1, 2. Nso ke eyenete kiet ekedifiọk, ndien nso ke enye akanam?

ROBERT akana baptism ini edide isua 15, edi enye ikadaha se enye ekekpepde ke Bible ke akpan n̄kpọ. Enye ọdọhọ ete: “Idịghe nte enyene idiọkn̄kpọ emi n̄kanamde, edi n̄konyụn̄ nnam n̄kpọ Abasi mbak owo edidọhọ. Owo okụt mi edikere ke mmọsọn̄ idem ke esop tutu, sia n̄kesifiakke mbono esop, mma nsinyụn̄ nnam usiakusụn̄ unọ un̄wam ndusụk ini. Edi esịt kiet ama ọdọhọ ke enyene se mmennamke.”

² Ini Robert ọdọde n̄wan ke enye ekedifiọk se enye mîkanamke. Ke ini enye ye n̄wan esie ẹtiede kiet ẹduọk odudu, mmọ ẹma ẹsibụp kiet eken mbụme Bible. Ikesisọn̄ke n̄wan esie ndibọrọ sia enye ama enen̄ede ọfiọk Bible. Edi ama esisọn̄ Robert ndibọrọ mbụme oro n̄wan esie ekesibụpde enye; n̄kpọ oro ama esinam Robert bụt. Enye ọdọhọ ete: “Eketie nte ndiọn̄ọke n̄kpọ ndomokiet. Mma n̄kere nte, ‘Edieke anade nda n̄wan mi usụn̄ ke n̄kpọ Abasi, ana mfak ọfọn̄.’ ” Se Robert akanamde edi oro. Enye ọdọhọ ete: “Mma nsịn idem n̄kpep Bible. Ekedi ntetie n̄kpep, nnana n̄kpep. Mma ndifiọk ediwak n̄kpọ oro mmen̄kọfiọkke. Ata akpan n̄kpọ edi ke oro ama anam mi ntetịm n̄kpere Jehovah.”

3. (a) Mbụk Robert ekpep nnyịn nso? (b) Nso ke idineme ke ibuotikọ emi?

³ Mbụk Robert ekeme ndikpep nnyịn ediwak n̄kpọ. Imekeme  ndifiọk ndusụk n̄kpọ ke Bible inyụn̄ isidụk mbono esop kpukpru ini, edi oro kpọt ikemeke ndinam nnyịn isọn̄ idem ke esop. Kpa ye oro ekemede ndidi imọsọn̄ idem ke esop, edieke idụn̄ọrede idem nnyịn, iyokụt ke osụk enyenyene se ikpanamde man ika iso inyene spirit Abasi. (Phil. 3:16) Ke ibuotikọ emi, iyọbọrọ mbụme ita oro edin̄wamde nnyịn ika iso inyene spirit Abasi: (1) Nso idin̄wam nnyịn ifiọk m̀mê ke inyenyene spirit Abasi? (2) Nso ke ikpanam man ika iso inyene spirit Abasi? (3) Uwem nnyịn editie didie edieke iyakde spirit Abasi ada nnyịn usụn̄ kpukpru usen?

4. Mmanie ke Ephesus 4:​23, 24 ebehe?

⁴ Ima ikpụhọde nte ikesidude uwem ini ikọtọn̄ọde ndinam n̄kpọ Jehovah. Ima ika iso ndikpụhọde idem ke ima ikana baptism. Bible ọdọhọ ika iso idi “obufa ke odudu oro anamde utom ke ekikere” nnyịn. (Eph. 4:​23, 24) Oyom kpukpru nnyịn ika iso ikpụhọde sia nnyịn ifọnke ima. Ekpededi ebịghi ikọtọn̄ọ ndinam n̄kpọ Jehovah, ana ika iso inam se idin̄wamde nnyịn itetịm ikpere enye.​—Phil. 3:​12, 13.

5. Mme mbụme ewe ke ikpobụp idem nnyịn?

⁵ Ana itịm idụn̄ọde idem nnyịn man ifiọk m̀mê ke inyenyene spirit Abasi inyụn̄ ifiọk se ikpanamde mbak spirit Abasi idikpọn̄ nnyịn. Edide idi n̄kpri m̀mê ikpọ owo, ọkpọfọn ibụp idem nnyịn ite: ‘Ndi nte ndude uwem idahaemi owụt ke mmama n̄kpọ Abasi n̄kan akpa? Ndi nte ndude uwem owụt ke mmekpebe Christ? Ndi nte nsinamde n̄kpọ ke mbono esop ye nte ndade mbono esop owụt ke mmada n̄kpọ Abasi ke akpan n̄kpọ? Se nsinemede owụt ke nso ke nnen̄ede mma? Nte nsikpepde n̄kpọ, nsịnede ọfọn̄, n̄kamade idem, m̀mê nnamde n̄kpọ ke ini ẹnọde mi item owụt ke ndi nso utọ owo? Nsinam n̄kpọ didie ke ini ẹdomode mi idomo? Ndi nsụk ndi eyenọwọn̄ ke Ikọ Abasi, mîdịghe ndi mmesịn idem n̄kpep Bible tutu ndifiọk ntotụn̄ọ n̄kpọ oro Bible ekpepde?’ (Eph. 4:13) Nte ibọrọde mme mbụme emi ayan̄wam nnyịn ifiọk nte imade Jehovah iketre.

6. Nso en̄wen ikeme ndin̄wam nnyịn ifiọk m̀mê ke inyenyene spirit Abasi?

⁶ Ndusụk ini, mbon en̄wen ẹkeme ndin̄wam nnyịn ifiọk m̀mê ke inyenyene spirit Abasi. Apostle Paul ama owụt ke owo oro mînyeneke spirit Abasi ifiọkke ke Abasi imaha nte imọ idude uwem. Edi owo oro enyenede spirit Abasi ọfiọk se Abasi amade onyụn̄ ọfiọk ke Abasi imaha owo odu uwem nte amade-ma. (1 Cor. 2:​14-16; 3:​1-3) Sia mbiowo ẹsikerede n̄kpọ nte Christ, mmọ ẹsisọp ẹfiọk ini eyenete ọtọn̄ọde ndinam n̄kpọ nte owo oro mînyeneke spirit Abasi. Ke ini mmọ ẹfọide nnyịn ẹwụt ke imọtọn̄ọ ndinam n̄kpọ oro ekemede ndinam spirit Abasi ọkpọn̄ nnyịn, ndi imesikpan̄ utọn̄ inyụn̄ inam se mmọ ẹtịn̄de? Ndinam emi owụt ke imenen̄ede iyom ndika iso nnyene spirit Abasi.​—Eccl. 7:​5, 9.

7. Ntak emi idọhọde ke idịghe owo ama ọfọfiọk Bible ọwọrọ ke enye enyene spirit Abasi?

⁷ Ti ke idịghe owo ama ọfọfiọk Bible ọwọrọ ke enye enyene spirit Abasi. Edidem Solomon ama enen̄ede ọfiọk Jehovah. Ẹma ẹkam ẹwet ndusụk se enye eketịn̄de ẹsịn ke Bible. Edi enye ikọsọn̄ọke ida ye Jehovah isịm akpatre. (1 Ndi. 4:​29, 30; 11:​4-6) Omokụt do ke ikụreke ke ndifiọk Bible, edi ana ika iso inam se idin̄wamde nnyịn itetịm ikpere Jehovah. (Col. 2:​6, 7) Edi didie ke ikeme ndinam emi?

8, 9. (a) Nso idin̄wam nnyịn itetịm ibuọt idem ye Jehovah? (b) Ntak emi isikpepde n̄kpọ inyụn̄ itiede ikere se ikpepde? (Se akpa ndise ibuotikọ emi.)

⁸ Paul ọkọdọhọ nditọete eyo mme apostle  ete ‘ẹkọri ẹsịm ọyọhọ idaha.’ (Heb. 6:1) Didie ke ikeme ndinam item Paul oro mfịn? Akpan n̄kpọ kiet emi edin̄wamde nnyịn edi ndikpep n̄wed Du Uwem Emi Edinamde Abasi Ama Fi. Edieke ekpepde n̄wed emi okụre, ọyọfiọk nte akpadade item Bible odu uwem. Ekpedi ama ekpep n̄wed oro okụre, emekeme ndikpep n̄wed en̄wen emi edin̄wamde fi etetịm ọbuọt idem ye Abasi. (Col. 1:23) Ndi emesitie ekere se afo ekpepde onyụn̄ eben̄e Jehovah an̄wam fi anam se ekpepde?

⁹ Ti ke ntak emi isikpepde n̄kpọ inyụn̄ itiede ikere se ikpepde edi man enen̄ede ọdọn̄ nnyịn ndinam se Jehovah amade inyụn̄ inịm ibet esie. (Ps. 40:8; 119:97) Ana inyụn̄ ikpeme mbak nnyịn idinam n̄kpọ ekededi oro mîdiyakke nnyịn ika iso inyene spirit Abasi.​—Titus 2:​11, 12.

10. Nso idin̄wam mme uyen ẹtetịm ẹkpere Jehovah?

¹⁰ Edieke afo edide uyen, ndi ama emek se oyomde ndida uwem fo nnam nnọ Abasi? Mbemiso mbono circuit ọtọn̄ọde, eyenete kiet emi otode Bethel esima ndineme nneme ye mme uyen oro ẹyomde ndina baptism onyụn̄ obụp mmọ m̀mê nso ke mmọ ẹyom ndida uwem mmọ nnam nnọ Abasi. Se ediwak mmọ ẹsibọrọde owụt ke mmọ ẹma ẹmemek se mmọ ẹyomde ndida uwem mmọ nnam nnọ Abasi. Ndusụk mmọ ẹmek ndidụk utom uyọhọ ini m̀mê ndika n̄kọkwọrọ ikọ ke ebiet oro ẹyomde-yom mme ọkwọrọikọ. Edi ndusụk uyen isifiọkke se mmọ ẹyomde ndida uwem mmọ nnam. Ndi oro ọwọrọ ke mmọ ikekereke ke akpana imek se iyomde ndida uwem mmimọ nnam? Ọkpọfọn uyen obụp idemesie ete: ‘Ndi nsika mbono esop ye ukwọrọikọ ke ntak emi ete ye eka mi ẹdọhọde mi n̄ka? Ndi mmanam se n̄kemede man ntetịm n̄kpere Jehovah?’ Se idude edi ke akpana kpukpru nnyịn imek se iyomde ndinam nnọ Abasi, edide idi ikpọ owo m̀mê mme uyen. Emi ayan̄wam kpukpru nnyịn itetịm ima Jehovah.​—Eccl. 12:​1, 13.

11. (a) Nso ke ikpanam man ika iso ikpere Abasi? (b) Anie ke ikpekpebe ke Bible?

¹¹ Ke ima ikọfiọk se ikpanamde man ika iso ikpere Abasi, inaha ibiat ini ndinam oro. Ndinyene spirit Abasi edi n̄kpọ n̄kpa ye uwem. (Rome 8:​6-8) Edi Abasi idọhọke nnyịn ifọn ima mbemiso ikemede ndinyene spirit esie. Edisana spirit ekeme ndin̄wam nnyịn ika iso ikpere Abasi, edi inaha iwawan̄ ubọk itie. Se Brọda John Barr, emi ekedide Owo Otu Emi Ẹsede Ẹban̄a Utom Nnyịn, eketịn̄de ini enye akanamde Luke 13:24 an̄wan̄a owụt ke enyene se ikpesịnde idem inam. Enye ọkọdọhọ ke se isinamde ọsọn̄ ediwak owo ndibe ke mfafaha usụn̄ ndụk edi ke mmọ isisịnke idem ikpep Ikọ Abasi inyụn̄ inamke se mmọ ẹkpepde. Akpana ikpebe Jacob emi akan̄wanade ye angel tutu angel ọdiọn̄ enye. (Gen. 32:​26-28) Kpa ye oro ekemede ndinem nnyịn ndikpep Bible, nnyịn ikpekereke ke Bible etie nte n̄wed mbụk emi mme owo ẹwetde man ẹkot ẹkop idem inem. Ke ini ikotde Bible, ana isịn idem iyom item Bible oro edin̄wamde nnyịn.

12, 13. (a) Nso idin̄wam nnyịn inam se Rome 15:5 etịn̄de? (b) Didie ke uwụtn̄kpọ Peter ye se enye eketịn̄de ke 2 Peter 1:​5-8 ekeme ndin̄wam nnyịn? (c) Nso ke akpanam man aka iso enyene spirit Abasi? (Se ekebe oro “Se Akpanamde Man Aka Iso Enyene Spirit Abasi.”)

¹² Ke ini isịnde ukeme ndika iso n̄kpere Abasi, edisana spirit ayan̄wam nnyịn ikpụhọde nte isikerede n̄kpọ. Iyọtọn̄ọ sụn̄sụn̄ ndikere n̄kpọ nte Christ. (Rome 15:5) Edisana spirit oyonyụn̄ an̄wam nnyịn itre ndisikere ndiọi n̄kpọ inyụn̄ inyene mme edu oro ẹdinemde Abasi esịt. (Gal. 5:​16, 22, 23) Edi ikpanaha iyak idem emem nnyịn edieke osụk ọsọn̄de nnyịn nditre ndikere ndiọi n̄kpọ m̀mê nditre ndikere nte ikpenyenede enyọn̄ ye isọn̄. Akpana  ika iso iben̄e Jehovah edisana spirit esie. Jehovah ayan̄wam nnyịn isikere nti n̄kpọ. (Luke 11:13) N̄kọ emeti ke idịghe kpukpru ini ke apostle Peter ekesinam n̄kpọ nte owo emi enyenede spirit Abasi. (Matt. 16:​22, 23; Luke 22:​34, 54-62; Gal. 2:​11-14) Edi enye ikayakke oro anam idem emem enye. Jehovah ama an̄wam enye sụn̄sụn̄ sụn̄sụn̄ ọfiọk ndisikere n̄kpọ nte Christ. Nnyịn n̄ko imekeme ndikere n̄kpọ nte Christ.

¹³ Peter ama asiak mme n̄kpọ oro ẹkemede ndin̄wam nnyịn. (Kot 2 Peter 1:​5-8.) Edieke ‘isịnde ofụri ukeme’ ifara ke idem, iyọ, inyụn̄ ima nditọete nnyịn, emi ayan̄wam nnyịn ika iso inyene spirit Abasi. Akpana isibụp idem nnyịn kpukpru usen ite, ‘Nso ke n̄kpanam mfịn man ntetịm n̄kpere Abasi?’

14. Nso ufọn ke idibọ edieke inyenede spirit Abasi?

¹⁴ Nte isinamde n̄kpọ ke itieutom m̀mê ke ufọkn̄wed, nte isitịn̄de ikọ, ye se ibierede ndinam kpukpru usen oyowụt m̀mê imesikere n̄kpọ nte Christ. Se nnyịn ibierede ndinam oyowụt n̄ko m̀mê nnyịn ke idomo ndikpebe Christ. Owo oro enyenede spirit Abasi isinamke n̄kpọ ndomokiet oro ekemede ndidian̄ade enye n̄kpọn̄ Jehovah. Edieke inyenede spirit Abasi, nnyịn ididuọhọ ke ini ẹdomode nnyịn. Mbemiso ibierede n̄kpọ ekededi, iyobụp idem nnyịn ite: ‘Ewe item Bible edin̄wam mi mbiere n̄kpọ emi? Nso ke Christ akpanam? Ndi se nyomde ndibiere emi eyenem Jehovah esịt?’ Akpana emehe nnyịn ndisikere n̄kpọ ntem. Ẹyak ise n̄kpọ ifan̄ emi oyomde itie ikere kan̄a mbemiso ibierede se ikpanamde. Ke ini inemede n̄kpọ kiet kiet, se item N̄wed Abasi emi ekemede ndin̄wam nnyịn ibiere nnennen n̄kpọ.

15, 16. Tịn̄ nte ndikere n̄kpọ nte Christ ekemede ndin̄wam nnyịn imek (a) owo oro ikpọdọde. (b) mbon oro ikpodụkde nsan̄a.

¹⁵ Ke ini iyomde ndimek owo oro ikpọdọde. Item emi odude ke 2 Corinth 6:​14, 15 (kot) ayan̄wam nnyịn. Se Paul etịn̄de ke itien̄wed emi owụt ke owo oro enyenede spirit Abasi ye owo oro mînyeneke ikemeke-keme ndinen̄ede ndiana kiet. Didie ke itien̄wed emi ekeme ndin̄wam nnyịn ke ini iyomde ndimek owo oro ididọde?

¹⁶ Mbon oro ikpodụkde nsan̄a. Item emi odude ke 1 Corinth 15:33 (kot) ayan̄wam nnyịn. Owo oro amade Abasi isidụkke nsan̄a ye mbon oro ẹkemede ndinam enye edue Abasi. Kere nte itien̄wed emi ekemede ndin̄wam fi ke nsio nsio n̄kpọ. Ke uwụtn̄kpọ, didie ke itien̄wed emi ekeme ndin̄wam fi ọfiọk ikpehe Intanet oro akpakade? Didie ke enye ekeme ndin̄wam fi ọfiọk se akpanamde ke ini mbon oro afo mûdiọn̄ọke ẹdọhọde etiene mmimọ ebre game ke Intanet?

17-19. Didie ke ndinyene spirit Abasi edin̄wam fi (a) okûnam se mîdaha ubọn̄ inọ Abasi? (b) emek se edinamde inọ Abasi? (c) ebiere mfịna?

¹⁷ Mme n̄kpọ oro mîdiyakke ika iso inyene spirit Abasi. Paul ama ọnọ mme Christian item ke Mme Hebrew 6:1. (Kot.) Nso idi  “utom n̄kpa” oro Paul ọkọdọhọde ikûnam? Enye edi n̄kpọ ekededi oro mîdaha ubọn̄ inọ Abasi, oro onyụn̄ ekemede ndidian̄ade nnyịn n̄kpọn̄ Abasi. Item N̄wed Abasi emi ekeme ndin̄wam nnyịn ibọrọ utọ mbụme nte: ‘Ndi se nyomde ndinam emi edi utom n̄kpa? Ndi akpana ntiene nnam mbubehe emi? Ndi akpana ntiene ndụk n̄ka oro ẹdọhọde ke imọn̄ inam ererimbot emi ọfọn?’

¹⁸ Se iduakde ndinam nnọ Abasi. Se Jesus eketịn̄de ini enye ọkọkwọrọde ikọ ke obot ayan̄wam nnyịn ke ini iyomde ndimek se idinamde inọ Abasi. (Matt. 6:33) Owo oro enyenede spirit Abasi esida n̄kpọ Abasi akpa ke uwem esie. Ndifiọk emi ekeme ndin̄wam nnyịn ibọrọ utọ mbụme nte: ‘Ndi akpana n̄ka ufọkn̄wed ntaifiọk? Ndi n̄kpananam utom oro ẹdọhọde nnam?’

¹⁹ Ke ini inyenede mfịna ye owo. Didie ke item oro Paul ọkọnọde esop ke Rome ekeme ndin̄wam nnyịn ibiere mfịna? (Rome 12:18) Sia nnyịn ikpebede Christ, ọfọn inam se ikekeme man ‘itie ke emem ye kpukpru owo.’ Isinam n̄kpọ didie ke ini inyenede mfịna ye owo? Ndi esisọn̄ nnyịn ndinam emem? Ndi ẹdiọn̄ọ nnyịn nte mbon “emem”?​—Jas. 3:18.

20. Ntak emi oyomde ndinam se idin̄wamde fi aka iso enyene spirit Abasi?

²⁰ Uwụtn̄kpọ ifan̄ oro inemede mi owụt nte item Bible ekemede ndin̄wam nnyịn ibiere n̄kpọ ke usụn̄ emi owụtde ke spirit Abasi ada nnyịn usụn̄. Uwem eyenem nnyịn edieke iyakde spirit Abasi ada nnyịn usụn̄ sia emi ayanam itetịm ikpere Jehovah. Robert emi iketịn̄de iban̄a ke ntọn̄ọ ntọn̄ọ ọdọhọ ete: “Ke mma n̄kedinen̄ede n̄kpere Jehovah, oro ama anam mi ndi eti ebe ye eti ete; mma nnyụn̄ n̄kop inemesịt.” Nnyịn n̄ko imekeme ndibọ ediwak edidiọn̄ edieke isịnde idem inam se idin̄wamde nnyịn ika iso inyene spirit Abasi. Uwem eyenem nnyịn idahaemi, iyonyụn̄ idu “ata uwem” ke ini Abasi edinamde isọn̄ emi edi Paradise.​—1 Tim. 6:19.