მუს ნიშნენს რდე სულიერ პიროვნება?
„ღორონთიქ, ნამუთ მოთვინებას მარზენა დო გურშა ელამკინანა, ქიმერჩან თიცალ აზროვნება, მუნერით ქრისტე იესოს უღუდ“ (რომ. 15:5).
ობირეშეფი: 84, 5
1, 2. ა) მუს ფიქრენს ბრელ სულიერ აზროვნებაშ გურშენ? ბ) მუ კითხვეფს გუვარჩიენთ თე სტატიას?
„სულიერ აზროვნებას ჩქიმდა ბედნერობა მოუღჷ, მუშენდა თინა მოხვარ ადვილო ქუგურზე ირდღაშიან პრობლემეფს“, — იჩიებ ართ კანადელ და. ართ ბრაზილიელ ჯიმაქ თქუ: „23 წანა რე ბედნერ ქორწინება მიღნა, მუშენდა მა დო ჩქიმ ოსურ ირნერო ვოცადუთ სულიერ აზროვნება მიღდან“. შხვა ჯიმა, ნამუთ ფილიპინებს ცხოვრენსინ, რაგადანს: „სულიერ აზროვნებაშ ჭყოლოფათ მიღჷ შინაგან სიმშვიდე, მუთ მოხვარ ჯგირ ურთიერთობა მიღდას შხვადოშხვა ხასიათიშ და დო ჯიმალეფწკუმა“.
2 თე ირფელ ოძირანს, ნამდა სულიერ აზროვნებას ბრელ ჯგირობუა მოუღჷ. ათეშენ ქოპკითხათ ჩქინ დუც: მუჭო შემლებ უმოსო მიბრდე სულიერო დო ჩქიმ დუდშა გეგმოფცადე თი კურთხევეფ, მუთ სულიერ აზროვნებას მოჸუნს? სოიშახ თე კითხვას ვუპასუხენდათინ, საჭირო რე ქიგებგათ, მუს იჩიებ ბიბლია სულიერო მოაზროვნე კათაშე. თე სტატიას პასუხ ქიმიაჩამუ სუმ კითხვას: 1) მუს ნიშნენს რდე სულიერ პიროვნება? 2) ნამ მაგალითეფ მიმეხვარებნა სულიერო წიმი ულას? 3) მუჭო მიმეხვარებნა „ქრისტეშ გონება“, მიღდან სულიერ აზროვნება?
მუს ნიშნენს რდე სულიერ პიროვნება?
3. მუ სხვაობა რე სულიერ დო ხორციელ პიროვნებეფ შქას?
3 მოციქულ პავლე მოხვარნა თიშ გაგებას, მუ სხვაობა რე სულიერ დო ხორციელ პიროვნებეფ შქას (წეკითხით 1 კორინთელები 2:14—16). * თიქ თქუ ნამდა, „ხორციელ ადამიან ვა ღებულენს თის, მუთ ღორონთშე რე, მუშენდა უგუნურებათ მიორჩქ დო ვართ გებულენს თის“. თიშ გინაწონს, „სულიერ ადამიან ირფელს ამოწმენს“ დო „ქრისტეშ გონება“ უღჷ. პავლე ელამჩანა, მიღდან სულიერ აზროვნება. ხოლო მუთ გენესხვავებნა ართიანშე სულიერ დო ხორციელ პიროვნებეფი?
4, 5. მუთ იჩინებე „ხორციელ ადამიანი“?
4 მორთ, დიო გუვარჩუათ, მუნერ აზროვნება უღნა ხორციელ პიროვნებეფს. ამდღა ბრელს პირველ ადგილშა გეურე ხორციელ კორნებეფი. მოციქულ პავლე იჩიებ, ნამდა თეცალეფ გილულა „თი შურიშ გავლენათ, ნამუთ ასე უდუჯერებელ სქუალეფწკუმა მოქმედენს“ (ეფეს. 2:2). ხალხიშ უმენტაშ ეჸუნს შხვეფიშ გლახა საქციელს, მუშენდა თინეფ ქვეყნიერებაშ გავლენაშ თუდო რენა. თინეფ თის ორთნა, მუთ მუნეფიშ თოლს რე სწორ დო შუროთ ვაცადნა ღორონთიშ ნორმეფით ცხოვრებას. ხორციელ აზროვნებაშ პიროვნება ფიქრენს, ნამდა ქონება, პრესტიჟი დო მუშ უფლებეფიშ დაცვება ირფელიშ უმოს მნიშვნელოვან რე.
5 შხვა ირფელწკუმა ართო ხორციელ პიროვნება თით ხოლო იჩინებე, ნამდა ხორციშ საქმეეფს რე გინოჸუნელი (გალ. 5:19—21). კორინთელეფშა მეჭარილ პავლეშ პირველ წერილშე იძირე შხვა მხარეეფი, მუდგათ თეცალ ხალხ შხვეფშე გიშეგორუ. თეშა მიშურს უთანხმოებეფიშ დროს ართიანიშ გინორინა, სასამართლოს ჩიული, ხემძღვანელობაშ უპატიცემლობა დო შუმა-ჭკუმუაშ გინოჸუნა. მუჟამსით ცთუნებას შითმოხვადუ, ხორციელ პიროვნება ხეთეშე დაჸუნუ თის (იგავ. 7:21, 22). ღორონთიშ შთაგონებათ იუდაქ ჭარ, ნამდა ნამთინე გეიაჸუნუდ ხორციელ აზროვნებას დო „სულიერობა“ ვაღვენუდ (იუდ. 18, 19).
6. მუთ იჩინებე „სულიერ ადამიანი“?
6 მორთ, ასე ქიფჩუათ, მუნერ რე „სულიერ ადამიანი“. ხორციელ პიროვნებაშ გინაწონს, თინა აფასენს ღორონთწკუმა ურთიერთობას. სულიერო მოაზროვნე პიროვნება ირნერო ოცად მიაჸუნას ღორონთიშ მაგალითის (ეფეს. 5:1). თენა ნიშნენს, ნამდა თეცალ პიროვნებაქ იეჰოვაშ თოლით ოკო უჯინას საკითხეფს დო თიშ მაგალითის მიაჸუნას. თიშო ღორონთ რეალურ პიროვნება რე. ხორციელ პიროვნებაშ გინაწონს, სულიერ პიროვნება ირნერო ოცად, დეცვას იეჰოვაშ ნორმეფი (ფსალმ. 119:33; 143:10). თიშ მანგიორო, ნამდა ხორციელ საქმეეფ აკეთასინ, სულიერ პიროვნება ირნერო ოცად ღორონთიშ მოსაწონ თვისებეფიშ გიმორჩქინას (გალ. 5:22, 23). მორთ, უჯგუშო გემწყათ, მუს ნიშნენს სულიერ პიროვნება დო ქიმიპჸონათ თეცალ მაგალითი: ბიზნესმენს უძახნა თიცალ კოც, ნამუსით ბიზნეს ჯგირო არჩქილე. თეგვარო, სულიერ რე თიცალ პიროვნება, მიდგა მანგარო აფასენს სულიერ დო რელიგიურ საკითხეფს.
7. მუს იჩიებ ბიბლია სულიერო მოაზროვნე კათაშე?
7 ბიბლია სულიერო მოაზროვნე კათაშე იჩიებ, ნამდა თინეფ ბედნერეფ რენა. მაგალთო, მათეშ 5:3-ს ჭარ: „ბედნერეფ რენა სულიერს მოჸუმენაფილეფი, მუშენდა თინეფიშ რე ზეციერ სამეფო“. თეს გეძინელ, რომაელეფიშ 8:6 იჩიებ, ნამდა მარადიულ სიცოცხლე ქუმოკონან-და, საკითხეფს იეჰოვაშ თოლით ოკო ვუჯინედათ. თექ ჭარ: „ხორციელშე ფიქრ ღურას ნიშნენს, სულიერშე ფიქრ — სიცოცხლეს დო მშვიდობას“. მუჟამსით ყურადღება სულიერ საკითხეფშა გინმომღუნან, იეჰოვაწკუმა მშვიდობიან ურთიერთობა, შინაგან სიმშვიდე დო მარადიულ სიცოცხლეშ იმენდ მიღნა.
8. მუშენ რე რთულ სულიერობაშ შენარჩუნება?
8 ჩქი უდუნდებელ მსოფლიოს ფცხოვრენთ, სოდეთ ხალხ ხორციელ საქმეეფს რე გინოჸუნელი. ათეშენ, ირნერო ოკო ვეცადათ, ნამდა ჩქინ სულიერობას ქუმუთხილუათ. იეჰოვაშ მოსაწონ აზრეფშე ხშირას ვაფიფქრენთ-და, თიშ ადგილს ხორციელ აზრეფ ქიდეკინენს. მუ მიმეხვარებნა დუდ ევუჩილითუათ თეს? მუჭო შემლებნა სულიერო წიმი ულა?
ბიბლიურ მაგალითეფი
9. ა) მუ მიმეხვარებნა სულიერო წიმი ულას? ბ) ნამ პიროვნებეფიშ მაგალითეფს გუვარჩიენთ?
9 ბაღანეფ ოკვირნა მშობლეფს დო გურაფლენა თინეფიშ ჯგირ მაგალითშე. თეგვარო, ჩქი ხოლო შემლებნა სულიერო წიმი ულა, მუჟამსით ვოკვირუთ თი ხალხის, ნამუსით ჯგირ სულიერობა უღჷ დო მეპჸუნთ თინეფიშ მაგალითის. მარა ხორციელ აზროვნება უღუდუნ ფერ კათაშ მაგალით ჭკუაშ დაგურაფალ რე ჩქინო (1 კორ. 3:1—4). ბიბლიას მოჩამილ რე, მუჭოთ ჯგირ, თეშ გლახა მაგალითეფ ხოლო. ჩქინ მიზან რე, მიბრდათ სულიერო, ათეშენ მორთ, გუვარჩუათ ნამთინე პიროვნებაშ მაგალით, ნამუსით შემლებნა მივაჸუნათ. თე სტატიას გუვარჩიენთ იაკობიშ, მარიამიშ დო იესოშ მაგალითეფს.
მუშ გურაფა შემლებნა იაკობიშ დო მარიამიშ მაგალითეფშე? (ქოძირით აბზაცეფი 10, 11)
10. სოვრეშე იძირე, ნამდა იაკობი სულიერ პიროვნება რდუ?
10 დიო ქიფჩუათ იაკობიშ გურშენ. ამდღა ბრელს ვა მიღნა ადვილ ცხოვრება. იაკობი ხოლო თეცალ მდგომარეობას რდუ. თინა ითვინენდჷ მუშ ჯიმაშ, ესავიშ საქციელს, ნამუსით თიშ ჸვილუა ოკოდ. თეს გეძინელ, თიშო არძაშე უმოს რთულ რდუ მუშ მუანთილწკუმა ურთიერთობა, ნამუთ ირიათო ოცადუდ თიშ ღორებას. იაკობი ხორციელო აზროვნენდუნ ფერ კათაწკუმა ცხოვრენდჷ, მარა თის იშენით ვაუდინუაფ სულიერობა. თის ჯერდ აბრაამშა მეჩამილ დუნაპირებუშ დო ყურადღებას ვარკენდჷ მუშ ოჯახის, ნამუთ განსაკუთრებულ ადგილს ქიდეკინენდჷ ღორონთიშ განზრახვაშ შესრულებას (დაბ. 28:10—15). იაკობიშ სიტყვეფ დო საქმეეფშე იძირედ, ნამდა ვა გოჭყოლად ღორონთიშ დუნაპირებ. მაგალთო, მუჟამსით ესავი ჸვილუათ ორცქინანდუნ, იაკობიქ იეჰოვას ლოცვას უწუ: „გოხვეწუქ, ქიმმეხვარ . . . ხომ ქომწი, ჯგირს გაიკეთენქ დო სქან გამნარყის ზღვაშ ქვიშაცალო გინვოშქვანქია“ (დაბ. 32:6—12). მუშო ოკო რაგად, იაკობის ჯერდ თე დუნაპირებუშ, ნამუთ იეჰოვაქ იაკობის დო თიშ ჯვეშეფს მეჩჷ დო ოკოდ შეასრულკო ღორონთიშ ნება.
მუშ გურაფა შემლებნა მარიამიშ მაგალითშე?(ქოძირით აბზაცეფი 11)
11. სოვრეშე იძირე, ნამდა მარიამი სულიერ პიროვნება რდუ?
11 მორთ ასე ქობძირათ მარიამიშ მაგალითი. მუშენ გინოჭყვიდ იეჰოვაქ, ნამდა იესოშ დიდა მარიამი ჸოფედკო? თიშენ ნამდა, თინა სულიერო მოაზროვნე პიროვნება რდუ. სოვრეშე მიჩქუნა თენა? თექ ჯგირო ქიძირ, მუჟამსით მარიამქ სტუმარო მერთ მუშ ნათესეფიშ, ზაქარიაშ დო ელისაბედიშ ჸუჩა (წეკითხით ლუკა 1:46—55). * მარიამიშ სიტყვეფშე იძირე, ნამდა თის მანგარო უჸორდ ღორონთიშ სიტყვა დო ჯგირო უჩქუდ ებრაულ წერილეფი (დაბ. 30:13; 1 სამ. 2:1—10; მალ. 3:12). საყურადღებო თინა ხოლო რე, ნამდა მარიამი დო იოსები ახალ დაქორწინებულ რდეს, მარა იესოშ დაბადებაშახ თინეფს სქესობრივ კავშირ ვა უღდეს. თეცალ საქციელით თინეფქ ქაძირეს, ნამდა მუნეფიშ ხორციელ სურვილეფიშ წოხოლე იეჰოვაშ ნება დო თიშ ნორმეფ გეურდეს (მათ. 1:25). მარიამი იესოშ ცხოვრებას ოკვირუდ დო ყურადღებას აქციენდჷ თიშ ბრძნულ სიტყვეფს. თეს გეძინელ, მარიამი „ირფელს იმახსოვრენდჷ“ (ლუკ. 2:51). არგამა რე, ნამდა თის მანგარო ოინტერესუდ ღორონთიშ დუნაპირებ, ნამუთ მესიას ოხუდ. მარიამიშ მაგალით მოხვარნა, პირველ ადგილს ქიგვორინუათ ღორონთიშ ნება.
12. ა) მუჭო ოძირანდ იესო, ნამდა მეჸუნდჷ მუშ ზეციერ მუმაშ მაგალითის? ბ) მუჭო შემლებნა მივაჸუნათ იესოშ მაგალითის? (ქოძირით სურათ მა-18 გვერდის).
12 ასე ქიფჩუათ იესოშენ, ნამუთ მარზენა არძაშ უჯგუშ მაგალითის, მუნერ ოკო რდას სულიერო მოაზროვნე პიროვნება. თიქ მუშ ცხოვრება დო მსახურებათ ქაძირუ, ნამდა მუშ ზეციერ მუმაშ, იეჰოვაშ მაგალითის მეჸუნდჷ. იესოს თიცალ აზროვნება დო საქციელ უღუდ, მუნერით იეჰოვას; თეს გეძინელ, ცხოვრენდჷ ღორონთიშ ნორმეფით დო ასრულენდჷ თიშ ნებას (იოან. 8:29; 14:9; 15:10). ქოძირით, მუჭო რე ეჭარილ ესაიაშ წიგნის, მუნერო მეუღჷ გურშა იეჰოვას შხვეფიშ გაჭირება დო ქეშუდარით მარკოზიშ სახარებას, სოდეთ ეჭარილ რე იესოშ პიროვნება (წეკითხით ესაია 63:9; მარკოზი 6:34). * ქუვორეთო მზათ, იესოცალო ჩქი ხოლო გურშა მიბღათ შხვეფიშ გაჭირება? თეწკუმა ართო, დუდგინოდვალირო იფქადაქათ დო ვოგურუათ ხალხის სახიოლო ამბე? (ლუკ. 4:43). ზუსტას თეშნერ ოკო რდას სულიერო მოაზროვნე პიროვნება.
13, 14. ა) მუს ბგურაფლენთ სულიერო მოაზროვნე და დო ჯიმალეფშე? ბ) ქიმიჸონით მაგალითი.
13 ამდღა სულიერო მოაზროვნე ბრელ და დო ჯიმა მეჸუნს იესოშ მაგალითის. შილებე ნაძირეფ გაფდან, მუნერ გურგედვალირო მსახურენა თინეფ, პატის ცენა სტუმარს, გურშა მეუღნა შხვეფიშ გაჭირება ვარდა შხვა ჯგირ თვისებეფს გიმირჩქინანა. ჩქინცალო თინეფ ხოლო ობრძოლნა არასრულყოფილებას, მარა თეშ უმკუჯინუო, ოცადნა გავითარან ღორონთიშ მოსაწონ თვისებეფი. ართ ბრაზილიელ და, რეიჩელი იჩიებ: „მანგარო ვორდ მოდას ეჸუნელი. ათეშენ ჩქიმ მიკაქუნალ იშენ დო იშენ მოკრძალებულ ვა რდუ. მარა ჭეშმარიტებაშ გაგებაქ მიმეხვარ, დოფთირედკო სულიერ პიროვნებათ. თენა ადვილ ვა რდუ, მარა ამდღა უმოს ბედნერ ვორექ დო აზრიან ცხოვრება მიღჷ“.
14 ართ ფილიპინელ დას, რეილინს შხვანერ პრობლემა უღუდ. თის მთელ ყურადღება გინოღალირ აფუდ უმაღლეს განათლებაშ მეღებაშა დო ჯგირ სამუშაშ დოჭყაფაშა. რეილინი იჩიებ: „სულიერ მიზნეფს ისხი ყურადღებას ვავაქციენდ. მარა ჭიჭე ხანშა ქიმეფხვად, ნამდა ცხოვრებას მუდგარენ მორკუდ, მუთ სამუშაშე უმოს მნიშვნელოვან რდუ. ათეშენ ყურადღება იეჰოვაშ მსახურებაშა გეგნიბღჷ“. ამდღა რეილინი დარწმუნებულ რე იეჰოვაშ დუნაპირებუს, ნამუთ მათეშ 6:33, 34-ის ინოჭარ. თე და იჩიებ: „ბჯერს, ნამდა იეჰოვა დღას ვადომტენს უყურადღებოთ!“. შილებე თქვან კრებას ხოლო რდან თიცალ და დო ჯიმალეფ, ნამუთ ჯგირ მაგალითის გარზენა. ათეშენ მორთ, ჩქი ხოლო მივაჸუნათ თე ართგურ და დო ჯიმალეფიშ მაგალითის (1 კორ. 11:1; 2 თეს. 3:7).
გიღდან „ქრისტეშ გონება“
15, 16. ა) მუ ოკო ვაკეთათ, ნამდა მივაჸუნათ ქრისტეშ მაგალითის? ბ) მუჭო შემლებნა ენვაჭათ ქრისტეშ აზროვნებას?
15 მუჭო შემლებნა მივაყუნათ ქრისტეშ მაგალითის? 1 კორინთელეფიშ 2:16-ის ჩიება მეურს, ნამდა ოკო მიღდან „ქრისტეშ გონება“. თეს გეძინელ, რომაელეფიშ 15:5-შე ბგებულენთ, ნამდა ოკო გუვავითარათ „თიცალ აზროვნება, მუნერით ქრისტე იესოს უღუდ“. იესოშ მაგალითის მივაჸუნათინ, საჭირო რე მიჩქუდან მუს ფიქრენდჷ, გინაფლენდჷ დო ორთუდ იესო. თის მთელ ყურადღება ღორონთწკუმა ურთიერთობაშა აფუდ გინოღალირი. თაშ ნამდა, მუჟამსით იესოშ მაგალითის მივაჸუნუთინ, უმოს ხოლოს იპჸუაფუთ იეჰოვაწკუმა. ასე უმოს გასაგებ რე მუშენ რე მნიშვნელოვან, მიღდან ქრისტეცალ აზროვნება.
16 მუჭო შემლებნა თეშ კეთება? იესოშ მოწაფეეფ ორწყედეს თიშ სასწაულეფს, ირჩქილედეს თიშ გურაფეფს, ოკვირდეს მუჭო ოქცუდ თინა შხვადოშხვა ხალხის დო მუჭო გიმირინუანდჷ ღორონთიშ პრინციპეფს. თინეფქ თქვის: „ჩქი თი ირფელიშ მოწმეეფ ვორეთ, მუთ თიქ . . . აკეთ“ (საქ. 10:39). მუშო ოკო რაგად, ამდღა ვეშემლებნა იესოშ ძირაფა, მარა იეჰოვაქ ქომჩეს სახარებეფ, ნამუთ ჯგირო მოჩინებაფუანა თის. მუჟამსით პკითხულენთ დო ფიფქრენთ მათეშ, მარკოზიშ, ლუკაშ დო იოანეშ სახარებეფშენ, უმოსო ენვანჭუთ ქრისტეშ აზროვნებას. თეგვარო შემალებენა ართგურო მივაჸუნათ „თიშ ნაკვალუს“ დო მიღდან „თიცალ განწყობა“ მუნერით ქრისტეს უღუდ (1 პეტ. 2:21; 4:1).
17. მუჭო მიმეხვარებნა ქრისტეცალ აზროვნება?
17 მუჭო მიმეხვარებნა ქრისტეცალ აზროვნება? სასარგებლო ოჭკუმალ ამანგარენს ჩქინ ორგანიზმის, თეგვარო ჩქინ სულიერობა ხოლო გემანგარებ, მუჟამსით გონებას ქრისტეს უღუდუნ თიცალ აზრეფით გევოფშანთ. დროხანიშ მიკულაწკუმა ართო, ჭიჭე-ჭიჭეთ ქიგებგით, მუჭო მიქციებუდ იესო შხვადოშხვა სიტუაციაშ დროს. თეშ რჩქინა მიმეხვარებნა თიცალ გადაწყვეტილებეფ მიბღათ, ნამდა სინდისიქ ვეშმაწუხან დო ღორონთიშ მოსაწონეფ ქიპჸუათ. თე ირფელ ჯგირ მიზეზის მარზენა, ნამდა მივაჸუნათ იესოშ დოტებულ მაგალითის (რომ. 13:14).
18. მუ გებგით თე სტატიაშე სულიერ პიროვნებაშ გურშენ?
18 ჩქი გუვარჩით მუს ნიშნენს ვორდათ სულიერ პიროვნებეფი. თეს გეძინელ, ქობძირით, ნამდა შემლებნა ბრელ მუთუნ დიბგურუათ სულიერო მოაზროვნე კათაშ მაგალითეფშე. საბოლათ, ქიგებგით, ნამდა „ქრისტეშ გონება“ მოხვარნა სულიერო წიმი ულას. მარა, ხოლო რე ნამთინე საკითხი, ნამუთ სულიერო რდუალას ოხუ დო თეშე დაფიქრება რე საჭირო. მაგალთო, მუჭო შემლებნა თიშ გაგება ქუვორეთ დო ვარ სულიერო ძალიერეფი? ხოლო მუშ კეთება შემლებნა თიშო, ნამდა უმოსო გუვავითარათ ჩქინ სულიერობა? დო ბოლოს, მუ გავლენა აღვენუ სულიერობას ჩქინ ცხოვრებას? უკულიან სტატია პასუხის ქიმეჩანს თე კითხვეფს.
^ აბზ. 3 1 კორ. 2:14—16: 14 ხორციელ ადამიან ვა ღებულენს თის, მუთ ღორონთშე რე, მუშენდა უგუნურებათ მიორჩქ დო ვართ გებულენს თის, თიშენ ნამდა თეშო სულიერ აზროვნება რე საჭირო. 15 სულიერ ადამიან ირფელს გინამოწმენს, მარა შხვეფ აშო ვეგნამოწმენა, 16 მუშენდა „მიქ ინანჭ იეჰოვაშ გონებას, ნამდა ქუდაგურუას თის?“, მარა ჩქი ქრისტეშ გონება მიღნა.
^ აბზ. 11 ლუკ. 1:46—55: 46 მარიამქ თქუ: „ვადიდენქ იეჰოვას 47 დო მანგარო გეფხარ ღორონთიშ, ჩქიმ მარსხებელიშ გურშენ, 48 მუშენდა ქუმკაჯინ ღორონთიქ მუშ მოინალეს. ამდღარ დღაშე არძა თაობა ბედნერს დომძახუ, 49 მუშენდა დიდებულ საქმე მიკეთ ძალიერ ღორონთიქ. წმინდა რე თიშ სახელი, 50 მუშ მოშიშეფიშ ჭყოლოფას გიმირჩქინანს არძა თაობას. 51 ძალიერებათ მოქმედენს, იშო-აშო აკმოფაჩუნს ამაყ გურიშ კათას. 52 ძალაუფლება უღნან თინეფს ტახტეფშე გიმარაგუანს დო უბრალო ხალხის ამაღალენს. 53 შქირენულეფს ირნერ ჯგირობუათ ეთმიოფშანს დო მდიდარეფს ხეცარიელს უტენს. 54 მოურს, ნამდა ქიმეხვარას მუშ მსახურს, ისრაელს; ვაჭყორდუ მუშ ჭყოლოფა 55 მარადიულო, მუჭოთ ჩქინ ჯვეშეფს, აბრაამს დო თიშ გამნარყის ურაგადუდ“.
^ აბზ. 12 ეს. 63:9: თინეფიშ გაჭირება მუშ გაჭირება რდუ. თიშ მაცნექ ირსხჷ თინეფი. ჸოროფათ დო შხვეფიშ გაჭირებაშ გურშა მეღალათ გეგშეჸიდ, გეჭოფ დო გილაჸუნდჷ თინეფ ჯვეშ დროს.
მარ. 6:34: ნავშე გეგმორთუნ, იესოქ ანაყუ ხალხი ქოძირ დო გურქ დაჭვჷ თინეფიშ გურშენ, მუშენდა უჭყიშო შხურეფცალო რდეს დო ბრელ მუთუნს ოგურუანდ თინეფს.
