1, 2. Unsay nakita sa brader nga kulang sa iyang espirituwalidad, ug unsay iyang gihimo?

SI Robert nabawtismohan sa tin-edyer pa, pero wala kaayo niya pabilhi ang kamatuoran. Siya miingon: “Wala gyod koy nahimong sayop, pero rutina lang ang akong pag-alagad. Kon tan-awon, morag lig-on ko sa espirituwal, motambong sa tanang tigom ug pipila ka beses mag-auxiliary payunir kada tuig. Pero dihay kulang.”

² Ayha pa naamgohan ni Robert kon unsay kulang dihang naminyo siya. Sila sa iyang asawa magpangutan-anay bahin sa Bibliya. Ang iyang asawa, nga lig-on sa espirituwal, makatubag dayon, pero pirmeng maulawan si Robert kay dili siya makatubag. Siya miingon: “Mora kog walay nahibaloan. Naghunahuna ko, ‘Kon akoy espirituwal nga ulo sa akong asawa, kinahanglang may himoon ko.’” Ug may gibuhat gyod si Robert. Siya miingon: “Balikbalik nakong gitun-an ang Bibliya, ug anam-anam nga nasabtan ang koneksiyon sa matag detalye niini. Akong nabatonan ang kahibalo ug, labaw sa tanan, nasuod ko kang Jehova.”

3. (a) Unsay atong makat-onan sa eksperyensiya ni Robert? (b) Unsang importanteng mga punto ang atong hisgotan?

³ Makakat-on tag importanteng mga leksiyon sa eksperyensiya ni Robert. Tingali may nahibaloan ta sa Bibliya ug pirme tang nakig-uban sa kongregasyon, pero dili ni awtomatikong makapahimo  natong tawong espirituwal. O tingali miuswag na ta, pero dihang gisusi pa nato ang kaugalingon, duna pa diay tay puwedeng pauswagon. (Filip. 3:16) Aron padayon tang mouswag, tubagon nato ang tulo ka pangutana: (1) Unsay makatabang nato sa pagsusi sa tinuod nga kahimtang sa atong espirituwalidad? (2) Unsaon nato pagpalig-on ang atong espirituwalidad ug padayong mouswag ingong tawong espirituwal? (3) Sa unsang paagi ang lig-ong espirituwalidad makatabang nato sa adlaw-adlawng pagkinabuhi?

4. Kang kinsa mapadapat ang tambag sa Efeso 4:23, 24?

⁴ Dihang nahimo tang alagad sa Diyos, nagbag-o ta. Kini nga pagbag-o nakaapektar sa matag bahin sa atong kinabuhi. Ug wala nâ matapos dihang nabawtismohan ta. Giawhag ta nga “[padayong] magbag-o . . . diha sa puwersa nga nagpalihok sa [atong] kaisipan.” (Efe. 4:23, 24) Kay dili hingpit, kinahanglang padayon tang magbag-o. Bisag dugay na tang nag-alagad kang Jehova, padayon gihapon natong lig-onon ang atong espirituwalidad.​—Filip. 3:12, 13.

5. Unsang mga pangutana ang makatabang nato sa pagsusi sa kaugalingon?

⁵ Aron mouswag ug molig-on sa espirituwal, kinahanglang matinud-anon natong susihon ang kaugalingon. Bata man o tigulang, mahimong pangutan-on nato ang kaugalingon: ‘Namatikdan ba nako nga miuswag ko sa espirituwal? Anam-anam ba kong nahisama kang Kristo? Unsay gipakita sa akong kinaiya ug binuhatan diha sa mga tigom bahin sa akong espirituwalidad? Unsay gipakita sa akong pagpakig-estorya bahin sa akong mga gusto? Unsay gipakita bahin kanako sa akong paagi sa pagtuon, sininaan ug pamostura, o reaksiyon sa tambag? Unsay akong reaksiyon kon tentalon? Naningkamot ba kong mouswag aron mahimong hamtong nga Kristohanon?’ (Efe. 4:13) Ang paghunahuna sa atong tubag niini makatabang nato sa pagsusi sa atong espirituwal nga pag-uswag.

6. Unsa pay gikinahanglan aron masusi ang atong espirituwalidad?

⁶ Aron masusi ang atong espirituwalidad, usahay gikinahanglan nato ang tabang sa uban. Si apostol Pablo nag-ingon nga dili makita sa tawong unodnon nga wala malipay ang Diyos sa iyang pagkinabuhi. Sa laing bahin, ang tawong espirituwal nakasabot sa panglantaw sa Diyos. Nahibalo sab siya nga wala uyoni sa Diyos ang tawong pisikal. (1 Cor. 2:14-16; 3:1-3) Ang mga ansiyano nga nakabaton sa panghunahuna ni Kristo sagad makamatikod dayon dihang ang usa mosugod paggawi nga unodnon. Kon tambagan ta bahin niini, ato bang dawaton ug ipadapat ang ilang tambag? Sa paghimo niana, atong gipakita nga gusto natong mouswag sa espirituwal.​—Eccl. 7:5, 9.

7. Nganong dili igo ang kahibalo sa Bibliya aron mahimong mahunahunaon sa espirituwal?

⁷ Hinumdomi nga dili igo ang kahibalo sa Bibliya aron mahimong mahunahunaon sa espirituwal. Si Haring Solomon daghag nahibaloan bahin kang Jehova. Ang iyang mga panultihon nahimo ganing bahin sa Bibliya. Pero sa ulahi, napakyas siya sa pagpabiling matinumanon kang Jehova ingong tawong espirituwal. (1 Hari 4:29, 30; 11:4-6) Busa gawas sa kahibalo sa Bibliya, unsay gikinahanglan? Kinahanglan nga padayon tang mouswag sa espirituwal. (Col. 2:6, 7) Pero sa unsang paagi?

8, 9. (a) Unsay makatabang nato sa pagpalig-on sa atong espirituwalidad? (b) Unsay atong tumong dihang magtuon ug mamalandong? (Tan-awa ang hulagway sa sinugdan sa artikulo.)

⁸ Giawhag ni Pablo ang unang siglong mga Kristohanon nga ‘mouswag sa pagkahamtong.’ (Heb. 6:1) Sa unsang paagi mapadapat  nato ang tambag ni Pablo? Ang usa ka importanteng paagi mao ang pagtuon sa librong “Magpabilin Kamo sa Gugma sa Diyos.” Motabang nâ nimo sa pagpadapat sa mga prinsipyo sa Bibliya. Kon nahuman na nimog tuon ang maong libro, puwede nimong tun-an ang ubang publikasyon nga makapalig-on sa imong pagtuo. (Col. 1:23) Kinahanglan sab nimong pamalandongon ang imong nakat-onan ug mangayog tabang kang Jehova kon unsaon kana pagpadapat.

⁹ Hinumdomi nga dihang magtuon ug mamalandong, atong tumong nga maugmad ang kinasingkasing nga tinguha sa pagpahimuot kang Jehova ug pagtuman sa iyang mga balaod. (Sal. 40:8; 119:97) Maningkamot sab ta sa pagsalikway sa bisan unsa nga makababag sa atong espirituwal nga pag-uswag.​—Tito 2:11, 12.

10. Unsay himoon sa mga batan-on aron molig-on sa espirituwal?

¹⁰ Kon batan-on ka, duna ka bay espirituwal nga mga tumong? Dihang motambong ug sirkitong mga asembliya, naandan sa usa ka brader nga nag-alagad sa Bethel ang pagpakig-estorya sa mga kandidato sa bawtismo sa dili pa magsugod ang programa. Daghan nila mga batan-on pa. Pangutan-on sila sa brader kon unsay ilang espirituwal nga mga tumong. Ang tubag sa kadaghanan nila nagpakita nga ila nang gipamalandong kon unsaon nila pag-alagad si Jehova​—tingali pinaagig pagsulod sa bug-os panahong pag-alagad o pag-alagad sa lugar diin gikinahanglan ang dugang magsasangyaw. Pero usahay, may mga batan-on nga wala tingaliy ikatubag. Nagpasabot kaha nâ nga gibati nilang dili importante ang paghimog espirituwal nga mga tumong? Kon batan-on ka, pangutan-a ang kaugalingon: ‘Nakigbahin ba ko sa espirituwal nga mga kalihokan tungod lang kay mao nay gidahom sa akong ginikanan? Naningkamot ba kong maugmad ang personal nga relasyon sa Diyos?’ Siyempre, dili mga batan-on ray gitambagan sa paghimog espirituwal nga mga tumong. Ang maong mga tumong makatabang natong tanan sa pagpalig-on sa atong espirituwalidad.​—Eccl. 12:1, 13.

11. (a) Unsay kinahanglan natong himoon aron mouswag gyod sa espirituwal? (b) Unsa nga ehemplo sa Bibliya ang atong masundog?

¹¹ Dihang mahibaloan na nato kon unsay pauswagon, kinahanglang mohimo tag mga paagi nga mouswag. Importante kaayo ang pagkahimong tawong espirituwal. Sa pagkatinuod, nagkahulogan kini sa atong kinabuhi. (Roma 8:6-8) Apan dili kinahanglang hingpit ta aron mahimong hamtong sa espirituwal. Ang espiritu ni Jehova makatabang nato nga mouswag. Pero kinahanglan gihapon tang maningkamot. Si John Barr, nga membro kaniadto sa Nagamandong Lawas, mikomento bahin sa Lucas 13:24, “Daghan ang wala molampos kay wala sila maningkamot nga molig-on.” Kinahanglang sundogon nato si Jacob, kinsa milahutay sa pagpakiglayog sa anghel hangtod nga gipanalanginan siya. (Gen. 32:26-28) Bisag makalingaw ang pagtuon sa Bibliya, dili nato hunahunaon nga ang Bibliya morag nobela nga gisulat para lang malingaw ta. Kinahanglang maningkamot ta sa pagpangitag espirituwal nga mga bahandi nga makatabang nato.

12, 13. (a) Unsay makatabang nato sa pagpadapat sa Roma 15:5? (b) Sa unsang paagi makatabang nato ang ehemplo ug tambag ni Pedro? (c) Unsay imong himoon aron mouswag sa espirituwal? (Tan-awa ang kahong “ Kon Unsay Imong Himoon Aron Mouswag sa Espirituwal.”)

¹² Samtang maningkamot tang mouswag sa espirituwal, ang balaang espiritu motabang nato sa pagbag-o sa atong hunahuna. Sa tabang niini, ang atong panghunahuna anam-anam nga mahisama nianang kang Kristo. (Roma 15:5) Dugang pa, motabang ni nato sa pagwagtang sa unodnong tinguha ug sa pag-ugmad sa mga hiyas nga makapalipay sa Diyos. (Gal. 5:16, 22, 23)  Kon atong mamatikdan nga naghunahuna na ta sa materyal o unodnon nga mga tinguha, dili ta magpadaog. Padayon tang mangayo sa espiritu ni Jehova, ug siya magtabang nato nga mapokus ang atong hunahuna sa maayong mga butang. (Luc. 11:13) Hinumdomi si apostol Pedro. Dihay mga higayon nga wala siya molihok ingong tawong espirituwal. (Mat. 16:22, 23; Luc. 22:34, 54-62; Gal. 2:11-14) Pero wala siya mosurender. Sa tabang ni Jehova, anam-anam niyang naugmad ang panghunahuna ni Kristo. Mahimo pod nato nâ.

¹³ Sa pagkatinuod, si Pedro sa ulahi naghisgot sa espesipikong mga hiyas nga atong ugmaron. (Basaha ang 2 Pedro 1:5-8.) Samtang kita ‘tim-os nga maningkamot’ sa pag-ugmad sa mga hiyas sama sa pagpugong sa kaugalingon, paglahutay, ug inigsoong pagbati, matabangan ta nga mouswag sa espirituwal. Kada adlaw, pangutan-a ang kaugalingon, ‘Unsay akong himoon aron mouswag sa espirituwal?’

14. Sa unsang paagi ang pagkamahunahunaon sa espirituwal makaapektar sa atong kinabuhi?

¹⁴ Kon maghunahuna ta nga sama kang Kristo, kini mag-impluwensiya sa atong sinultihan, atong panggawi diha sa trabahoan o eskuylahan, ug mga desisyon adlaw-adlaw. Ipakita sa maong mga desisyon nga naningkamot ta sa pagsunod kang Kristo. Ingong mga tawong espirituwal, dili ta mohimog bisan unsa nga makadaot sa atong relasyon sa langitnong Amahan. Ang atong samag Kristong panghunahuna makatabang nato sa pagsukol sa mga tentasyon. Dihang modesisyon, atong pamalandongon kini: ‘Unsang mga prinsipyo sa Bibliya ang makatabang nako sa pagdesisyon? Unsa kahay buhaton ni Kristo niini nga situwasyon? Unsa nga desisyon ang makapalipay kang Jehova?’ Aron mabansay ta sa paghunahuna niining paagiha, atong hisgotan ang pipila ka pananglitan. Sa matag usa niana, tan-awon nato ang usa ka prinsipyo sa Bibliya nga makatabang nato sa paghimog maalamong desisyon.

15, 16. Paghatag ug mga pananglitan kon sa unsang paagi ang paghunahuna nga sama kang Kristo makatabang nato sa pagdesisyon bahin sa (a) pagpilig kapikas. (b) pagpilig mga kauban.

¹⁵ Pagpilig kapikas. Ang prinsipyo niini makita sa 2 Corinto 6:14, 15. (Basaha.) Klarong giingon ni Pablo nga dili gyod bug-os magkauyon ang tawong espirituwal ug tawong pisikal. Sa unsang paagi mapadapat kini sa pagpilig kapikas?

¹⁶ Mga kauban. Matikdi ang prinsipyo sa 1 Corinto 15:33. (Basaha.) Ang tawong diyosnon dili makig-uban niadtong makadaot sa iyang espirituwalidad. Unsang mga pangutana ang makatabang nimo sa paghimog praktikal nga kapadapatan? Pananglitan, sa unsang paagi mapadapat kini diha sa social networking? O unsay angay nimong himoon kon gi-invite ka nga makigdula online sa tawong dili nimo kaila?

17-19. Sa unsang paagi ang espirituwal nga panghunahuna makatabang nimo (a) sa paglikay sa walay pulos nga mga buhat? (b) sa paghimog mga tumong? (c) kon duna kay dili ikasinabot?

¹⁷ Mga kalihokan nga makababag sa espirituwal nga pag-uswag. Si Pablo may pasidaan sa iyang mga isigka-Kristohanon. (Basaha ang  Hebreohanon 6:1.) Unsa ang “patay nga mga buhat” nga angay natong likayan? Kini mao ang walay pulos nga mga buhat nga dili makapalig-on sa atong espirituwalidad. Ang maong prinsipyo makatabang sa pagtubag sa mga pangutana sama sa: ‘Kini ba nga kalihokan matawag nga unodnon? Moapil ba ko ini nga negosyo? Nganong dili ko moapil sa organisasyon nga naningkamot nga bag-ohon ang kalibotan?’

¹⁸ Espirituwal nga mga tumong. Sa Wali sa Bukid, si Jesus naghatag ug klarong giya bahin sa paghimog mga tumong. (Mat. 6:33) Ang tawong espirituwal mangab-ot ug espirituwal nga mga tumong. Ang paghunahuna niini nga prinsipyo makatabang nato sa pagtubag sa mga pangutana sama sa: ‘Angay ba kong mangab-ot ug taas nga edukasyon? Dawaton ba nako ni nga trabaho?’

¹⁹ Dili pagsinabtanay. Sa unsang paagi ang tambag ni Pablo sa kongregasyon sa Roma makatabang nato kon mahitabo ang dili pagsinabtanay? (Roma 12:18) Ingong mga sumusunod ni Kristo, kinahanglan tang “makigdinaitay sa tanang tawo.” Unsay atong buhaton kon dunay dili nato ikasinabot? Malisdan ba ta sa pagpaubos, o nailhan ta nga ‘makigdaiton’?​—Sant. 3:18.

20. Nganong gusto nimong mouswag sa espirituwal?

²⁰ Ang pipila ka pananglitan nga atong nahisgotan nagpakita kon sa unsang paagi ang pagpadapat sa mga prinsipyo sa Diyos makatabang nato sa pagdesisyon ingong tawong espirituwal. Kon mahunahunaon ta sa espirituwal, kita mas malipayon ug tagbaw sa atong adlaw-adlawng pagkinabuhi. Si Robert, nga gihisgotan sa sinugdan, miingon: “Human nako maugmad ang tinuod nga relasyon kang Jehova, nahimo kong mas maayong bana ug amahan. Ako kontento ug malipayon.” Matagamtam nato ang samang mga panalangin kon atong unahon ang pagpauswag sa atong espirituwalidad. Ingong tawong espirituwal, matagamtam nato ang mas malipayong kinabuhi karon ug ang “tinuod nga kinabuhi” sa umaabot.​—1 Tim. 6:19.