1, 2. (1) ¿Ima niyantaq mëtsikaq cristiänukuna Diosnintsik munanqannö pensëpaq? (2) ¿Ima tapukïkunapitataq yachakushun?

CANADÄPITA juk panim kënö nirqan: “Diosnintsik munanqannö pensëta yachanqämi yanapamashqa kushishqa kawakunäpaq y problëmakunachö alli tsarakunäpaq”. Brasilpita juk wawqinam kënö nirqan: “Diosnintsik munanqannö pensëta procurashqa karmi warmiwan kushishqa kawakuyarqö 23 watakunapa”. Y Filipïnaspita juk wawqinam nirqan, Diosnintsik munanqannö pensëta yachakushqa karnin alli concienciayoq kanqanta y cristiänu mayinkunawampis alli kawakunqanta.

² Rikanqantsiknömi Diosnintsik munanqannö pensëqa alläpa yanapakun. Tsëqa, ¿imataraq rurashwan Diosnintsik munanqannö pensanapaq? Tsëta musyarinapaqqa puntataqa entiendirishun Diosnintsik munanqannö pensë ima kanqanta. Kë tapukïkunatam contestashun: ¿Imanötaq Diosnintsik munanqannö pensaq nunaqa? ¿Pikunapita yachakunqantsiktaq yanapamäshun Diosnintsik munanqannö pensanapaq? Y tsëta logranapaqqa, ¿imanöraq yanapamäshun Cristu pensanqannö pensëta procuranqantsik?

3. Munëninmannö kawakoq nuna y santu espïritu pushananta jaqeq nunaqa, ¿imachötaq jukläya kayan?

³ Apostol Pablum entienditsikurqan Diosnintsik munanqannö o “santu espïritu pushananta jaqeq” nuna, “munëninmannö kawakoq” nunapita jukläya kanqanta (leyi 1 Corintius 2:14-16). Y munëninmannö kawakoq nunaqa, santu espïritu yachatsikunqanta mana väleqpaq churanqantam nirqan. Peru santu espïritu pushananta jaqeqqa imatapis alleqraq pensanqanta y Cristu pensanqannö pensanqantam nirqan. Tsëpitanam Pabluqa consejamantsik Diosnintsik munanqannö pensanapaq. ¿Ima maschötaq jukläya kayan kë ishkan cläsi nunakuna?

4, 5. ¿Imanötaq kayan munëninmannö kawakoq nunakunaqa?

⁴ Rikärishun “munëninmannö kawakoq” nuna imanö kanqanta. Tsënö nunaqa, mana wiyakoq nunakunapa pensëninkunata qatirninmi munëninkunallata mas precisaqpaq churan (Efes. 2:2). Tsë mana alli pensëmi cäsi llapan nunakunata dominan, tsëmi kikinkunapaq allinö kanqanllata rurayan, y Dios mandakunqankunata wiyakïtaqa kallpachakuyantsu. Masqa yarpachakuyan alli rikashqa këpaq, kapoqyoq këpaq y derëchunkunallata imëkanöpapis välitsitam.

⁵ Munëninmannö kawakoq nunakunaqa imëka mana allikunata rurarllam kawakuyan (Gäl. 5:19-21). Jina tsënö nunakunapaqmi, corintukunaman puntata cartakunqanchö apostol Pablu nirqan, jukpa problëmankunaman mëtikuyanqanta, nunakunata chikinakatsiyanqanta, mana cäsukoq kayanqanta, demandanakurlla kakuyanqanta, autoridäkunata mana respetayanqanta, mikïllapaq y upïllapaq yarparäkuyanqanta (Prov. 7:21, 22). Discïpulu Jüdasmi nirqa tsënö nunakunachöqa santu espïritu mana kanqanta (Jüd. 18, 19).

6. ¿Imanötaq Diosnintsik munanqannö pensaq nunakunaqa kayan?

⁶ Peru Diosnintsik munanqannö pensaq nunakunaqa manam tsënötsu kayan. Sinöqa imëkatapis Dios rikanqannö rikëtam, y pëwan amïgu këtam procurayan (Efes. 5:1). Pëkunapaqqa Diosqa rasumpam kawan, tsëmi llapan mandakunqankunata cumplita procurayan (Sal. 119:33; 143:10). Munëninkunamannö kawakuyänampa rantinmi, santu espïritu yanapanqanta rikätsikuyan yachanëpaq nuna karnin (Gäl. 5:22, 23). Diosnintsik munanqannö pensaq nuna imanö kanqanta maslla entiendirishun. Pipis müsicallapaq alläpa yarparaptinqa, “pëtaqa müsicam gustan” nintsikmi. Jina tsënöllam pipis Dios mandakunqankunata mas precisaqpaq churaptinqa, “pëqa Dios mandakunqankunatam kuyan” nintsik.

7. ¿Imanötaq Diosnintsik munanqannö pensaq nunakunaqa kayan?

⁷ Jesusmi Mateu 5:3 textuchö kënö nirqan: “Kushishqam kayan Dios pushananta wanayanqanta musyaq kaqkuna”. Y Romänus 8:6 textunam kënö nin: “Porqui jutsasapa ëtsapa munëninman yarparäkïqa wanïmanmi chätsikun, peru santu espïritupa kaqkunaman yarparëqa, kawëman y yamë këmanmi chätsikun”. Diosnintsik munanqannö pensëta procurarqa, Diospa rikëninchömi alli kashun, kikintsikpis allim sientikushun y shamoq tiempuchöpis mana wanushpa kawakïtam puëdishun.

8. ¿Ima nirtaq Diosnintsik munanqannö pensëta mas procuranantsik?

 ⁸ Kanan witsanqa, Diosnintsik munanqannö mana pensaq nunakunawanmi kawantsik, tsëmi alleq cuidakunantsik pëkunanö mana pensanapaq. Diosnintsik munanqannö pensëta jaqirirqa, mana allikunamannam pensar qallëkushun. ¿Imataq yanapamäshun tsëpita cuidakunapaq? Y ¿imataraq rurashwan Diosnintsik munanqannö mas pensanapaq?

9. (1) ¿Imaraq yanapamäshun Diosnintsik munanqannö mas pensanapaq? (2) ¿Pikunapitataq yachakushun?

⁹ Bibliachöqa tarintsik Diosnintsik munanqannö pensaq nunakunapaq y pënö mana pensaq nunakunapaq willakïkunatam. Wakinkunaqa cristiänu këkarmi munëninkunamannö kawakuyarqan, y pëkunanö këtaqa manam munantsiktsu (1 Cor. 3:1-4). Y wakinkunaqa Diosnintsik munanqannö pensaq nunakunam kayarqan, tsëmi juk wamra teytankunapita alli rurëkunata yachakoqnö noqantsikpis pëkunapita yachakïta puëdintsik. Kë yachatsikïchöqa yachakurishun Jacobpita, Marïapita y Jesuspitam. Tsëmi yanapamäshun Diosnintsik munanqannö mas pensanapaq.

10. ¿Imanötaq Jacobqa rikätsikurqan Diosnintsik munanqannö pensaq nuna kanqanta?

¹⁰ Jacobpita yachakurishun. Pëqa tukï problëmakunapam pasarqan. Munëninmannö kawakoq wawqin Esaümi wanutsita munarqan. Y suegrunnam engañarqan y pëpita provechakurqan. Peru Jacobqa tsënö nunakunawan këkarpis, Diosnintsik munanqannö pensaq nunam karqan. Diosnintsik änikunqankunamanmi confiakurqan, tsëmi familianta shumaq cuidarqan, porqui musyarqanmi Diospa munënin cumplikänampaqqa familian alläpa  precisanqanta (Gen. 28:10-15). Ruranqankunawan y parlanqankunawanmi rikätsikurqan Dios mandakunqanta respetanqanta y munënin cumplikänanta munanqanta. Tsëmi Esaü wanutsinampaq kaqta pensarnin Diosman kënö mañakurqan: “Qammi kënö nimarqunki: ‘Noqam cuidashqëki alli kanëkipaq, y kastëkikunaqa lamar kuchunchö aqushanömi yupëtapis mana puëdipaq kanqa’” (Gen. 32:6-12). Jacobqa imanö kawanqanwanmi rikätsikurqan Jehovä änikunqankunaman chipyëpa confiakunqanta.

11. ¿Imanötaq musyantsik Marïaqa Diosnintsik munanqannö pensaq warmi kanqanta?

¹¹ Kananqa Marïapita yachakurishun. Pëqa Dios mandakunqankunatam cäsukoq y änikunqankuna cumplikänantam alläpa munaq. Tsëmi pëtaqa Jesuspa mamänin kanampaq Jehovä akrarqan. Jehoväpa kaqta alläpa kuyanqantaqa musyantsik, Zacarïastawan Elisabet-ta watukanqanchö Jehoväta shumaq alabanqampitam (leyi Lücas 1:46-55). Marïa tsënö parlanqanqa rikätsikun Diospa Palabranta alleq musyanqanta y kuyanqantam (Gen. 30:13; 1 Sam. 2:1-10; Mal. 3:12). Y Josëwan casakurirqa, Jesus yurinqanyaqmi shuyäyarqan oqllanakur ruranakuyänampaq. Tsëmi rikätsikun munëninkunallata rurayänampa rantin, Diospa munëninta mas precisaqpaq churayanqanta (Mat. 1:25). Y tsëpitanam Marïaqa alcäbulla këkarqan Jesus winarnin ruranqankunata y parlanqankunata, y shonqunllachömi pensarnin karqan (Lüc. 2:51). Pëqa alläpam rikëta munarqan Dios änikunqan Cristu imanö chämunampaq kaqta. Noqantsikpis Marïapitaqa, Diospa munëninta puntaman churëta y mandakunqankunata respetëtam yachakïta puëdintsik.

12. (1) ¿Imachötaq Jesusqa Teytannö? (2) ¿Imakunachötaq Jesusnö kanqantsikta rikätsikushwan? (Rikäri kë yachatsikïpa qallananchö këkaq dibüjuta).

¹² Kananqa yachakurishun Jesuspita. Pëqa pensanqanwan y ruranqanwanmi rikätsikurqan Teytan mandakunqannö kawanqanta, y Pënö këtam imëpis procurarqan (Juan 8:29; 14:9; 15:10). Tsëmi Isaïas libruqa willakun Jehovä llakipäkoq kanqanta, y Marcus librunam willakun Jesuspis teytannö llakipäkoq kanqanta (leyi Isaïas 63:9 *; Marcus 6:34). ¿Jesusnöku problëmakunapa pasëkaqkunata shumaq tratantsik? ¿Pënöku Diospita yachatsikïta precisaqpaq churantsik? (Lüc. 4:43). Tsënö rurarqa, Diosnintsik munanqannö pensaq nunam kashun.

13, 14. (1) ¿Imatataq yachakuntsik Diosnintsik munanqannö pensaq cristiänukunapita? (2) Juk panita pasanqanta willakaramï.

¹³ Kanan witsampis mëtsikaqmi Dios munanqannö nuna këta lograyashqa. Pëkunaqa kushishqam Diospita yachatsikuyan, y posadatsikoq, qarakoq y llakipäkoqmi kayan. Noqantsiknömi mana alli munëninkunata vencita procurayan Dios munanqannö nuna kayänampaq. Brasilpita juk panim kënö nirqan: “Unëqa Diosta mana cäsukoq nunakunanömi vistikoq kä. Peru Diospita yachakurmi entiendirirqä Diosnintsik munanqannö imatapis pensanä precisanqanta. Tsëta rurananqa manam fäciltsu karqan, peru lograrirqa kushishqam sientikurqä”.

¹⁴ Peru Filipïnaspita Reylene jutiyoq  paniqa Testïgu këkarmi mas precisaqpaq churarqan universidächö estudiëta y alli kawakunampaq alli trabäjuyoq këta. Kënömi willakun: “Diospa kaqchö rurëta munanqäkunataqa mananam valorarqänatsu. Peru tsëpitam cuentata qokurirqä kushishqana mana kanqäta. Tsëpitam Diosta sirwita puntaman churanäpaq decidirirqä”. Tsëpita patsëmi Reyleneqa Mateu 6:33, 34 textu ninqannö kawakun. Itsa congregacionnintsikchö wawqikuna y panikunapis tsënö decidiyashqa. ¿Manaku pëkunata rikarninqa noqantsikpis pëkunanö këta munarintsik? (1 Cor. 11:1; 2 Tes. 3:7).

15. ¿Imaraq yanapamäshun Cristunö kanapaq?

¹⁵ “Cristu Jesus pensanqannö” pensanapaqqa 1 Corintius 2:16 y Romänus 15:5 textukunam nimantsik. Tsëmi Cristunö pensanapaqqa, alleq musyanantsik pë imanö kanqanta, imanö pensanqanta y imatapis imanir ruranqanta. Pëqa masqa yarparaq Dioswan alli këtam. Tsëmi Jesusnö kanapaqqa pënö pensëta yachakunantsik. Porqui tsëta rurarmi Diospa kuyë amïgun tikrashun.

16. ¿Imanötaq yachakushwan Cristu pensanqannö pensëta?

¹⁶ ¿Imataq yanapamäshun Cristunö pensanapaq? Jesuspa qateqninkunam rikäyarqan milagrukunata ruranqanta, nunakunata imanö tratanqanta y Dios mandakunqannö kawanqanta, jina yachatsikunqantam wiyayarqan. Tsëmi, “llapan ruranqankunata rikashqa testïgukuna[m] kayä” niyarqan (Hëch. 10:39). Y Jehoväqa Mateu, Marcus, Lücas y Juan librukunatam qomarquntsik tsëta leyirnin Jesus imanö kanqanta musyanapaq. Tsë librukunata leyirmi, Jesus imanö pensanqanta alleq yachakuntsik. Tsëta rurarmi kë consëjuta wiyakushun: “Cristupis qamkunarëkurmi sufrirqan, qamkuna pëpita yachakuyänëkipaq, tsënöpa pë ruranqankunata shumaq y alli qatiyänëkipaq”, y “tsë yarpëyoqlla kayänëkipaq listu këkäyë” (1 Pëd. 2:21; 4:1).

17. ¿Imanötaq Jesus pensanqannö pensëqa alläpa yanapamantsik?

¹⁷ Cristu pensanqannö pensëqa alläpam yanapamantsik. Imanömi sänu mikïkunata mikurninqa alli saloryoq kantsik, jina tsënöllam Jesuspita alleq yachakunqantsikpis Diosnintsik munanqannö imatapis ruranapaq yanapamantsik. Jesus pensanqannö pensëta procurarqa, ima cäsuchöpis Cristu imata ruranampaq kaqtam entiendishun. Y tsënam yanapamäshun imatapis alli decidirnin alli concienciayoq kanantsikpaq y Diosnintsikta kushitsinantsikpaq. Tsëmi, “Jesucristu imanö kawanqampita yachakuyë” neq consëjutaqa wiyakunantsik (Rom. 13:14).

18. ¿Imakunapitataq kë yachatsikïchö yachakurquntsik?

¹⁸ Kë yachatsikïchöqa yachakurquntsik, Diosnintsik munanqannö pensaq nuna imanö kanqanta, Diosnintsik munanqannö nunakunapita imata yachakunqantsikta y Jesus pensanqannö pensëqa alleq yanapamanqantsiktam. Peru tsënö kaptimpis maskunataran yachakunantsik. Kënö tapukurishun: “¿Imanötaq musyä Dios munanqannö pensaq nuna kanqäta? ¿Ima mastataq ruranä Dios munanqannö pensaq nuna kanäpaq? Y Dios munanqannö pensaq nuna kanqäqa, ¿imanötaq yanapamanqa cada junaq kawënïchö?”. Qateqnin kaq yachatsikïchömi kë tapukïkunapita yachakurishun.