1, 2. (a) Gini bipai du badungu aboro na ni nibipa du wenengai rogo toro yo? (b) Gini bangua asanahe nibipa du wenengai rogo toro yo ani nika wisigoho?

WIRINA ni dee Kanada yo aya, “Padu mi wenengai rogo toro yo ima sare mi du na bakere ngbarago, na si ima sare mi naadiabe agu akpakarapai mi agbia tire na ni na aˈuru dũ.” Kura wirina Brazil yo aya tigako, “Agu agarã 23 ani namangihe ku rogo rogatise ima hi be ngbarago mbiko ani namanga ome kadu wenengai rogo toro yo.” Na gu kurako Philippines yo aya, “Padu mi wenengai rogo toro yo ima sare mi du zezeredi berãre yo, na si ima undo re mi naamangasunge zanga kpakarapai na agu awirina du apai tipa yo kia.”

² Ngbatunga afugo wa gure nayugoho nga si ni wenepai kadu wenengai rogo toro yo. Ni sangbana gipai re, ani rengbe ka sana tirani nga, ‘Wai du rengbe mi ka sona rogo toro yo na ki gbia agu aundo bakere gbe i nafura tipaha kuari re?’ Ono tie, mbata fu ani karagapai kuti gu sanahe re, si naida ani rugutirani ziazia na gupai Ziazia Kekeapai agumbaha tipa agu aboro du wenengai rogo toro yo. Rogo gi kekeapai re, ani nika karagapai kuti bangua asanahe biata. (1) Rogo gupai yo nga kadu wenengai rogo toro yo nga gine? (2) Gini akpiapai rengbe  ka undo rani ani sono rogo toro yo? (3) Gu ome ani amangaha kadu na “ga Kristo berã,” wai du si nika undo rani ani du wenengai rogo toro yo?

3. Wai du Ziazia Kekeapai ayugo gu kparakparapai du dagba gu boro nga ga borose ni na guni du wenengai rogo toro yo?

³ Gu mokedi nangia Pauro aundo rani ani rugutirani na gu boro du rogo toro yo wenengai ni yugoko gu kparakparapai du dagba “boroboro” na “gu ni du na toro.” (Oni gedi 1 AKorindo 2:14-16.) Gu kparakparapai re nga gine? Ko afura tipa “boroboro” ni gu boro “adia nga agu apai nga ga ga Mbori Toro [ya]; bambiko si du ni mumungo pai fu ni; ka ni ini nga ha te.” Ono tipa “gu ni du na toro” tigani, ni nga gu boro “nawisiga apai dunduko” na ki ngia gu boro du na “ga Kristo berã” tiní. Pauro angarasi rani nga ani du ni agu aboro du wenengai rogo toro yo. Gini kura agene du agu aboro nga ga borose yo kia ngbaha ti agu aboro du wenengai rogo toro yo?

4, 5. Gini asino duti boro borose?

⁴ Bambatapai nga oni bingo agu asino du ti boro borose. Ni namerafuo agu asino du ti aboro zegino, nga agu aboro du yangara nyanyakipa pai rogo gayo raka yo nga kina gayo nyemuapai. Pauro afura tipa gu sino re ya si nga “gu toro namanga pai awere rogo agu awiri yo nakeretu.” (Ef. 2:2) Gu toro re nagbarasa rii badungu aboro yo i naapeka kina fuo agu aboro du yo dagbayo. Gu yangarapai nyakipaha bangiriyo nga kina agu apai nga ga borose. Ni sangbana gupai re, badunguyo namanga kina gupai ngba bangiriyo zanga manga ome ka raka ringbisihe kuti ga Mbori arugute. Gu boro naberã kina pa agu apai nga ga borose, ni nabaka bangirini gbe kina tipa worimo ni gbiati du na aũkumuko beni watadu tipa ka sovura tipa gupai ni abihe nga si nga gani rengo.

⁵ Gini kura apai berewe nayugo gu boro nga boro borose? Boro borose namanga “agu apai borose amanga” ha. (Gara. 5:19-21) Ga Pauro bambata waraga fu gu dungurati nangia ga aKorindo nayugo badungu asino nga gu duti agu aboro du na gu berã nga ga borose. Agu asino re nakoda: kparakaro, ngbe na kina kura aboro rogo tagbagapai yo, ngarasa kura aboro i samungu, yamba awirina ku ngbangayo, zanga du na irisa koyo du agu aboro ni nangera kurii apai, na bi riahe gbiati mbirahe na nyanyakipaha kisusi rogo raka yo. Gu boro du na gu berã nga ga borose, ho ni agbia tiní ni na asada, ni narungbura na ni ki ti ku rogoho. (Snz. 7:21, 22) Yuda afura tipa agu akurayo si adu nga i nika gberã ki da ti gu bangiriba nga ka i “adu nga na Toro ya.”​—Yuda 18, 19.

6. Wai du ani aino gu boro du na toro?

⁶ Ginipai tie si ayugoho kadu “na toro”? Gu boro du na toro naberãpa agu apai nga ga Mbori, ni wa boro borose te. Agu aboro naberãpa agu apai nga ga toro, i namanga nyanyaki asadatise ka ‘wirika Mbori.’ (Ef. 5:1) Gure nayugo gupai nga i namanga ome kaa berã kina wai Yekova aberã na kini bi apai kina wai ko abihe. I nabi Mbori ni ndikidi boro. I kia ti agu aboro du na gu berã nga ga borose mbiko i naasada ka manga apai dunduko ringbisihe kina kuti ga Yekova arugute. (Tam. 119:33; 143:10) Kuba gupai nga ka maa berãni fuo gu mangaapai nga ga borose, gu boro du na gu berã nga ga toro namanga nyanyaki asadatise ka sonosa “zuzu Toro.” (Gara. 5:22, 23) Sidu, gu boro nabi agu apai nga ga toro na nyanyakipaha, ni du nga gu boro du na toro.

7. Ginipai Ziazia Kekeapai apehe tipa agu aboro namaaberã yo fuo agu apai nga ga toro?

⁷ Ziazia Kekeapai nafura wenengai bara agu aboro namaa berãyo fuo agu apai nga ga toro. Matayo 5:3 naya: “[“Aboro ngbarago nga agu aboro inipa gu gayó azingo nga ga toro,” NW], bambiko gu ngbi [“Kindo,” NW] nga ga ngbangbaturũ nga gayo.” ARomo 8:6 nayugo gu wenepai du ti maaberãse fuo agu apai nga ga toro, si naya: “Gu berã nga ga borose si nga kpio,  ono gu berã nga ga Toro si nga unga na zereda.” Ho ani amaaberã rani ni fuo agu apai nga ga toro, ani naye kadu na zereda dagbarani na Mbori na zereda berãrani yo gbiati gu maabangirise nga ka raka kumbatayo nyeanye kindi.

8. Tipagine si aida ani mangi ome ti ni ka bandatirani rogo toro yo?

⁸ Ono tie, ani naraka rogo kere zegino. Wa duhe nga agu aboro ke rani kirikiri naberã kina patiyo, si naida ani mangi nyanyaki asadatise ka banda berãrani. Ka ani ahiisongo berãrani na agu aberã nga ga Yekova ya, zegino nika hiisoho na gaha asino na berãpai. Ginipai rengbe ani ka mangaha tipa ka gu ngbatungapai re mangingo ya? Wai du rengbe ani ka sona rogo toro yo?

9. (a) Gine rengbe ka undo rani ani sono rogo toro yo? (b) Gini akpiapai nga ga agu aboro naaima nyaka rogo toro yo ani ka wisigoho?

⁹ Gude rengbe ka nyaka ho u abi gu wene kpiapai ni nga ga avunguru na kini wirikihe. Wakina gure a, ani rengbe ka nyaka rogo toro yo ni wirika ani gu kpiapai nga ga agu aboro naima nyaka rogo toro yo. Tipa agu aboro tigayo naberãpa kina agu apai nga ga borose, si naida gayo kpiapai du ni zahe furani. (1 Kor. 3:1-4) Ziazia Kekeapai na wene akpiapai rogoho gbiati gbegberẽ akpiapai a. Ono wadu he nga ani naida ka sona rogo toro yo, ani bingo bete wene akpiapai nga gu rengbe ani ka wirikaha. Ani nika bi gu kpiapai nga ga Yakobo, Maria, gbiati Yesu.

10. Wai du Yakobo ayugu gupai nga ko angia gu boro naaberãpa agu apai nga ga toro?

¹⁰ Ni bambataha, ani bingo gu kpiapai nangia ga Yakobo. A wa duhe tipa badungu rani areme, raka aadunga ni taataha fu Yakobo te. Wirinako nangia Esau nga guko naaberã kina pa agu apai nga ga borose aaida ka imoko. Kurigure, gbioko aasadi bara dunguhe ka tudo ko. Ono tie, wa si avura du nga agu aboro naake ko kirikiri angia agu aboro naaberã kina pa agu apai nga ga “borose,” Yakobo angia gu kumba naamaa berãko fuo agu apai nga ga toro. Ko aima du na idapase kuti gu mokido Mbori amangihe  fu Abarayama na ko ki futiko ka ngerafuo gako aborokporo nga aguyo si adu nga Yekova nika digiso gako ringbisapai rogoyo yo. (Bam. P. 28:10-15) Afugo Yakobo gbiati gako mangaapai nayugo gupai nga bangiriko aagonga ti ga Mbori arugute gbiati gupai Mbori akpinyemuhe te. Ni kpiapai, ho Yakobo aberẽhe ni nga Esau aaida ka mangako gbegberẽ, ko aya fu Mbori wẽ: “Mi nakpara foro mo bátasi re . . . wa mo aya, ‘Ni rengo mi amánga pa ro wenengaĩ, mi asá ngbatungaro wa kina ngume baime.’” (Bam. P. 32:6-12) Zanga kapa, ko aima du na idapase kuti gu kidohe Yekova amangihe fuko gbiati bako na titako, na ko aaida ka mangapai ringbisihe kina kuti ga Mbori ringbisapai na gupai ko akpinyemuhe.

11. Ginipai nayugoho nga Maria angia gu boro naaberãpa agu apai nga ga toro?

¹¹ Awere tie, ani bingo gu kpiapai nangia ga Maria. Tipagine Yekova asia Maria ti ni ri du ni navungu Yesu? Zanga kapa, mbiko ri anaaberãpa agu apai nga ga toro. Wai du ani aino gupai re? Ri ayugu gu gopai nayugo gupai nga ri aaberãpa agu apai nga ga toro na gu wene afugo tambuahe ri agumbaha ho ri andu ni ka bi agumeri nangia Zekaraya na Erizabeta. (Oni gedi Ruka 1:46-55.) Afugo Maria nayugo gupai nga ri adu na dudunguro nyemuse tipa Fugo Mbori na ri aima ino Kuru Ndika wenengai. (Bam. P. 30:13; 1 Sam. 2:1-10; Mara. 3:12) Oni tingidi gupai a nga, wa aMaria na Yosefa avura du ni vovo arogotise, i aamanganga kodaba te da kinaho i avungu Yesu ni. Gupai re nayugo gine? Si nayugo gupai nga gupai paha anyaki fuyo dunduko ue angia gupai Yekova akpinyemuhe angianga ka mbisa gayo nyemuapai ya. (Mt. 1:25) A wa regbo aasusa, Maria aabi agu apai abi naasusa rogo ga Yesu raka yo na ri kini degeturi wenengai kuti agu afugo tatamana ko aapekaha. Kurigure, ri “ki ka kuti agi apai kpotori yo dunduko re.” (Rk. 2:51) Si tie ziazia nga ri aima du na nyemu ga Mbori ringbisapai nga gu naadu rogo Masiya yo. Ya mo ga Maria kpiapai aundongo rani ani berẽpa wai ani narengbe ka peresapa ga Mbori pai mbatayo rogo gaani raka yo te?

12. (a) Wai du Yesu awiriki Bako? (b) Wai du rengbe ani ka wirika ga Yesu kpiapai? (Oni bi gu sura duti tonatonaha.)

¹² Ono tie, dagba agu aboro yo dunduko naraki, da du gani kpiapai nga ga berãpa agu apai nga ga toro nasusi ga kura aboro dũ? Nirengo, Yesu du. Rogo gako raka yo naabaha na tingba gako sunge tungusapai, ko ayuguhe nga ko aaida ka wirika Bako nga Yekova. Ko anaaberã na kini mangiapai wakina Yekova na ko araki ringbisihe kuti gupai Mbori akpinyemuhe na ringbisihe kuti gako arugute. (Yo. 8:29; 14:9; 15:10) Ni kpiapai, oni bingo wai gu nebi nangia Yesaya afura tipa ga Yekova nunga, na oni ringbisinga gupai ko agumbaha re na gupai gu bake Kitabu Wene Pangbanga nangia Marako agumbaha tipa ga Yesu nunga. (Oni gedi Yesaya 63:9; Marako 6:34.) Ya mo ani ti aregbo dũ regerege wa Yesu ka yugo nunga fu agu aboro ani agbia yo rogo zingo? Kurigure, Yesu afutiko tipa sunge tungusapai na yugo wene pangbanga fu aboro. (Rk. 4:43) Gu nunga ko adu na ni re gbiati agu apai ko aamangaha re aayugoho nga ko angia gu boro naaberãpa agu apai aberã nga ga toro.

13, 14. (a) Ginipai rengbe ani ka wirikaha be agu aboro naberãpa agu apai nga ga toro nga aguyo du areme? (b) Oni pekenga akpiapai.

¹³ Kparakusayo ti agu akpiapai nga ga Ziazia Kekeapai, badungu akpiapai kinaho areme nga ga agu aboro naberãpa agu apai nga ga toro nga aguyo mangi bakere sonakumbatayo kadu na agu asino tiyo duwa ga Kristo. Isoke mo ima bi gu kakaka nyemuse du yo na ni tipa tungusapai, gu sino du tiyo nga ga dia aboro kugume, gayo nunga, watadu gu kura wene asinoyo. Wakina rani a, i nasota asota na arungbura gbiati azangarengba wa i aˈasada ka sonosa agu asino Mbori re. Wirina Brazil yo du rimori nga Rachel aya: “Mi aima kpinyemu pekafuo gu sino vodatise nga ga zegino. Ni sangbanaha, mi anaavonga iriiri aroko te. Ono ho mi awiriki rengo ni, si afõngbadureyo mi mangi ome  kadu ni gu boro naberãpa agu apai nga ga toro. Si aadunga taata fere mi mangi ariapai te, ono mi aye kadu na bakere ngbarago na ki ini gu ndikidi ndupai aboro araka ti ni.”

¹⁴ Reylene nga guri naraka Philippines yo tigari agbia tiri na kura kpakarapai kia. Ri amoi berãri ka gbata kina bakere wirikapai na ka gbia wene sunge tipa gupai nga ka raka wene raka. Ri aya: “Pa gimi asasa nga ga toro atona kada bangire taata. Ono mi atona ka bi gupai nga he kinaho naakpa rogo gimi raka, nga guhe paha anyaki kisusi gimi sunge marã. Ni sangbanaha, mi amangi ariapai na ki tona ka maaberã re fuo mangasunge fu Yekova.” Natona ti gu regbo re ka ndu kumbatayo, Reylene aima digo nidu na idapase kuti gu ga Yekova kidohe du rogo Matayo 6:33, 34. Ri aya: “Mi ima ino gupai nirengo nga Yekova nika ngera angera fuo re!” Isoke mo ima inopa ngbatunga aboro wa gure rogo gamo dungurati. Ya mo gipai re afõnga ngbaduraniyo ani wiriki gu kpiapai nga ga gu ngbatunga ruru aboro re wa i apekafuo Kristo te?​—1 Kor. 11:1; 2 Tesa. 3:7.

15, 16. (a) Ginipai si aida ani mangihe tipa kadu wa Kristo? (b) Wai du rengbe ani ka mbu “ga Kristo berã” si du na maapai kurii berãrani?

¹⁵ Wadu ani ni basasa dũ, wai du rengbe ani ka wirika Kristo? Rogo 1 AKorindo 2:16, Ziazia Kekeapai nagumba gupai nga si naida ani du na “ga Kristo berã.” Na ARomo 15:5 nagumba gupai furani nga si naida ani du na “berã sa ku sangba Kristo Yesu yo.” Sidu tie, tipa kadu wa Kristo, si naida ani ini gako gene berãpai gbiati asinoko wenengai. Fuani, si naida ani pekefuoko. Gupai nyakipaha bangiri Yesu kisusi nga pa gako pagume na Mbori. Sidu, padu ani wa Yesu nasarani ani du wa Yekova. Gure nga gu nduapai duhe ti ni ni nyanyakipa pai furani ani wiriki kaa berã kina wai Yesu anaaberã.

¹⁶ Wai du rengbe ani ka manga gipai re? Ga Yesu abawiriki aima bi ko ko nimangi iˈiriwoapai, i aima gia gako agumbapai, i aima bi wai ko aamangapai na ngbatunga aboro dũ, na i ki ima bi wai ko aamangapai kuti agu arugute nga ga Mbori. I aya: “Ani nga adezire agu apai ko anamanga.” (Amo. 10:39) Ono tipa rani tigani, ani aabingo Yesu te. Ono Yekova aima fu Kitabu Wene Pangbanga furani nga gu naundo rani ani ini asino Yesu. Ho ani ageda agu akitabu nga ga Ziazia Kekeapai ni nga Matayo, Marako, Ruka, na Yoane, ani nasa gu berã nga ga Kristo si du na maapai kurii gaani berã. Rogo gi gene re, ani rengbe ka ‘peka fuo ko’ na ki “ukadi [tirani na] ũvura niberẽ pai a” wa gu Kristo aaberã.​—1 Pet. 2:21; 4:1.

17. Gini undo rengbe ani ka gbiaha ka ani aberã wa Kristo?

¹⁷ Gini undo rengbe ani ka gbiaha ka ani wiriki kaa berã wakina Kristo? Kina wai wene riahe anyakasa kpotorani, kinawo a riga berãrani na agu aberã nga ga Kristo anyakasa rani rogo toro yo. Yeeye ani naye ka ino gupai Kristo narengbe ka mangaha rogo ai gupai yo rengbe ko ka gbiatiko na ni. Mangaha wo naundo rani ani mangi agu adiaberã nika sarani ani du na gigiri sangbakpotoseyo na rago ngba ti Mbori na ani. Ya mo oni adanga kuti gupai nga agu aundo re nafu wene ndupai furani tipa ani “ukadi Gbia Yesu Kristo” te?​—Rom. 13:14.

18. Ginipai mo nawirikihe rogo gi sakapai du tipa du ni gu boro du rogo toro yo wenengai re?

¹⁸ Ani ima wisigo gupai si ayugoho kadu ni gu boro du na toro tiní. Ani ima bi gupai a nga ani ima rengba ka wirika gu wene akpiapai nga ga agu aboro du wenengai rogo toro yo. Niyangaraha, ani ima wirika wai padu ani na “ga Kristo berã” aundo rani ani sono rogo toro yo. Ono tie, gu kura apai kinaho nibipa du rogo toro yo wenengai si aida ani wisigipai tipaha. Ni kpiapai, wai du rengbe ani ka ino banyaka rani rogo toro yo? Ginipai rengbe ani ka mangaha tipa ka nyaka rogo toro yo? Na wai du padu ani rogo toro yo wenengai nika du na maapai kurii gaani raka na aˈuru dũ? Gu kekeapai ngbefuo gere nika karagapai kuti agu asanahe re.