1, 2. Jé mojañ éziñ a nga yen éyoñ a nga tu’a fas été nsisime jé, a jé a nga bo?

ROBERT a nga duban a to ésoé, ve a nji tu’a nyoñe benya mejôô a nlem ôse. A jô na: “Me nji be me bo’o mbia jam éziñ, me mbe me jalé’é ve abendé. Be mbe ve buni na me ne ayôñe nsisim, amu me mbe me tabe’e bisulane bise, me nyoñe fe ésaé nkpwa’a mefan bengone béziñ. Ve jôm éziñ é mbe é jemba’ane ma.”

² Robert émien a nji yemelan vôm ôtui ô mbe ô yeme’ ndek, akekui a nga luk. Ba minga wé be mbe be nye’e be sila’ane minsili ya Bible. Mbôl minga wé a mbe ayôñ nsisim, a mbe a yala’ane minsili tyi’ibi, Robert ki a mbe a kele’ a di anyu. A jô na: “A mbe ve ane me nji yeme jôm. Nde me nga jô mamiene na, ‘Ma ma yiane volô minga wom mfa’a ya nsisim, nde ma yiane bo jôm éziñ.’” Ane a nga tôme nyul. A jô na: “Me nga yé’é Kalate Zambe ne yé’é, yé’é, yé’é. Ane me nga taté na ma wô’ô Mejô me Zambe nya ñwô’ane, a jam da dañ é ne na, me nga tu’a subu Yéhôva bebé.”

3. (a) Jé nkañete Robert ô ne ye’ele bia? (b) Bia zu bi biyalane ya beta minsili bivé?

³ Nkañete Robert ô ne volô bia abui. Bi ne yeme Kalate  Zambe abim éziñ a tabe bisulan, ve sa ke mam mete étam mme ma bo na bi bo étôtôlô nsisim. Ja’a bi yaéya nsisim aya, nge bia tu’a fase biabebien, bia ye yene na, bia yiane ke ôsu. (Beph. 3:16) Beta minsili mi mia ye volô bia na bi ke ôsu a yaé nsisim: (1) Jé é ne volô bia na bi tu’a yem été jangane ya nsisim? (2) Aval avé bi ne bo étôtôlô a ke ôsu a yaé nsisim? (3) Mfi ôvé bia bi éyoñ bi ne étôtôlô nsisim?

4. Melebe ya Beéphésien 4:23, 24 ma fombô za?

⁴ Éyoñ bi nga bo Bengaa, bi nga bo mintyéndane miziñ. Mintyéndane mite mi nga nambe ényiñe jangan ése. To’o éyoñ bi dubaneya, bi nga ke ôsu a tyendé. Bible a jô na bia yiane ‘ke ôsu a bo mimfefé mfa’a ya minsisime ya minleme miangan.’ (Beép. 4:23, 24) Mbôl bi ne bebo mam abé, bia bese bia yiane ke ôsu a sôane mam méziñ. To’o minnôm bebo bisaé be Yéhôva ba yiane ke ôsu a ba’ale été ya nsisime jap.​—Beph. 3:12, 13.

5. Minsili mivé mi ne volô bia na bi fas biabebien?

⁵ Nge bia kômbô ke ôsu a yaé nsisim, bia yiane tu’a fas biabebien. To’o bi ne bisoé nge minnôm, môt ase ya be bia a yiane sili émiene na: ‘Ye mam méziñ ya ényiñe jam ma liti na ma kômbô bo étôtôlô nsisim? Ye ma kôme fo’o vu Krist? Ye mam ma bo éyoñ me ne ésulan ma liti fo’o na, me ne nya étôtôlô nsisim? Minlañe miam mia liti na me ne avale môt avé? Ye me bili fo’o mbamba nta’ane mam asu ayé’é, a ye ma kañese melebe tyi’ibi? Mbote wom a nyanga jam bia liti na me ne avale môt avé? Me wô’ô bo aya éyoñe ma tôbane meve’ele? Ye me ngenane me nya’a ve menyañ, éyoñ ma yiane di benya bidi ya nsisim? (Beép. 4:13) Nge bia tu’a bindi mam mete, bia ye yemelan été jangane ya nsisim.

6. Jé éfe é ne volô bia na bi fas été jangane ya nsisim?

⁶ Bôte befe be ne fe volô bia na bi yem été jangane ya nsisim. Nlômane Paul ô nga liti na, môt a nji bo étôtôlô a ne te yem été jé ya nsisim. Ve môt a ne étôtôlô nsisim, a ji’a yemelan ôsimesane Yéhôva, a ne fe yem éyoñ môt a wulu aval étam. (1 Bec. 2:14-16; 3:1-3) Amu bemvendé be bili ôsimesane Krist, be ne ji’a yene mendem ma liti na, môt a simesane mame ya minsôn. Éyoñ ba lebe bia, ye bi wô’ô fo’o vô’ôlô be? Môt a vô’ôlô melep a liti na a kômbô yaé nsisim.​—Ec. 7:5, 9.   

7. Amu jé é nji sili ve na, môt a bi ñyeman asu na a bo étôtôlô nsisim?

⁷ Bi nji yiane buni na, môt a ne étôtôlô nsisim fo’o ve amu a yem Mejô me Zambe. Njôô bôte Salomon a mbe a bili abui ñyeman. Mam a nga jô me ne ntilane Kalate Zambe. Ve a nji ke ôsu a bo étôtôlô nsisim. (1 Bb. 4:29, 30; 11:4-6) Nde ñhe, jé éfe ja sili asu na bi tu’a bo étôtôlô nsisim? Bia yiane ke ôsu a yaé nsisim. (Beco. 2:6, 7) Jé é ne volô bia?

8, 9. (a) Jé ja ye volô bia na bi ba’ale été ya nsisime jangan? (b) Amu jé bia yé’é a bindi Mejô me Zambe? (Fombô’ô fôtô ya atata’a.)

 ⁸ Paul a nga lebe Bekristene ya ntete mimbu ôsu na be ‘ke ôsu’ a yaé nsisim. (Beh. 6:1) Jé é ne volô bia na bi tôñe melebe mete den? Jam ôsu é ne na bi yé’é kalate “Mi ba’alane miabebien nye’ane Zambe été.” A ye volô bia na bi tôñe miñye’elane ya Bible ényiñe jangan. Nge ô maneya yé’é kalate ate, ô ne ke ôsu a yé’é bekalate befe be ne volô wo na ô ba’ale mbunane wôé. (Beco. 1:23) Ye wo ye’elane fo’o Yéhôva na a volô wo na, ô bo mame wo yé’é?

⁹ Ba’ale’ na, bia yé’é a bindi Mejô me Zambe amu bia kômbô ve Zambe nlem avak, a amu bia kômbô tôñe metiñe mé. (Bs. 40:8; 119:97) Bia jeñe fe na, bi sa’ale mam ma kamane bia na bi yaé nsisim.​—Tite 2:11, 12.

10. Aval avé bisoé bi ne yaé nsisim?

¹⁰ Nge ô ne ésoé, ye ô bili fo’o mingum minsôñan? Étôkane ya alu da, nlômane ya Béthel ô wô’ô laan a bôte ba zu duban. Abui ya été é wô’ô bo bisoé. Mojañ a wô’ô sili môt ase minsôñane mié ya nsisim. Biyalane bi bobejañ béziñ bi wô’ô liti na ba yeme jam ba bo; be wô’ô jô na, ba ye nyoñ ésaé nkpwa’a mefan, nge ke na, ba ye ke su’u ésaé vôme bekañete mbamba foé ba jemban. Ve bevo’o be wô’ô di anyu. Nga nalé a liti na, be nji bi nsôñan éziñe mfa’a ya nsisim? Nge ô ne ésoé, sili’i womiene na: ‘Ye ma nyoñe ngap a mame ya nsisim fo’o ve amu bebiaé bam ba tindi ma? Ye me bili fo’o élate jam mamien a Zambe?’ Melebe mete ma fombô fe benya bôtô. Me ne volô môt ase ya be bia na, a tu’a bo étôtôlô nsisim.​—Ec. 12:1, 13.

11. (a) Jé bia yiane bo asu na bi kôme yaé nsisim? (b) Bi ne vu éve’ela za Kalate Zambe?

¹¹ Éyoñ bi maneya yemelan été jangan, bia yiane bo mam ma sili asu na bi yaé nsisim. Nge bia kômbô bi ényiñe ya melu mese, e ne nya mfi na bi bo étôtôlô nsisim. (Bero. 8:6-8) Ve e bo étôtôlô nsisim a nji tinane na bi bo zôsôô ne tiliññ. Mbamba nsisim a ne volô bia na bi bo mintyéndane mia sili. Ve biabebien bia yiane fe ve ngul. John Barr, mojañ a mbe ébu’a ya Tin Ékôan, a nga timin Luc 13:24 a jô’ô na: “Nge abui bôte da ku, a ne amu da ve ki ngul ése na e yaé nsisim.” Bia yiane vu Jacob, nnye ate a nji suu éngele akekui a nga bi ébotan. (Met. 32:26-28) Akusa bo ayé’é Bible é ne mvaé, bi nji yiane lañe nye ane bia lañe zezé kalate na bia vôman. Bia yiane jeñe bidima bi mame ya Kalate Zambe bi ne volô bia.

12, 13. (a) Jé é ne volô bia na bi tôñe melebe ya Beromain 15:5? (b) Aval avé éve’ela nlômane Pierre a melebe mé bi ne volô bia? (c) Jé ô ne bo asu na ô yaé nsisim? (Fombô’ô nka’ale ô ne nlô ajô na, “ Mam ô ne bo asu na ô yaé nsisim.”)

¹² Nté bia jeñe na bi yaé nsisim, mbamba nsisim a ye volô bia na bi tyendé ôsimesane wongan. Ôte’ete’ ôte’etek, bia ye taté na bia fas ane Krist. (Bero. 15:5) Mbamba nsisim a ye fe volô bia na bi titane mbia b’asimesan minlem miangan, a na bi bi mefulu ma ve Zambe nlem avak. (Beg. 5:16, 22, 23) Bi nji yiane jô’é  na nlem ô tindi bia na bi bo ôzañ akum, nge na bi simesane ve mvite mame ya minsôn. Kele’ ôsu a ja’é Zambe mbamba nsisim, a Yéhôva a ye volô wo na ô fol mbia b’asimesan a mbamba b’asimesan. (Luc 11:13) Simesa’an nlômane Pierre. Ô nga bo abui mam ane môt a nji bo étôtôlô nsisim. (Mt. 16:22, 23; Luc 22:34, 54-62; Beg. 2:11-14) Ve a nji bili atek. Yéhôva a nga volô nye ôte’ete’ ôte’ete’e na, a fas ane Yésus. A ne fe volô bia.

¹³ Pierre a nga su’ulane kate bia mefulu bia yiane jeñe na bi bi. (Lañe’e 2 Pierre 1:5-8.) Éyoñ bia ve “ngule” jangan ése na bi bi mefulu ane njôane nlem, mban, nye’ane bobejañ, bia ke ôsu a yaé nsisim. Nde ñhe, sili’i womiene môs ôse na: ‘Jé ma yiane bo den asu na me yaé nsisim?’

14. Aval avé ôsimesane Krist wo nambe ényiñe jangan?

¹⁴ Môt a bili ôsimesane Krist a tabe ntyel a mam ma kui nye anyu, a ntabane wé sikôlô nge ke nda bisaé, a tabe fe ntyel a mintyi’an a nyoñ môs ôse. Mintyi’ane mite mia ye liti na, bia jeñ na bi bo benya Bekristene. Bi nji yi na bi bo jam éziñ é ne ndaman élate bia be Ésaa wongan. Éyoñ bi tele meve’ele, ôsimesane Krist wo ye volô bia na bi sa’ale me. Ôsusua na bia nyoñe ntyi’an, bia ye taté fas minsili mi: ‘Miñye’elane ya Bible mivé mi ne volô ma? Nge Yésus nnye a nga tele été jam, ve a bo aya? Ntyi’an ôvé wo ye ve Yéhôva nleme mvaé?’ Bi tame zu yen bité biziñ bi ne sili na bi fas aval ete. Bia zu fe yene miñye’elane ya Bible mi ne volô bia bité bite bise.

15, 16. Bive’ane bivé bia liti na ôsimesane Krist wo volô bia na (a) bi yeme tobe môte ya luk? (b) bi yeme tobe mewoso mangan?

¹⁵ E tobe môte ya luk. Bia koone ñye’elan ô ne volô bia mfa’a ôte e 2 Becorinthien 6:14, 15. (Lañek.) Paul a jô bôsa na, nya mfulane éziñ a vo’o bo zañe môt a nye’e mame ya nsisim a nyô a nji bo étôtôlô nsisim. Aval avé mejô mete me ne volô wo nge wo jeñ aluk?

¹⁶ Mewoso. Bia koone ñye’elan ô ne volô bia mfa’a ôte e 1 Becorinthien 15:33. (Lañek.) Môt a nye’e Zambe a nji yiane wulu a bôte be ne ndaman élate jé a Yéhôva. Sili ñhe womiene na: Aval avé ñye’elan ôte ô ne volô ma éyoñ ma belane beréseaux sociaux? Ye ma yiane vôé internet a bôte ma yeme ki?

17-19. Aval avé môt a ne étôtôlô nsisim a kui na (a) a sa’ale zezé minsôñan? (b) a bi benya minsôñan? (c) a yeme kôme mejô?

¹⁷ Mam ma kamane bia na bi yaé nsisim. Paul a ve Bekristen abendé.  (Lañe’e Behébreu 6:1.) “Biwuwua mimboan” bivé bia yiane sa’ale? Zezé mam, mam mese me vo’o soo bia mvolan mfa’a ya nsisim. Ñye’elan ôte ô ne volô bia môs ôse na bi bi biyalane ya minsili mi: ‘Ye jam ma kômbô bo di é tii a mame ya minsôn? Nge môt a te zu yene ma na bia nye bi bo mam me moné, ye ma yiane yebe? Amu jé me nji yiane bundan a bôte ba kômbô tyendé mam émo?’

¹⁸ Minsôñane ya nsisim. Nkañete Yésus a nga bo nkôle yôp, wo ngôné avale minsôñane bia yiane bi. (Mt. 6:33) Môt a ne étôtôlô nsisim a bili minsôñane mi tii a mame ya nsisim. Nge bia tu’a fas mejô me Yésus mete, bia ye sili biabebiene minsili mi: ‘Ye nsôñane wom ô ne na me bo beta besikôlô? Ye ma yiane yebe asu ésaé di?’

¹⁹ Mejô. Aval avé melebe Paul a nga ve akônda ya Rome me ne volô bia na bi kôm mejô? (Bero. 12:18) Mbôle bi ne Bekristen, bia jeñe na bi tabe “bôte bese mvo’é.” Bi wô’ô bo aya éyoñ bi bili ajô a môt éziñ? Ye bia jô’é na jo’ojo’o a ke ôsu, nge ke na, ye bia liti na bi ne môt a “jeñe mvo’é”?​—Jc. 3:18, Mfefé Nkôñelan.

20. Amu jé wo kômbô ke ôsu a yaé nsisim?

²⁰ Bi yeneya mam méziñ me ne volô bia na bi nyoñe mintyi’an mia liti na bi ne étôtôlô nsisim, ve Kalate Zambe a bili abui miñye’elan mife. Nge bi ne étôtôlô nsisim bia ye ba’ale ava’a dangan môs ôse. Robert bia te jôô nye atata’a a jô na: “E yemete élate jam a Yéhôva a nga volô ma na me bo mba nnôm a mba ésaa. Jam ete e nga soo ma abui mevak.” Nge bia jeñ a ngul ése na bi yaé nsisim, bia fe bi ne bi avale meva’a ete. Bia ye bu’uban ényiñe den, a melu ma zu, bia ye bi “ényiñ é ne fo’o ényiñ.”​—1 Tim. 6:19.