi interesá den e promesanan di Dios relashoná ku e Mesías. Maria semper a pone Yehova su boluntat na promé lugá den su bida. Kon nos por imitá su ehèmpel?

12. (a) Den ki manera Hesus a imitá Yehova? (b) Kon nos por imitá e ehèmpel di Hesus? (Wak e promé plachi.)

¹² Di tur hende ku a yega di biba, ken ta e persona di mas spiritual? Naturalmente, esei ta Hesus. Durante henter su bida i sirbishi, el a demostrá ku e kier a imitá su Tata, Yehova. E tabata pensa, sinti i hasi manera Yehova i a biba na armonia ku e normanan i boluntat di Dios. (Huan 8:29; 14:9; 15:10) Por ehèmpel, wak kon e profeta Isaías a deskribí Yehova su kompashon, òf miserikòrdia, i kompará esaki ku e deskripshon ku Marko, e eskritor di Evangelio, a duna di Hesus su sintimentunan. (Lesa Isaías 63:9; Marko 6:34.) Meskos ku Hesus, nos ta kla pa mustra kompashon ora nos topa hende ku tin mester di yudansa? Ademas, nos ta hasi nos bèst pa prediká i siña hende e bon notisia manera Hesus a hasi? (Luk. 4:43) Si nos ta imitá Hesus, nos ta demostrá ku nos ta hende spiritual.

13, 14. (a) Kiko nos por siña for di nos rumannan spiritual djawe? (b) Duna un ehèmpel.

¹³ Awe tambe nos tin rumannan spiritual ku ta hasi esfuerso pa imitá Hesus, i nos por siña hopi for di nan ehèmpel. E rumannan akí ta prediká ku zelo, ta masha hospitalario, ta kompasivo i tin hopi otro bon kualidat. Meskos ku nos, nan tambe ta imperfekto i ta lucha ku debilidatnan segun ku nan ta hasi esfuerso pa kultivá e kualidatnan kristian ei. Rachel, un ruman na Brazil, a bisa: “Mi tabata gusta bisti segun e último moda. P’esei, mi pañanan no tabata masha modesto. Pero ora mi a siña e bèrdat, esei a animá mi pa hasi esfuerso pa bira un hende spiritual. No tabata fásil pa hasi kambio, pero mi a bira mas felis i mi bida a haña berdadero propósito.”

 ¹⁴ Reylene, un ruman muhé di Filipinas tabatin un otro problema. E tabata enfoká riba enseñansa superior i un bon trabou pa e por bai dilanti den bida. El a bisa: “Mi metanan spiritual a kuminsá bira ménos importante. Pero mi a realisá ku mi bida tabata falta algu, algu muchu mas importante ku mi trabou. Esei a pone ku mi a bolbe enfoká mi atenshon riba mi sirbishi na Yehova.” Desde e tempu ei, Reylene a bira un bon ehèmpel di un persona ku tin fe den Yehova su promesa ku nos ta haña na Mateo 6:33 i 34. El a bisa: “Mi sa sigur ku Yehova lo perkurá pa mi.” Podisé bo sa di algun ehèmpel similar den bo kongregashon. Bo no ta sinti bo motivá pa imitá e manera ku e rumannan fiel akí ta sigui Kristu?—1 Kor. 11:1; 2 Tes. 3:7.

15, 16. (a) Kiko nos mester hasi pa nos por imitá Kristu? (b) Kon nos por haña “e mente di Kristu”?

¹⁵ Kon nos por imitá Kristu? Na 1 Korintionan 2:16, Beibel ta bisa ku nos mester tin “e mente di Kristu.” I Romanonan 15:5 ta bisa ku nos mester tin “e mesun aktitut mental ku Kristu Hesus tabatin.” P’esei pa nos por imitá Kristu, nos mester siña konosé su personalidat i su manera di pensa. Despues nos mester sigui su pasonan. Pa Hesus, su relashon ku Dios tabata e kos di mas importante. Pues, ora nos ta imitá Hesus, nos ta hala mas serka Yehova. P’esei ta masha importante pa nos siña pensa manera Hesus ta pensa.

¹⁶ Kon nos por hasi esei? E disipelnan di Hesus a mira e milagernan ku el a hasi, a skucha su sermonnan, a mira kon el a trata ku tur sorto di hende i kon el a sigui e prinsipionan di Dios. Nan a bisa: “Nos ta testigu di tur loke el a hasi.” (Echo. 10:39) Sinembargo, awe nos no por mira Hesus. Pero ku amor Yehova a perkurá pa nos haña e relatonan di Mateo, Marko, Lukas i Huan ku por yuda nos siña konosé e personalidat di Hesus. Si nos lesa nan i meditá riba loke nos ta lesa, nos lo siña konosé e manera di pensa di Hesus. Asina nos por “sigui su pasonan fielmente” i ‘fortifiká nos mes ku e mesun disposishon mental’ ku esun di Kristu.—1 Ped. 2:21; 4:1.

17. Kon nos lo benefisiá si nos ta pensa manera Kristu?

¹⁷ Kon nos lo benefisiá si nos ta pensa manera Kristu? Meskos ku kuminda nutritivo ta fortalesé nos kurpa físiko, di mes manera ora nos ta yena nos mente ku e pensamentunan di Kristu, nos ta bira spiritualmente fuerte. Tiki tiki nos ta siña kiko Hesus lo a hasi den kada situashon. Esaki, na su turno, ta yuda nos tuma desishonnan ku ta agradá Dios i ta laga nos keda ku un konsenshi limpi. Bo no ta haña ku e benefisionan akí ta bon motibu pa nos “bisti Señor Hesukristu”?—Rom. 13:14.

18. Kiko bo a siña for di nos lès djawe?

¹⁸ Nos a mira kiko ser un persona spiritual ta enserá. Nos a mira tambe ku nos por siña for di e bon ehèmpelnan di hende spiritual. Finalmente, nos a siña ku ora nos tin “e mente di Kristu” nos por pensa manera Yehova ta pensa i hala mas serka dje. Pero tin mas kos ku nos por siña tokante e tópiko akí. Por ehèmpel, kon nos por sa si nos ta spiritualmente fuerte? Kiko mas nos por hasi pa por bira spiritualmente mas fuerte? I kon nos spiritualidat por influensiá nos bida diario? E siguiente artíkulo lo yuda nos kontestá e preguntanan akí.